Informasaun atu uza hamutuk livru Moris Kristaun no Haklaken

6-​12 MARSU

JEREMIAS (YEREMIA) 1-4

Keʼe no hetan buat murak husi Bíblia

(Jeremias 2:13, 18)

w07 15/3 p. 9 par. 8

Pontu importante husi livru Jeremias

2:13, 18. Ema Izraél sira neʼebé la laran-metin halo hahalok aat rua. Sira husik tiha Jeová, Maromak neʼebé fó bensaun, matadalan no protesaun ba sira. No sira “keʼe bee-posu ba sira-nia an rasik” hodi halo aliansa ho rai-Ejitu no Asíria. Se ita husik Jeová hodi buka ema nia hanorin, teoria no mundu nia polítiku, neʼe hanesan deʼit ita troka “hun ba bee moris nian” ho “bee-posu sira neʼebé nakfera ona”.

(Jeremias 4:10)

w07 15/3 p. 9 par. 4

Pontu importante husi livru Jeremias

4:10; 15:18​—⁠Oinsá mak Jeová lohi ninia povu neʼebé la laran-metin? Iha Jeremias nia tempu, iha profeta sira neʼebé “fó sai lia-bosok”. (Jeremias [Yeremia] 5:31; 20:6; 23:16, 17, 25-28, 32) Maski nuneʼe Jeová la hanetik sira atu fó sai mensajen falsu.

13-​19 MARSU

JEREMIAS (YEREMIA) 5-7

Keʼe no hetan buat murak husi Bíblia

(Jeremias 6:16)

w05 1/11 p. 23 par. 11

Ita sei laʼo hamutuk ho Maromak ka lae?

¹¹  Ita husik Maromak nia Lia­fuan atu dirije didiʼak ita ka lae? Dala ruma ita ida-idak presiza uza ita-nia tempu atu buka-hatene didiʼak ita-nia an. Mai ita haree eskritura ida neʼebé sei ajuda ita atu halo nuneʼe: “Jeová dehan nuneʼe: ‘Hamriik iha dalan kruzamentu no haree bá. Husu toʼok kona-ba dalan sira neʼebé antigu, husu toʼok, dalan ida-neʼebé mak diʼak, no laʼo iha dalan neʼe bá, atu nuneʼe imi bele hetan kmaan.’” (Jeremias [Yeremia] 6:16) ­Karik eskritura neʼe halo ita hanoin kona-ba ema laʼo-ain neʼebé para iha kruzamentu hodi husu diresaun. Tuir loloos, sira neʼebé kontra Jeová iha rai-Izraél mós presiza halo buat neʼebé hanesan. Sira presiza fila fali ba “dalan sira neʼebé antigu”. Dalan sira-neʼe mak ‘dalan diʼak’, neʼebé uluk sira-nia beiʼala sira neʼebé laran-metin laʼo bá. Maibé povu Izraél ulun-toos no lakohi simu Maromak nia matadalan atu laʼo iha dalan neʼebé loos. Eskritura neʼe hatutan tan: “Maibé sira dehan: ‘Ami lakohi laʼo iha dalan neʼe.’” Maibé, Maromak nia povu ohin loron la hanesan neʼe.

(Jeremias 6:22, 23)

w88 1/4 p. 13 par. 15

Jeremias​—Profeta tesi-lia nian neʼebé ema la gosta

Judá hetan kastigu

¹⁵ Toʼo maizumenus tinan 632 molok Kristu, ema Babilónia no Média manán ona rai-Asíria, no rai-Ejitu mós sai fraku ona. Maibé tuir loloos, rai-Judá sei hetan susar boot husi parte norte. Tan neʼe, Jeremias tenke fó avizu ba ema judeu! “Haree bá! Povu ida sei mai husi rai norte . . . Sira mak siʼak tebes no la iha laran-sadiʼa. . . . Oh oan-feto Siaun, tropa neʼe sei forma didiʼak atu halo funu hasoru ó hanesan asuwaʼin ida.” Iha tempu neʼebá Babilónia nia ukun sai forsa ba daudaun. Maromak sei uza ukun neʼe atu fó kastigu ba Judá neʼebé fiar-laek.​—⁠Jeremias (Yeremia) 6:22, 23; 25:8, 9.

20-​26 MARSU

JEREMIAS (YEREMIA) 8-​11

Keʼe no hetan buat murak husi Bíblia

(Jeremias 9:24)

w13 15/1 p. 20 par. 16

Hakbesik nafatin ba Jeová

¹⁶ Ita sente kontente no gaba an tanba ita mak nuʼudar Testemuña ba Jeová. (Jer 9:24) Se ita gaba an iha dalan neʼebé loos, ida-neʼe ajuda ita hakaʼas an atu halo desizaun diʼak no halo tuir nafatin Maromak nia matadalan. Maibé, ita mós presiza kuidadu atu la sai foti-an hodi hanoin katak ita mak sempre loos tanba ida-neʼe bele hadook ita husi Jeová.​—⁠Sal 138:6; Rom 12:​3.

(Jeremias 11:10)

w07 15/3 p. 9 par. 2

Pontu importante husi livru Jeremias

3:​11-22; 11:​10-12, 17​—⁠Tanbasá mak Jeremias temi kona-ba suku sanulu husi parte norte maski Samaria lakon ona iha tinan 740 molok Kristu? Neʼe tanba Jeruzalein neʼebé naksobu iha tinan 607 molok Kristu mak hanesan Maromak nia tesi-lia ba nasaun Izraél tomak, laʼós deʼit ba rai-Judá. (Ezequiel [Yehezkiel] 9:9, 10) Maski suku sanulu lakon ona, Jeruzalein kontinua reprezenta sira, tanba Maromak nia profeta sira nafatin hatoʼo Maromak nia lia­fuan ba ema Izraél sira.

27 MARSU–​2 ABRÍL

JEREMIAS (YEREMIA) 12-​16

Keʼe no hetan buat murak husi Bíblia

(Jeremias 12:1, 2, 14)

jr p. 118 par. 11

Loron-loron ita husu “Jeová iha neʼebé?”

¹¹ Jeremias husu pergunta ida bainhira nia haree ema aat sira hetan susesu. (Lee Jeremias [Yeremia] 12:1, 3.) Jeremias la duvida kona-ba Maromak nia hahalok loos, maibé ninia hakarak mak atu Maromak hatán ba ninia halerik. Hodi koʼalia nakloke ba Jeová, hatudu katak Jeremias iha relasaun neʼebé besik tebes ho Jeová, hanesan oan ho aman. Jeremias la komprende deʼit tanbasá mak ema judeu barak iha moris neʼebé diʼak maski sira mak ema neʼebé aat. Ikusmai, Jeremias hetan duni resposta ba ninia pergunta ka lae? Jeová promete katak Nia sei fokit sai ema aat sira. ­(Je­remias [Yeremia] 12:14) Bainhira Jeremias haree rezultadu husi ninia orasaun, karik ninia fiar ba Maromak nia justisa sai metin liután. No karik neʼe book Jeremias atu sadere liután ba Maromak liuhusi orasaun hodi fó sai ninia sentimentu ba ninia Aman.

