Jeová mak ita-nia hela-fatin
“Oh, Jeová, Ita rasik mak hela-fatin neʼebé loos ba ami durante jerasaun ba jerasaun.”—SAL 90:1.
1, 2. Maromak nia atan sira sente oinsá kona-ba mundu neʼe? Saida mak ita-nia “hela-fatin neʼebé loos”?
ITA sente seguru no hakmatek iha mundu aat neʼe ka lae? Se ita la sente hanesan neʼe, laʼós ita mesak deʼit mak sente nuneʼe! Husi tempu antigu toʼo ohin loron, ema hotu neʼebé hadomi Jeová sente katak sira hanesan ema laʼo-rai iha mundu neʼe. Porezemplu, Maromak nia atan sira neʼebé laʼo-lemo iha rai-Kanaan, sira “simu an nuʼudar ema rai seluk nian no ema laʼo-rai iha mundu neʼe”.—Ebr 11:13.
2 Nuneʼe mós ho ema kristaun kose-mina sira, neʼebé ‘sira-nia moris loloos mak iha lalehan’, sira haree sira-nia an nuʼudar ema “malae no laʼo-rai” iha mundu neʼe. (Flp 3:20; 1 Ped 2:11) No Kristu nia “bibi seluk” mós “laʼós mundu neʼe nian” hanesan Jesus “laʼós mundu neʼe nian”. (Joao 10:16; 17:16) Maibé ida-neʼe la dehan katak Maromak nia povu la iha hela-fatin. Tuir loloos, ita hela iha fatin protesaun neʼebé seguru liu no neʼebé iha domin. Kona-ba hela-fatin neʼe, Moisés hakerek: “Oh, Jeová, Ita rasik mak hela-fatin neʼebé loos ba ami durante jerasaun ba jerasaun.” (Sal 90:1) Eskritura neʼe hatudu katak Jeová mak “hela-fatin neʼebé loos” ba ninia atan sira. Maibé, oinsá mak Jeová hanesan “hela-fatin” ba ninia atan sira iha tempu uluk? Oinsá mak nia hanesan “hela-fatin” ba ninia atan sira ohin loron? No oinsá mak nia sei sai “hela-fatin” neʼebé seguru ba ninia atan sira iha futuru?
JEOVÁ MAK “HELA-FATIN” NEʼEBÉ LOOS BA NINIA ATAN SIRA IHA TEMPU ULUK
3. Tuir Salmo 90:1, Jeová hanesan saida? Tanbasá?
3 Dala barak, Bíblia kompara Maromak Jeová ho buat ruma hodi ajuda ita atu hatene diʼak liután kona-ba ninia hahalok oioin. Porezemplu, iha Salmo 90:1 dehan katak Jeová mak hanesan “hela-fatin”. Saida deʼit mak hanesan entre Jeová no hela-fatin? Porezemplu, Jeová fó protesaun ba ninia povu. Nia halo nuneʼe tanba nia mak Maromak neʼebé domin. (1 Joao 4:8) Nia mós Maromak dame nian, neʼebé halo ninia atan sira “hela ho hakmatek”. (Sal 4:8) Agora, mai ita haree oinsá mak Jeová hanesan hela-fatin ba ninia atan sira iha tempu uluk, hanesan Abraão, Isaac, no Jacob.
4, 5. Oinsá mak Jeová haraik bensaun ba Abraão no proteje nia?
4 Bíblia la fó sai oinsá mak Abraão sente kuandu Jeová hatete ba nia: “Sai husi ó-nia rai no husi ó-nia família . . . hodi bá rai neʼebé haʼu sei hatudu ba ó.” Se Abraão sente laran-susar hodi rona liafuan neʼe karik, ita fiar katak nia sente kmaan fali kuandu Jeová hatete: “Haʼu sei halo ó sai nasaun boot no haʼu sei haraik bensaun ba ó no haʼu sei halo ó-nia naran sai boot . . . No haʼu sei haraik bensaun ba sira neʼebé fó bensaun ba ó, no haʼu sei fó malisan ba ema neʼebé hatete aat ba ó.”—Gên 12:1-3.
