Aumenta ita-nia matenek iha serbisu haklaken—Ajuda ita-nia pár
Tanbasá importante: Jesus hatene katak diʼak atu haklaken hamutuk ho maluk ida. Kuandu nia haruka ninia dixípulu naʼin-70 atu haklaken, nia haruka sira rua-rua. (Lucas 10:1) Kuandu ita haklaken ho maluk ida, nia bele ajuda ita kuandu hasoru situasaun susar ka ita la hatene oinsá atu hatán ba uma-naʼin. (Eclesiastes [Pengkhotbah] 4:9, 10) Nia bele fahe ninia esperiénsia no fó sujestaun ruma atu ajuda ita sai matenek liu iha serbisu haklaken. (Provérbios [Amsal] 27:17) Bainhira ita laʼo hela ho ita-nia pár, ita mós bele koʼalia ba malu no fó laran-manas ba malu.—Filipe 4:8.
Oinsá atu halo ida-neʼe:
• Kuandu ita-nia pár haklaken hela, rona didiʼak ba buat neʼebé nia koʼalia. (Tiago 1:19) Se nia lee eskritura ida, ita mós loke ita rasik nia Bíblia tanba hodi halo nuneʼe, ita bele prontu atu fó ajuda.
• Kuandu ita-nia pár mak koʼalia ba uma-naʼin, diʼak atu haree toʼok ita bele aumenta liafuan ruma ka lae, no bainhira mak tempu diʼak atu halo nuneʼe. (Provérbios [Amsal] 25:11) Se ita tuir haklaken-naʼin ida nia estudu Bíblia, nia sei gosta kuandu ita fó komentáriu ruma. Maibé, kuandu haklaken husi uma ba uma, karik ita-nia pár sei gosta koʼalia rasik, se ida-neʼe mak ninia tempu atu haklaken ba uma-naʼin. Maski nuneʼe, se nia mak haklaken-naʼin foun, ka nia la hatene oinsá hatán ba pergunta ruma, klaru katak nia sei hafolin ita-nia ajuda. Maibé, maski ita bá haklaken husi uma ba uma, bá vizita fali ka tuir ema seluk nia estuda, la diʼak atu koʼalia korta ita-nia pár, koʼalia barak demais ka komesa koʼalia kona-ba tópiku seluk.
• Fahe ita-nia matenek. Diʼak se dala ruma ita bele fó sujestaun ba ita-nia pár kona-ba oinsá atu haklaken iha dalan neʼebé diʼak liután. (Provérbios [Amsal] 3:27) Porezemplu, iha tempu neʼebé loos, ita bele hatete: “Ita hanoin oinsá kona-ba dalan neʼebé Ita foin koʼalia ba uma-naʼin?” ka “Haʼu bele fó sujestaun ruma?” ka “Baibain, haʼu koko atu halo ida-neʼe.” La haluha katak, maski irmaun-irmán balu dala ruma gosta atu simu sujestaun, maibé se ita hatete sai sira-nia sala hotu, ida-neʼe sei halo sira laran-tun.
Koko ida-neʼe durante fulan neʼe:
• Depois haklaken tiha ho Ita-nia pár, gaba nia kona-ba buat neʼebé nia halo ka hatete neʼebé ajuda Ita atu koʼalia ba uma-naʼin.