(Jeremias 15:17)

w04 1/5 p. 12 par. 16

Sai aten-brani hanesan Jeremias

Kuidadu ho ita-nia ransu

¹⁶ Jeremias hakerek kona-ba buat seluk neʼebé ajuda nia atu sai aten-brani. Nia dehan: “Haʼu la tuur iha ema halimardór sira-nia leet no haksolok hamutuk. Tanba Ita-nia liman tula mai haʼu, haʼu tuur mesak, tanba Ita halo nakonu ona haʼu ho laran-nakali.” (Jeremias [Yeremia] 15:17) Ba Jeremias diʼak liu mesak duké sai aat tanba ransu hamutuk ho ema aat sira. Ohin loron, ita mós tenke iha hanoin neʼebé hanesan. Mai ita nunka haluha apóstolu Paulo nia avizu, neʼebé dehan “ransu hamutuk ho ema aat sei estraga toman diʼak,” neʼe inklui toman diʼak sira neʼebé ita iha ba tinan barak ona.​—⁠1 Korinto 15:​33.

JEREMIAS

1 Tuirmai mak Jeremias nia lia­fuan, oan-mane husi amlulik ida iha Anatot iha rai-Benjamin, naran Hilkias. ² Jeová nia lia­fuan tun ba Jeremias iha tempu neʼebé Liurai Josias, Amon nia oan-mane, nia ukun ba rai-Judá tama ba tinan 13. ³ Maromak nia lia­fuan mós tun ba Jeremias iha tempu neʼebé Liurai Jehoakim, Josias nia oan-mane, ukun ba rai-Judá, toʼo Liurai Zedekias, Josias nia oan-mane, remata ninia ukun ba rai-Judá ba tinan 11. Ikusmai iha fulan dalima iha tinan neʼe ema sira iha Jeruzalein sai dadur.

⁴ Jeová nia lia­fuan tun mai haʼu, dehan:

⁵ “Antes haʼu kria ó iha inan nia knotak, haʼu hatene ona ó,

No antes ó moris, haʼu hili ona ó atu halo serbisu santu nuʼudar profeta ba nasaun sira.”

⁶ Maibé haʼu hatete: “Oh, Naʼi Jeová Ukun-Naʼin Boot Liu!

Haʼu la iha matenek atu koʼalia, tanba haʼu mak otas kiʼik deʼit.”

⁷ Tuirmai Jeová dehan mai haʼu:

“Keta hatete: ‘Haʼu mak otas kiʼik deʼit.’

Tanba ó tenke bá toʼo ema hotu neʼebé haʼu haruka ó bá,

No ó tenke hatoʼo buat hotu neʼebé haʼu haruka ó atu koʼalia.

⁸ Keta taʼuk ba sira,

Tanba Jeová dehan: ‘Haʼu sei hamutuk ho ó hodi salva ó.’”

⁹ Tuirmai Jeová lolo nia liman no kona haʼu-nia ibun. No Jeová dehan mai haʼu: “Haʼu tau ona haʼu-nia lia­fuan sira iha ó-nia ibun. ¹⁰ Haree, iha loron neʼe haʼu fó kbiit ba ó atu sai boot liu fali nasaun sira no governu sira, atu fokit no atu sobu, atu harahun no atu halakon, atu harii no atu kuda.”

¹¹ Jeová nia lia­fuan tun fali mai haʼu, dehan: “Jeremias, saida mak ó haree?” Nuneʼe haʼu hatete: “Haʼu haree ai-amendueira nia sanak.”

¹² Jeová dehan mai haʼu: “Ó haree neʼe loos, tanba haʼu hadeer nafatin hodi haʼu bele kumpre lia­fuan neʼebé haʼu hatete.”

¹⁴ Tuirmai Jeová dehan mai haʼu:

“Susar boot sei mosu mai husi rai norte,

Haterus ema hotu neʼebé hela iha rai neʼe.

Iha Jeruzalein nia portaun sira,

Sira sei haleʼu no ataka sidade neʼe nia moru

No ataka sidade sira hotu iha rai-Judá.

Tanba sira husik ona haʼu,

¹⁷ Maibé ó tenke halo prontu ó-nia an bá,

No ó tenke hamriik no fó-hatene ba sira lia­fuan hotu neʼebé haʼu haruka ba ó.

Keta taʼuk ba sira,

Hodi nuneʼe haʼu sei la hataʼuk ó iha sira-nia oin.

¹⁸ Tanba iha loron neʼe, haʼu halo ona ó sai hanesan sidade neʼebé metin,

Ninia amlulik sira no povu sira iha rai neʼe.

¹⁹ No sira sei halo funu duni hasoru ó,

Maibé sira sei la manán hasoru ó,

2 Jeová nia lia­fuan tun mai haʼu, dehan: ² “Bá no hatoʼo ba Jeruzalein: ‘Jeová dehan nuneʼe:

“Haʼu hanoin-hetan ho didiʼak bainhira ó sei otas kiʼik, ó laran-metin ba haʼu,

Bainhira haʼu prenda ó atu kaben, ó hatudu domin mai haʼu,

Ó laʼo tuir haʼu iha rai-fuik laran,

Iha rai neʼebé ema la kari fini.

³ Izraél mak santu ba Jeová, ai-fuan primeiru ba nia.” ’

Jeová dehan: ‘Ema sé deʼit neʼebé halo aat ba nia sei simu sala todan.

Susar boot sei kona sira.’ ”

⁴ Oh, Jakob nia umakain,

No imi família hotu husi umakain Izraél, rona ba Jeová nia lia­fuan.

⁵ Jeová dehan nuneʼe:

“Imi-nia beiʼala sira hetan sala saida iha haʼu,

Neʼebé halo sira hadook an husi haʼu,

No laʼo tuir estátua sira neʼebé folin-laek toʼo halo sira-nia an rasik mós sai folin-laek?

⁶ Sira la husu: ‘Jeová iha loos neʼebé?

Ida neʼebé lori ita sai husi rai-Ejitu,

Neʼebé lori ita laʼo liu rai-fuik,

Laʼo liu rai-fuik maran neʼebé iha rai-kuak sira,

Rai neʼebé bee la iha no lalatak metan tebes,

Rai neʼebé la iha ema ida mak laʼo liu

No la iha ema ida mak hela,

Nia iha neʼebé?’

Maibé imi tama mai no hafoʼer haʼu-nia rai,

Imi halo haʼu-nia liman-rohan sai fali buat neʼebé haʼu hakribi tebes.

⁸ Amlulik sira la husu: ‘Jeová iha loos neʼebé?’

Sira neʼebé kaer Ukun-Fuan la hatene haʼu,

Bibi-atan sira kontra hasoru haʼu,

Profeta sira mós fó sai lia­fuan hodi Baal nia naran,

⁹ Jeová dehan: ‘Nuneʼe haʼu sei foti lia tan hasoru imi,

No haʼu mós sei foti lia hasoru imi-nia oan-mane sira-nia oan-mane sira.’

¹⁰ ‘Maibé hakat ba illa sira ema Kitim nian no haree bá.

Sin, haruka manu-ain ba Kedar no hanoin didiʼak bá;

¹¹ Iha ka lae, nasaun ida neʼebé soe ona sira-nia maromak no troka fali ho buat neʼebé laʼós maromak?

Maibé haʼu-nia povu rasik soe ona haʼu-nia glória no troka fali ho buat neʼebé folin-laek.

