Apoia ita-nia maluk neʼebé ita haklaken hamutuk
1. Oinsá mak ita bele banati-tuir apóstolu Paulo nia ezemplu kuandu ita haklaken ho ema seluk?
1 Apóstolu Paulo haree tempu neʼebé nia uza hamutuk ho ninia maluk fiar-naʼin nuʼudar oportunidade atu “hametin malu”. (Roma 1:12) Kuandu ita haklaken hamutuk ho ita-nia maluk, ita uza oportunidade neʼe atu hametin malu no ajuda malu ka lae? Duké nonook deʼit, diʼak liu fahe ba ita-nia maluk buat sira neʼebé ajuda ita atu sai haklaken-naʼin neʼebé diʼak.
2. Saida mak ita bele halo atu ajuda ita-nia maluk neʼebé ita haklaken hamutuk atu sai fiar an liután? Tanbasá mak ida-neʼe importante?
2 Haburas fiar an: Haklaken-naʼin barak ladún fiar an, no karik ida-neʼe kona dalan neʼebé sira koʼalia. Se nuneʼe, ita bele ajuda sira atu sai fiar an liután hodi gaba sira husi laran. Iha dalan saida deʼit mak ita bele ajuda sira atu sai fiar an liután? Kuandu haklaken ho ema seluk, katuas área nian ida koʼalia nakloke kona-ba ninia taʼuk no kona-ba oinsá nia halo orasaun dala barak atu husu ajuda hodi halakon ninia sentimentu taʼuk. No kona-ba sai aten-brani, irmaun ida seluk dehan: “Ida-neʼe hahú ho oin-midar. Dala ruma haʼu tenke halo orasaun atu husu ajuda hodi haʼu bele hatudu ida-neʼe.” Iha buat ruma neʼebé ajuda ona ita atu sai fiar an liután kuandu haklaken ka lae? Fahe ida-neʼe ho ema neʼebé ita haklaken hamutuk.
3. Saida deʼit mak ita bele fahe ba ita-nia maluk hodi ajuda nia atu sai haklaken-naʼin neʼebé diʼak liu?
3 Fahe ideia kona-ba dalan neʼebé ita haklaken: Ita hatene liafuan simples ka pergunta ruma ka akontesimentu ruma neʼebé diʼak atu uza hodi hahú koʼalia ho uma-naʼin ka lae? Ita hetan ona rezultadu diʼak hodi uza ezemplu oinsá atu haklaken husi ita-nia livru sira maibé troka liafuan uitoan ka lae? Se nuneʼe, fahe ida-neʼe ba ema neʼebé ita haklaken hamutuk. (Provérbios [Amsal] 27:17) Kuandu ita laʼo hamutuk atu bá vizita fali, ita bele esplika ba ita-nia maluk kona-ba saida mak ita hakarak hanorin ba uma-naʼin no oinsá ita sei halo nuneʼe. No depois estuda tiha, esplika tansá mak ita hili pontu ruma, eskritura ruma, ka dalan atu hanorin neʼebé kona ita-nia estudante nia presiza.
4. Tanbasá mak ita presiza ajuda ita-nia maluk neʼebé ita haklaken hamutuk?
4 Haklaken-naʼin sira iha apóstolu sira-nia tempu la hanoin deʼit kona-ba oinsá atu ajuda ema neʼebé laʼós fiar-naʼin. Maibé, sira mós sente katak importante atu hametin malu no fó kbiit ba sira-nia maluk. (Apóstolu 11:23; 15:32) Apóstolu Paulo fó treinu ba joven Timóteo no tuirmai fó laran-manas ba nia atu fahe ba ema seluk buat neʼebé nia aprende ona. (2 Timóteo 2:2) Kuandu ita hakaʼas an atu halo diʼak ba ita-nia maluk kristaun nuʼudar ita halaʼo serbisu haklaken, ida-neʼe laʼós deʼit aumenta ita-nia ksolok no matenek, maibé mós halo ita-nia Aman iha lalehan kontente.—Ebreu 13:15, 16.