Informasaun atu uza hamutuk livru Moris Kristaun no Haklaken
2-8 JANEIRU
Keʼe no hetan buat murak husi Bíblia
(Isaías 26:15) Oh Jeová, Ita aumenta ona povu iha nasaun neʼe, Ita halo nasaun neʼe sai boot; Ita fó glória ona ba Ita-nia an. Ita haluan fronteira sira hotu iha rai neʼe.
Serbisu atu hafurak liután paraízu espirituál nian
ITA-NIA KONTRIBUISAUN BA PARAÍZU ESPIRITUÁL NIAN
18 Oportunidade neʼebé Jeová fó ita atu hafurak ita-nia paraízu espirituál mak priviléjiu boot duni. Ita fó ita-nia kontribuisaun liuhusi haklaken ho badinas kona-ba ninia Ukun no ajuda ema sai Jesus nia dixípulu. Bainhira ita ajuda ema laʼo ba oin iha lia-loos toʼo sira dedika an ba Jeová, ita mós hola parte atu halo boot tan paraízu espirituál nian.—Isaías (Yesaya) 26:15; 54:2.
(Isaías 26:20) Oh haʼu-nia povu, bá, tama ba imi-nia kuartu laran, No taka odamatan sira iha imi-nia kotuk. Subar imi-nia an ba tempu uitoan Toʼo Maromak nia hirus liutiha.
Jeová mak ita-nia hela-fatin
JEOVÁ SEI KONTINUA SAI ITA-NIA “HELA-FATIN NEʼEBÉ LOOS”
15 Nuʼudar Satanás nia mundu aat neʼe besik ona toʼo rohan, problema oioin iha mundu neʼe sei sai aat liután. (Mateus 24:7, 8) No durante terus boot, situasaun iha mundu neʼe sei sai aat duni, sei sai runguranga no ema sei taʼuk tebes. (Habacuque [Habakuk] 3:16, 17) Bíblia fó-hatene nanis katak sira sei halai ba foho hodi subar “iha rai-kuak sira no iha fatuk sira leet”. (Apokalipse 6:15-17) Maibé, sei la iha rai-kuak ka organizasaun polítiku no ekonomia nian neʼebé bele proteje sira.
16 Maibé durante terus boot neʼe, ita sei kontinua hetan protesaun husi Jeová. Hanesan ho profeta Habacuc iha tempu uluk, ita mós “sei haksolok iha Jeová” neʼebé fó salvasaun mai ita. (Habacuque [Habakuk] 3:18) Iha dalan saida deʼit mak Jeová sei proteje ita iha tempu susar neʼe? Atu hatene kona-ba neʼe, ita presiza hein. Maibé, ita bele fiar katak Jeová sei nafatin organiza ninia povu no fó matadalan ba sira, hanesan nia halo ba ema Israel kuandu sira sai husi rai-Egiptu. (Apokalipse 7:9; lee Êxodo [Keluaran] 13:18.) Oinsá mak Jeová sei fó matadalan mai ita? Karik Jeová sei uza kongregasaun hodi fó-hatene mai ita kona-ba buat neʼebé ita tenke halo. Profeta Isaías fó-hatene nanis kona-ba “kuartu sira” neʼebé Maromak nia povu tama hodi hetan protesaun. Karik kuartu sira-neʼe mak kona-ba kongregasaun rihun ba rihun iha mundu tomak. (Lee Isaías [Yesaya] 26:20.) Ita hafolin reuniaun kongregasaun nian ka lae? Ita sempre prontu atu halo tuir matadalan sira neʼebé Jeová fó mai ita liuhusi kongregasaun ka lae?—Ebreu 13:17.
9-15 JANEIRU
Keʼe no hetan buat murak husi Bíblia
(Isaías 30:21) No se imi laʼo sala ba sorin loos ka ba sorin karuk, imi-nia tilun rasik sei rona liafuan ida husi imi-nia kotuk dehan: “Neʼe mak dalan. Laʼo tuir bá”.
Iha situasaun naran deʼit, rona ba Jeová nia lian
2 Ohin loron, Maromak Jeová uza buat tolu atu dirije ita, neʼe mak Bíblia, ninia espíritu santu no kongregasaun kristaun. (Apóstolu 9:31; 15:28; 2 Timóteo 3:16, 17) Ninia matadalan klaru tebes. Buat ida karik, neʼe hanesan ita rona Maromak hatete mai ita: “Dalan mak neʼe. Laʼo tuir bá.” (Isaías [Yesaya] 30:21) Maromak Jeová mós uza Jesus hodi hatoʼo Ninia mensajen mai ita. Maromak foti Jesus hodi dirije kongregasaun liuhusi “atan laran-metin no matenek”. (Mateus 24:45) Importante tebes atu halo tuir matadalan neʼebé ita simu tanba hodi nuneʼe, ita bele hetan moris rohan-laek.—Ebreu 5:9.
(Isaías 33:22) Tanba Jeová mak ita-nia Juis, Jeová mak fó Ukun-Fuan ba ita, Jeová mak ita-nia Liurai; Nia mak Ida neʼebé sei salva ita.
Imi sei serbí nuʼudar “amlulik no liurai”
4 Aliansa Ukun-Fuan nian ka bele bolu mós Moisés nia Ukun-Fuan, komesa laʼo iha tinan 1513 molok Kristu. Liuhusi Moisés nia Ukun-Fuan ka aliansa neʼe, Jeová hili nasaun Izraél sai hanesan nasaun espesiál ida ba nia. No hahú husi tempu neʼebá, Jeová mós sai sira-nia Juíz, Lei-Naʼin, no Liurai. (Isaías [Yesaya] 33:22) Jeová fó Moisés nia Ukun-Fuan atu proteje Abraão nia liña jerasaun hodi la bele kahur ho raan seluk. Entaun, ema Izraél tenke halo tuir Moisés nia Ukun-Fuan hodi la bele kaben ho ema jentiu ka ema neʼebé adora maromak seluk.—Êxodo (Keluaran) 20:4-6; 34:12-16.
16-22 JANEIRU
Keʼe no hetan buat murak husi Bíblia
(Isaías 35:8) No iha neʼebá sei iha dalan boot, Sin, dalan ida neʼebé bolu nuʼudar Dalan Santu. Ema neʼebé la moos sei la laʼo iha dalan neʼe. Dalan neʼe ba deʼit sira neʼebé laʼo tuir nia; Ema beik labele laʼo iha dalan neʼe.
w08 15/5 p. 26 par. 4
Hakaʼas an atu “sai santu loloos hodi taʼuk ba Maromak”
‘Sei iha dalan ida neʼebé bolu nuʼudar Dalan Santu’
Jeová fó-hatene nanis katak ninia povu neʼebé sai dadur iha Babilónia sei fila fali ba sira-nia rai. Profesia neʼe fó garantia katak, “iha neʼebá sei iha dalan boot, sin, dalan ida neʼebé bolu nuʼudar Dalan Santu”. (Isaías [Yesaya] 35:8a) Liafuan sira-neʼe hatudu katak Jeová sei loke dalan ba ema judeu atu fila fali ba sira-nia rai no mós nia sei proteje sira iha dalan.
w08 15/5 p. 27 par. 1
Hakaʼas an atu “sai santu loloos hodi taʼuk ba Maromak”
“Ema neʼebé la moos sei la laʼo iha dalan neʼe”
Ba ema judeu sira neʼebé fila husi Babilónia iha tinan 537 molok Kristu, sira tenke kumpre kritériu importante ida atu bele laʼo iha “Dalan Santu” neʼe. Isaías 35:8b hatete: “Ema neʼebé la moos sei la laʼo iha dalan neʼe. Dalan neʼe ba deʼit sira neʼebé laʼo tuir dalan neʼe; ema beik labele laʼo iha dalan neʼe.” Objetivu ba ema judeu atu fila ba Jeruzalein mak atu harii fali adorasaun neʼebé loos, tan neʼe ema neʼebé fila mak ema neʼebé la buka diʼak ba sira-nia an deʼit, iha respeitu ba buat santu, no ema neʼebé moos iha dalan espirituál. Sira tenkesér moris tuir Jeová nia matadalan santu sira. Ohin loron mós hanesan, se ita hakarak Maromak simu ita, ita tenke halo tuir ninia hakarak. Ita tenke hakaʼas an atu sai “santu loloos hodi taʼuk ba Maromak”. (2 Korinto 7:1) Ita tenke hasees an husi hahalok la moos saida deʼit?
(Isaías 36:2, 3) Tuirmai liurai Asíria haruka Rabsake sai husi Lakis hamutuk ho soldadu barak hodi bá hasoru liurai Ezekias iha Jeruzalein. Soldadu sira-neʼe hamriik besik bee-dalan neʼebé suli husi bee-lihun iha leten, besik dalan boot ba rai-luan neʼebé ema fase roupa. 3 Tuirmai Eliakim, Hilkias nia oan-mane, neʼebé tau matan ba palásiu, hamutuk ho sekretáriu Sebna, no mós Joá, Asaf nia oan-mane, neʼebé nuʼudar liurai nia hakerek-naʼin, sira sai mai hasoru nia.
(Isaías 36:22) Maibé Eliakim, Hilkias nia oan-mane, neʼebé tau matan ba palásiu, hamutuk ho sekretáriu Sebna, no mós Joá, Asaf nia oan-mane, neʼebé nuʼudar liurai nia hakerek-naʼin, sira mai hasoru Ezekias ho sira-nia roupa neʼebé sira lees ona no sira konta fali Rabsake nia liafuan sira ba liurai.
w07 15/1 p. 8 par. 6
Pontu importante husi livru Isaías—II
Lisaun:
36:2, 3, 22. Maski Sebna lakon ninia knaar nuʼudar liurai nia atan neʼebé tau matan ba liurai nia uma no ema seluk mak troka ninia pozisaun, maibé Sebna kontinua serbí liurai nuʼudar atan neʼe nia sekretáriu. (Isaías [Yesaya] 22:15, 19) Se ita lakon ita-nia knaar espesiál ruma iha Jeová nia organizasaun tanba razaun ruma, ita tenkesér kontinua atu serbí Jeová hodi simu knaar naran deʼit.
23-29 JANEIRU
Keʼe no hetan buat murak husi Bíblia
(Isaías 38:17) Haree bá! Duké dame, haʼu hetan susar boot; Maibé tanba Ita hadomi haʼu, Ita proteje haʼu hodi la husik haʼu tama ba rai-kuak mate nian. Ita soe tiha haʼu-nia sala hotu ba Ita-nia kotuk.
w03 1/7 p. 17 par. 17
“Maromak mak domin”
17 Bainhira Jeová salva Ezekias husi moras neʼebé todan, Ezekias fó-agradese ba Jeová hodi kanta: “Ita soe tiha haʼu-nia sala hotu ba Ita-nia kotuk.” (Isaías [Yesaya] 38:17) Eskritura neʼe hatudu katak Jeová foti sala sira husi ema neʼebé arrepende an ona no soe ba Ninia kotuk atu Nia la haree tan sala sira-neʼe. Livru ida hatete katak, eskritura neʼe mós bele tradús nuʼudar, “Tuir Ita-nia haree, haʼu nunka halo sala”. Neʼe fó kmaan tebes ba ita, loos ka lae?
(Isaías 42:3) Nia sei la halo tohar duʼut-kain neʼebé kleʼuk ona, No nia sei la hamate ahi-oan neʼebé besik atu mate. Ho laran-metin nia sei halo loos buat hotu.
Banati-tuir Jesus nia haraik-an no laran-sadiʼa
13 Jesus mós hatudu ninia laran-sadiʼa liuhusi dalan neʼebé nia koʼalia ba ema seluk, liuliu sira neʼebé terus. Apóstolu Mateus koʼalia kona-ba Jesus hodi temi fali Isaías nia liafuan. Isaías dehan: “Nia sei la halo tohar duʼut-kain neʼebé kleʼuk ona, no nia sei la hamate ahi-oan neʼebé besik atu mate.” (Isaías [Yesaya] 42:3; Mateus 12:20) Ninia liafuan sira-neʼe kona-ba saida? Jesus koʼalia iha dalan neʼebé halo ema sente kmaan. Nia haklaken mensajen kona-ba esperansa ba ema neʼebé laran-kanek. (Isaías [Yesaya] 61:1) Ema neʼebé ‘kole tan serbisu makaʼas no lori naha todan’, nia konvida sira atu hakbesik ba nia hodi hetan kmaan. (Mateus 11:28-30) Nia fó fiar ba ninia dixípulu sira katak Maromak hanoin tebes sira ida-idak, inklui mós sira neʼebé ema seluk ladún respeitu ka hafolin.—Mateus 18:12-14; Lucas 12:6, 7.
30 JANEIRU–5 FEVEREIRU
Keʼe no hetan buat murak husi Bíblia
(Isaías 43:10-12) Jeová dehan: “Imi mak haʼu-nia testemuña, Sin, haʼu-nia atan neʼebé haʼu hili ona, Atu nuneʼe imi bele hatene no tau fiar ba haʼu No komprende katak haʼu hanesan ba nafatin. La iha Maromak ida seluk antes haʼu, No la iha Maromak seluk depois haʼu. 11 Haʼu, haʼu mak Jeová, la iha salvadór ida seluk só haʼu deʼit.” 12 “Bainhira la iha maromak seluk iha imi-nia leet, Haʼu mak fó-hatene nanis buat neʼebé atu akontese no fó salvasaun no fó sai kona-ba ida-neʼe. Entaun, imi mak haʼu-nia testemuña”, Jeová dehan, “no haʼu mak Maromak.
“Povu neʼebé sira-nia Maromak mak Jeová”
NASAUN TESTEMUÑA IDA
14 Ema Izraél adora sira-nia Maromak Jeová, maibé ema husi nasaun sira seluk adora sira-nia maromak rasik. Entaun, Maromak ida-neʼebé mak Maromak loos? Iha Isaías nia tempu, Jeová kompara situasaun iha mundu hanesan kazu iha tribunál. Nia hatete katak se nasaun sira-nia maromak sira mak loos, entaun sira tenkesér lori sira-nia testemuña sira. Nia hatete: “Husik sira lori sira-nia testemuña sira mai hodi hatudu katak sira mak loos, ka husik ema sira-neʼe rona hodi sira bele dehan, ‘Ida-neʼe mak lia-loos.—Isaías (Yesaya) 43:9.
15 Nasaun sira-nia maromak la bele fó prova katak sira mak maromak loos tanba sira mak estátua deʼit neʼebé la bele koʼalia no presiza ema hulan mak foin bele book an. (Isaías [Yesaya] 46:5-7) Maibé Jeová hatete ba povu Izraél dehan: “Imi mak haʼu-nia testemuña sira, . . . sin, haʼu-nia atan neʼebé haʼu hili, atu imi hatene no tau fiar mai haʼu no komprende katak haʼu mak Nia duni. Antes haʼu, la iha Maromak ida seluk, no depois haʼu, la iha ida seluk. Haʼu, haʼu mak Jeová, no haʼu deʼit mak salvadór, la iha ida seluk. . . . Tan neʼe, imi mak haʼu-nia testemuña sira, . . . no haʼu mak Maromak.”—Isaías (Yesaya) 43:10-12.
16 Hanesan testemuña sira iha tribunál, Jeová nia povu iha priviléjiu hodi fó sasin katak Jeová mak Maromak neʼebé loos mesak deʼit. Maromak bolu sira ‘povu neʼebé haʼu halibur ba haʼu-nia an hodi sira bele hanaʼi haʼu-nia glória’. (Isaías [Yesaya] 43:21) Sira mak lori Maromak nia naran. Jeová hakarak sira halo tuir nia no fó glória ba nia tanba nia lori sira sai husi rai-Ejitu. Jeová mós hakarak ita halo tuir no fó glória ba nia ohin loron. Tan neʼe profeta Miquéias fó sai Maromak nia povu nia sentimentu: “Ba ema hotu, sira sei laʼo ho sira ida-idak nia maromak nia naran, maibé ba ami, ami sei laʼo iha Jeová ami-nia Maromak nia naran ba tempu neʼebé la bele sura, no ba nafatin.”—Miquéias (Mikha) 4:5.
(Isaías 43:25) Haʼu hamoos tiha ó-nia sala sira tanba haʼu-nia an rasik, No haʼu sei la hanoin-hetan tan ó-nia sala sira.
ip-2 p. 60 par. 24
“Imi mak haʼu-nia Testemuña”!
24 Maibé tuir loloos, Maromak hatudu ninia laran-sadiʼa ba povu Izraél laʼós tan deʼit nia sente kasian ba sira. Nia halo ida-neʼe atu defende ninia naran. Se nia husik hela povu Izraél nuʼudar dadur ba nafatin, ema sei koʼalia aat kona-ba ninia naran. (Salmo [Mazmur] 79:9; Ezequiel [Yehezkiel] 20:8-10) Hanesan mós ho ohin loron, atu halo Jeová nia naran sai santu no defende Ninia direitu atu ukun, neʼe mak buat neʼebé importante liu fali ema nia salvasaun. Maibé Jeová hadomi ema neʼebé simu ninia dixiplina no adora Nia ho espíritu no lia-loos. Maski sira mak ema neʼebé hetan ona kose-mina ka bibi seluk, Maromak hatudu ninia domin ba sira hodi kasu sira-nia sala liuhusi Jesus Kristu nia sakrifísiu.—João 3:16; 4:23, 24.