¹² Oh lalehan, haree ba ida-neʼe no hakfodak bá,

Sira husik tiha haʼu, hun ba bee moris nian,

No sira keʼe bee-posu ba sira-nia an rasik,

Bee-posu sira neʼebé nakfera ona, neʼebé la bele rai bee.’

¹⁴ ‘Povu Izraél mak atan ida ka? Nia mak atan nia oan ida neʼebé moris mai iha ema nia umakain ka?

Se laʼós hanesan neʼe, tansá mak ema domina nia hanesan atan?

¹⁵ Leaun-oan sira hasaʼe lian siʼak hasoru nia,

Sira hasaʼe lian makaʼas.

Sira halo ninia rai sai fatin neʼebé halo ema taʼuk.

Ahi han mohu tiha ninia sidade sira, toʼo ema ida mós la bele hela.

¹⁶ Ema Nof ho ema Tafnes sira mós han mohu ó-nia baboton.

¹⁷ Neʼe mak buat neʼebé ó rasik halo ba ó-nia an, loos ka lae?

Tanba ó husik tiha ó-nia Maromak Jeová,

Bainhira nia lori hela ó laʼo tuir dalan.

¹⁸ Agora tansá mak ó hakarak laʼo ba dalan Ejitu

Atu hemu bee husi Sior?

Tansá mak ó hakarak laʼo ba dalan Asíria

Atu hemu bee husi Mota Eufrates?

¹⁹ Ó-nia hahalok aat tenke korrije ó,

Hatene no komprende bá, katak husik Jeová, ó-nia Maromak,

Mak buat neʼebé aat no moruk tebes.

No tesi kotu korrente neʼebé kesi metin ó.

Maibé ó dehan: “Haʼu sei la serbí Ita”,

No iha foho-oan hotu nia leten no ai-hun buras hotu nia okos

Ó toba haklenan an hanesan feto-aat.

²¹ Haʼu kuda ó nuʼudar uvas mean hun ida neʼebé diʼak liu, ninia fini hotu diʼak.

Nuneʼe, oinsá mak ó sai fali uvas-hun seluk nia sanak neʼebé aat iha haʼu-nia oin?’

²³ Oinsá mak ó bele hatete: ‘Haʼu la hafoʼer haʼu-nia an.

Haʼu la halo tuir Baal sira’?

Haree bá ó-nia lalaʼok iha foho-leet.

Hanoin didiʼak ba buat neʼebé ó halo ona.

Neʼebé halai tun-saʼe, la hatene atu bá loos neʼebé.

²⁴ Hanesan kuda-burru inan neʼebé toman ona hela iha rai-fuik,

Neʼebé horon anin hodi kaan kuda-burru aman.

Sé mak bele hanetik nia bainhira nia hakarak namanas atu kaben?

Iha ninia tempu, sira sei hetan nia.

²⁵ Keta husik ó-nia ain sai tanan,

No keta husik ó-nia kakorok sente hamrook.

Maibé ó hatete: ‘Lae, haʼu la bele fila fali ona!

Haʼu laran monu ona ba nasaun seluk nia maromak sira,

No haʼu sei halo tuir sira.’

²⁶ Hanesan naʼok-teen ida neʼebé sente moe tanba ema kaer toman nia,

Umakain Izraél nian mós hetan ona moe boot,

Sira hotu, sira-nia liurai sira, ulun-naʼin sira,

Amlulik sira no profeta sira.

²⁷ Sira hatete ba ai-hun: ‘Ó mak haʼu-nia aman’,

No ba fatuk: ‘Ó mak hahoris haʼu.’

Maibé ba haʼu, sira fila kotuk no la fó oin.

No iha tempu terus nia laran, sira sei dehan:

‘Hamriik bá, no salva ami!’

Tanba oh Judá, ó-nia maromak sira sai barak tebes ona hanesan ó-nia sidade sira.

Tansá mak imi hotu kontra hasoru haʼu?’

Sira lakohi simu dixiplina;

Imi-nia surik rasik mak han tiha imi-nia profeta sira

Hanesan leaun ida neʼebé ataka ema.

³¹ Oh imi hotu iha jerasaun ida-neʼe, imi rasik hanoin didiʼak lai Jeová nia lia­fuan.

Ba Izraél, haʼu sai ona hanesan rai-fuik lerek deʼit ka?

Ka rai ida neʼebé nakukun metan ka?

Ami sei la fila fali tan ba Ita’?

³² Feto virjen ida bele haluha ninia sasán sira hafurak an nian ka?

Noiva ida bele haluha ninia hena kazamentu nian ka?

Maibé haʼu-nia povu rasik, sira haluha tiha ona haʼu ba tempu kleur neʼebé sura la bele.

³³ Oh, feto, ó sai matenek loos atu buka dalan hodi bele manán mane nia domin!

³⁴ Ó-nia hatais mós iha ona noda husi ema kiak sira-nia raan neʼebé la sala.

Maski sira la tama ema nia uma hodi naʼok,

Maibé sira-nia raan iha ó-nia hatais hotu.

³⁵ Maibé ó dehan: ‘Haʼu la iha sala.

Maromak nia hirus ba haʼu lakon duni ona.’

Agora haʼu tesi lia hasoru ó

Tanba ó dehan: ‘Haʼu la halo sala.’

³⁶ Tansá ó hanoin ó-nia hahalok neʼebé troka bá-mai mak baibain deʼit?

Hanesan ó sai moe ona tanba rai-Asíria,

Nuneʼe mós ó sei sai moe tanba rai-Ejitu.

³⁷ Tanba Jeová la simu ona sira neʼebé ó tau fiar,

Tan neʼe mós ó sei laʼo sai hodi tula ó-nia liman iha ó-nia ulun;

Sira sei la lori susesu ba ó.”

3 Ema husu: “Se laʼen ida soe nia feen no feen neʼe husik duni nia no sai fali mane seluk nian, laʼen neʼe sei fila fali ba nia feen neʼe ka lae?”

Rai neʼe sai foʼer tebes ona, loos ka lae?

Jeová dehan: “Ó faʼan ona ó-nia an hodi halo sala-foʼer ho mane barak,

No agora ó bele fila fali mai haʼu ka lae?

² Foti ó-nia matan no haree ba foho-oan sira neʼebé molik.

Iha fatin neʼebé mak mane seidauk estraga ó?

Ó tuur iha dalan ninin hodi hein ba sira,

Hanesan ema ida neʼebé laʼo-lemo iha rai-fuik.

Ó hafoʼer beibeik rai neʼe

Hodi sai feto-aat no halo hahalok aat.

³ Tan neʼe udan boot la tun,

No iha tempu udan mós udan la iha.

Ó-nia moe la iha.

⁴ Maibé agora ó bolu fali haʼu, dehan:

⁵ Ita-Boot sei hirus ba nafatin ka?

Ita-Boot sempre haree haʼu-nia sala ka?’

