Nuʼudar haklaken-naʼin ida, halo nafatin mudansa hodi laʼo ba oin
1. Husi Jesus nia tempu, ezemplu saida deʼit mak hatudu katak ita tenke halo nafatin mudansa ba dalan haklaken?
1 Nuʼudar mestre ka mestra ba Bíblia, ema kristaun tenkesér halo beibeik mudansa. Tan neʼe mak Jesus fó treinu ba ninia dixípulu sira hodi aumenta sira-nia matenek iha serbisu haklaken nian. (Lucas 9:1-5; 10:1-11) No mós tanba razaun neʼe mak Ákuila no Prisila lori Apolo ba hamutuk ho sira hodi “esplika diʼak liután ba nia kona-ba Maromak nia dalan”. (Apóstolu 18:24-26) Apóstolu Paulo mós, tanba razaun neʼe mak nia anima Timóteo, haklaken-naʼin ho esperiénsia tinan barak, hodi kontinua hakaʼas ninia an hodi halo tuir ninia hanorin. Hodi nuneʼe, ‘ema hotu bele haree ho momoos oinsá nia laʼo ba oin’. (1 Timóteo 4:13-15) Maski ita sai haklaken-naʼin ba tempu kleur ona mós diʼak, ita presiza halo mudansa nafatin hodi haklaken ho matenek.
2. Oinsá mak ita bele aprende husi ema seluk?
2 Aprende husi ema seluk: Atu bele iha mudansa ba oin, diʼak atu aprende husi ema seluk. (Provérbios [Amsal] 27:17) Tan neʼe mak bainhira ita-nia maluk haklaken-naʼin ida haklaken hela, diʼak atu fó atensaun ba nia. Husu sujestaun espesífiku ba haklaken-naʼin sira neʼebé iha ona esperiénsia barak, no rona didiʼak ba sira-nia sujestaun sira. (Provérbios [Amsal] 1:5) Ita hakarak hatene oinsá atu halo vizita fali, halaʼo estuda ho ema, ka haklaken iha dalan oioin ka lae? Bele husu ba irmaun neʼebé tau matan ba ita-nia grupu haklaken ka haklaken-naʼin seluk neʼebé iha ona esperiénsia iha dalan sira-neʼe hodi treinu ita. Keta haluha mós katak Jeová bele uza ninia espíritu santu hodi aumenta ita-nia kapasidade, tan neʼe husu beibeik ninia espíritu santu liuhusi orasaun.—Lucas 11:13.
3. Ita hakarak halo saida se ema fó sujestaun mai ita, maski ita la husu nia?
3 Se ema fó sujestaun ruma ba ita, maski ita la husu nia, simu deʼit, lalika hirus. (Eclesiastes [Pengkhotbah] 7:9) Halo tuir Apolo hodi simu ajuda husi ema seluk ho haraik-an no agradesimentu. Ida-neʼe mak hahalok neʼebé matenek.—Provérbios (Amsal) 12:15.
4. Jesus dehan tanba razaun importante saida mak ita hakarak halo mudansa hodi laʼo ba oin nuʼudar haklaken-naʼin ida?
4 Ita-nia mudansa fó glória ba Maromak: Jesus uza ai-knanoik ida hodi anima ninia dixípulu sira halo mudansa hodi bele sai mestre neʼebé diʼak liután. Nia kompara ninia an hanesan ho uvas-hun ida no ema kose-mina sira hanesan uvas nia sanak sira. Nia hatete katak sanak sira neʼebé fó fuan, Aman iha lalehan mós hamoos sira ho didiʼak, atu nuneʼe sira bele fó fuan barak liután. (João 15:2) Hanesan ho toos-uvas naʼin hakarak ninia uvas nia sanak sira sai buras liután, Jeová mós hakarak ita atu bele kontinua uza ita-nia kapasidade hodi “uza ita-nia ibun” fó fuan barak liután. (Ebreu 13:15) Se ita halo mudansa hodi laʼo ba oin nuʼudar haklaken-naʼin diʼak ida, neʼe bele lori rezultadu saida? Jesus dehan: “Haʼu-nia Aman hetan glória ho ida-neʼe, katak imi kontinua fó fuan barak.”—João 15:8.