ISAIAS
24 Haree bá! Jeová halo mamuk rai neʼe no halo rai neʼe sai fuik.
Nia dulas rai neʼe no halo ema iha rai laran laʼo namkari.
2 Situasaun neʼe sei mosu ba ema hotu:
Povu no mós amlulik,
Atan no ninia naʼi,
Atan-feto no ninia patraun-feto,
Ema neʼebé sosa no ema neʼebé faʼan,
Ema neʼebé fó-empresta no ema neʼebé empresta,
Ema neʼebé fó-debe no ema neʼebé debe.
3 Rai neʼe sei sai mamuk hotu;
Ema sei hadau hotu sasán sira,
Tanba Jeová mak fó sai ona liafuan neʼe.
4 Rai neʼe lelir; no sai fraku ona.
Rai neʼebé buras sai namlaek; no sai maran ona.
Ema neʼebé naran-boot iha rai neʼe sai menus ona.
5 Ema neʼebé hela iha rai neʼe halo rai neʼe sai foʼer,
Tanba sira hakat liu lei sira,
Troka ukun-fuan sira,
No la kumpre aliansa neʼebé ba nafatin.
6 Tan neʼe mak rai neʼe hetan malisan no sai rahun,
No sira neʼebé hela iha laran simu sala.
Tan neʼe mak ema neʼebé hela iha rai neʼe sai menus,
No ema uitoan deʼit mak hela.
7 Tua-uvas foun halerik, uvas-hun sai namlaek,
No ema hotu neʼebé kontente sai neon-susar.
8 Lian haksolok nian husi tamborín para ona;
Lian husi ema neʼebé festa la iha tan;
Lian ksolok nian husi arpa para ona.
9 Sira hemu tua-uvas la ho knananuk,
No tua neʼebé ema hemu sente moruk.
10 Sidade neʼebé husik mamuk sai rahun ona;
Uma hotu taka ona atu nuneʼe ema la bele tama.
11 Sira hakilar iha dalan sira tanba tua-uvas la iha ona.
Ksolok hotu lakon ona;
Rai neʼe nia ksolok la iha tan.
12 Sidade neʼe sai rahun ona;
Portaun sira harahun hotu ona.
13 Tanba haʼu-nia povu iha nasaun sira-nia leet sei sai
Hanesan oliveira fuan restu neʼebé iha ai-oliveira hun bainhira ema baku tiha ona,
No hanesan uvas-fuan restu bainhira tempu koʼa uvas nian remata ona.
14 Sira sei hasai lian,
Sira sei haklalak ho kontente.
Husi tasi mak sira sei fó sai Jeová nia kmanek.
15 Tan neʼe mak sira sei fó glória ba Jeová iha rai parte leste;
Sira sei fó glória ba Jeová nia naran, Maromak Izraél nian, iha illa sira iha tasi.
16 Husi rai nia rohan mak ita rona knananuk sira neʼebé dehan:
“Glória ba Maromak neʼebé iha hahalok loos!”
Maibé haʼu dehan: “Haʼu sai fraku daudaun, haʼu sai fraku liu!
Susar ba haʼu! Ema laran-makerek hatudu hahalok laran-makerek;
Ho laran-aat mak ema laran-makerek hatudu hahalok laran-makerek.”
17 Taʼuk no rai-kuak no lasu hein hela imi neʼebé hela iha rai neʼe.
18 Ema neʼebé halai tanba lian neʼebé halo taʼuk sei monu ba rai-kuak,
No ema neʼebé sai husi rai-kuak sei tama ba lasu.
Tanba bee iha leten sei loke tiha,
No rai nia hun sei nakdoko.
19 Rai nakfera ona;
Rai nakdoko tiha ona;
Rai nakdedar makaʼas.
20 Rai neʼe la metin hanesan mane ida neʼebé lanu la’o la metin,
No rai neʼe nakdoko bá-mai hanesan barraka neʼebé anin huu kona.
Ninia sala sira sai todan iha nia leten,
No nia sei monu, atu nuneʼe nia sei la hamriik fali.
21 Iha loron neʼebá Jeová sei tesi-lia ba tropa sira neʼebé iha leten
No ba liurai sira iha rai neʼe.
22 Nia sei halibur sira hamutuk
Hanesan ema dadur sira halibur hamutuk ba rai-kuak ida,
No nia sei sulan metin sira iha kadeia laran;
Liutiha loron barak nia sei fó kastigu ba sira.
23 Fulan nakonu sei sai moe,
No loro-matan neʼebé nabilan sei sai moe,
Tanba Jeová, ukun-naʼin ba tropa lalehan nian, sai ona Liurai iha Foho Siaun no iha Jeruzalein,
Nia hetan glória iha povu nia katuas sira-nia oin.
25 Oh Jeová, Ita-Boot mak haʼu-nia Maromak.
Haʼu hahiʼi Ita, haʼu hahiʼi Ita-nia naran,
Tanba Ita halo ona buat kmanek sira.
Ita halo buat neʼebé Ita fó sai ona husi tempu antigu,
Ita hatudu ona laran-metin, no ema bele tau fiar.
2 Tanba Ita halo ona sidade ida sai fali fatuk butuk,
Sidade neʼebé metin sai uut ona.
Ema estranjeiru nia fatin seguru la sai tan nuʼudar sidade ida;
Sidade neʼe sei nunka harii fali.
3 Tan neʼe mak povu neʼebé forte sei fó glória ba Ita;
Nasaun sira neʼebé hanehan ema sei sai taʼuk ba Ita.
4 Tanba Ita sai ona fatin seguru ba ema kiʼik,
Fatin seguru ba ema kiak neʼebé kona susar,
Fatin protesaun nian husi udan-boot,
No mahon husi loron manas.
Bainhira ukun-naʼin aat sira sai hirus hanesan anin-boot neʼebé huu hasoru moru ida,
5 Ita hamenus lian barullu husi ema estranjeiru,
Hanesan kalohan hamenus manas iha rai neʼebé maran.
Ita halakon knananuk husi ukun-naʼin neʼebé aat,
Hanesan kalohan nia lalatak hamenus manas.
6 Iha foho neʼe mak Jeová, ukun-naʼin ba tropa lalehan nian, sei halo festa ba povu hotu
Festa ho hahán neʼebé gostu loos,
Festa ho tua-uvas neʼebé diʼak liu,
Hahán diʼak liu neʼebé nakonu ho naʼan diʼak,
Ho tua-uvas diʼak neʼebé tais ona.
7 Iha foho neʼe mak nia sei halakon hena neʼebé falun povu hotu
No hena neʼebé taka metin nasaun sira hotu.
8 Nia sei halakon mate ba nafatin,
No Jeová, Naʼi Ukun-Naʼin Boot Liu, sei hamaran matan-been husi ema hotu nia oin.
Nia sei hasai tiha ninia povu nia moe husi rai tomak,
Tanba Jeová rasik mak fó sai ona ida-neʼe.
9 Iha loron neʼebá sira sei dehan:
“Haree bá! Neʼe mak ita-nia Maromak!
Ita tau esperansa iha nia,
No nia sei salva ita.
Neʼe mak Jeová!
Ita tau ona esperansa iha nia.
Mai ita haksolok no kontente tanba salvasaun husi nia.”
10 Tanba Jeová nia liman sei tun hodi proteje foho neʼe,
No nia sei sama Moab nia fatin sira
Hanesan sama duʼut-maran hamutuk ho animál nia tee.
11 Nia sei baku Moab ho nia liman
Hanesan ema neʼebé nani baku nia liman hodi nani,
Nia sei book nia liman ho matenek
Hodi hatún Moab nia hahalok foti-an.
12 No nia sei harahun sidade neʼebé metin,
Hamutuk ho moru aas sira neʼebé seguru,
Nia sei baku rahun toʼo rai.
26 Iha loron neʼebá ema sei kanta knananuk tuirmai neʼe iha rai-Judá:
“Ami-nia sidade mak forte.
Ninia salvasaun mak hanesan moru neʼebé proteje ami.
2 Loke portaun sira atu nuneʼe nasaun neʼebé iha hahalok loos bele tama,
Nasaun neʼebé hatudu hahalok laran-metin.
3 Ita sei proteje sira neʼebé sadere ba Ita ho laran tomak;
Ita sei fó dame nafatin ba sira,
Tanba sira tau fiar ba Ita deʼit.
4 Tau fiar nafatin ba Jeová,
Tanba Jah Jeová mak Fatuk rohan-laek nian.
5 Tanba nia hatún ona sira neʼebé hela iha fatin aas, sin, sidade neʼebé aas.
Nia lori tun ida-neʼe,
Nia lori tun ida-neʼe ba rai;
Nia soe ida-neʼe tun ba rai-rahun.
6 Sira neʼebé hetan terus sei sama ida-neʼe,
Ema kiʼik sira sei sama ida-neʼe ho sira-nia ain.”
7 Ema laran-loos nia dalan sira mak loos.
Tanba Ita iha hahalok loos,
Ita sei halo tetuk dalan ba ema laran-loos.
8 Oh Jeová, ami tau esperansa ba Ita
Nuʼudar ami laʼo iha Ita-nia dalan justisa nian.
Ami hafolin tebes no hanoin-hetan Ita-nia naran.
9 Bainhira kalan ona haʼu hein Ita ho haʼu-nia forsa tomak,
Sin, iha haʼu-nia laran, haʼu buka namanas ba Ita;
Tanba bainhira Ita tesi lia ba rai,
Ema neʼebé hela iha rai sei aprende kona-ba hahalok loos.
10 Maski ema laran-aat simu laran-diʼak,
Nia sei la aprende kona-ba hahalok loos.
Maski nia hela iha rai ema laran-loos nian, maibé nia sei hatudu hahalok aat,
No nia sei la haree Jeová nia kmanek.
11 Oh Jeová, Ita hiʼit ona Ita-nia liman, maibé sira la haree ida-neʼe.
Sira sei haree Ita-nia laran-manas ba Ita-nia povu no sira sei sai moe.
Sin, ahi husi Ita sei han mohu Ita-nia inimigu sira.
12 Oh Jeová, Ita sei fó ami dame,
Tanba Ita mak fó kbiit ba ami atu halo buat hotu.
13 Oh Jeová, ami-nia Maromak, maski naʼi seluk mak ukun ona ami,
Maibé ami sei temi deʼit Ita-nia naran.
14 Sira mate ona; sira sei la moris.
Sira mate no la iha kbiit, sira sei la hadeer fali.
Tanba Ita tesi lia ona ba sira
Atu halakon sira hodi nuneʼe ema sei la hanoin-hetan tan sira.
15 Oh Jeová, Ita aumenta ona povu iha nasaun neʼe,
Ita halo nasaun neʼe sai boot;
Ita fó glória ona ba Ita-nia an.
Ita haluan fronteira sira hotu iha rai neʼe.
16 Oh Jeová, durante tempu susar sira buka Ita;
Sira hatoʼo sira-nia orasaun ho lian neineik bainhira Ita fó dixiplina ba sira.
17 Hanesan feto isin-rua neʼebé besik ona atu tuur ahi
Nia sente moras tuur ahi nian no hakilar tanba moras,
Nuneʼe mós ami sente moras tanba Ita, oh Jeová.
18 Ami sai isin-rua ona, ami sente ona moras tuur ahi nian,
Maibé ami tuur ahi ba anin deʼit.
Ami la lori salvasaun ba rai neʼe,
No la iha oan ida mak moris hodi hela iha rai neʼe.
19 “Imi-nia ema neʼebé mate sei moris fali.
Haʼu-nia mate-isin sira sei moris fali.
Oh imi neʼebé hela iha rai-rahun,
Hadeer bá no haklalak ho kontente!
Tanba imi-nia maho-been mak hanesan maho-been iha dadeer,
No rai neʼe sei entrega fali ema mate sira neʼebé iha laran.
20 Oh haʼu-nia povu, bá, tama ba imi-nia kuartu laran,
No taka odamatan sira iha imi-nia kotuk.
Subar imi-nia an ba tempu uitoan
Toʼo Maromak nia hirus liutiha.
21 Tanba Jeová mai daudaun husi ninia fatin
Atu fó kastigu ba ema sira neʼebé hela iha rai neʼe tanba sira-nia sala,
No rai neʼe sei hatudu sai raan neʼebé fakar ona iha ninia leten
No sei la taka tan ninia ema sira neʼebé mate.”
27 Iha loron neʼebá Jeová sei uza surik boot neʼebé forte
Hodi fó kastigu ba animál boot iha tasi, neʼebé dolar lalais hanesan samea,
Sin, fó kastigu ba animál boot, neʼebé bobar an hanesan samea,
No nia sei oho kriatura boot neʼebé iha tasi.
2 Oh povu sira, iha loron neʼebá kanta ba nia:
“Nia mak toʼos-uvas neʼebé fó tua-uvas nafurin!
3 Haʼu Jeová, haʼu mak proteje nia.
Haʼu rega nia beibeik.
Haʼu proteje nia kalan no loron,
Atu nuneʼe ema ida la bele halo aat ba nia.
4 Haʼu la sente hirus tan ba nia.
Sé mak sei kontra haʼu ho ai-tarak no duʼut aat iha funu?
Haʼu sei sama sira no sunu sira hotu hamutuk iha ahi laran.
5 Tan neʼe, husik nia mai iha haʼu-nia fatin seguru.
Husik nia halo dame ho haʼu;
Sin, husik nia halo dame ho haʼu.”
6 Iha loron sira tuirmai Jacob nia abut sei metin,
Izraél sei buras no iha dikin,
No sira sei halo nakonu rai ho sira-nia fuan.
7 Tansá mak tenke baku makaʼas nasaun Izraél?
Tansá mak tenke oho nia iha dalan hanesan neʼe?
8 Ho hakilar taʼuk nian mak Ita sei luta hasoru nia bainhira haruka nia bá.
Maromak sei duni sai nia ho anin makaʼas hanesan anin neʼebé huu husi parte leste.
9 Entaun iha dalan neʼe mak Jacob nia sala sei hetan perdua,
No bainhira Maromak hamoos tiha ninia sala, buat tuirmai neʼe sei akontese duni:
Nia sei halo altár nia fatuk hotu sai
Hanesan ahu-ruin neʼebé harahun tiha,
No sei la iha tan ai-riin lulik sira ka fatin insensu nian.
10 Tanba sidade neʼebé metin sei sai mamuk;
Fatin neʼebé animál han duʼut sei husik tiha hanesan rai-fuik ida.
Iha neʼebá mak karau oan sira sei han no toba
No han ai-sanak iha sidade neʼe.
11 Bainhira ninia ai-sanak sira sai maran,
Feto sira sei mai no halo tohar ai-sanak sira-neʼe
Hodi sunu iha ahi.
Tanba povu neʼe la komprende.
Tan neʼe mak sira-nia Kriadór sei la hatudu laran-sadiʼa ba sira,
No Ida neʼebé halo sira sei la simu tan sira.
12 Oh povu Izraél, hanesan ema ida haketak ai-fuan husi ai-hun no halibur ai-fuan ida-idak, Jeová mós sei halibur imi neʼebé namkari iha rai oioin hahú husi Mota toʼo iha Foho-Leet Ejitu nian.
13 Iha loron neʼebá sei iha lian boot husi dikur ida, no sira neʼebé besik mate iha rai-Asíria no sira neʼebé namkari iha rai-Ejitu sei mai no hakruʼuk an ba Jeová iha ninia foho santu iha Jeruzalein.
28 Susar ba Efraim nia ema lanu-teen sira-nia koroa,
Koroa furak neʼe sai hanesan ai-funan namlaek,
Neʼebé tau iha sidade nia leten, sidade neʼebé iha foho-tutun besik foho-leet neʼebé buras, hela-fatin ba ema sira neʼebé lanu ho tua-uvas!
2 Haree bá! Jeová sei haruka ema ida neʼebé forte no kbiit.
Nia sei soe tun koroa neʼe ba rai ho makaʼas,
Hanesan rai-tarutu ho udan jelu no anin-boot neʼebé estraga buat barak,
Hanesan rai-tarutu ho anin-boot neʼebé halo bee saʼe.
3 Nia sei sama tiha
Efraim nia lanu-teen sira-nia koroa furak iha ninia ain okos.
4 No koroa furak neʼebé hanesan ai-funan namlaek
Neʼebé iha sidade leten, sidade neʼebé besik foho-leet buras,
Sei sai hanesan ai-figeira fuan primeiru antes bailoro.
Bainhira ema ida haree ai-fuan neʼe, nia kuʼu kedas no tolan lalais deʼit.
5 Iha loron neʼebá Jeová, ukun-naʼin ba tropa lalehan nian, sei sai hanesan koroa kmanek no koroa furak husi ai-funan ba ninia povu restu.
6 Nia sei fó espíritu justisa nian ba ema neʼebé tuur atu tesi lia no fó forsa ba sira neʼebé duni sai inimigu neʼebé ataka iha portaun.