Ó hatete hanesan neʼe,

⁶ Iha Liurai Josias nia tempu, Jeová hatete mai haʼu: “‘Ó haree ona buat neʼebé Izraél la laran-metin halo ka lae? Nia saʼe ba foho aas hotu nia leten no bá ai-hun buras hotu nia okos hodi halo sala-foʼer hanesan feto-aat. ⁷ Maski Izraél halo buat hirak-neʼe hotu, haʼu kontinua hatete ba nia atu fila fali mai haʼu, maibé nia la fila; no Judá hateke nafatin ba Izraél, ninia biin neʼebé traidór. ⁸ Bainhira haʼu haree ida-neʼe, haʼu haruka Izraél neʼebé la laran-metin husik haʼu no halo surat soe-malu nian ba nia tanba nia halo ona sala-foʼer. Maibé ninia alin-feto Judá neʼebé traidór la sai taʼuk; nia mós bá halo sala-foʼer hanesan feto-aat. ⁹ Nia haree ninia hahalok feto-aat nian mak buat baibain deʼit, no nia kontinua hafoʼer rai neʼe no halo sala-foʼer ho fatuk no ai sira. ¹⁰ Maski nuneʼe, ninia alin-feto Judá neʼebé laran-makerek lakohi fila fali mai haʼu ho laran tomak, nia halo finje deʼit’, Jeová dehan nuneʼe.”

¹¹ Tuirmai Jeová dehan mai haʼu: “Izraél neʼebé la laran-metin, nia diʼak liu fali Judá neʼebé laran-makerek. ¹² Bá no hatoʼo lia­fuan tuirmai neʼe ba parte norte:

‘Jeová dehan: “Fila fali mai haʼu, oh, Izraél neʼebé ulun-toos.” Jeová dehan: “Haʼu sei la hateke tun ba ó ho hirus, tanba haʼu laran-metin. Haʼu sei la rai hirus ba nafatin, ¹³ naran katak ó rekoñese ó-nia sala, tanba ó kontra hasoru ona Jeová, ó-nia Maromak. Ó kontinua buka tuir maromak falsu sira no faʼan an ba sira iha ai-hun buras hotu nia okos, maibé ó lakohi halo tuir haʼu-nia lia­fuan.” Jeová dehan nuneʼe.’

¹⁴ Jeová dehan: “Fila fali mai haʼu, imi oan sira neʼebé ulun-toos, tanba haʼu sai ona naʼin neʼebé loos ba imi; no haʼu sei foti imi, ida husi sidade ida no rua husi umakain ida, no haʼu sei lori imi ba Siaun. ¹⁵ No haʼu sei fó ba imi bibi-atan sira neʼebé monu loos ba haʼu-nia laran, no sira sei fó-han imi ho koñesimentu no matenek. ¹⁶ Iha tempu neʼebá, imi sei iha oan no bei-oan sira no sai barak iha rai neʼe.” Jeová dehan: “Sira sei la hatete tan: ‘Jeová nia arka aliansa nian!’ Sira sei la hanoin tan ba arka neʼe, no sira mós sei la hanoin-hetan ka sente lakon, no sira mós sei la halo fali ida foun. ¹⁷ Iha tempu neʼebá, sira sei temi Jeruzalein nuʼudar Jeová nia kadunan; no nasaun hotu sei halibur hamutuk ba Jeová nia naran iha Jeruzalein, no sira sei la ulun-toos tan hodi laʼo tuir sira rasik nia laran-aat.”

¹⁸ “Iha tempu neʼebá sira sei laʼo hamutuk, umakain Judá hamutuk ho umakain Izraél, no sira sei sai husi rai norte no fila fali mai rai neʼe, neʼebé haʼu fó ona ba imi-nia beiʼala sira nuʼudar liman-rohan. ¹⁹ No uluk haʼu hanoin: ‘Ho laran-haksolok haʼu tau ona ó iha haʼu-nia oan sira-nia leet no fó ona rai neʼebé diʼak ba ó, liman-rohan neʼebé furak liu iha nasaun sira-nia leet!’ Haʼu mós hanoin imi sei bolu haʼu: ‘Haʼu-nia Aman!’ no imi sei nafatin laʼo tuir haʼu no sei la fila kotuk. ²⁰ ‘Tebes duni, hanesan feen ida sai traidór no husik nia laʼen, imi mós sai ona traidór ba haʼu, oh umakain Izraél’, Jeová dehan nuneʼe.”

²¹ Iha foho-oan sira neʼebé molik, ema rona lian,

Povu Izraél nia lian halerik no tanis husu ajuda,

Tanba sira halo kleʼuk ona sira-nia dalan;

Sira haluha ona Jeová, sira-nia Maromak.

²² “Fila fali mai haʼu, imi oan sira neʼebé traidór.

Haʼu sei haloos imi-nia laran neʼebé la metin.”

“Ami mak neʼe! Ami mai hakbesik ba Ita,

Tanba Ita, oh Jeová, Ita mak ami-nia Maromak.

²³ Loloos, barullu neʼebé ami halo iha foho-oan sira no foho sira, neʼe habosok ami-nia an deʼit.

Loloos Jeová, ami-nia Maromak mak Izraél nia salvasaun.

²⁴ Maibé husi tempu neʼebé ami sei joven, maromak folin-laek neʼebé halo moe mak han mohu ami-nia beiʼala sira-nia kolen,

Sira-nia bibi no karau sira,

Sira-nia oan-mane no oan-feto sira.

²⁵ Husik ami toba latan ho moe,

No husik ami-nia moe mak falun ami,

Tanba ami ho ami-nia aman sira halo sala ona hasoru Jeová ami-nia Maromak,

Husi tempu neʼebé ami sei joven toʼo ohin loron,

4 Jeová dehan: “Oh Izraél, se ó fila fali,

Se ó fila fali mai haʼu

Ó sei la laʼo lemo-lemo iha ema nia rai.

‘Haʼu jura hodi Jeová neʼebé moris!’

“Fila rai bá iha fatin neʼebé diʼak ba imi atu kuda,

No keta kari tan fini iha ai-tarak nia leet.

⁴ Imi ema Judá no ema neʼebé hela iha Jeruzalein,

No hasai buat neʼebé foʼer husi imi-nia laran bá,

Atu nuneʼe haʼu-nia hirus labele lakan hanesan ahi

No ahi neʼe labele lakan makaʼas toʼo la iha ida mak bele hamate,

Tanba imi-nia hahalok aat sira.”

⁵ Fó-hatene ida-neʼe iha Judá bá, no haklaken iha Jeruzalein bá.

Hakilar no huu dikur iha rai tomak bá.

Hasaʼe lian makaʼas bá hodi hatete: “Halibur hamutuk bá,

No mai ita halai ba sidade sira neʼebé seguru.

⁶ Foti saʼe ai-riin sinál nian ba Siaun bá.

Buka fatin subar nian bá, keta hamriik deʼit”,

⁷ Nia saʼe ona hanesan leaun ida neʼebé sai husi ai-horis nia leet;

Nia neʼebé sobu nasaun sira sai mai ona.

Nia sai ona husi ninia fatin atu haterus imi-nia rai.

Imi-nia sidade sira sei harahun toʼo la iha ema ida mak hela.

⁸ Tan neʼe, hatais hena karón bá,

Tanis no halerik bá,

Tanba Jeová nia hirus neʼebé lakan makaʼas seidauk sees husi ita.

⁹ Jeová dehan: “Iha tempu neʼebá, liurai sei lakon ninia aten-brani,

Ema-boot sira mós lakon sira-nia aten-brani;

¹⁰ Tuirmai haʼu hatete: “Oh, Naʼi Jeová Ukun-Naʼin Boot Liu! Loloos Ita lohi ona povu neʼe no Jeruzalein, hodi dehan: ‘Imi sei iha dame’, maibé surik mak besik ami-nia kakorok.”

