Hametin no fó ksolok ba malu iha serbisu haklaken
1 Ita hotu gosta atu rona “liafuan neʼebé hatoʼo iha tempu neʼebé loos” hodi hametin no fó ksolok ba ita. (Prov 25:11) Kuandu ita halaʼo serbisu haklaken ho ita-nia maluk, saida mak ita bele halo hodi ita-nia liafuan bele hametin no fó ksolok ba sira?
2 Liafuan neʼebé fó ksolok: Iha serbisu haklaken, diʼak tebes atu koʼalia ho irmaun no irmán sira kona-ba buat neʼebé ajuda ita atu hametin ita-nia relasaun ho Maromak! (Sal 37:30) Ita bele koʼalia kona-ba buat neʼebé ita atu hatoʼo ba uma-naʼin ka konta esperiénsia diʼak neʼebé ita foin hetan iha serbisu haklaken. (Apos 15:3) Karik ita bele fahe pontu diʼak ruma neʼebé ita hetan husi Bíblia, livru, ka reuniaun. Ita mós bele koʼalia kona-ba pontu ruma neʼebé ita foin rona iha diskursu públiku iha Salaun Reinu.
3 Dala ruma, ita sente laran-tun kuandu uma-naʼin koʼalia hasoru ita no ita la hatene hatán. Sai tiha husi uma neʼe, diʼak tebes se ita para uitoan no koʼalia hamutuk kona-ba oinsá mak ita bele hatán kuandu hasoru fali situasaun hanesan, karik hodi loke livru Bertukar Pikiran. No mós, se ita gosta buat ruma neʼebé ita-nia maluk koʼalia ba uma-naʼin, ita bele gaba nia hodi hametin no fó ksolok ba nia.
4 Buka oportunidade: Iha Ita-nia grupu estudu livru nian, iha irmaun ka irmán neʼebé kleur ona la haklaken hamutuk ho Ita ka lae? Se konvida nia atu haklaken hamutuk, Ita sei iha oportunidade atu “hametin malu”. (Rom 1:12) Pioneiru regulár no ausiliár sente kontente kuandu haklaken hamutuk ho ema seluk, liuliu iha dadeer-saan antes grupu ka iha lokraik depois tuku haat, kuandu ladún iha maluk atu akompaña sira. Ita bele apoia pioneiru sira hodi bá haklaken hamutuk ho sira. Iha ka lae, irmaun ka irmán ida neʼebé la bele halo buat barak iha serbisu haklaken tanba moras? Diʼak atu konvida nia atu bá hamutuk ho Ita, karik hodi tuir Ita-nia estudu Bíblia. Hodi halo ida-neʼe, ita bele hametin no fó ksolok ba malu.—Prov 27:17.
5 Kuandu ita gaba no fó obrigadu ba ita-nia maluk, maski kona-ba buat neʼebé kiʼik deʼit, liafuan sira-neʼe sempre hametin no fó ksolok ba sira. Keta haluha kona-ba ida-neʼe bainhira ita haklaken ho ita-nia maluk, tanba ita hakarak nafatin atu fó ksolok ba malu no “hametin malu”.—1 Tes 5:11.