5 Jeová promete katak nia sei haraik bensaun ba Abraão no proteje nia, ninia oan no bei-oan sira, no Jeová kumpre duni ninia liafuan neʼe. (Gên 26:1-6) Porezemplu, nia proteje Abraão ho Sara kuandu liurai husi rai-Egiptu no Liurai Abimélec husi rai-Gerar mak koko atu estraga Sara no atu oho Abraão. Depois neʼe, Jeová mós proteje Isaac no Rebeca kuandu sira hasoru situasaun neʼebé hanesan. (Gên 12:14-20; 20:1-14; 26:6-11) Bíblia hatete: “[Jeová] la husik ema ida atu lohi sira, maibé tanba sira mak nia fó kastigu ba liurai sira, hodi hatete: ‘Imi keta book haʼu-nia atan kose-mina sira, no ba haʼu-nia profeta sira, keta halo aat.’”—Sal 105:14, 15.
“Haʼu sei la husik ó”
6. Isaac haruka Jacob atu halo saida? Karik Jacob hanoin saida?
6 Jeová mós tau matan didiʼak ba Abraão nia bei-oan Jacob. Kuandu Jacob atu buka feen, ninia aman Isaac hatete ba nia: “Ó labele hola feto husi rai-Kanaan nia oan-feto sira. Hamriik bá, bá Padan-aram ba Betuel nia uma, ó-nia inan nia aman, no iha neʼebá, hola feto ida ba ó-nia an husi Laban nia oan-feto sira.” (Gên 28:1, 2) Jacob halo tuir. Nia husik ninia família iha rai-Kanaan, no laʼo rai dook kilómetru atus ba atus toʼo rai-Haran, karik nia bá mesak. (Gên 28:10) Karik nia hanoin: ‘Ba tempu hira mak haʼu sei dook husi haʼu-nia família? Haʼu-nia tiu sei simu haʼu ho didiʼak ka lae? Haʼu sei hetan feen neʼebé hadomi Jeová ka lae?’ Maibé, kuandu nia laʼo tiha maizumenus kilómetru 100 husi Berseba toʼo Luz, buat ida akontese neʼebé halo Jacob sente kmaan fali. Saida mak akontese iha Luz?
7. Saida mak Jeová hatete ba Jacob liuhusi mehi?
7 Iha Luz, Jeová hatete ba Jacob liuhusi mehi: “Haʼu hamutuk ho ó no haʼu sei proteje ó iha dalan hotu neʼebé ó bá no haʼu sei lori fali ó ba rai ida-neʼe, tanba haʼu sei la husik ó toʼo haʼu halo duni buat neʼebé haʼu hatete ona ba ó.” (Gên 28:15) Liafuan neʼe fó kmaan ba Jacob! Ita bele fiar katak depois Jacob rona tiha ida-neʼe, nia hakarak tebes atu haree oinsá mak Jeová sei kumpre ninia liafuan. Se ita hela dook husi ita-nia família tanba ita serbí iha rai seluk ka tanba razaun seluk, karik ita mós sente laran-susar hanesan Jacob. Maibé, karik ita rasik mós iha esperiénsia kona-ba oinsá mak Jeová tau matan ba ita.
8, 9. Iha dalan saida deʼit mak Jeová hanesan “hela-fatin neʼebé loos” ba Jacob? Husi Abraão, Isaac no Jacob nia ezemplu, ita aprende saida kona-ba Jeová?
8 Kuandu Jacob toʼo tiha Haran, ninia tiu Laban simu nia ho diʼak no depois fó Lea no Raquel nuʼudar Jacob nia feen. Maibé tempu balu liutiha, Laban komesa aproveita Jacob no troka beibeik toʼo dala sanulu kolen neʼebé nia tenke fó ba Jacob! (Gên 31:41, 42) Maibé Jacob tahan ho hahalok la loos neʼe hodi fiar metin katak Jeová sei nafatin tau matan ba nia. No Jeová halo ida-neʼe duni! Ikusmai, kuandu Jeová haruka Jacob atu fila fali ba rai-Kanaan, Jacob iha ona “bibi barak, no atan-feto no atan-mane sira, no kuda-kamelu no kuda-burru barak”. (Gên 30:43) Tan neʼe, Jacob fó-agradese ba Jeová hodi dehan: “Haʼu la merese laran-diʼak neʼebé nakonu ho domin no laran-metin neʼebé Ita hatudu ona ba atan haʼu, tanba ho haʼu-nia ai-tonka deʼit mak haʼu hakur mota Jordaun neʼe, maibé agora haʼu iha ona grupu rua.”—Gên 32:10.