¹¹ Iha tempu neʼebá, povu neʼe no Jeruzalein sei rona lia­fuan tuirmai neʼe:

“Husi foho-oan sira neʼebé molik iha rai-fuik maran,

Anin neʼe mai laʼós atu tahek ka atu hamoos trigu.

¹² Anin neʼe huu makaʼas husi fatin sira-neʼe tanba haʼu mak haruka.

Agora haʼu sei fó sai tesi-lia ba sira.

No ninia kuda-karreta sira mak hanesan anin-fuik.

‘Susar ba ita, tanba nia harahun ona ita!’

¹⁴ Oh Jeruzalein, hamoos ó-nia fuan-laran husi hahalok aat atu ó bele hetan salvasaun.

Toʼo bainhira mak ó sei rai hela hanoin aat sira?

¹⁵ Tanba iha lian ida neʼebé hatoʼo lia­fuan husi Dan,

No lian neʼe fó sai dezastre husi foho sira iha Efraim.

¹⁶ Imi hatoʼo ida-neʼe ba nasaun sira bá;

Haklaken ida-neʼe ba Jeruzalein bá.”

“Espiaun sira sei mai husi rai dook,

No sira sei hasaʼe lian funu nian hasoru sidade sira iha rai-Judá.

¹⁷ Sira mai ataka Jeruzalein husi sorin-sorin hotu hanesan guarda sira iha rai-luan,

¹⁸ “Ó rasik sei simu rezultadu husi ó-nia lalaʼok sira no hahalok sira.

Susar neʼebé kona ó moruk tebes,

¹⁹ Oh, haʼu-nia terus, haʼu-nia terus!

Haʼu sente moras tebes iha haʼu-nia fuan-laran.

Haʼu-nia fuan fekit makaʼas iha haʼu-nia laran.

Haʼu la bele nonook deʼit,

Tanba haʼu rona ona dikur nia lian,

Sinál funu nian.

²⁰ Dezastre ida ba dezastre ida, haʼu rona ona ida-neʼe.

Tanba rai tomak naksobu ona.

Derrepente deʼit haʼu-nia tenda sira naksobu,

No rona dikur nia lian?

²² Tanba haʼu-nia povu mak beik;

Sira la rona haʼu.

Sira mak oan beik, neʼebé la komprende.

Bainhira atu halo buat neʼebé aat, sira matenek,

Maibé atu halo buat neʼebé diʼak, sira la hatene.

²³ Haʼu hateke ba rai neʼe, maibé haree bá! rai neʼe mamuk no fuik.

Haʼu hateke ba lalehan, maibé naroman la iha tan.

²⁴ Haʼu hateke ba foho sira, maibé haree bá! foho sira-neʼe nakdoko makaʼas,

No foho-oan sira hotu nakdoko bá-mai.

²⁵ Haʼu hateke, maibé haree bá! ema ida mós la iha,

No manu hotu iha lalehan mós semo lakon tiha.

²⁶ Haʼu hateke, maibé haree bá! toʼos ai-fuan nian sai fali rai-fuik,

No sidade sira hotu sobu rahun tiha.

Neʼe tanba Jeová,

Tanba ninia hirus neʼebé lakan makaʼas.

Maibé haʼu sei la halakon mohu rai neʼe.

²⁸ Tan neʼe mak rai neʼe sei tanis,

No lalehan iha leten mós sei sai nakukun.

Neʼe tanba haʼu mak dehan ona, haʼu deside ona,

Haʼu sei la troka haʼu-nia hanoin, no haʼu mós sei la dada fali haʼu-nia lia­fuan.

²⁹ Tanba rona tropa neʼebé saʼe kuda no hanadór sira-nia lian,

Ema hotu iha sidade tomak halai sai ona,

Sira halai tama ba ai-laran,

No sira saʼe ba fatuk-boot sira.

Sidade hotu sai mamuk ona,

No la iha ema ida mak hela.”

Uluk ó hatais roupa mean lakan,

Hafurak ó-nia an ho osan-mean oioin,

Maibé ó hafurak an saugati deʼit,

Tanba sira neʼebé uluk kaan ó, lakohi ona ó;

Sira buka daudauk atu oho ó.

³¹ Tanba haʼu rona lian hanesan feto ida neʼebé moras nia lian,

Terus hanesan feto ida neʼebé tuur ahi ba oan primeiru,

Oan-feto Siaun nia lian neʼebé dada iis makaʼas.

Nia lolo ninia liman no dehan:

Hateke haleʼu no haree didiʼak bá.

Buka toʼok bá iha sidade nia fatin públiku sira

Ida neʼebé hakaʼas an atu hatudu laran-metin,

Maibé sira nafatin jura falsu deʼit.

Ita baku sira, maibé sira la sente moras.

Sira halo sira-nia oin toos liu fali fatuk,

No sira lakohi fila fali ba Ita.

⁴ Maibé haʼu koʼalia ba haʼu-nia an: “Loloos neʼe tanba sira mak ema baibain deʼit no la matenek.

Sira halo hahalok beik, tanba sira la hatene Jeová nia dalan,

Sira-nia Maromak nia ukun-fuan.

Sira-nia Maromak nia ukun-fuan.

Maibé sira hotu soe tiha sira-nia naha

No tesi kotu ona tali neʼebé kesi sira.”

⁶ Tan neʼe mak leaun husi ai-laran ataka sira,

Asu-fuik husi rai-tetuk maran estraga beibeik sira,

Leopardu latan an hodi hafuhu hela sira-nia sidade sira.

Nia tata lees ema sé deʼit neʼebé sai husi sidade sira-neʼe.

Tanba sira halo sala barak ona;

Sira-nia hahalok la laran-metin barak tebes ona.

⁷ Oinsá mak haʼu bele fó perdua ó ba ida-neʼe?

Ó-nia oan-mane sira husik ona haʼu,

No sira jura hodi buat neʼebé laʼós Maromak.

Haʼu fó buat hotu neʼebé sira presiza,

Maibé sira nafatin halo sala-foʼer,

No sira nadodon bá feto-aat nia uma.

⁸ Sira mak hanesan kuda-aman neʼebé kaan namanas kuda-inan,

Hanesan kuda-aman, sira hasaʼe lian hodi kaan namanas mane seluk nia feen.

⁹ Jeová dehan: “Haʼu tenke haruka sira hatán kona-ba sira-nia hahalok hirak-neʼe, loos ka lae?

Haʼu tenke fó kastigu ba nasaun hanesan neʼe, loos ka lae?”

¹⁰ “Saʼe bá, ataka ninia toʼos-uvas no estraga bá,

Maibé keta halakon mohu.

Hasai tiha ninia sanak nurak sira neʼebé buras,

Tanba sira laʼós Jeová nian.

¹¹ Tanba umakain Izraél no umakain Judá

Sai ona traidór ba haʼu”, Jeová dehan nuneʼe.

¹² “Sira nega ona Jeová, no dehan beibeik:

‘Nia sei la halo buat ida ba ita.

Susar sei la kona ita;

No ita sei la haree surik no mós rai-hamlaha.’

¹³ Profeta sira-nia lia­fuan hanesan anin deʼit,

Sira la fó sai Maromak nia lia­fuan.

Sira mós sei sai hanesan sira-nia lia­fuan neʼe!”