7 No ema sira-neʼe mós la’o sala dalan tanba hemu tua-uvas;
Sira-nia tua halo sira sidi.
Amlulik no profeta sira la’o sala dalan tanba hemu tua;
Tua-uvas halo sira bilán,
No sira sidi tanba sira-nia tua;
Sira-nia vizaun halo sira lakon dalan,
No sira-nia tesi-lia mak laloos.
8 Tanba sira-nia meza hotu nakonu ho muta foʼer,
Sin, fatin hotu taka ho muta.
9 Sira dehan: “Nia hakarak fó sai koñesimentu ba sé?
Nia esplika mensajen neʼe ba sé?
Ba sira neʼebé foin haketak susu ka?
Ba sira neʼebé foin para ona susu ka?
10 Tanba Isaias fó sai beibeik, hodi dehan: ‘Mandamentu tuir mandamentu, sin, mandamentu tuir mandamentu,
Ukun-fuan ba ukun-fuan, sin, ukun-fuan ba ukun-fuan,
Uitoan iha neʼe, uitoan iha neʼebá.
11 Entaun nia sei koʼalia ba povu neʼe liuhusi sira neʼebé hasan-toos no ho lian ema rai seluk nian.
12 Uluk nia dehan ba sira: “Neʼe mak fatin deskansa nian. Husik ema neʼebé kole atu deskansa; neʼe mak fatin neʼebé ema hetan kmaan”, maibé sira lakohi atu rona.
13 Nuneʼe Jeová sei fó sai ninia liafuan ba sira, hodi dehan:
“Mandamentu tuir mandamentu, sin, mandamentu tuir mandamentu,
Ukun-fuan ba ukun-fuan, sin, ukun-fuan ba ukun-fuan,
Uitoan iha neʼe, uitoan iha neʼebá”,
Atu nuneʼe kuandu sira laʼo,
Sira sei sidi no monu ba kotuk
No sira sei tohar no tama iha lasu no ema kaer sira.
14 Tan neʼe, imi neʼebé gaba an,
Imi ukun-naʼin sira ba povu neʼe iha Jeruzalein, rona ba Jeová nia liafuan,
15 Tanba imi dehan:
“Ami halo ona aliansa ho mate,
No ami hakotu lia ona ho rate.
Bainhira bee suli liu ho makaʼas,
Neʼe sei la lori ami,
Tanba ami halo ona lia-bosok nuʼudar ami-nia fatin seguru
No ami halo buat falsu sai ami-nia subar-fatin.”
16 Entaun Jeová, Naʼi Ukun-Naʼin Boot Liu, dehan nuneʼe:
“Haʼu tau fatuk ida neʼebé koko tiha ona nuʼudar uma hun iha Siaun,
Fatuk folin-boot neʼebé importante nuʼudar uma nia hun neʼebé metin.
Ema hotu neʼebé tau fiar sei la sai taʼuk.
17 No haʼu sei halo justisa nuʼudar tali sukat nian
No hahalok loos nuʼudar sasán atu halo tetuk.
Udan jelu sei halakon tiha imi-nia lia-bosok, imi-nia fatin seguru,
No bee boot sei halo nakonu imi-nia subar-fatin.
18 Imi-nia aliansa ho mate sei la vale,
No lia neʼebé imi hakotu ona ho rate sei la iha tan.
Bainhira bee boot neʼebé suli liu ho makaʼas,
Ida-neʼe sei harahun imi.
19 Dala hotu neʼebé bee neʼe suli liu,
Neʼe sei lori lakon tiha imi;
Tanba ida-neʼe sei suli liu iha dadeer ba dadeer,
Durante loron no durante kalan.
Só taʼuk deʼit mak sei halo sira komprende buat neʼebé sira rona ona.”
20 Tanba kama badak liu atu ema ida lolo nia an,
No lensól kloot liu atu falun an.
21 Jeová sei hamriik hanesan nia uluk halo iha Foho Perazim;
Nia rasik sei hamriik hanesan nia uluk halo iha foho-leet besik Jibeon,
Atu nuneʼe nia bele halo ninia hahalok sira, ninia hahalok neʼebé laʼós baibain,
No atu nia bele kumpre ninia serbisu, serbisu neʼebé laʼós baibain.
22 Agora imi keta soe-lia,
Atu nuneʼe tali neʼebé kesi imi sei la sai metin liután,
Tanba haʼu rona ona husi Naʼi Ukun-Naʼin Boot Liu, Jeová, ukun-naʼin ba tropa lalehan nian,
Katak nia deside ona atu halakon rai tomak.
23 See tilun no rona haʼu-nia liafuan;
Tau atensaun no rona ba buat neʼebé haʼu fó sai.
24 Ema neʼebé fila rai, sei uza loron tomak atu fila rai antes nia kuda fini ka lae?
Nia sei kontinua fila rai deʼit no la kuda fini ka lae?
25 Duké halo ida-neʼe, bainhira nia halo tetuk ona ninia rai,
Tuirmai nia sei lekar fini husi komiñu-metan no kuda fini komiñu, loos ka lae?
No nia sei kuda trigu oioin no sevada,
No mós kuda espelta iha toʼos ninin, loos ka lae?
26 Tanba Maromak hanorin nia iha dalan neʼebé loos;
Ninia Maromak hanorin nia.
27 Tanba baibain ema la uza ai-kabelak atu harahun komiñu-metan,
No ema la uza roda boot atu harahun komiñu hodi hasai nia kulit.
Duké halo ida-neʼe, ema baku komiñu-metan ho ai-tonka,
No baku komiñu ho ai-sanak.
28 Ema ida harahun trigu atu halo paun ka?
Lae, nia sei la harahun ida-neʼe beibeik;
No bainhira nia sama fini neʼe hodi uza roda boot neʼebé kuda sira dada,
Nia la harahun ida-neʼe.
29 Neʼe mós mai husi Jeová, ukun-naʼin ba tropa lalehan nian,
Ninia konsellu mak kmanek liu
No ninia serbisu sira mak boot liu.
29 “Oh Ariel, sidade neʼebé David hela bá, susar ba ó!
Imi povu sira, kontinua atu halaʼo imi-nia festa tinan-tinan,
Selebra festa sira tinan ba tinan.
2 Maibé haʼu sei lori susar ba Ariel,
No iha neʼebá ema sei tanis no halerik,
No ba haʼu, Ariel sei sai hanesan Maromak nia altár hodi sunu sakrifísiu.
3 Haʼu sei hela iha ó-nia sorin hotu hodi kontra ó,
No haʼu sei tau lutu haleʼu ó hodi ataka ó
No sei ateru rai hasoru ó.
4 Ó sei monu no hetan moe;
Ó sei koʼalia husi rai-rahun,
No rai-rahun sei hanetik ó-nia koʼalia.
Ó-nia lian sei sai husi rai
Hanesan lian husi matan-dook ida,
No ó sei koʼalia lian neineik husi rai-rahun.
5 Haʼu sei halo namkari ó-nia inimigu lubun hanesan rai neʼebé uut loos,
No halo namkari ukun-naʼin aat sira hanesan trigu kulit neʼebé anin huu.
No neʼe sei akontese derrepente deʼit.
6 Jeová, ukun-naʼin ba tropa lalehan nian, sei proteje ó
Ho rai-tarutu no rai-nakdoko no ho tarutu makaʼas,
Ho anin-boot no anin makaʼas no ho ahi neʼebé lakan makaʼas.”
7 Tuirmai ema-lubun husi nasaun sira hotu neʼebé halo funu hasoru Ariel,
Sin, sira hotu neʼebé halo funu hasoru nia,
Sira neʼebé harii uma aas atu ataka nia,
No sira neʼebé lori susar ba nia,
Sira sei sai hanesan mehi ida, vizaun ida iha kalan.
8 Sin, neʼe sei sai hanesan ema neʼebé hamlaha mehi katak nia han daudaun,
Maibé bainhira nia hadeer, nia hamlaha nafatin,
No neʼe hanesan ema neʼebé hamrook mehi katak nia hemu,
Maibé bainhira nia hadeer, nia sei kole no hamrook nafatin.
Entaun neʼe mak sei akontese ba ema-lubun husi nasaun hotu
Neʼebé halo funu hasoru Foho Siaun.
9 Sai bilán no hakfodak;
Halo delek imi-nia matan no sai matan-delek bá.
Sira lanu, maibé laʼós ho tua-uvas;
Sira sidi, maibé laʼós tanba hemu tua.
10 Tanba Jeová halo ona imi toba-dukur loos;
Oh profeta sira, nia taka ona imi-nia matan,
Oh siʼikdór sira, nia taka ona imi-nia ulun.
11 Ba imi, vizaun hotu sai ona hanesan liafuan iha livru neʼebé taka metin. Bainhira sira fó livru neʼe ba ema ida neʼebé bele lee, hodi dehan: “Favór ida, lee ida-neʼe ho lian makaʼas”, ema neʼe sei hatán: “Haʼu la bele lee, tanba livru neʼe taka metin ona.”
12 No bainhira sira fó livru neʼe ba ema neʼebé la bele lee, hodi dehan: “Favór ida, lee ida-neʼe”, ema neʼe sei hatán: “Haʼu la hatene atu lee.”
13 Jeová hatete: “Povu neʼe hakbesik ba haʼu ho sira-nia ibun
No sira respeitu haʼu ho ibun-tutun deʼit,
Maibé sira-nia laran dook husi haʼu;
No sira taʼuk haʼu tan deʼit ema nia ukun-fuan neʼebé hanorin ona ba sira.
14 Tan neʼe, haʼu rasik mak sei halo fali buat furak sira ba povu neʼe,
Ho buat kmanek barak;
No sira-nia matenek-naʼin sira sei lakon sira-nia matenek,
No koñesimentu husi sira-nia ema matenek sei lakon.”
15 Susar ba sira neʼebé hakaʼas an atu subar sira-nia planu husi Jeová.
Sira halo planu iha fatin nakukun,
No sira dehan: “Sé mak haree ita?
Sé mak hatene kona-ba ita?”
16 Imi-nia hanoin mak kleʼuk duni!
Badain rai-mean hanesan ho rai-mean ka lae?
Sasán neʼebé badain halo ona labele koʼalia kona-ba badain neʼe, hodi dehan:
“Nia la halo haʼu.”
Sasán neʼebé badain halo ona labele koʼalia kona-ba badain neʼe, hodi dehan:
“Nia la hatene buat ida.”
17 Lakleur tan, Líbanu sei sai fali toʼos ai-fuan nian,
No toʼos ai-fuan nian sei sai hanesan ai-laran.
18 Iha loron neʼebá tilun-diuk sei rona liafuan sira husi livru neʼe,
No ema matan-delek sei haree husi nakukun.
19 Ema laran-maus sei haksolok boot tanba Jeová,
No ema kiak sira iha ema nia leet sei haksolok tanba Maromak neʼebé Santu ba Izraél.
20 Tanba ukun-naʼin aat sei la iha tan,
Ema neʼebé gaba an sei lakon,
No ema hotu neʼebé prontu atu halo aat sei halakon tiha.
21 Sira neʼebé uza liafuan falsu hodi lori sala ba ema seluk sei lakon tiha.
Ema sira-neʼe tau lasu ba ema neʼebé fó konsellu iha sidade nia portaun,
No uza liafuan bosok hodi nega justisa ba ema laran-loos.
22 Entaun, neʼe mak buat neʼebé Jeová, ida neʼebé sosa fali Abraão, dehan ba Jacob nia umakain:
“Jacob sei la sai moe tan,
No ninia oin sei la kamutis ona.
23 Tanba bainhira nia haree ninia oan sira iha ninia leet,
Neʼebé haʼu-nia liman rasik mak halo,
Sira sei halo santu haʼu-nia naran;
Sin, sira sei halo santu Maromak neʼebé Santu ba Jacob,
No sira sei hamtaʼuk Maromak Izraél nian.
24 Sira neʼebé iha hanoin sala sei hetan kbiit atu komprende,
No sira neʼebé muramura sei simu hanorin.”
30 Jeová dehan: “Susar ba oan-mane sira neʼebé ulun-toos,
Sira kumpre planu neʼebé laʼós haʼu-nian,
No sira halo aliansa, maibé kontra haʼu-nia hakarak,
Atu nuneʼe sira-nia sala aumenta tan.
2 Sira laʼo tun ba rai-Ejitu hodi la husu uluk ba haʼu,
Sira buka protesaun husi Faraó
No buka protesaun iha rai-Ejitu nia mahon!
3 Maibé Faraó nia protesaun sei sai nuʼudar buat neʼebé halo imi moe,
No protesaun husi rai-Ejitu nia mahon sei hamoe imi.
4 Tanba ninia ulun-naʼin sira iha Soan,
No ninia ema sira neʼebé lori mensajen toʼo ona iha Hanes.
5 Sira hotu sei sai moe
Tanba sira sadere ba ema Ejitu neʼebé la lori buat diʼak ba sira,
No neʼebé la fó ajuda no la bele halo buat ida,
Só deʼit lori moe boot.”
6 Tuirmai neʼe mak mensajen hasoru animál sira husi parte súl:
Sira laʼo liuhusi rai terus no susar nian,
Sira mós laʼo liuhusi rai neʼebé iha leaun, no leaun neʼebé hasai lian,
Liuhusi rai neʼebé iha samea venenu no samea neʼebé ataka lalais,
Sira lori sira-nia rikusoin iha kuda-burru nia kotuk
No lori sira-nia prezente iha kuda-kamelu nia kotuk.
Maibé buat sira-neʼe sei la fó diʼak ba povu.
7 Tanba ema Ejitu nia ajuda mak la iha folin.
Entaun haʼu bolu ida-neʼe nuʼudar: “Rahab, neʼebé la halo buat ida.”
8 “Agora bá, hakerek neʼe iha fatuk-belar ida iha sira-nia oin,
No hakerek neʼe iha livru ida,
Atu nuneʼe bele sai nuʼudar sasin ba nafatin
Iha futuru.
9 Tanba sira mak povu neʼebé kontradór, oan-mane neʼebé bosok-teen,
Oan-mane neʼebé lakohi atu rona ba Jeová nia ukun-fuan.
10 Sira hatete ba siʼikdór sira, hodi dehan: ‘Keta haree’,
No hatete ba sira neʼebé haree vizaun dehan: ‘Keta konta vizaun neʼebé loos ba ami.
Fó sai deʼit liafuan neʼebé diʼak ba ami; haree deʼit vizaun sira neʼebé laloos.
11 Fila sees husi dalan neʼe; laʼo sees husi dalan loos.
Para ona atu koʼalia ba ami kona-ba Maromak neʼebé Santu ba Izraél.
12 Tan neʼe, Maromak neʼebé Santu ba Izraél dehan nuneʼe:
“Tanba imi la simu ona liafuan neʼe
No imi tau fiar ba lia-bosok no lohi
No imi sadere ba buat sira-neʼe,
13 Entaun imi-nia sala neʼe mak hanesan moru neʼebé nakfera,
Hanesan moru aas neʼebé besik atu monu.
Neʼe sei rahun kedas no rahun derrepente deʼit.
14 Ida-neʼe sei rahun hanesan sanan-rai boot ,
Neʼebé baku rahun ona toʼo la iha pedasuk ida mak sei hela
Atu uza hodi raʼut ahi husi ahi fatin
Ka atu kuru bee uitoan husi bee-lihun.”
15 Tanba Naʼi Ukun-Naʼin Boot Liu, Jeová, Maromak neʼebé Santu ba Izraél dehan nuneʼe:
“Imi sei hetan salvasaun se imi fila fali ba haʼu no hein deʼit ba haʼu;
Imi sei hetan forsa se imi kalma nafatin no tau fiar ba haʼu.”
Maibé imi lakohi.
16 Duké halo nuneʼe, imi dehan fali: “Lae, ami sei halai hodi saʼe kuda!”
Tan neʼe, imi sei halai duni.
Imi dehan: “Ami sei saʼe kuda neʼebé halai lalais!”
Tan neʼe, sira neʼebé duni tuir imi sei halai lalais.
17 Ema naʼin-rihun ida sei nakdedar tanba taʼuk ema ida;
No tanba taʼuk ema naʼin-lima imi sei halai
Toʼo ema restu husi imi sai deʼit hanesan ai-riin ida iha foho-tutun,
Hanesan ai-riin sinál nian iha foho-oan ida.
18 Maibé Jeová hein ho pasiénsia atu hatudu laran-diʼak ba imi,
No nia sei hamriik hodi hatudu laran-sadiʼa ba imi.
Tanba Jeová mak Maromak justisa nian.
Ksolok ba ema sira neʼebé hein nafatin ba nia.
19 Bainhira povu neʼe hela iha Siaun, iha Jeruzalein, imi sei la tanis tan. Maromak sei hatudu duni laran-diʼak ba imi bainhira imi husu ajuda husi nia; nia sei hatán kedas bainhira nia rona imi halerik.
20 Maski Jeová, imi-nia Mestre Boot, sei fó-terus ba imi nuʼudar imi-nia paun no fó susar nuʼudar imi-nia bee, maibé nia sei la subar tan nia an, no imi sei haree imi-nia Mestre Boot ho imi-nia matan rasik.