9 Ezemplu sira-neʼe hatudu katak Moisés nia liafuan tuirmai neʼe mak loos. Nia dehan: “Oh, Jeová, Ita rasik mak hela-fatin neʼebé loos ba ami durante jerasaun ba jerasaun.” (Sal 90:1) Jeová “la muda” no nia nafatin hadomi, proteje no tau matan ba ninia atan sira neʼebé laran-metin ba nia. (Tgo 1:17) Mai ita haree oinsá.
JEOVÁ MAK “HELA-FATIN NEʼEBÉ LOOS” BA ITA OHIN LORON
10. Tanbasá mak ita bele fiar katak Jeová nafatin hanesan hela-fatin neʼebé seguru ba ninia atan sira?
10 Hanoin toʼok situasaun tuirmai neʼe: Ita iha tribunál hodi fó sasin hasoru ulun-naʼin ba organizasaun aat ida neʼebé halo krime oioin iha mundu tomak. Nia mak ema bosok-teen no ohodór neʼebé iha matenek no forsa boot. Kuandu ita foin sai husi tribunál neʼe, ita sente seguru ka lae? Lae duni! Karik ita husu ema ruma atu proteje ita. Nuʼudar Jeová nia atan, ita mós hasoru duni situasaun hanesan neʼe tanba ita fó sasin hasoru Jeová nia inimigu, Satanás! (Lee Apokalipse 12:17.) Maibé Satanás konsege hapara Maromak nia povu atu koʼalia ka lae? Lae duni. Ita kontinua haklaken ba ema barak liután iha mundu tomak. Tanbasá? Tanba Jeová mak ita-nia “hela-fatin neʼebé loos” hodi proteje no haraik bensaun ba ita iha loron ikus sira-neʼe. (Lee Isaías 54:14, 17.a) Maibé, Jeová la bele proteje ita se ita husik Satanás lohi ita atu sai husi hela-fatin neʼe.
Maromak nia anju sira ajuda no proteje ita
11. Ita bele aprende saida husi Abraão, Isaac no Jacob nia ezemplu?
11 Mai ita hanoin kona-ba buat seluk neʼebé ita bele aprende husi Abraão, Isaac no Jacob nia ezemplu. Maski sira hela iha rai-Kanaan, sira nafatin haketak an husi ema sira iha rai neʼe, no odi ema sira-neʼe nia hahalok aat oioin. (Gên 27:46) Maromak nia atan sira-neʼe la presiza lista naruk ho ukun-fuan oioin atu hatene saida mak loos no saida mak sala tanba sira hatene ona saida mak Jeová hadomi no saida mak Nia odi. Tan neʼe, sira lakohi atu hakbesik ho ema iha Kanaan. Ida-neʼe ezemplu diʼak tebes mai ita! Kuandu ita hili kolega ka atividade halimar nian, ita mós halo tuir sira-nia ezemplu. Maibé, triste katak ema kristaun balu hatudu liuhusi sira-nia hahalok katak sira sente kontente iha mundu aat neʼe. Se ita mós sente hanesan neʼe, ita presiza halo orasaun hodi husu Jeová nia ajuda. Ita labele haluha katak mundu neʼe mak Satanás ninian, no Satanás nunka hatudu laran-diʼak mai ita no la hanoin ita.—2 Kor 4:4; Ef 2:1, 2.
12. (a) Iha dalan saida deʼit mak Jeová ajuda ninia atan sira? (b) Ita rasik sente oinsá kona-ba buat neʼebé Jeová fó atu ajuda ita?