¹⁴ Tan neʼe, Jeová, Maromak ukun-naʼin ba tropa lalehan nian, dehan nuneʼe:

“Tanba ema sira-neʼe koʼalia nuneʼe,

Haʼu sei halo haʼu-nia lia­fuan sira iha ó-nia ibun sai hanesan ahi,

No povu neʼe sai hanesan ai,

No ahi sei han sira.”

¹⁵ Jeová dehan: “Oh umakain Izraél, haree bá, haʼu sei lori ba imi nasaun ida husi rai dook.

Neʼe mak nasaun antigu ida,

Nasaun ida neʼebé imi la hatene ninia língua,

No imi la bele komprende buat neʼebé sira koʼalia.

¹⁶ Sira-nia rama-fatin mak hanesan rate neʼebé nakloke hela;

Sira hotu mak asuwaʼin.

¹⁷ Sira sei han mohu imi-nia trigu no imi-nia paun.

Sira sei han mohu imi-nia bibi no karau sira.

Ho surik, sira sei harahun imi-nia sidade seguru sira neʼebé imi tau fiar.”

¹⁸ Jeová dehan: “Maski nuneʼe, haʼu sei la halakon mohu imi iha tempu neʼebá. ¹⁹ No bainhira sira husu: ‘Tanbasá mak ita-nia Maromak Jeová halo buat hirak-neʼe ba ita?’, ó tenke fó-hatene ba sira: ‘Hanesan imi husik ona haʼu no sai atan ba maromak husi rai seluk iha imi-nia rai, nuneʼe mós imi sei sai atan ba ema estranjeiru sira iha rai ida neʼebé laʼós imi-nian.’”

²⁰ Hatoʼo ida-neʼe ba Jakob nia umakain,

No haklaken ida-neʼe iha Judá, dehan:

Sira iha matan maibé la bele haree;

Sira iha tilun maibé la bele rona.

²² Jeová dehan: ‘Imi la taʼuk haʼu ka?

Imi tenke nakdedar iha haʼu-nia oin, loos ka lae?

Haʼu mak ida neʼebé tau ona rai-henek nuʼudar baliza ba tasi,

Ukun-fuan neʼe sei dura ba nafatin no la iha buat ida mak bele kontra.

Maski sira sai siʼak, maibé sira nafatin la bele liu baliza neʼe.

²³ Maibé povu neʼe ulun-toos no sira-nia laran lakohi halo tuir;

Sira fila kotuk ona ba haʼu no laʼo tuir sira-nia dalan rasik.

²⁴ No sira la dehan iha sira-nia laran:

Ida neʼebé fó udan tuir ninia tempu,

²⁵ Imi rasik nia sala sira mak hanetik buat hirak-neʼe labele toʼo mai;

Sira tau lasu neʼebé bele halo mate.

Vítima neʼebé sira kaer mak ema.

²⁷ Hanesan luhan ida neʼebé nakonu ho manu,

Tan neʼe mak sira sai ema-boot no riku.

²⁸ Sira sai bokur ona no sira-nia isin-kulit kabeer;

Sira-nia hahalok aat nakonu toʼo resin.

Sira la ajuda oan-kiak nia kazu,

Atu nuneʼe sira bele hetan susesu;

No sira la tesi lia ba ema kiak sira-nia diʼak.’”

²⁹ Jeová dehan: “Haʼu tenke haruka sira hatán kona-ba sira-nia hahalok hirak-neʼe, loos ka lae?

Haʼu tenke fó kastigu ba nasaun hanesan neʼe, loos ka lae?

³¹ Profeta sira fó sai lia-bosok,

Amlulik sira mós hanehan povu ho sira-nia kbiit.

No haʼu-nia povu rasik mós gosta buat hanesan neʼe.

6 Oh, imi Benjamin nia oan-mane sira, buka fatin seguru bá, halai sai husi Jeruzalein bá.

No iha Tekoa, huu dikur bá;

Halakan ahi nuʼudar sinál iha Bet-Hakerem bá!

Tanba dezastre ida mosu husi parte norte, neʼe mak terus boot ida.

² Oan-feto Siaun hanesan feto ida neʼebé bonita, mamar no maus.

³ Bibi-atan sira no sira-nia bibi-lubun sei mai hasoru nia.

Sira sei harii tenda sira haleʼu nia,

Sira ida-idak fó-han ba bibi neʼebé sira hein.

⁴ “Prepara atu funu hasoru nia bá!

Hamriik bá, no mai ita ataka nia iha meiudia!”

“Susar ba ita, tanba loro-matan tun daudaun ona,

Tanba lalatak kalan nian sai naruk daudaun ona!”

⁵ “Hamriik bá, mai ita ataka nia iha tempu kalan

No harahun ninia uma-aas sira neʼebé seguru.”

⁶ Tanba Jeová, ukun-naʼin ba tropa lalehan nian, dehan nuneʼe:

“Tesi tiha ai no ateru rai atu ataka Jeruzalein.

Nia mak sidade neʼebé tenke simu kastigu;

Tanba hahalok hanehan malu deʼit mak nakonu iha sidade neʼe.

⁷ Hanesan sempre iha bee malirin iha bee-matan,

Iha sidade neʼe, haʼu rona beibeik ema halo violénsia no estraga malu;

Haʼu haree beibeik moras no buat aat oioin mosu.

⁸ Oh Jeruzalein, rona avizu bá, se lae, haʼu sei husik ó tanba hakribi ó;

Haʼu sei halo ó sai fatin neʼebé fuik, rai neʼebé la iha ema ida mak hela.”

“Sira sei halibur duni ema Izraél restu sira hanesan kuʼu uvas-fuan restu husi uvas-hun.

Lolo fali ó-nia liman hanesan ema neʼebé kuʼu uvas-fuan husi uvas-hun.”

¹⁰ “Ba sé mak haʼu tenke koʼalia no fó avizu?

Sé mak sei rona?

Haree bá! Sira-nia tilun taka hela, tan neʼe mak sira la bele rona.

Haree bá! Sira koʼalia aat hasoru Jeová nia lia­fuan;

Sira la kontente ho lia­fuan neʼe.

¹¹ Nuneʼe, haʼu-nia laran nakonu ho Jeová nia hirus,

No haʼu kole ona atu tahan ida-neʼe.”

“Fakar sai ida-neʼe ba labarik kiʼik iha dalan bá,

No ba grupu mane joven sira neʼebé halibur hamutuk.

¹² Sira-nia uma sei sai ema seluk nian,

Nuneʼe mós ho sira-nia toʼos no sira-nia feen.

Tanba haʼu sei foti liman hasoru povu neʼebé hela iha rai neʼe”, Jeová dehan.

¹³ “Tanba husi povu kiʼik toʼo ema-boot sira, sira ida-idak manán osan hodi lohi ema;

Husi profeta toʼo amlulik, sira ida-idak bosok ema.

¹⁴ No sira koko atu hadiʼa haʼu-nia povu nia situasaun aat hodi koʼalia ho ibun-midar, dehan:

‘Iha dame! Iha dame!’

Maibé loloos dame la iha.

¹⁵ Sira sente moe ba buat aat oioin neʼebé sira halo ona ka lae?

Sira-nia moe la iha duni!

Sira mós la hatene moe!

Bainhira haʼu fó kastigu ba sira, sira sei sidi”, Jeová dehan.