21 No se imi laʼo sala ba sorin loos ka ba sorin karuk, imi-nia tilun rasik sei rona lian ida husi imi-nia kotuk dehan: “Neʼe mak dalan. Laʼo tuir bá”.
22 No imi sei hafoʼer osan-mutin neʼebé taka imi-nia estátua neʼebé bahat ona no osan-mean neʼebé taka imi-nia estátua besi nian. Imi sei soe tiha sira hanesan hena menstruasaun nian no dehan ba estátua sira-neʼe: “Neʼe foʼer!”
23 No Maromak sei fó udan ba fini neʼebé imi kuda iha rai, no ai-han neʼebé moris husi rai sei sai barak no diʼak liu. Iha loron neʼebá imi-nia animál-hakiak sei han duʼut iha fatin neʼebé luan. 24 No karau ho kuda-burru sira neʼebé uza atu fila rai sei han trigu diʼak oioin, katak trigu diʼak neʼebé haketak ona husi ninia kulit hodi uza kanuru boot no garfu boot.
25 Iha loron neʼebé ema barak sei mate bainhira uma-aas sira monu, iha tempu neʼe foho aas hotu no foho-oan hotu sei iha mota no bee-dalan.
26 No iha loron neʼebé Jeová falun ninia povu nia kanek no kura ninia povu nia kanek todan husi ninia kastigu, naroman husi fulan tomak sei sai hanesan naroman husi loro-matan; no naroman husi loro-matan sei sai naroman liután ba dala hitu, hanesan naroman ba loron hitu nian.
27 Haree bá! Jeová mai daudaun husi fatin neʼebé dook,
Nia mai ho ninia hirus no ho kalohan metan.
Ninia ibun nakonu ho hirus,
No ninia nanál mak hanesan ahi-lakan makaʼas.
28 Ninia espíritu mak hanesan bee boot iha mota neʼebé saʼe toʼo kakorok,
Nia sei doko nasaun sira toʼo sira lakon tiha,
No nia sei tau kuda-freun ba povu sira-nia hasan-ruin hodi lori lakon sira.
29 Maibé imi-nia knananuk sei sai hanesan knananuk neʼebé imi kanta iha kalan
Bainhira imi prepara ba festa ida,
No imi-nia laran-ksolok sei sai hanesan ema
Neʼebé huu flauta
Nuʼudar nia laʼo ba foho Jeová nian, Fatuk ba Izraél.
30 Jeová sei halo ema rona ninia lian neʼebé kmanek
No nia sei hatudu sai forsa husi ninia liman ho hirus makaʼas,
Ho ahi neʼebé lakan boot,
Kalohan neʼebé lori udan-boot no rai-tarutu no udan jelu.
31 Tanba ho Jeová nia lian, rai-Asíria sei sai taʼuk;
Nia sei baku rai-Asíria ho rota.
32 No dala hotu neʼebé Jeová baku rai-Asíria
Ho ninia rota kastigu nian
Neʼe sei akompaña ho tamborín no arpa
Nuʼudar nia liki liman hasoru sira iha funu.
33 Tanba Maromak prepara ona fatin atu halakon rai-Asíria;
Fatin neʼe mós halo prontu ona ba sira-nia liurai.
Nia prepara ona ai-butuk neʼebé barak no luan,
Neʼebé nakonu ho ahi no ai.
Anin husi Jeová nia ibun neʼebé hanesan mota ahi nian
Sei sunu ida-neʼe.
31 Susar ba sira neʼebé tun ba rai-Ejitu atu husu ajuda,
Sira neʼebé tau fiar ba kuda,
Sira neʼebé tau fiar ba kuda-karreta funu nian neʼebé barak loos,
No kuda funu nian tanba iha kbiit.
Maibé sira la buka ajuda husi Maromak neʼebé Santu ba Izraél,
No sira la buka Jeová.
2 aibé Maromak mós hatudu matenek no sei lori susar,
No nia sei la dada fali ninia liafuan sira.
Nia sei hamriik hodi kontra hasoru ema aat nia umakain
No kontra sira neʼebé ajuda ema aat.
3 Maibé ema Ejitu mak ema deʼit, laʼós Maromak;
Sira-nia kuda mak isin deʼit, laʼós espíritu.
Bainhira Jeová lolo ninia liman,
Ema neʼebé fó ajuda sei sidi
No ema neʼebé husu ajuda sei monu;
Sira hotu sei lakon mohu dala ida deʼit.
4 Tanba Jeová fó sai ona ba haʼu, hodi dehan:
“Hanesan leaun ida neʼebé forte hasai lian tanba animál neʼebé nia foin oho,
Bainhira bibi-atan hotu bolu malu hamutuk atu kontra leaun neʼe,
Nia la sai taʼuk tanba sira-nia lian
Ka la hakfodak tanba sira-nia barullu,
Nuneʼe mós ho Jeová, ukun-naʼin ba tropa lalehan nian, sei tun atu halo funu ho aten-brani
Iha Foho Siaun no ninia foho-oan sira-nia leten.
5 Hanesan manu neʼebé semo tun, nuneʼe mós Jeová, ukun-naʼin ba tropa lalehan nian, sei defende Jeruzalein.
Nia sei defende Jeruzalein no salva sidade neʼe.
Nia sei proteje no salva Jeruzalein.”
6 “Oh povu Izraél, fila fali ba Ida neʼebé imi kontra ho ulun-toos.
7 Tanba iha loron neʼebá imi ida-idak sei nega imi-nia maromak folin-laek sira husi osan-mutin no osan-mean, neʼebé imi halo ho imi-nia liman rasik no neʼe mak hahalok sala.
8 No Asíria sei monu ho surik, maibé laʼós ho ema nia surik;
No surik ida mak sei tolan nia, maibé laʼós ho ema nia surik.
Nia sei halai tanba surik,
No ninia mane joven sira sei sai nuʼudar atan atu halo serbisu.
9 No ida neʼebé nia tau fiar sei lakon tiha tanba taʼuk,
No ninia ulun-naʼin sira sei taʼuk tanba ai-riin sinál nian”, Jeová mak fó sai ida-neʼe.
Ninia ahi-oan iha Siaun no ninia ahi-matan iha Jeruzalein.
32 Haree bá! Liurai ida sei ukun ho hahalok loos,
No ulun-naʼin sira sei ukun ho justisa.
2 Sira ida-idak sei sai hanesan subar-fatin husi anin,
No fatin mahon husi udan-boot,
Hanesan bee neʼebé suli iha rai-maran,
Hanesan mahon husi fatuk-boot iha rai-maran.
3 Tuirmai ema neʼebé bele haree sei la taka matan tan,
No ema neʼebé bele rona sei tau atensaun.
4 Ema neʼebé ansi sei hanoin didiʼak kona-ba koñesimentu,
No ema neʼebé hasan-toos sei koʼalia la sidi no koʼalia moos.
5 Ema sei la bolu tan ema aat nuʼudar ema laran-luak,
No la bolu tan ema neʼebé la iha morál nuʼudar ema-boot;
6 Tanba ema beik sei koʼalia buat beik,
No ninia laran sei planu kona-ba buat aat,
Atu habelar hahalok kontra Maromak no koʼalia buat aat hasoru Jeová,
Nia la fó ai-han ruma ba ema neʼebé hamlaha
No la fó bee ba ema neʼebé hamrook atu hemu.
7 Ema neʼebé la iha morál, nia hahalok sira mak aat;
Nia habelar hahalok la iha moe
Atu harahun ema neʼebé iha susar laran ho lia-bosok,
Nia harahun ema kiak maski ema kiak koʼalia buat loos.
8 Maibé ema laran-luak, hakarak hatudu laran-luak,
No nia sei kontinua atu hatudu laran-luak.
9 “Oh feto sira neʼebé baruk-teen, hadeer bá no rona haʼu-nia lian!
Oan-feto neʼebé la hanoin barak, see tilun ba buat neʼebé haʼu hatete!
10 Liu tiha tinan ida, imi neʼebé la hanoin barak sei sai nakdedar,
Tanba maski tempu uvas nian remata ona, maibé imi sei la halibur uvas-fuan ida.
11 Oh feto sira neʼebé baruk-teen, nakdedar bá!
Imi neʼebé la hanoin barak, nakdedar bá!
Halo imi-nia an sai isin-tanan,
No kesi hena karón iha imi-nia knotak.
12 Baku imi-nia hirus-matan hodi tanis
Tanba buat neʼebé akontese ona ba toʼos neʼebé diʼak no toʼos-uvas neʼebé buras.
13 Tanba haʼu-nia povu nia rai sei taka ho ai-tarak no duʼut tarak;
Ai-tarak sira sei nakonu iha uma ksolok nian hotu,
Sin, iha sidade ksolok nian.
14 Tanba uma aas neʼebé seguru sai mamuk ona;
Sidade neʼebé barullu sai mamuk ona.
Ofel no ninia fatin aas sai ona rai-fuik ba nafatin,
Fatin neʼebé kuda-burru fuik gosta,
No fatin neʼebé bibi-lubun sira han duʼut,
15 Toʼo tempu neʼebé Maromak fakar ninia espíritu ba ita,
No rai-fuik sei sai fali toʼos ai-fuan nian,
No ema sei haree toʼos ai-fuan nian hanesan ai-laran.
16 Tuirmai justisa sei hela iha rai-fuik,
No hahalok loos sei hela iha toʼos ai-fuan nian.
17 Rezultadu husi hahalok loos mak dame,
No rezultadu husi hahalok loos mak hakmatek no seguru ba nafatin.
18 Haʼu-nia povu sei hela iha fatin neʼebé iha dame,
Sira sei hela iha fatin neʼebé hakmatek no seguru.
19 Maibé udan jelu sei estraga no halo tetuk ai-laran,
No sidade sei sai rai-tetuk.
20 Ksolok ba imi neʼebé kuda fini besik bee ninin hotu,
No ba imi neʼebé kore karau no kuda-burru sira.”
33 Susar ba ó neʼebé estraga ema nia rai maski ó-nia rai seidauk hetan estraga;
Ó neʼebé lohi ema maski ó seidauk hetan lohi!
Bainhira ó remata ona atu estraga, ó mós sei hetan estraga.
Bainhira ó remata ona atu lohi, ó mós sei hetan lohi.
2 Oh Jeová, hatudu laran-diʼak ba ami.
Ami tau esperansa iha Ita-Boot.
Dadeer-dadeer apoia ami ho Ita-nia liman,
Sin, sai ami-nia salvadór iha tempu susar.
3 Povu sira halai tanba rona lian tarutu.
Bainhira Ita hamriik, nasaun sira halai namkari.
4 Ema sei halibur ó-nia sasán hanesan gafañotu neʼebé hamlaha han buat hotu;
Ema sei halai lalais atu foti ó-nia sasán hanesan gafañotu barak.
5 Jeová sei hetan hahiʼi,
Tanba nia hela iha fatin aas iha leten.
Nia sei halo nakonu Siaun ho justisa no hahalok loos.
6 Iha loron sira neʼebá,
Hahalok matenek, koñesimentu, no taʼuk ba Jeová,
Neʼebé nuʼudar ninia rikusoin, mak sei lori salvasaun boot.
7 Haree bá! Sira-nia mane asuwaʼin sei hakilar iha dalan;
No ema neʼebé lori mensajen dame nian sei tanis makaʼas.
8 Dalan boot sira sai mamuk ona;
La iha ema ida mak laʼo iha dalan kiʼik sira.
Nia kontra ona aliansa neʼe;
Nia la simu ona sidade sira;
Nia la hanoin ema.
9 Rai neʼe lelir no namlaek ona.
Líbanu sai moe no dodok ona.
Saron sai ona hanesan rai-fuik maran,
Ai-tahan sira iha Basan no Karmel monu ona.
10 Jeová dehan: “Agora haʼu sei hamriik,
Agora haʼu sei lori hahiʼi ba haʼu-nia an;
Agora haʼu sei lori glória ba haʼu-nia an.
11 Imi sai isin-rua ho duʼut no imi tuur ahi ba duʼut-kain.
Imi-nia hanoin rasik sei tolan imi hanesan ahi.
12 No povu sei sai hanesan ahu-ruin neʼebé sunu iha ahi.
Ema sei sunu tiha sira iha ahi hanesan ai-tarak neʼebé tesi ona.
13 Imi neʼebé iha fatin dook, rona bá buat neʼebé haʼu sei halo!
No imi neʼebé besik, rekoñese haʼu-nia kbiit bá!
14 Ema sala-naʼin sira iha Siaun sai taʼuk;
Sira neʼebé kontra Maromak sai nakdedar:
‘Sé mak bele hela besik ahi neʼebé lakan makaʼas?
Sé mak bele hela besik ahi neʼebé la mate?’
15 Neʼe mak ema neʼebé kontinua halo hahalok loos,
Ema neʼebé koʼalia buat loos,
Ema neʼebé la bosok, la lohi atu hamatak ema,
Ema neʼebé ninia liman la simu osan hodi bobar lia-loos,
Ema neʼebé taka sira-nia tilun ba ema nia planu atu oho ema,
No ema neʼebé taka ninia matan atu la bele haree buat aat,
16 Nia sei hela iha foho neʼebé aas;
Ninia fatin seguru mak iha fatuk boot sira,
Nia sei simu ai-han,
No ninia bee sei la maran.”
17 Imi-nia matan sei haree liurai ida neʼebé kmanek;
No haree rai ida neʼebé dook tebes.
18 Iha imi-nia laran imi sei hanoin fali kona-ba buat neʼebé hataʼuk imi, hodi dehan:
“Sekretáriu iha neʼebé?
Ema neʼebé tetu impostu iha neʼebé?
Ema neʼebé sura uma aas sira iha neʼebé?”
19 Imi sei la haree tan povu neʼebé la hatene respeitu,
Povu ida neʼebé ninia língua susar liu atu komprende,
Neʼebé ninia lian hanesan ema hasan-toos no halo imi la komprende.
20 Haree bá Siaun, sidade neʼebé baibain ita halo ita-nia festa sira!
Imi-nia matan sei haree Jeruzalein nuʼudar hela-fatin neʼebé hakmatek,
Tenda ida neʼebé sei nunka muda.
Ninia pregu tenda nian sei nunka fokit sai,
No ninia tali ida mós sei nunka kotu.
21 Maibé iha neʼebá mak Jeová, Ida neʼebé Kbiit Boot,
Sei proteje ita hanesan mota no bee-dalan neʼebé luan haleʼu fatin ida,
Ró funu nian sei la liu
No ró boot mós sei la liu.
22 Tanba Jeová mak ita-nia Juis,
Jeová mak fó Ukun-Fuan ba ita,
Jeová mak ita-nia Liurai;
Nia mak Ida neʼebé sei salva ita.
23 Imi-nia inimigu nia ró talin sira sei kesi la metin;
Tali sira-neʼe la bele tahan netik ró nia riin no laan;
Iha tempu neʼebá ema sei fahe ba malu sasán neʼebé sira hadau ona;
No ema ain-kudeʼik mós sei foti sasán barak.
24 No la iha ema ida iha rai neʼebé sei dehan: “Haʼu moras.”
Povu neʼebé hela iha rai neʼe sei hetan duni perdua ba sira-nia sala.
34 Oh imi nasaun sira, mai besik atu rona,
Oh imi povu sira, tau atensaun bá.
Mundu no buat neʼebé iha laran,
No mós rai no buat hotu neʼebé moris iha rai, rona bá.
2 Tanba Jeová sai hirus hasoru nasaun hotu,
No ninia hirus kontra hasoru sira-nia soldadu hotu.
Nia sei halakon sira;
Nia sei entrega sira ba mate.
3 Ema sei soe sai tiha sira-nia mate-isin,
No dois husi sira-nia mate-isin sei saʼe ba leten;
Foho sira sei nabeen tanba sira-nia raan.
4 Tropa lalehan nian hotu sei dodok tiha,
No lalehan sei lulun tiha hanesan surat-tahan ida.
Lalehan nia tropa hotu sei namlaek,
Hanesan uvas-tahan namlaek neʼebé monu husi ninia hun
No ai-figeira fuan namlaek neʼebé monu husi ninia hun.
5 “Tanba iha lalehan haʼu-nia surik sei sai bokon ho raan.
Surik neʼe sei tun ba Edom hodi tesi lia,
Tun ba povu neʼebé haʼu deside ona atu halakon.
6 Jeová iha surik ida; ida-neʼe sei taka ho raan.
Ida-neʼe sei taka ho bokur,
Ho raan husi bibi-malae aman no bibi-timur,
Ho bokur husi bibi-malae nia rins.
Tanba Jeová sei halo sakrifísiu ida iha Bozra,
No nia sei oho ema barak iha rai-Edom.
7 Karau-aman fuik sei mate ho sira,
Karau sei mate ho karau sira neʼebé iha kbiit boot.
Sira-nia rai sei bokon ho raan,
No sira-nia rai-rahun sei hoban ho bokur.”
8 Tanba Jeová hili ona loron ida atu selu fali,
Nia hili ona tinan atu fó kastigu ba inimigu tanba halo buat aat ba Siaun.