12 Se ita lakohi Satanás atu lohi ita, ita presiza aproveita buat hotu neʼebé Jeová fó atu ajuda ninia atan sira. Porezemplu, Jeová ajuda ita liuhusi reuniaun kristaun, adorasaun nuʼudar família, no katuas kristaun sira neʼebé fó kmaan no apoia ita atu bele tahan hasoru susar oioin iha ita-nia moris. (Ef 4:8-12) Irmaun George Gangas, neʼebé uluk serbí nuʼudar membru ida husi Grupu Administradór, nia hatete: “Kuandu haʼu hamutuk ho [Maromak nia povu], haʼu sente haʼu hamutuk ho haʼu-nia família.” Ita mós sente hanesan neʼe ka lae?
13. Ita bele aprende saida husi Ebreu 11:13?
13 Husi Abraão, Isaac no Jacob nia ezemplu, ita mós aprende katak ita lalika taʼuk se ita la hanesan ho ema seluk iha mundu aat neʼe. Hanesan temi iha parágrafu 1, sira “simu an nuʼudar ema rai seluk nian no ema laʼo-rai iha mundu neʼe”, neʼe katak sira la moe atu fó sai katak sira nuʼudar ema laʼo-rai, ka estranjeiru iha rai neʼe. (Ebr 11:13) Ita mós hatudu katak ita la hanesan ho ema seluk iha mundu neʼe ka lae? Maski dala ruma la fasil atu halo ida-neʼe, maibé hodi hetan ajuda husi Jeová no ita-nia maluk kristaun sira, ita bele. Keta haluha, ita la mesak. Ema hotu neʼebé hakarak serbí Jeová presiza luta hasoru Satanás no ninia mundu aat neʼe! (Ef 6:12) Maibé ita bele manán hodi tau fiar ba Jeová no simu nia nuʼudar ita-nia hela-fatin neʼebé seguru.
14. Abraão hein ba “sidade” saida?
14 Ita mós presiza halo tuir Abraão nia ezemplu hodi “hateke” ba kolen neʼebé ita sei simu. (2 Kor 4:18) Apóstolu Paulo hatete katak Abraão hein nafatin ba “sidade neʼebé Maromak harii, hanoin no hakiak”. (Ebr 11:10) “Sidade” neʼe mak Maromak nia Ukun. Klaru katak Abraão presiza hein ba “sidade” neʼe. Maibé ita lae. Maromak nia Ukun komesa ona iha lalehan. No mós, buat barak neʼebé akontese daudauk hatudu katak lakleur tan Maromak sei ukun mundu tomak. Entaun, dalan neʼebé ita halaʼo ita-nia moris hatudu katak ita fiar duni ida-neʼe ka lae? Ita tau uluk Maromak nia hakarak iha ita-nia moris no haketak an husi mundu aat neʼe ka lae?—Lee 2 Pedro 3:11, 12.
JEOVÁ SEI KONTINUA SAI ITA-NIA “HELA-FATIN NEʼEBÉ LOOS”
15. Ema neʼebé tau fiar ba mundu aat neʼe sei hasoru situasaun saida iha futuru?
15 Nuʼudar Satanás nia mundu aat neʼe besik ona toʼo rohan, problema oioin iha mundu neʼe sei sai aat liután. (Mt 24:7, 8) No durante terus boot, situasaun iha mundu neʼe sei sai aat duni, sei sai runguranga no ema sei taʼuk tebes. (Hab 3:16, 17) Bíblia fó-hatene nanis katak sira sei halai ba foho hodi subar “iha rai-kuak sira no iha fatuk sira leet”. (Apok 6:15-17) Maibé, sei la iha rai-kuak ka organizasaun polítiku no ekonomia nian neʼebé bele proteje sira.