¹⁶ Jeová dehan nuneʼe:

“Hamriik iha dalan kruzamentu no haree bá.

Husu toʼok kona-ba dalan sira neʼebé antigu,

Atu nuneʼe imi bele hetan kmaan.”

Maibé sira dehan: “Ami lakohi laʼo iha dalan neʼe.”

¹⁷ “No haʼu haruka ona guarda sira atu dehan:

‘Rona didiʼak dikur nia lian bá!’”

Maibé sira dehan: “Ami lakohi rona.”

¹⁸ “Tan neʼe, oh nasaun sira, rona bá!

Oh povu sira, hatene bá,

Buat neʼebé sei akontese ba Jeruzalein.

¹⁹ Oh rai, rona bá!

Haʼu sei lori terus boot ba povu ida-neʼe

Nuʼudar rezultadu husi sira rasik nia planu aat,

Tanba sira la rona ba haʼu-nia lia­fuan

No sira lakohi simu haʼu-nia lei.”

²⁰ “Maski imi lori insensu mutin husi Sabá

Haʼu la simu imi-nia sakrifísiu sunu nian,

No imi-nia sakrifísiu sira la halo haʼu kontente.”

²¹ Tan neʼe, Jeová dehan nuneʼe:

No sira sei sidi duni ba fatuk sira-neʼe,

Aman ho oan sira hamutuk,

Viziñu ho sira-nia maluk hamutuk,

No sira hotu sei lakon.”

²² Jeová dehan nuneʼe:

“Haree bá! Povu ida sei mai husi rai norte,

²³ Sira sei kaer rama no diman.

Sira mak siʼak tebes no la iha laran-sadiʼa.

Sira-nia lian sei tarutu hanesan tasi,

No sira saʼe kuda.

²⁴ Ami rona ona kona-ba ida-neʼe.

Ami-nia liman sai kbiit-laek;

Laran-taridu mak falun metin ami,

²⁵ Keta sai ba toʼos,

Keta laʼo iha dalan,

Tanba inimigu sei kaer surik;

Fatin hotu nakonu ho taʼuk.

²⁶ Oh haʼu-nia povu nia oan-feto,

Tanis bá hanesan tanis ba oan-mane mesak mate, tanis ho makaʼas bá,

Tanba derrepente deʼit inimigu sei mai harahun ita.

²⁷ “Iha haʼu-nia povu nia leet, haʼu halo ó sai hanesan ema neʼebé koko besi,

Ida neʼebé buka-hatene didiʼak;

Sira laʼo bá laʼo mai habelar lia-bosok.

Sira mak hanesan riti no besi;

Sira hotu laran-aat tebes.

²⁹ Buat neʼebé uza atu kehe ahi, motuk ona.

Besi makdadi deʼit mak naksulin sai husi ahi.

Saugati deʼit ba ema neʼebé hakaʼas an atu hamoos sira hanesan hamoos besi,

Tanba sira hotu mesak aat deʼit.

Tanba Jeová la simu ona sira.”

7 Neʼe mak Jeová nia lia­fuan tun ba Jeremias, dehan: ² “Bá hamriik iha Jeová nia templu nia portaun no iha neʼebá ó tenke fó sai lia-menon neʼe: ‘Rona ba Jeová nia lia­fuan, imi hotu, ema Judá neʼebé tama liuhusi portaun sira-neʼe atu hakruʼuk an ba Jeová. ³ Jeová, ukun-naʼin ba tropa lalehan nian, Maromak Izraél nian, dehan: “Hadiʼa imi-nia dalan sira no imi-nia hahalok sira, hodi nuneʼe haʼu sei husik imi hela nafatin iha fatin neʼe. ⁴ Keta tau fiar ba lia-bosok sira no keta hatete: ‘Neʼe mak Jeová nia templu, Jeová nia templu, Jeová nia templu!’

⁵ Tanba se imi hadiʼa duni imi-nia dalan sira no hahalok sira; se imi halaʼo duni justisa entre mane ida ho ninia maluk; ⁶ se imi la haterus ema husi rai seluk, oan-kiak sira no feto-faluk sira; se imi la fakar ema laran-moos nia raan iha fatin neʼe; no se imi la laʼo tuir maromak sira seluk neʼebé lori susar ba imi-nia an rasik; ⁷ haʼu sei husik imi hela nafatin iha fatin ida-neʼe, iha rai neʼebé haʼu fó ona ba imi-nia beiʼala sira ba nafatin.”’”

⁸ “Maibé imi fiar hela ba lia-bosok sira, ida-neʼe sei nunka lori buat diʼak ba imi. ⁹ Imi naʼok, oho ema, halo sala-foʼer, jura falsu, hasaʼe sakrifísiu ba Baal, no laʼo tuir maromak sira neʼebé uluk imi la hatene, ¹⁰ tuirmai imi mai hamriik iha haʼu-nia oin iha uma ida-neʼe neʼebé lori haʼu-nia naran no hatete: ‘Ami sei hetan salvasaun’, maski imi halo daudaun buat aat hirak-neʼe hotu, haʼu bele simu ida-neʼe ka lae?

¹¹ Iha imi-nia matan, uma ida-neʼe neʼebé lori haʼu-nia naran sai ona naʼok-teen sira-nia knuuk ka? Haʼu rasik haree ona ida-neʼe”, Jeová dehan nuneʼe.

¹² “‘Maibé agora, bá haʼu-nia fatin iha Silo, neʼebé ulukliu haʼu hili atu lori haʼu-nia naran, no haree bá, buat neʼebé haʼu halo ona ba fatin neʼe tanba haʼu-nia povu Izraél nia hahalok aat. ¹³ Maibé imi nafatin halo hahalok hirak-neʼe hotu’, Jeová dehan, ‘no maski haʼu koʼalia fila-fila ba imi, maibé imi la rona. Haʼu bolu imi nafatin, maibé imi la hatán. ¹⁴ Tan neʼe, ba uma neʼebé lori daudauk haʼu-nia naran, neʼebé imi tau fiar, no ba fatin ida-neʼe neʼebé haʼu fó ona ba imi no ba imi-nia beiʼala sira, haʼu mós sei halo duni hanesan ho buat neʼebé haʼu halo ona ba Silo.

¹⁵ Haʼu sei soe sai imi husi haʼu-nia oin, hanesan haʼu soe ona imi-nia maun-alin sira hotu, Efraim nia bei-oan hotu.’

¹⁶ “Kona-ba ó, ó keta halo orasaun ba povu neʼe nia diʼak. Keta halerik ka hasaʼe orasaun ka husu haʼu ba sira-nia diʼak, tanba haʼu sei la rona ba ó. ¹⁷ Ó haree ka lae, buat neʼebé sira halo daudauk iha sidade sira iha Judá no iha dalan sira iha Jeruzalein? ¹⁸ Oan-mane sira hili ai, aman sira halakan ahi, no feen sira deʼut trigu atu tunu dose hodi hasaʼe sakrifísiu ba Liurai-Feto Lalehan nian, no sira fui sakrifísiu hemu nian ba maromak sira seluk hodi hakanek haʼu-nia laran. ¹⁹ Jeová dehan: ‘Maibé haʼu mak ida neʼebé sira hakanek ka lae? Sira hakanek sira-nia an toʼo hamoe sira-nia an rasik, loos ka lae?’ ²⁰ Tan neʼe, Naʼi Jeová Ukun-Naʼin Boot Liu dehan: ‘Haree bá! Haʼu-nia hirus no laran-nakali sei fakar tun ba fatin ida-neʼe, ba ema no ba animál, ba ai-hun sira iha rai no ba ai-fuan sira hotu iha toʼos; haʼu-nia hirus sei sai hanesan ahi-lakan neʼebé la bele hamate.’