9 Ninia mota sira sei troka fali sai alkatraun,
No ninia rai-rahun sei sai fali fatuk neʼebé lakan,
No ninia rai sei sai fali alkatraun neʼebé lakan.
10 Iha kalan ka loron ahi sei la mate;
Ninia suar sei kontinua saʼe nafatin ba leten.
Husi jerasaun ba jerasaun rai neʼe sei nafatin mamuk;
No la iha ema neʼebé sei laʼo liu rai neʼe ba nafatin.
11 Manu-pelikano no fahi-tarak sei hela iha laran,
No manu-kakuuk no manu-metan sei hela iha laran.
Maromak sei sukat rai neʼe ho tali sukat nian no fatuk sukat nian
Atu hatudu katak rai neʼe sei sai mamuk no la iha folin.
12 Ninia ema-boot ida mós sei la sai liurai,
No ninia liurai-oan hotu sei la iha tan.
13 Ai-tarak sira sei moris iha ninia palásiu sira neʼebé metin,
Ai-horis fuik no duʼut tarak mak sei moris iha ninia moru aas sira.
Sidade neʼe sei sai toba-fatin ba asu-fuik sira,
No hela-fatin ba manu-avestrús.
14 Animál husi rai-fuik sei hasoru malu iha neʼebá hodi hasai lian,
No bibi-timur fuik sei bolu ninia maluk.
Sin, iha neʼebá mak manu-kalan sei hela no hetan fatin deskansa.
15 Samea sei halo knuuk no tolun iha neʼebá,
No sei iha oan no halibur sira hodi proteje sira iha ninia mahon.
Sin, manu-makikit sira sei halibur iha neʼebá, sira ida-idak ho sira-nia pár.
16 Buka didiʼak iha Jeová nia livru no lee neʼe ho lian makaʼas:
Animál sira-neʼe ida mós sei la lakon;
Sira ida mós sei la falta sira-nia pár,
Tanba Jeová nia ibun mak fó sai mandamentu neʼe,
No ninia espíritu mak halibur sira hamutuk.
17 Nia mak Ida neʼebé dada sorte ba sira,
No ninia liman rasik sukat ona fatin neʼebé fó ona ba sira.
Sira sei hela iha rai neʼe ba nafatin;
Sira sei hela iha laran husi jerasaun ba jerasaun.
35 Rai-fuik no rai-maran sei haksolok,
No rai-tetuk maran sei haksolok no sai nakonu ho ai-funan.
2 Rai neʼe sei sai buras duni;
Neʼe sei haksolok no haklalak ho kontente.
Líbanu nia glória sei entrega tiha ba rai neʼe,
No mós Karmel no Saron nia glória.
Sira sei haree Jeová nia glória, ita-nia Maromak nia kmanek.
3 Hametin ema fraku nia liman,
No hametin ema neʼebé ain-tuur nakdedar.
4 Hatete ba sira neʼebé laran-taridu, hodi dehan:
“Sai forte bá. Keta taʼuk.
Haree bá! Imi-nia Maromak rasik sei mai atu selu fali,
Maromak sei selu fali ba imi-nia inimigu.
Nia sei mai atu salva imi.”
5 Iha tempu neʼebá ema matan-delek sei haree fali,
No ema tilun-diuk sei rona fali.
6 Iha tempu neʼebá ema ain-kudeʼik sei haksoit hanesan bibi-rusa,
No ema monok nia nanál sei haklalak ho haksolok.
Tanba bee sei suli iha rai-fuik,
No mota sira sei suli iha rai-tetuk maran.
7 Rai-maran neʼebé manas sei sai fali bee-lihun ho duʼut aas,
No bee sei suli iha rai neʼebé maran-dekor.
Iha fatin neʼebé uluk asu-fuik sira deskansa bá,
Sei iha duʼut matak, duʼut aas no duʼut-papiru.
8 No iha neʼebá sei iha dalan boot,
Sin, dalan ida neʼebé bolu nuʼudar Dalan Santu.
Ema neʼebé la moos sei la laʼo iha dalan neʼe.
Dalan neʼe ba deʼit sira neʼebé laʼo tuir nia;
Ema beik labele laʼo iha dalan neʼe.
9 La iha leaun ida iha neʼebá,
No animál fuik neʼebé siʼak sei la tama iha laran.
Ema sei la hetan animál sira-neʼe iha neʼebá;
Só deʼit ema sira neʼebé Maromak sosa fali ona mak laʼo iha neʼebá.
10 Ema sira neʼebé Jeová sosa fali ona mak sei fila fali no toʼo iha Siaun ho haklalak ksolok nian.
No sira sei tau koroa ksolok nian iha sira-nia ulun ba nafatin.
Ksolok no kontente mak sira-nian,
No tanis no halerik sei la iha tan.
2 Tuirmai liurai Asíria haruka Rabsake sai husi Lakis hamutuk ho soldadu barak hodi bá hasoru Liurai Ezekias iha Jeruzalein. Soldadu sira-neʼe hamriik besik bee-dalan neʼebé suli husi bee-lihun iha leten, besik dalan boot ba rai-luan neʼebé ema fase roupa.
3 Tuirmai Eliakim, Hilkias nia oan-mane, neʼebé tau matan ba palásiu, hamutuk ho sekretáriu Sebna, no mós Joá, Asaf nia oan-mane, neʼebé nuʼudar liurai nia hakerek-naʼin, sira sai mai hasoru nia.
4 Entaun Rabsake dehan ba sira: “Favór ida, hatete ba Ezekias: ‘Neʼe mak liafuan husi liurai boot, liurai husi rai-Asíria: “Ó-nia fiar nia hun mak saida?
5 Ó hatete: ‘Haʼu iha planu no kbiit atu halo funu’, maibé neʼe mak liafuan mamuk deʼit. Ó tau fiar ba sé? Tansá mak ó brani atu kontra haʼu?
8 Entaun favór ida, agora taru ho haʼu-nia naʼi liurai Asíria: Haʼu sei fó kuda 2.000 ba ó no haree toʼok se ó bele buka-hetan soldadu neʼebé toʼo atu saʼe kuda sira-neʼe.
9 Entaun, oinsá mak ó bele duni sai ulun-naʼin neʼebé kiʼik liu entre haʼu-nia naʼi nia atan sira, se ó tau fiar ba rai-Ejitu nia kuda-karreta funu nian no soldadu neʼebé saʼe kuda?
10 Jeová mak fó direitu ba haʼu hodi saʼe mai atu halakon rai neʼe. Jeová rasik dehan ba haʼu: ‘Saʼe ba kontra no halakon rai neʼe.
11 Ho ida-neʼe, Eliakim, Sebna, no Joá hatete ba Rabsake: “Favór ida, koʼalia ba Ita-nia atan sira iha lia-aramaiku, tanba ami bele komprende ida-neʼe; labele koʼalia ba ami ho ema Judeu nia língua tanba povu iha moru leten rona hela.”
12 Maibé Rabsake hatete: “Haʼu-nia naʼi haruka haʼu atu koʼalia liafuan sira-neʼe laʼós ba imi-nia naʼi no imi deʼit, loos ka lae? Maibé mensajen neʼe mós ba ema hotu neʼebé iha moru leten, katak sira hotu neʼebé sei han sira-nia tee rasik no hemu sira-nia mii rasik hamutuk ho imi, loos ka lae?”
13 Tuirmai Rabsake hamriik no hakilar ho lian makaʼas iha lian Judeu nian, hodi dehan: “Rona ba liafuan husi liurai boot, liurai husi rai-Asíria.
14 Liurai dehan: ‘Keta husik Ezekias lohi imi, tanba nia la iha kbiit atu salva imi.
16 Keta rona ba Ezekias, tanba liurai Asíria dehan nuneʼe: “Halo dame ho haʼu no rende an bá, nuneʼe imi ida-idak sei han uvas-fuan husi imi-nia toʼos-uvas rasik no han figeira-fuan husi imi-nia ai-figeira rasik no hemu bee husi imi-nia bee-posu rasik,
17 toʼo haʼu mai no lori imi ba rai neʼebé hanesan imi-nian rasik, rai neʼebé iha ai-han barak no tua-uvas foun, rai neʼebé iha paun barak no iha toʼos-uvas.
18 Keta husik Ezekias lohi imi, hodi dehan: ‘Jeová sei salva ita.’ Maromak sira neʼebé nasaun oioin adora, bele salva sira-nia rai husi liurai Asíria nia liman ka lae?
19 Maromak sira husi sidade Hamat no Arpad iha neʼebé? Maromak sira husi sidade Sefarvaim iha neʼebé? No sira bele salva Samaria husi haʼu-nia liman ka lae?
20 Husi rai sira-neʼe, maromak neʼebé mak salva ona ninia rai husi haʼu-nia liman? Jeová bele salva Jeruzalein husi haʼu-nia liman ka?
21 Maibé sira kontinua nonook no la koʼalia liafuan ida ba nia, tanba liurai fó ona mandamentu dehan: “Imi keta hatán ba nia.”
37 Bainhira Liurai Ezekias rona ida-neʼe, nia lees ninia roupa no hatais hena karón no tama ba Jeová nia uma.
2 Tuirmai nia haruka Eliakim neʼebé tau matan ba palásiu, hamutuk ho Sebna, liurai nia sekretáriu, no amlulik nia katuas sira, no sira hatais hena karón, hodi bá hasoru profeta Isaias, Amoz nia oan-mane.
3 Sira hatete ba nia: “Ezekias dehan nuneʼe: ‘Ohin mak loron terus nian, loron kastigu nian, no loron moe nian; loron neʼe hanesan tempu neʼebé bebé ida besik atu moris, maibé inan la iha forsa atu tuur ahi ba bebé neʼe.
4 Karik Jeová, Ita-Boot nia Maromak, sei rona ba Rabsake nia liafuan sira. Ninia naʼi liurai Asíria haruka nia mai atu sadik Maromak neʼebé moris. Ita-nia Maromak Jeová sei selu fali ba nia tuir liafuan neʼebé Maromak rona ona. Tan neʼe, harohan bá atu husu ajuda ba ema restu neʼebé sei moris hela.
5 Entaun Liurai Ezekias nia atan sira bá hasoru Isaias,
6 no Isaias dehan ba sira: “Neʼe mak liafuan neʼebé imi tenke fó sai ba imi-nia naʼi: ‘Jeová dehan nuneʼe: “Keta taʼuk tanba liafuan sira neʼebé ó rona husi liurai Asíria nia atan neʼebé koʼalia aat haʼu.
7 Haʼu sei tau ideia ida iha ninia neon, no nia sei rona mensajen no fila fali ba ninia rai rasik; no haʼu sei halo nia mate ho surik iha ninia rai.
8 Depois neʼe, Rabsake rona katak liurai Asíria sai ona husi Lakis, no Rabsake fila fali ba nia no haree katak nia halo funu daudaun hasoru Libna.
9 Iha tempu neʼe, liurai rona katak Liurai Tirhaka husi Etiópia mai ona atu halo funu hasoru nia. Bainhira nia rona ida-neʼe, nia haruka ema lori tan mensajen ba Ezekias, hodi dehan:
10 “Neʼe mak liafuan neʼebé ó tenke fó sai ba Liurai Ezekias husi Judá: ‘Keta husik Maromak neʼebé ó fiar atu lohi ó, hodi dehan: “Jeruzalein sei la entrega ba liurai Asíria nia liman.”
11 Haree bá! Ó rona ona kona-ba buat neʼebé liurai sira husi Asíria halo ba rai hotu hodi harahun sira. Entaun ó-nia sidade mesak deʼit mak sei la rahun ka?
12 Maromak sira husi nasaun oioin neʼebé haʼu-nia beiʼala sira halakon ona bele salva sira ka lae? Gozan, Haran, Resef, ho povu husi Eden neʼebé iha Tel-Asar, sira agora iha neʼebé?
13 Liurai husi Hamat, liurai husi Arpad, no liurai sira husi Sefarvaim, Hena, no Iva iha neʼebé?
14 Ezekias simu karta sira-neʼe husi atan sira neʼebé lori mensajen no lee karta sira-neʼe. Tuirmai Ezekias saʼe ba Jeová nia uma no tau karta sira-neʼe iha Jeová nia oin.
15 No Ezekias komesa harohan ba Jeová, hodi dehan:
16 “Oh Jeová, ukun-naʼin ba tropa lalehan nian, Maromak Izraél nian, Ita tuur iha kadunan iha kerubín nia leten; husi ukun sira hotu iha rai neʼe, Ita deʼit mak Maromak neʼebé loos. Ita mak halo lalehan no rai.
17 Oh Jeová, see tilun mai, no rona bá! Oh Jeová, loke Ita-nia matan, no haree bá! Rona bá liafuan hotu neʼebé Senakerib haruka mai atu sadik Maromak neʼebé moris.
18 Oh Jeová, ema hotu hatene ona katak liurai sira husi Asíria halakon rai sira hotu, inklui mós sira-nia rai rasik.
19 Sira soe tiha nasaun sira-neʼe nia maromak sira ba ahi, tanba neʼe laʼós maromak loloos maibé ema nia liman mak halo husi ai no fatuk. Tan neʼe mak sira bele halakon maromak sira-neʼe.
20 Maibé agora, oh Jeová, ami-nia Maromak, salva ami husi ninia liman, atu nuneʼe ukun hotu iha rai neʼe bele hatene katak Ita deʼit mak Maromak, oh Jeová.”
21 Isaias, Amoz nia oan-mane, haruka lia-menon neʼe ba Ezekias, hodi dehan: “Jeová, Maromak Izraél nian, dehan nuneʼe: ‘Tanba ó harohan ba haʼu kona-ba Liurai Senakerib husi Asíria,
22 entaun neʼe mak liafuan neʼebé Jeová fó sai hasoru nia:
“Siaun nia oan-feto virjen hakribi ona ó, nia goza ó.
Jeruzalein nia oan-feto doko ulun ba ó.
23 Ó koʼalia aat no sadik sé?
Ó hasai lian
No hateke ho foti an ba sé?
Ó kontra ona Maromak neʼebé Santu ba Izraél!
24 Ó sadik ona Jeová liuhusi ó-nia atan, hodi dehan:
‘Ho haʼu-nia kuda-karreta funu nian barak
Haʼu sei saʼe foho aas sira,
Bá parte dook liu husi Líbanu.
Haʼu sei tesi ninia ai-sedru neʼebé aas, no tesi ninia ai-junipero neʼebé diʼak liu.
Haʼu sei tama ba ninia fatin aas liu, no tama ba ninia ai-laran neʼebé boot.
25 Haʼu sei keʼe bee-posu no hemu bee;
Haʼu sei hamaran mota sira iha rai-Ejitu ho haʼu-nia ain-okos.’
26 Ó seidauk rona ka? Ida-neʼe deside nanis ona husi tempu ulukliu bá.
Haʼu prepara ida-neʼe husi loron sira neʼebé liu ona.
Agora haʼu sei kumpre ida-neʼe.
Ó sei halo sidade neʼebé metin sai fali fatuk rahun butuk.
27 Povu iha sidade sira-neʼe sei sai kbiit-laek;
Sira sei sai taʼuk no moe.
Sira sei sai hanesan ai-horis iha rai-luan no duʼut matak,
Hanesan duʼut iha uma-kakuluk neʼebé sai maran tanba anin husi parte leste.
28 Maibé haʼu hatene didiʼak bainhira ó tuur, bainhira ó laʼo sai, bainhira ó tama,
No bainhira ó sai hirus tebes hasoru haʼu,
29 Tanba ó sai hirus hasoru haʼu no haʼu rona ona ó-nia lian hirus nian.
Entaun haʼu sei tau kail iha ó-nia inus no tau kuda-freun iha ó-nia ibun,
No haʼu sei lori ó fila liuhusi dalan neʼebé ó mai.”
30 Ida-neʼe sei sai sinál ba ó: Tinan neʼe imi sei han ai-han neʼebé moris mesak deʼit; no iha tinan segundu, imi sei han ai-han neʼebé moris mesak deʼit; maibé iha tinan terseiru imi sei kuda fini no koʼa, no imi sei kuda uvas no han ninia fuan.
31 Ema husi Judá nia umakain neʼebé la mate, katak sira neʼebé restu, sei sai abut no fó fuan.
32 Tanba ema restu sei sai husi Jeruzalein no sira neʼebé moris hela sei sai husi Foho Siaun. Jeová, ukun-naʼin ba tropa lalehan nian, mak sei halo ida-neʼe ho ninia laran-manas.
33 Tan neʼe mak Jeová fó sai liafuan tuirmai kona-ba liurai Asíria:
“Nia sei la tama ba sidade neʼe
Nia sei la hana ninia rama-oan ida iha neʼebá
Ka kontra sidade neʼe ho eskudu
Ka ateru rai hodi ataka sidade neʼe.
34 Jeová dehan: ‘Nia sei fila liuhusi dalan neʼebé nia mai;
Nia sei la tama ba sidade neʼe.
35 Haʼu sei defende no salva sidade neʼe tanba haʼu-nia naran
No tanba haʼu-nia atan David.