16. Oinsá mak ita-nia haree kona-ba kongregasaun kristaun? Tanbasá?
16 Maibé durante terus boot neʼe, ita sei kontinua hetan protesaun husi Jeová. Hanesan ho profeta Habacuc iha tempu uluk, ita mós “sei haksolok iha Jeová” neʼebé fó salvasaun mai ita. (Hab 3:18) Iha dalan saida deʼit mak Jeová sei proteje ita iha tempu susar neʼe? Atu hatene kona-ba neʼe, ita presiza hein. Maibé, ita bele fiar katak Jeová sei nafatin organiza ninia povu no fó matadalan ba sira, hanesan nia halo ba ema Israel kuandu sira sai husi rai-Egiptu. (Apok 7:9; lee Êxodo 13:18.b) Oinsá mak Jeová sei fó matadalan mai ita? Karik Jeová sei uza kongregasaun hodi fó-hatene mai ita kona-ba buat neʼebé ita tenke halo. Profeta Isaías fó-hatene nanis kona-ba “kuartu sira” neʼebé Maromak nia povu tama hodi hetan protesaun. Karik kuartu sira-neʼe mak kona-ba kongregasaun rihun ba rihun iha mundu tomak. (Lee Isaías 26:20.c) Ita hafolin reuniaun kongregasaun nian ka lae? Ita sempre prontu atu halo tuir matadalan sira neʼebé Jeová fó mai ita liuhusi kongregasaun ka lae?—Ebr 13:17.
17. Oinsá mak Jeová nafatin sai nuʼudar “hela-fatin neʼebé loos” ba ninia atan sira neʼebé mate ona?
17 Jeová mós nafatin sai nuʼudar “hela-fatin neʼebé loos” ba ninia atan sira neʼebé mate antes terus boot. Oinsá? Jeová hatete ba Moisés: “Haʼu mak . . . Abraão nia Maromak, Isaac nia Maromak, no Jacob nia Maromak.” (Êx 3:6) Kuandu Jesus temi fali liafuan neʼe, nia hatutan tan: “Nia laʼós [ema mate] sira-nia Maromak, maibé ema moris sira-nian; basá ba Naʼi, ema hotu moris hela.” (Lc 20:38) Sin, Jeová nia atan sira neʼebé laran-metin toʼo mate, sira hanesan moris hela iha Jeová nia haree, no iha futuru nia sei halo sira moris hiʼas fali.—Ecle 7:1.
18. Oinsá mak Jeová sei sai “hela-fatin neʼebé loos” ba ninia atan sira iha mundu foun?
18 Iha mundu foun, Jeová sei sai “hela-fatin neʼebé loos” ba ninia povu iha dalan seluk tan. Apokalipse 21:3 hatete: “Ó haree sidade neʼe? Neʼe mak Maromak nia horik-fatin iha ema sira leet. Nia sei halo nia uma iha sira leet; sira sei sai nia povu no nia sei hela ho sira.” Maromak Jeová sei uza Jesus Kristu atu ukun mundu tomak durante tinan rihun ida. Depois neʼe, Jesus sei entrega fali ukun neʼe ba ninia Aman tanba nia ramata ona ninia knaar atu kumpre Maromak nia hakarak iha rai. (1 Kor 15:28) Ikusmai, Jeová rasik mak sei ukun ema neʼebé sai perfeitu ona. Ida-neʼe mak esperansa neʼebé kapás tebes mai ita! Tan neʼe, mai ita hakaʼas an atu banati-tuir Maromak nia atan sira husi tempu uluk hodi simu Jeová nuʼudar ita-nia “hela-fatin neʼebé loos”.
a Isaías 54:14, 17: “14 Ó sei sai metin iha justisa rasik. Ó sei sai dook husi terus tanba ó sei la taʼuk ba buat ida, no ó sei dook husi buat naran deʼit neʼebé halo ó taʼuk, tanba ida-neʼe sei la mai besik ó.” “17 ‘Kroʼat naran deʼit neʼebé ema halo atu hasoru ó sei la manán, no nanál hotu neʼebé hamriik hasoru ó iha tesi-lia, ó sei duun. Ida-neʼe mak liman-rohan ba Jeová nia atan sira, no sira-nia justisa mai husi haʼu’, Jeová hatete.”
b Êxodo 13:18: “Tan neʼe, Maromak halo povu neʼe laʼo fali liuhusi dalan iha rai-fuik ba Tasi Mean. Maibé Israel nia oan sira bá ho formasaun funu nian hodi sai husi rai-Egiptu.”
c Isaías 26:20: “Bá, haʼu-nia povu, tama ba ó-nia kuartu neʼebé seguru, no taka ó-nia odamatan iha ó-nia kotuk. Subar an ba tempu uitoan toʼo Maromak nia hirus liu ona.”