36 Tuirmai Jeová nia anju sai hodi oho ema Asíria naʼin–185.000 iha soldadu nia hela-fatin. Bainhira ema hadeer iha dadeer-saan, sira haree mate-isin sira hotu.
37 Entaun Liurai Senakerib husi rai-Asíria fila fali ba Nínive no nia hela iha neʼebá.
38 Loron ida, bainhira nia hakruʼuk an iha ninia maromak Nisrok nia templu, ninia oan-mane rasik Adramelek no Sarezer oho nia ho surik no tuirmai sira halai ba rai-Ararat. Nuneʼe ninia oan-mane Esar-Hadon sai fali liurai hodi troka nia.
38 Iha tempu neʼebá Ezekias moras todan toʼo besik mate. Tuirmai profeta Isaias, Amoz nia oan-mane, mai no hatete ba nia: “Jeová dehan nuneʼe: ‘Fó matadalan ba ó-nia umakain tanba ó sei mate; ó sei la sai diʼak fali.
2 Ho ida-neʼe, Ezekias fila oin ba moru no komesa halo orasaun ba Jeová, hodi dehan:
3 “Oh Jeová, haʼu husu Ita-Boot, favór ida, hanoin-hetan oinsá haʼu laʼo ona ho laran-metin iha Ita-nia oin. Haʼu serbí Ita ho laran tomak, no haʼu halo buat neʼebé diʼak iha Ita-nia oin.” No Ezekias komesa tanis makaʼas.
4 Tuirmai Jeová koʼalia ba Isaias, hodi dehan:
5 “Fila fali bá no hatete ba Ezekias: ‘Jeová, ó-nia beiʼala David nia Maromak, dehan nuneʼe: “Haʼu rona ona ó-nia orasaun. Haʼu haree ona ó-nia matan-been. Nuneʼe haʼu sei aumenta tinan 15 tan ba ó-nia moris,
6 no haʼu sei salva ó no sidade neʼe husi liurai Asíria nia liman, no haʼu sei defende sidade neʼe.
7 Jeová fó sinál ida ba ó nuʼudar prova katak nia sei kumpre liafuan neʼebé nia hatete ona. Jeová dehan:
8 Haʼu sei halo lalatak iha Akaz nia eskada atu hakiduk fali ba eskada sanulu. Ho ida-neʼe, lalatak neʼe hakiduk fali ba eskada sanulu husi ninia fatin.
9 Tuirmai neʼe mak liafuan neʼebé Liurai Ezekias husi rai-Judá hakerek bainhira nia sai diʼak fali ona husi ninia moras.
10 Haʼu dehan: “Bainhira haʼu seidauk idade boot
Haʼu tenke tama ba rate nia portaun.
Haʼu sei lakon haʼu-nia tinan restu sira.”
11 Haʼu dehan: “Haʼu sei la haree Jah, Jah nia laran-diʼak iha ema moris nia leet.
Haʼu sei la haree tan ema
Tanba haʼu sei hamutuk ho ema mate sira.
12 Haʼu-nia hela-fatin mak hanesan bibi-atan nia tenda
Neʼebé sobu no ema hasai tiha ona.
Haʼu lulun ona haʼu-nia moris hanesan ema lulun hena;
Nia tesi haʼu hanesan ema tesi kabas.
Husi dadeer toʼo kalan Ita entrega haʼu ba susar.
13 Haʼu halo kalma haʼu-nia an toʼo dadeer.
Hanesan leaun ida, nia kontinua harahun haʼu-nia ruin hotu;
Husi dadeer toʼo kalan Ita entrega haʼu ba susar.
14 Hanesan manu kiʼik sira, haʼu nafatin halo lian;
Haʼu kontinua halo lian hanesan manu-pombu.
Haʼu-nia matan hateke ba leten ho kole:
‘Oh Jeová, haʼu iha susar boot nia laran;
Apoia haʼu bá!’
15 Haʼu bele koʼalia tan saida?
Nia dehan ona ba haʼu no kumpre ida-neʼe.
Tanba haʼu hetan ona susar boot
Agora haʼu sei laʼo ho haraik-an durante haʼu-nia moris tomak.
16 ‘Oh Jeová, tanba Ita mak ema hotu bele moris,
No tanba buat sira-neʼe mak haʼu bele dada-iis.
Ita sei fó saúde diʼak fali ba haʼu no proteje haʼu-nia moris.
17 Haree bá! Duké dame, haʼu hetan susar
Maibé tanba Ita hadomi haʼu,
Ita proteje haʼu hodi la husik haʼu tama ba rai-kuak mate nian.
Ita soe tiha haʼu-nia sala hotu ba Ita-nia kotuk.
18 Tanba rate la bele fó glória ba Ita,
Mate la bele hahiʼi Ita.
Sira neʼebé tama ba rai-kuak la bele tau fiar ba Ita-nia laran-metin.
19 Sira neʼebé moris hela mak bele hahiʼi Ita,
Hanesan haʼu halo iha loron neʼe.
Aman ida bele hanorin ninia oan sira kona-ba Ita-nia laran-metin.
20 Oh Jeová, salva haʼu,
No ami sei toka arpa no kanta haʼu-nia knananuk
Iha Jeová nia uma iha loron hotu neʼebé ami moris.
21 Tuirmai Isaias dehan: “Lori ai-figeira fuan maran no tau neʼe ba ninia fisur, atu nuneʼe nia bele sai diʼak fali.” 22 No Ezekias husu: “Sinál saida mak hatudu katak haʼu sei laʼo ba Jeová nia uma?”
39 Iha tempu neʼebá liurai Babilónia, Merodak-Baladan, Baladan nia oan-mane, haruka ninia atan sira lori karta no prezente ba Liurai Ezekias, tanba nia rona katak uluk Ezekias moras maibé agora nia diʼak fali ona.
2 Ezekias simu sira ho kontente no hatudu ba sira fatin neʼebé nia tau ninia rikusoin, katak osan-mutin, osan-mean, mina bálsamu no mina folin-boot seluk, ninia armas funu nian hotu, no buat hotu neʼebé iha ninia osan-fatin. Ezekias hatudu ba sira buat hotu iha ninia palásiu no iha ninia ukun hotu.
3 Depois neʼe, profeta Isaias mai hasoru Liurai Ezekias no husu nia: “Mane sira-neʼe dehan saida? Sira mai husi neʼebé?” Ezekias hatán: “Sira mai husi fatin dook, husi rai-Babilónia.”
4 Tuirmai nia husu: “Saida mak sira haree iha ó-nia palásiu?” Ezekias hatán: “Sira haree buat hotu iha haʼu-nia palásiu. Haʼu hatudu ba sira buat hotu iha fatin neʼebé haʼu tau haʼu-nia rikusoin.”
5 Tuirmai Isaias hatete ba Ezekias: “Rona bá liafuan husi Jeová, ukun-naʼin ba tropa lalehan nian:
6 ‘Haree bá! Tempu sei toʼo mai, no ema sei lori ba Babilónia buat hotu neʼebé iha ó-nia palásiu no buat hotu neʼebé ó-nia beiʼala sira rai hela toʼo ohin loron. Sira sei la husik hela buat ida’, Jeová dehan.
7 ‘No sira sei lori ó-nia oan-mane balu ba Babilónia atu sai nuʼudar ema-boot iha liurai Babilónia nia palásiu.
8 Ho ida-neʼe, Ezekias hatete ba Isaias: “Jeová nia liafuan neʼebé ó fó sai ona mak diʼak.” Nia hatutan tan: “Tanba sei iha dame no hakmatek durante haʼu-nia moris.”
40 Imi-nia Maromak dehan: “Fó kmaan bá haʼu-nia povu, fó kmaan ba sira.
2 Koʼalia hodi book Jeruzalein nia laran,
No fó sai ba nia katak nia kumpre ona ninia serbisu nuʼudar atan,
Katak nia selu hotu ona ninia sala sira.
Nia simu ona kastigu ba ninia sala hotu husi Jeová nia liman.”
3 Ema ida hasai lian iha rai-fuik, hodi dehan:
“Prepara Jeová nia dalan!
Halo loos dalan-boot ba ita-nia Maromak liuhusi rai-fuik maran.
4 Foho-leet hotu sei ateru tiha,
No foho aas no foho-oan hotu sei halo sai tetuk.
Rai neʼebé la tetuk sei halo kabeer,
No rai neʼebé tun-saʼe sei halo sai rai-tetuk.
5 Jeová sei hatudu sai ninia glória,
No ema hotu hamutuk sei haree ida-neʼe,
Tanba Jeová rasik mak koʼalia ona kona-ba neʼe.”
6 Rona bá! Ema ida dehan: “Fó avizu bá!”
No ema seluk husu: “Avizu saida mak haʼu tenke fó sai?”
“Ema hotu mak hanesan duʼut matak.
Sira hotu nia domin mak hanesan ai-funan iha rai-luan.
7 Duʼut matak sai maran ona,
No ai-funan sai namlaek ona,
Tanba Jeová mak huu nia iis ba ida-neʼe.
Ema sira mak hanesan duni ho duʼut matak.
8 Duʼut matak sei sai maran,
No ai-funan sei sai namlaek,
Maibé ita-nia Maromak nia liafuan sei hela ba nafatin.”
9 Oh feto neʼebé lori liafuan diʼak ba Siaun,
Saʼe ba foho neʼebé aas.
Oh feto neʼebé lori liafuan diʼak ba Jeruzalein,
Hasai lian bá ho makaʼas.
Hasai lian bá, keta taʼuk.
Fó avizu ba sidade sira iha Judá, hodi dehan: “Neʼe mak imi-nia Maromak.”
10 Haree bá! Jeová, Naʼi Ukun-Naʼin Boot Liu, sei mai ho kbiit,
Nia sei ukun ho nia liman-loos.
Haree bá! Nia lori kolen hamutuk ho nia,
Nia prontu atu selu ema nia kolen.
11 Hanesan bibi-atan ida, nia sei tau matan ba ninia bibi-lubun.
Ho ninia liman nia sei halibur bibi-oan sira,
No nia sei koʼus sira iha ninia hirus-matan.
Ho kuidadu mak nia sei dirije bibi-inan neʼebé fó-susu ba bibi-oan.
12 Sé mak bele tau tasi-been hotu iha ninia liman laran?
Sé mak bele sukat lalehan ho nia liman sukat ida?
Sé mak halibur ona rai-uut hotu husi rai iha fatin sukat nian?
Sé mak tetu ona foho sira iha dasin
No tetu ona foho-oan sira iha dasin?
13 Sé mak bele sukat Jeová nia espíritu?
Sé mak bele hanorin nia nuʼudar ninia konsellu-naʼin?
14 Nia husu konsellu ba sé hodi bele komprende?
Sé mak hanorin nia kona-ba dalan justisa nian?
Sé mak hanorin koñesimentu ba nia?
Sé mak hatudu ba nia dalan ba matenek neʼebé loos?
15 Haree bá! Nasaun sira mak hanesan bee turuk ida husi balde,
No nia haree sira hanesan rai-uut iha dasin leten.
Haree bá! Nia hiʼit saʼe illa sira hanesan rai-rahun.
16 Ai-hun hotu iha Líbanu mós la toʼo atu sunu iha ninia altár,
No animál fuik sira iha Líbanu mós la toʼo atu hasaʼe ba nia nuʼudar sakrifísiu sunu nian.
17 Nasaun hotu la iha folin ida iha ninia oin;
Nia haree sira hanesan buat neʼebé la vale, laʼós realidade.
18 Imi bele kompara Maromak ho sé?
No nia haree hanesan saida?
19 Badain halo estátua ida,
Badain-besi taka ida-neʼe ho osan-mean,
No nia halo korrente husi osan-mutin atu hafurak ida-neʼe.
20 Nia hili ai-hun ida nuʼudar kontribuisaun,
Ai-hun neʼebé sei la sai dodok.
Nia buka badain neʼebé matenek
Atu bahat estátua ida neʼebé la nakdoko.
21 Imi la hatene ka?
Imi la rona ka?
Ida-neʼe fó sai tiha ona ba imi husi uluk kedas, loos ka lae?
Imi seidauk komprende husi tempu neʼebé tau rai nia hun ka?
22 Maromak hela iha mundu kabuar nia leten,
No sira neʼebé hela iha mundu mak hanesan gafañotu.
Nia nahe lalehan hanesan hena mihis ida,
No nia nahe lalehan hanesan tenda atu hela iha laran.
23 Nia halo ema-boot sira sai folin-laek
No halo juis sira iha rai sai la folin.
24 Sira hanesan ai-horis neʼebé foin kuda,
Sira hanesan fini neʼebé foin kari,
Sira-nia abut seidauk metin iha rai,
No anin huu toʼo halo sira namlaek,
No anin lori lakon sira hanesan ai-tarak.
25 Maromak neʼebé Santu dehan: “Imi bele kompara haʼu ho sé? Sé mak hanesan ho haʼu?
26 Foti matan ba lalehan no haree.
Sé mak kria buat sira-neʼe?
Neʼe mak Ida neʼebé dirije ninia tropa sira tuir sira-nia númeru;
Nia bolu sira ida-idak nia naran.
Tanba ninia forsa boot no ninia kbiit neʼebé kmanek,
Sira ida mós la falta.
27 Oh Jacob, oh Izraél, tansá mak ó dehan:
‘Haʼu-nia dalan sira subar husi Jeová,
No haʼu la simu justisa husi Maromak’?
28 Ó la hatene ka? Ó la rona ka?
Jeová mak Kriadór ba buat hotu iha rai, nia mak Maromak neʼebé iha ba nafatin.
Nia nunka sai kole ka fraku.
La iha ema ida mak bele hatene ninia matenek.
29 Nia fó kbiit ba ema neʼebé kole
No fó forsa boot ba sira neʼebé fraku.
30 Labarik-mane sira sei sai kole no fraku,
No mane joven sira sei sidi no monu,
31 Maibé ema sira neʼebé tau esperansa ba Jeová sei hetan fali kbiit.
Sira sei semo aas hanesan manu-makikit.
Sira sei halai no la sai fraku;
Sira sei laʼo no la sai kole.”
41 “Oh illa sira, nonook no rona ba haʼu;
Husik nasaun sira hetan fali forsa.
Husik sira hakbesik mai; no husik sira koʼalia.
Mai ita halibur hamutuk no haʼu sei tesi lia.
2 Sé mak hili ema ida husi lorosaʼe,
No bolu ema neʼe atu halo ninia serbisu,
Atu entrega nasaun sira ba nia
No atu halo nia manán liurai sira?
Sé mak harahun sira ho ninia surik hodi halo sira sai hanesan rai-rahun,
Hanesan ai-tarak neʼebé anin huu sai iha ninia rama oin?
3 Nia duni tuir sira, no la iha buat ida hanetik nia
Atu laʼo tuir dalan sira neʼebé nia seidauk laʼo liu.
4 Sé mak book an hodi halo ida-neʼe?
Sé mak bolu jerasaun sira husi ulukliu?
Haʼu, Jeová, haʼu mak Ida neʼebé Primeiru;
No toʼo jerasaun neʼebé ikus, haʼu sempre hanesan.”
5 Illa sira haree ona ida-neʼe no sai taʼuk.
Rai nia rohan komesa nakdoko.
Ema hakbesik no hakat mai oin.
6 Sira ida-idak ajuda sira-nia maluk
No dehan ba sira-nia maun-alin: “Sai forte bá.”
7 Entaun badain sira fó kbiit ba badain-besi;
Ema neʼebé halo tetuk besi ho martelu boot
Fó kbiit ba ema neʼebé baku besi ho martelu.
Nia koʼalia ba ema neʼebé solda besi, hodi dehan: “Neʼe diʼak.”
Tuirmai ema hametin estátua neʼe ho pregu atu nuneʼe nia la bele monu.
8 “Maibé oh Izraél, ó mak haʼu-nia atan,
Oh Jacob, haʼu hili ona ó,
Ó mak haʼu-nia belun Abraão nia bei-oan,
9 Haʼu foti ó husi rai nia rohan,
No haʼu bolu ó husi fatin dook.
Haʼu dehan ba ó: ‘Ó mak haʼu-nia atan;
Haʼu hili ona ó; haʼu sei la soe ó.
10 Keta taʼuk tanba haʼu hamutuk ho ó.
Keta laran-taridu tanba haʼu mak ó-nia Maromak.
Haʼu sei hametin ó, sin, haʼu sei ajuda ó,
Haʼu sei kaer metin duni ó ho haʼu-nia liman-loos justisa nian.’
11 Haree bá! Ema hotu neʼebé hirus ó sei sai moe.
Ema neʼebé halo funu hasoru ó sei lakon no mate.
12 Ó sei buka ema sira neʼebé luta hasoru ó, maibé la hetan sira;
Sira neʼebé halo funu hasoru ó sei sai hanesan buat neʼebé la vale, no la iha folin.
13 Tanba haʼu, Jeová, ó-nia Maromak, mak kaer ó-nia liman-loos,
Haʼu dehan ba ó: ‘Keta taʼuk. Haʼu sei ajuda ó.’
14 Keta taʼuk, oh Jacob, neʼebé hanesan ular-oan,
Oh povu Izraél, haʼu sei ajuda imi”, Jeová, Ida neʼebé Sosa fali imi, Maromak neʼebé Santu ba Izraél mak dehan nuneʼe.
15 “Haree bá! Haʼu halo ó sai hanesan ai-kabelak neʼebé uza atu sama trigu,
Ai-kabelak sama trigu nian foun neʼebé kroʼat.
Ó sei sama foho sira no harahun sira
No halo foho oan sira sai hanesan trigu nia kulit.
16 Ó sei tahek sira,
No anin sei lori sira ba dook;
No anin-boot sei halo sira namkari.
Ó sei haksolok tanba Jeová,
No ó sei gaba an tanba Maromak neʼebé Santu ba Izraél.”
17 “Ema kiʼik no ema kiak buka bee, maibé bee la iha.
Sira-nia nanál sai maran tanba hamrook.
Haʼu, Jeová, sei hatán sira.
Haʼu, Maromak Izraél nian, sei la husik sira.
18 Haʼu sei halo mota suli iha foho-oan sira neʼebé maran
No hamosu bee-matan sira iha rai-tetuk.
Haʼu sei halo rai-fuik sai fali bee-lihun boot.
No halo rai-maran sai fali bee-matan.
19 Iha rai-maran haʼu sei kuda ai-sedru,
Ai-akasia, ai-murta no ai-oleastru.
Iha rai-tetuk maran haʼu sei kuda ai-junipero,
Hamutuk ho ai-freixu no ai-sipreste.
20 Atu nuneʼe ema hotu bele haree no hatene
No tau atensaun no komprende
Katak Jeová nia liman mak halo ida-neʼe,
No Maromak neʼebé Santu ba Izraél mak kria ida-neʼe.”
21 Jeová dehan: “Fó sai imi-nia kazu.”
Liurai ba Jacob dehan: “Fó sai imi-nia prova.”
22 “Hatudu prova no fó sai ba ami buat neʼebé sei akontese.
Konta ba ami kona-ba buat neʼebé uluk nian,
Atu nuneʼe ami bele hanoin kleʼan kona-ba buat sira-neʼe no hatene ninia rezultadu.
Ka fó sai ba ami buat neʼebé atu mosu mai.
23 Konta ba ami buat neʼebé sei akontese iha futuru,
Atu nuneʼe ami bele hatene katak imi mak maromak.
Sin, halo buat ruma, maski neʼe mak diʼak ka aat,
Atu nuneʼe ami bele hakfodak bainhira haree ida-neʼe.
24 Haree bá! Imi la iha folin ida,
No imi la halo buat ida.
Ema neʼebé apoia imi mak beik.
25 Haʼu foti ona ema ida husi parte norte, no nia sei mai,
Ema ida husi lorosaʼe neʼebé sei bolu haʼu-nia naran.
Nia sei sama ukun-naʼin sira hanesan sira mak rai-mean,
Hanesan badain rai-mean sama rai-mean neʼebé bokon.
26 Sé mak fó sai kona-ba neʼe horiuluk kedas, atu nuneʼe ami bele hatene,
Ka husi tempu neʼebé liu ona, atu nuneʼe ami bele dehan: ‘Nia loos’?
Tuir loloos, la iha ema ida mak fó avizu kona-ba neʼe!
La iha ema ida mak fó sai ida-neʼe!
La iha ema ida mak rona buat ruma husi imi!”
27 Haʼu mak ulukliu atu fó sai ba Siaun, hodi dehan: “Haree bá! Neʼe mak buat neʼebé sei akontese!”
No haʼu sei haruka ema neʼebé lori liafuan diʼak bá Jeruzalein.
28 Maibé haʼu kontinua hateke, no la iha ema ida;
La iha estátua ida husi sira-nia leet neʼebé bele fó konsellu.
Maski haʼu kontinua husu maibé sira la hatán.
29 Haree bá! Estátua sira hotu neʼe mak falsu deʼit.
Ema sira-neʼe halo buat neʼebé folin-laek.
Sira-nia estátua besi mak hanesan anin no la iha folin.
42 Haree bá! Haʼu-nia atan neʼebé haʼu apoia!
Haʼu hili ona nia, no nia monu loos ba haʼu-nia laran!
Haʼu tau ona haʼu-nia espíritu iha nia;
Nia sei lori justisa ba nasaun sira.
2 Nia sei la hakilar ka hasai ninia lian,
No ema sei la rona ninia lian iha dalan sira.
3 Nia sei la halo tohar duʼut-kain neʼebé kleʼuk ona,
No nia sei la hamate ahi-oan neʼebé besik atu mate.
Ho laran-metin nia sei halo loos buat hotu.
4 Nia sei la sai fraku ka rahun toʼo nia halo loos buat hotu iha rai;
No illa sira kontinua hein ba ninia ukun-fuan.
5 Jeová mak Maromak loos,
No Kriadór ba lalehan. Nia mak Maromak Boot Liu neʼebé nahe lalehan hanesan hena ida,
Nia mak nahe rai no kria buat hotu iha rai,
Nia mak fó iis ba povu iha rai
Nia mak fó moris ba sira neʼebé laʼo iha laran, nia dehan:
6 “Haʼu, Jeová, haʼu bolu ó ho hahalok loos;
Haʼu kaer metin ó-nia liman.
Haʼu sei proteje ó no ó sei sai nuʼudar aliansa entre haʼu ho povu neʼe
No nuʼudar naroman ba nasaun sira,
7 Atu ó bele loke matan-delek sira-nia matan,
Lori ema dadur sira sai husi rai-kuak,
No lori sira neʼebé tuur iha nakukun laran sai husi komarka.
8 Haʼu mak Jeová. Neʼe mak haʼu-nia naran;
Haʼu la fó haʼu-nia glória ba buat seluk,
No la fó haʼu-nia hahiʼi ba estátua sira.
9 Haree bá! Buat primeiru nian sai loos ona;
Agora haʼu fó sai fali buat foun sira.
Antes buat sira-neʼe akontese, haʼu fó-hatene ona ba imi.”
10 Imi sira neʼebé tun ba tasi no buat hotu neʼebé nakonu iha laran,
Imi illa sira no povu sira iha laran,
Kanta knananuk foun ida ba Jeová,
Kanta kona-ba ninia glória husi rai nia rohan sira.
11 Rai-fuik sira no ninia sidade sira sei hasai sira-nia lian,
No knua sira neʼebé ema Kedar hela sei hasai lian.
Ema sira neʼebé hela iha fatuk-boot nia kuak sei haklalak ho haksolok;
Sira sei hakilar husi foho-tutun sira.
12 Sira sei fó glória ba Jeová
No fó sai ninia glória iha illa sira.
13 Jeová sei sai mai hanesan mane asuwaʼin ida.
Nia sei hatudu sai ninia laran-manas hanesan funu-naʼin ida.
Nia sei hakilar, sin, nia sei hakilar ho lian funu nian;
Nia sei hatudu sai katak nia forte liu ninia inimigu sira.
14 “Haʼu nonook deʼit ba tempu kleur ona.
Haʼu nafatin nonook no kontrola an.
Hanesan feto neʼebé tuur ahi,
Haʼu sei halerik, dada-iis boot, no dada-iis naruk iha tempu hanesan.
15 Haʼu sei halakon foho aas no foho-oan sira
No haʼu sei halo namlaek hotu ai-horis iha foho sira-neʼe.
Haʼu sei halo mota sira sai fali illa
No hamaran bee-lihun sira neʼebé iha duʼut aas.
16 Haʼu sei dirije matan-delek iha dalan neʼebé sira la hatene
No halo sira laʼo iha dalan neʼebé sira seidauk sama bá.
Haʼu sei troka nakukun hodi sai naroman iha sira-nia oin
No halo rai-kuak sira sai fali rai-tetuk.
Neʼe mak buat neʼebé haʼu sei halo ba sira, no haʼu sei la husik sira.”
17 Sira neʼebé tau fiar ba estátua neʼebé bahat ona,
Sira neʼebé dehan ba estátua husi besi: “Imi mak ami-nia maromak sira”,
Sira sei hakiduk no sei sai moe tebes.
18 Rona bá, imi neʼebé tilun-diuk;
Hateke no haree bá, imi neʼebé matan-delek.
19 Sé mak matan-delek hanesan haʼu-nia atan,
No tilun-diuk hanesan manu-ain neʼebé haʼu haruka?
Sé mak matan-delek hanesan ema neʼebé haʼu fó kolen ona,
No matan-delek hanesan Jeová nia atan?
20 Imi haree buat barak, maibé imi la matan-moris.
Imi see tilun, maibé la rona.
21 Tanba Jeová nia hahalok loos
Mak nia sai kontente atu hatudu sai katak ukun-fuan mak kmanek no iha glória boot.
22 Maibé ema ataka povu neʼe no hadau sira-nia sasán;
Sira hotu sai dadur iha rai-kuak no iha komarka.
Ema ataka sira no la iha ema ida atu salva sira,
Ema hadau sira-nia sasán no la iha ema ida mak dehan: “Lori ema sira-neʼe fila!”
23 Sé mak sei rona ida-neʼe iha imi-nia leet?
Sé mak sei see tilun no aprende kona-ba tempu neʼebé atu mai?
24 Sé mak entrega Jacob ba ema atu ataka
No entrega Izraél ba ema atu hadau ninia sasán?
Neʼe mak Jeová, Ida neʼebé sira kontra ona hodi halo sala, loos ka lae?
Sira lakohi laʼo iha Ninia dalan sira,
No sira lakohi halo tuir Ninia ukun-fuan.
25 Tan neʼe, Nia kontinua fakar sai ninia hirus,
Ho laran-nakali no hirus, nia lori funu ba sira.
Funu neʼe hanesan ahi neʼebé han buat hotu neʼebé haleʼu Izraél, maibé Izraél la hanoin kona-ba neʼe.
Ahi lakan hasoru Izraél, maibé neʼe la book Izraél nia laran.
43 Neʼe mak liafuan husi Jeová,
Ó-nia Kriadór, oh Jacob, no Ida neʼebé halo ó, oh Izraél, nia dehan:
“Keta taʼuk, tanba haʼu sosa fali ona ó.
Haʼu bolu ó ho ó-nia naran.
Ó mak haʼu-nian.
2 Bainhira ó laʼo liu bee sira, haʼu sei hamutuk ho ó,
No bainhira ó hakur mota sira, sira sei la halo ó mout.
Bainhira ó laʼo liu ahi, neʼe sei la han ó,
No ahi sei la sunu ó.
3 Tanba haʼu mak Jeová, ó-nia Maromak,
Maromak neʼebé Santu ba Izraél, ó-nia Salvadór.
Haʼu entrega ona Ejitu nuʼudar folin atu sosa fali ó,
Haʼu fó Etiópia no Seba atu troka fali ó.
4 Tanba haʼu haree ó hanesan buat folin-boot,
Ó hetan ona glória, no haʼu hadomi ona ó.
Entaun haʼu sei entrega povu sira hodi sosa fali ó
No haʼu sei fó nasaun sira hodi salva ó-nia moris.
5 Keta taʼuk, tanba haʼu hamutuk ho ó.
Haʼu sei lori ó-nia bei-oan sira husi parte leste
No halibur imi hamutuk husi parte oeste.
6 Haʼu sei hatete ba norte: ‘Entrega fali ema sira-neʼe!’
No ba súl: ‘Keta kaer netik sira.
Lori haʼu-nia oan-mane sira husi fatin dook, no lori mós haʼu-nia oan-feto sira husi rai nia rohan sira,
7 Lori ema hotu neʼebé bolu hodi haʼu-nia naran,
Sira neʼebé haʼu kria atu fó glória ba haʼu,
Sira neʼebé haʼu halo no kria ona.’
8 Lori sai mai povu neʼebé matan-delek maski sira iha matan,
No povu neʼebé tilun-diuk maski sira iha tilun.
9 Husik nasaun hotu halibur hamutuk iha fatin ida
No husik povu sira halibur hamutuk.
Iha sira-nia leet, sé mak bele fó sai ida-neʼe?
Sé mak bele halo ami rona buat sira neʼebé sei mosu ulukliu?
Husik sira lori sira-nia sasin mai atu fó prova katak sira mak loos,
Ka husik sira rona no dehan: ‘Neʼe mak lia-loos!’ ”
10 Jeová dehan: “Imi mak haʼu-nia testemuña,
Sin, haʼu-nia atan neʼebé haʼu hili ona,
Atu nuneʼe imi bele hatene no tau fiar ba haʼu
No komprende katak haʼu hanesan ba nafatin.
La iha Maromak seluk antes haʼu,
No la iha Maromak seluk depois haʼu.
11 Haʼu, haʼu mak Jeová, la iha salvadór ida seluk só haʼu deʼit.”
12 “Bainhira la iha maromak seluk iha imi-nia leet,
Haʼu mak fó-hatene nanis buat neʼebé atu akontese no fó salvasaun no fó sai kona-ba ida-neʼe.
Entaun, imi mak haʼu-nia testemuña”, Jeová dehan, “no haʼu mak Maromak.
13 No mós, haʼu hanesan deʼit ba nafatin;
No la iha ema ida mak bele hadau buat ruma husi haʼu-nia liman.
Bainhira haʼu halo buat ruma, sé mak bele hanetik haʼu?”
14 Neʼe mak liafuan husi Jeová, Ida neʼebé Sosa fali imi, Maromak neʼebé Santu ba Izraél, nia dehan:
“Tanba imi mak haʼu sei haruka ema bá Babilónia no harahun ai-loos sira neʼebé xave portaun,
No ema Kaldeia sei hakilar ho neon-susar iha sira-nia ró laran.
15 Haʼu mak Jeová, Ida neʼebé Santu ba imi, Kriadór ba Izraél, no imi-nia Liurai.”
16 Neʼe mak liafuan husi Jeová,
Ida neʼebé halo dalan ida liuhusi tasi,
Sin, dalan ida liuhusi tasi neʼebé siʼak,
17 Ida neʼebé lori sai kuda-karreta funu nian no kuda sira,
Lori sai soldadu sira hamutuk ho asuwaʼin sira, nia dehan:
“Sira sei latan no la hamriik fali.
Sira sei lakon mohu hanesan hamate ahi-oan.”
18 “Keta hanoin-hetan buat uluk nian,
No keta hanoin beibeik kona-ba tempu uluk.
19 Haree bá! Haʼu halo buat neʼebé foun;
Agora daudaun ida-neʼe mosu ona.
Imi haree ida-neʼe ka lae?
Haʼu sei halo dalan ida liuhusi rai-fuik
No halo mota liuhusi rai-maran.
20 Animál fuik iha rai-luan, asu-fuik no manu-avestrús
Sei fó glória ba haʼu,
Tanba haʼu hamosu bee iha rai-fuik,
No hamosu mota iha rai-maran,
Atu haʼu-nia povu neʼebé haʼu hili, bele hemu,
21 Povu neʼebé haʼu hili ba haʼu-nia an
Atu nuneʼe sira bele fó sai haʼu-nia glória.
22 Maibé ó la bolu haʼu, oh Jacob,
Tanba ó sai baruk kona-ba haʼu, oh Izraél.
23 Ó la lori bibi-malae ida atu hasaʼe ba haʼu nuʼudar sakrifísiu sunu nian
No ó la fó glória ba haʼu ho ó-nia sakrifísiu sira.
Haʼu la obriga ó atu lori prezente ida mai haʼu,
No haʼu la halo ó kole hodi husu ó atu fó insensu mutin.
24 Ó la sosa duʼut kana morin ba haʼu ho ó-nia osan rasik,
No ó la halo haʼu kontente ho naʼan bokur husi ó-nia sakrifísiu sira.
Duké halo nuneʼe, ó hatodan haʼu ho ó-nia sala sira
No halo haʼu kole ho ó-nia sala sira.
25 Haʼu hamoos tiha ó-nia sala sira tanba haʼu-nia an rasik,
No haʼu sei la hanoin-hetan tan ó-nia sala sira.
26 Fó-hanoin ba haʼu; mai ita lori ita-nia kazu hodi hasoru malu;
Konta ó-nia kazu hodi fó prova katak ó mak loos.
27 Ó-nia beiʼala primeiru halo ona sala,
No ema neʼebé reprezenta ó kontra ona hasoru haʼu.
28 Tan neʼe, haʼu sei hamoe ulun-naʼin sira husi fatin santu,
No haʼu sei husik ema atu halakon Jacob
No haʼu sei husik Izraél atu rona liafuan goza nian.
44 “Agora rona bá, oh haʼu-nia atan Jacob,
Rona bá, oh Izraél, neʼebé haʼu hili ona.
2 Neʼe mak liafuan husi Jeová,
Ó-nia Kriadór, Ida neʼebé halo ó,
Ida neʼebé ajuda ona ó husi knotak laran, nia dehan:
‘Haʼu-nia atan Jacob, keta taʼuk,
Oh Jesurun, neʼebé haʼu hili ona.
3 Tanba haʼu sei fó bee ba ema neʼebé hamrook
No halo bee suli iha rai neʼebé maran.
Haʼu sei fakar sai haʼu-nia espíritu ba ó-nia bei-oan
No fakar haʼu-nia bensaun ba ó-nia bei-oan sira.
4 No sira sei buras hanesan duʼut matak,
Hanesan ai-koupos besik mota ninin.
5 Sira ida sei dehan: “Haʼu mak Jeová nian.”
Ida seluk sei bolu nia an hodi Jacob nia naran,
No ida seluk tan sei hakerek iha ninia liman dehan: “Haʼu mak Jeová nian.”
No nia sei simu Izraél nia naran.’
6 Neʼe mak liafuan husi Jeová,
Liurai ba Izraél no Ida neʼebé Sosa fali nia, Jeová, ukun-naʼin ba tropa lalehan nian, nia dehan:
‘Haʼu mak primeiru no haʼu mak ikus.
La iha Maromak seluk só haʼu deʼit.
7 Sé mak hanesan ho haʼu?
Husik nia koʼalia no fó sai ida-neʼe no fó prova ba haʼu!
Husik nia konta kona-ba buat neʼebé atu mai
No fó sai buat neʼebé sei akontese,
Hanesan haʼu halo ona husi tempu neʼebé haʼu hili povu ida iha tempu uluk.
8 Keta sai nakdedar,
No keta hakfodak ho taʼuk.
Haʼu koʼalia ona ba imi ida-idak no fó sai ona ida-neʼe, loos ka lae?
Imi mak haʼu-nia testemuña.
La iha Maromak seluk só haʼu deʼit, loos ka lae?
Sin, la iha Fatuk seluk; haʼu hatene la iha Maromak seluk.’ ”
9 Sira hotu neʼebé bahat estátua mak folin-laek,
No estátua neʼebé sira hafolin sei la lori buat diʼak ida.
Sira la bele haree buat ida no la hatene buat ida,
No sira-nia testemuña, katak ema sira neʼebé halo estátua, sei sai moe.
10 Ema neʼebé halo maromak ida ka halo estátua husi besi,
Neʼe la lori buat diʼak ida.
11 Haree bá! Ninia maluk hotu sei sai moe!
Badain sira mak ema deʼit.
Husik sira halibur hamutuk no hamriik iha sira ida-idak nia fatin.
Sira sei sai taʼuk no sai moe hamutuk.
12 Badain-besi hamanas besi iha ahi-klaak leten.
Ho ninia liman neʼebé forte
Nia baku besi neʼe ho martelu sira.
Tuirmai nia sai hamlaha no lakon forsa;
Nia la hemu bee no sai kole.
13 Ema neʼebé matenek atu bahat, nia sukat ho tali, no nia tau marka ho jís mean.
Nia halo serbisu ho bahat no halo marka ho sasán marka nian.
Nia halo estátua neʼe atu haree hanesan ema,
No halo furak hanesan ema,
Hodi tau iha uma laran.
14 Iha ema neʼebé halo serbisu hodi tesi ai-sedru.
Nia hili ai-hun oin ida, ai-hun karvallu,
No nia husik ai neʼe sai boot entre ai-hun sira seluk iha ai-laran.
Nia kuda ai-loureiro, no udan halo ai neʼe sai boot.
15 Tuirmai ema ida uza ai neʼe atu sunu iha ahi.
Nia foti ai neʼe balu atu sunu hodi haneruk an;
Nia tau ai ba ahi no tunu paun.
Maibé nia mós halo ai neʼe sai maromak ida no adora ida-neʼe.
Nia bahat estátua husi ai neʼe, no hakruʼuk an iha estátua nia oin.
16 Ai balu nia sunu iha ahi;
No ho ai neʼe mak nia tunu naʼan, no nia han toʼo bosu.
Nia mós haneruk an no dehan:
“Agora haʼu sente manas nuʼudar haʼu hateke ba ahi neʼe.”
17 Maibé ai restu neʼe nia halo nuʼudar maromak ida, katak estátua neʼebé bahat ona.
Nia hakruʼuk an no adora ida-neʼe.
Nia halo orasaun ba ida-neʼe, hodi dehan:
“Salva haʼu, tanba Ita mak haʼu-nia maromak.”
18 Sira la hatene buat ida, sira la komprende buat ida,
Tanba sira-nia matan taka metin no sira la bele haree,
No sira-nia laran la iha matenek.
19 Sira la iha koñesimentu ka kbiit atu komprende,
La iha ema ida mak hanoin iha ninia laran, hodi dehan:
“Ai balu haʼu sunu ona iha ahi,
No iha ahi-klaak leten mak haʼu tunu paun ho naʼan atu han.
Se nuneʼe, haʼu mós tenke halo ai neʼe balu hodi sai nuʼudar buat neʼebé la vale ka?
Haʼu tenke adora ai neʼe nia pedasuk balun ka?”
20 Nia sai hanesan ema neʼebé han ahi-kadesan.
Ninia laran neʼebé lohi nia, halo nia la’o sala dalan.
Nia la bele salva nia an, no nia la dehan:
“Haʼu iha buat neʼebé folin-laek iha haʼu-nia liman-loos.”
21 “Oh Jacob, oh Izraél, hanoin-hetan buat sira-neʼe,
Tanba ó mak haʼu-nia atan.
Haʼu mak halo ó, no ó mak haʼu-nia atan.
Oh Izraél, haʼu sei la haluha ó.
22 Haʼu sei hamoos ó-nia sala
No taka ó-nia sala hanesan taka ho kalohan mahar.
Fila fali ba haʼu, tanba haʼu sei sosa fali ó.
23 Oh lalehan, haklalak ho haksolok,
Tanba Jeová halo ona ida-neʼe!
Oh fatin neʼebé kleʼan iha rai, haklalak ho lian manán nian!
Oh foho sira, ai-laran sira, no ai-hun sira hotu,
Haklalak ho haksolok!
Tanba Jeová sosa fali ona Jacob,
No nia hatudu sai ona ninia kmanek ba Izraél.”
24 Neʼe mak liafuan husi Jeová, Ida neʼebé Sosa fali imi,
Ida neʼebé kria imi husi knotak laran, nia dehan:
“Haʼu mak Jeová, haʼu mak halo buat hotu.
Haʼu rasik nahe lalehan hanesan hena ida,
No haʼu mak nahe rai.
Sé mak uluk hamutuk ho haʼu?
25 Haʼu halo runguranga profeta falsu nia sinál sira,
No haʼu mak halo siʼikdór sira hatudu hahalok beik;
Haʼu mak halo ema matenek sai bilán
No troka sira-nia koñesimentu hodi sai nuʼudar buat beik;
26 Haʼu mak kumpre haʼu-nia atan sira-nia liafuan
No halo haʼu-nia atan sira-nia liafuan sai loos;
Haʼu fó sai kona-ba Jeruzalein: ‘Ema sei hela iha sidade neʼe’,
No kona-ba Judá nia sidade sira: ‘Ema sei harii fali sidade sira-neʼe,
No haʼu sei hadiʼa fali fatin sira neʼebé rahun ona’;
27 Haʼu mak dehan ba bee neʼebé kleʼan: ‘Sai maran bá,
No haʼu sei halo maran ó-nia mota sira hotu’;
28 Haʼu mak dehan ba Ciro: ‘Nia mak haʼu-nia bibi-atan,
No nia sei kumpre duni haʼu-nia hakarak hotu’;
Haʼu dehan kona-ba Jeruzalein: ‘Ema sei harii fali sidade neʼe’,
No kona-ba templu: ‘Ema sei tau fali ó-nia hun.’ ”
45 Tuirmai neʼe mak liafuan husi Jeová ba Ciro, ema neʼebé haʼu hili ona,
Neʼebé haʼu kaer ninia liman-loos
Atu domina nasaun sira iha ninia oin,
Atu manán liurai sira,
Atu loke portaun sidade nian sira ba nia,
Hodi nuneʼe portaun sira labele taka metin:
2 “Haʼu sei laʼo iha ó-nia oin,
No haʼu sei halo tetuk foho-oan sira.
Portaun husi riti haʼu sei harahun tiha ba pedasuk,
No haʼu sei tesi tiha besi lolon neʼebé uza atu taka portaun.
3 Haʼu sei fó ba ó rikusoin neʼebé ema rai hela iha nakukun laran
No fó rikusoin neʼebé subar ona iha fatin segredu,
Atu nuneʼe ó bele hatene katak haʼu mak Jeová,
Maromak Izraél nian, ida neʼebé bolu ó ho ó-nia naran rasik.
4 Tanba haʼu-nia atan Jacob no Izraél neʼebé haʼu hili ona,
Mak haʼu bolu ó ho ó-nia naran rasik.
Haʼu sei halo ema respeitu ó-nia naran, maski ó la hatene haʼu.
5 Haʼu mak Jeová, no la iha ida seluk.
La iha Maromak seluk só haʼu deʼit.
Haʼu sei hametin ó, maski ó la hatene haʼu,
6 Atu nuneʼe povu sira
Husi loro-matan saʼe toʼo loro-matan monu bele hatene
Katak la iha Maromak seluk só haʼu deʼit.
Haʼu mak Jeová, no la iha ida seluk.
7 Haʼu kria naroman no kria nakukun,
Haʼu halo dame no hamosu susar;
Haʼu, Jeová, haʼu mak halo buat sira-neʼe hotu.
8 Oh lalehan, hatún udan husi leten;
Husik kalohan sira fakar sai hahalok loos.
Husik rai loke no fó fuan salvasaun nian,
No fó moris ba hahalok loos iha tempu hanesan.
Haʼu, Jeová, haʼu mak kria ida-neʼe.”
9 Susar ba ema neʼebé haksesuk malu ho ninia Kriadór,
Tanba nia mak sanan-rai pedasuk ida deʼit
Entre sanan-rai pedasuk sira seluk neʼebé latan iha rai!
Rai-mean bele dehan ba badain rai-mean: “Ó halo saida?”
Ka buat neʼebé nia halo bele dehan: “Ó la iha liman”?
10 Susar ba ema neʼebé dehan ba aman ida: “Ó sai aman ba saida?”
No dehan ba feto ida: “Ó tuur ahi ba saida?”
11 Jeová, Maromak neʼebé Santu ba Izraél, Ida neʼebé kria Izraél, dehan nune’e:
“Imi sei husu haʼu kona-ba buat neʼebé atu akontese ka?
Imi sei manda haʼu kona-ba haʼu-nia oan-mane sira no kona-ba serbisu neʼebé haʼu halo ho haʼu-nia liman ka?
12 Haʼu halo rai no kria ema iha laran.
Haʼu nahe lalehan ho haʼu-nia liman rasik,
No haʼu fó mandamentu ba sira-nia tropa sira hotu.”
13 Jeová, ukun-naʼin ba tropa lalehan nian, dehan: “Ho hahalok loos mak haʼu hili ona mane ida,
No haʼu sei halo loos ninia dalan sira hotu.
Nia mak sei harii haʼu-nia sidade
No nia sei la husu osan ka la simu osan atu halo livre haʼu-nia ema sira neʼebé dadur.”
14 Jeová dehan nuneʼe:
“Rai-Ejitu nia serbisu-naʼin sira no ema Etiópia neʼebé faʼan sasán no ema Sabeu neʼebé ain-aas,
Sira sei mai hasoru ó no sei sai ó-nian.
Sira sei laʼo iha ó-nia kotuk nuʼudar kesi hela ho korrente.
Sira sei mai no hakruʼuk an ba ó.
Sira sei koʼalia ho respeitu ba ó, hodi dehan: ‘Maromak hamutuk duni ho ó,
No la iha ida seluk; la iha Maromak seluk.’ ”
15 Ita mak Maromak neʼebé subar an,
Oh Maromak Izraél nian, Ita mak Salvadór.
16 Ema hotu neʼebé halo estátua sei sai moe tebes;
Sira hotu sei bá ho moe.
17 Maibé Jeová sei salva Izraél ho salvasaun neʼebé ba nafatin.
Imi sei la sai moe ka la hetan naran foʼer ba nafatin.
18 Neʼe mak liafuan husi Jeová,
Kriadór ba lalehan, Maromak neʼebé loos,
Ida neʼebé kria rai, no Kriadór neʼebé halo neʼe sai metin,
Nia la kria rai ho saugati deʼit, maibé nia kria neʼe atu ema bele hela bá, nia dehan:
“Haʼu mak Jeová, no la iha ida seluk.
19 Haʼu la koʼalia iha fatin subar, iha fatin nakukun;
Haʼu la dehan ba Jacob nia bei-oan:
‘Buka haʼu no imi sei la hetan buat ida.’
Haʼu mak Jeová, ida neʼebé koʼalia buat loos no fó sai saida mak loos.
20 Halibur hamutuk no mai.
Hakbesik mai hamutuk, imi neʼebé halai husi nasaun sira.
Ema neʼebé lori bá-mai estátua neʼebé bahat ona
No halo orasaun ba maromak ida neʼebé la bele salva sira, sira la hatene buat ida.
21 Fó sai imi-nia prova, hatoʼo imi-nia kazu,
No koʼalia hamutuk bá ho hanoin ida deʼit.
Sé mak fó-hatene nanis ida-neʼe husi tempu uluk
No fó sai ida-neʼe husi tempu neʼebé liu ona?
Neʼe mak haʼu, Jeová, loos ka lae?
La iha Maromak seluk só haʼu deʼit;
Maromak neʼebé iha hahalok loos no Salvadór, la iha ida seluk só haʼu deʼit.
22 Imi iha rai hotu, fila fali ba haʼu no hetan salvasaun,
Tanba haʼu mak Maromak, la iha ida seluk.
23 Haʼu jura hodi haʼu-nia an rasik;
Liafuan neʼe sai ona husi haʼu-nia ibun no neʼe mak loos,
No neʼe sei la fila fali:
Ema hotu sei hakneʼak ba haʼu,
Ema hotu sei jura ho laran-metin,
24 Hodi dehan: ‘Jeová deʼit mak Maromak neʼebé iha hahalok loos no forsa.
Sira hotu neʼebé hirus hasoru nia sei mai iha nia oin ho moe.
25 Izraél nia bei-oan sira hotu sei haree katak sira mak loos hodi serbí Jeová,
No sira sei gaba an kona-ba nia.’ ”
46 Bel hakruʼuk ona, Nebo hakruʼuk an.
Sira tula sira-nia estátua iha animál leten,
Hanesan naha neʼebé hatodan animál neʼebé kole ona.
2 Sira sei hakruʼuk an hamutuk;
Sira la bele proteje sira-nia naha,
No sira rasik sei bá nuʼudar dadur.
3 “Rona ba haʼu, oh umakain Jacob no imi hotu neʼebé restu husi umakain Izraél,
Imi sira neʼebé haʼu apoia no ajuda husi tempu neʼebé imi moris mai husi knotak laran.
4 Haʼu sei hanesan nafatin toʼo imi idade boot;
Haʼu sei kontinua apoia imi toʼo imi-nia fuuk-mutin.
Hanesan haʼu halo ona, haʼu sei lori imi, apoia imi no salva imi.
5 Entaun, imi sei kompara haʼu ho sé? Imi sei fó sai katak haʼu hanesan ho sé
Atu nuneʼe ami bele sai hanesan deʼit?
6 Iha ema balu neʼebé hasai osan-mean barak husi sira-nia karteira;
Sira tetu osan-mutin iha dasin.
Sira selu badain-besi, no halo neʼe sai maromak ida.
Sira hakruʼuk an, sin, sira adora maromak neʼe.
7 Sira hulan neʼe iha sira-nia kabaas;
Sira lori neʼe no tau iha ninia fatin, no ida-neʼe hamriik deʼit iha neʼebá.
No neʼe la book an husi ninia fatin.
Sira halerik ba ida-neʼe, maibé nia la hatán;
Neʼe la bele salva ema ida husi ninia terus.
8 Hanoin-hetan ida-neʼe bá, no sai aten-brani.
Rai ida-neʼe iha imi-nia laran, imi ema sala-naʼin sira.
9 Hanoin-hetan buat uluk nian husi tempu ulukliu,
Katak haʼu mak Maromak, no la iha ida seluk.
Haʼu mak Maromak, no la iha ida mak hanesan haʼu.
10 Husi uluk kedas haʼu fó-hatene nanis buat neʼebé sei mosu,
No husi tempu ulukliu haʼu fó sai buat sira neʼebé seidauk akontese.
Haʼu hatete: ‘Haʼu-nia desizaun sei metin nafatin,
No haʼu sei halo buat naran deʼit neʼebé haʼu hakarak.’
11 Haʼu sei bolu manu-makikit mai husi lorosaʼe,
Haʼu sei bolu mane ida husi rai neʼebé dook atu kumpre haʼu-nia desizaun.
Haʼu koʼalia ona, no haʼu sei kumpre ida-neʼe.
Haʼu deside ona ida-neʼe, no haʼu sei kumpre.
12 Rona ba haʼu, imi neʼebé ulun-toos,
Imi neʼebé halo hahalok aat.
13 Haʼu lori ona haʼu-nia hahalok loos besik ba imi;
Neʼe la dook ida,
No haʼu-nia salvasaun sei la demora.
Haʼu sei fó salvasaun ba Siaun, no fó haʼu-nia glória ba Izraél.”