²⁷ “Ó sei koʼalia ba sira lia­fuan hirak-neʼe hotu, maibé sira sei la rona ó; ó sei bolu sira, maibé sira sei la hatán ó. ²⁸ No ó sei dehan ba sira: ‘Ida-neʼe mak nasaun neʼebé la halo tuir sira-nia Maromak Jeová nia lia­fuan no lakohi simu dixiplina. Sira-nia laran-metin lakon mohu ona no sira mós la temi tan ida-neʼe iha sira-nia leet.’

²⁹ “Tesi hotu ó-nia fuuk neʼebé seidauk tesi no soe tiha ida-neʼe bá, no iha foho-oan sira neʼebé molik ona, hananu knananuk lelir nian bá, tanba Jeová la simu ona no sei husik hela jerasaun ida-neʼe neʼebé halo nia laran-nakali. ³⁰ ‘Tanba ema Judá halo ona buat neʼebé aat iha haʼu-nia matan’, Jeová dehan. ‘Sira tau sira-nia estátua neʼebé foʼer tebes iha uma neʼebé lori haʼu-nia naran, hodi hafoʼer uma neʼe. ³¹ Sira harii ona fatin aas adorasaun nian iha Tofet, neʼebé iha Foho-Leet Hinom nian, hodi sunu sira-nia oan-mane no oan-feto iha ahi laran, neʼe mak hahalok neʼebé haʼu nunka haruka no haʼu-nia laran nunka hanoin kona-ba ida-neʼe.’

³² “Jeová dehan: ‘Tan neʼe, haree bá! Loron sira sei toʼo mai bainhira ema sei la temi tan fatin neʼe nuʼudar Tofet ka Foho-Leet Hinom nian, maibé temi fali nuʼudar Foho-Leet Oho nian. Sira sei hakoi mate-isin iha Tofet toʼo la iha tan fatin atu hakoi. ³³ No povu neʼe nia mate-isin sei sai ai-han ba manu sira iha lalehan no animál sira iha rai, la iha ema ida mak hataʼuk no duni sai sira. ³⁴ Iha sidade sira iha Judá no iha dalan sira iha Jeruzalein, haʼu sei hapara lian haklalak no lian haksolok, lian noivu nian no lian noiva nian, tanba rai neʼe sei estraga tiha no sei sai fuik.’”

8 Jeová dehan: “Iha tempu neʼebá, ema sei keʼe sai husi rate rai-Judá nia liurai sira-nia ruin, ema-boot sira-nia ruin, amlulik sira-nia ruin, profeta sira-nia ruin, no ema Jeruzalein sira-nia ruin. ² Ema sira-neʼe nia ruin sei namkari iha loro-matan, fulan no fitun sira hotu nia okos neʼebé sira hadomi no serbí no halo tuir no neʼebé sira buka no hakruʼuk an. Ruin sira-neʼe sei la halibur fali no mós sei la hakoi fali. Ruin sira-neʼe sei sai hanesan rai-metan ba rai.”

³ Jeová, ukun-naʼin ba tropa lalehan nian, dehan: “No umakain aat neʼe nia ema restu neʼebé sei moris, sira sei hili hakarak mate deʼit duké moris iha fatin hotu neʼebé haʼu halo ona sira namkari.

⁴ No ó tenke hatete ba sira: ‘Jeová dehan nuneʼe:

“Sira monu no la hamriik fali ka?

Se ema ida hakarak fila fali, ema seluk mós sei fila fali, loos ka lae?

Sira kaer metin ba lia-bosok;

Sira lakohi fila fali mai haʼu.

La iha ema ida mak hakribi ninia hahalok aat ka husu: ‘Sala saida mak haʼu halo ona?’

Sira ida-idak fila fali ba dalan neʼebé ema barak gosta, hanesan ho kuda ida neʼebé halai makaʼas tama ba funu.

⁷ Manu-segoña iha lalehan deʼit mós hatene ho loloos ninia tempu;

Manu-lakateu no manu-andoriña no manu-tordu mós hatene ho didiʼak oras neʼebé sira fila fali ba sira-nia knuuk.

Maibé haʼu-nia povu rasik, sira la hatene tempu neʼebé Jeová sei tesi lia ba sira.”’

⁸ ‘Oinsá mak imi bele hatete: “Ami mak matenek, no ami iha Jeová nia ukun-fuan”?

Tanba loloos, eskriba sira uza lapizeira falsu atu hakerek deʼit lia-bosok.

⁹ Ema matenek sira hetan ona moe boot.

Sira sai taʼuk tebes no sei monu ba lasu.

Haree bá! Sira la simu ona Jeová nia lia­fuan,

Tan neʼe, sira iha matenek saida?

¹⁰ Nuneʼe, haʼu sei fó sira-nia feen ba mane seluk,

No sira-nia toʼos sei sai ema seluk nian;

Tanba husi povu kiʼik toʼo ema-boot, sira ida-idak manán osan hodi lohi ema;

Husi profeta toʼo amlulik, sira ida-idak bosok ema.

¹¹ No sira koko atu hadiʼa haʼu-nia povu nia oan-feto nia situasaun aat hodi koʼalia ho ibun-midar, dehan:

“Iha dame! Iha dame!”

Maibé loloos dame la iha.

¹² Sira sente moe ba buat aat oioin neʼebé sira halo ona ka lae?

Sira-nia moe la iha duni!

Sira mós la hatene moe!

Bainhira haʼu fó kastigu ba sira, sira sei sidi’, Jeová dehan.

¹³ ‘Bainhira haʼu halibur sira, haʼu sei halakon sira’, Jeová dehan.

‘Uvas-hun sei la iha tan nia fuan, ai-figeira sei la iha tan nia fuan, no ai-tahan sira sei sai namlaek.

Buat hotu neʼebé haʼu fó ba sira sei la iha tan.’”

¹⁴ “Tanbasá mak ita tuur deʼit iha neʼe?

Mai ita halibur hamutuk no tama ba sidade sira neʼebé seguru no mai ita mate mohu iha neʼebá.

Tanba Jeová ita-nia Maromak sei halakon ita,

Nia fó-hemu bee venenu ba ita,

Tanba ita halo ona sala hasoru Jeová.

¹⁵ Uluk ema hein ba dame, maibé buat diʼak ida mós la toʼo mai,

Ema hein ba tempu kura nian, maibé taʼuk deʼit mak iha!

¹⁶ Husi Dan, bele rona inimigu nia kuda sira-nia lian.

Rai tomak nakdoko

Tanba ninia kuda-aman sira-nia lian.

Inimigu tama mai no han mohu rai neʼe ho buat hotu iha rai neʼe,

Sidade no mós ema iha sidade neʼe.”

¹⁷ Jeová dehan: “Tanba haree bá, haʼu sei haruka samea sira ba imi-nia leet,

No sira sei tata duni imi.”

¹⁸ Haʼu-nia triste kura la bele;

Haʼu-nia laran moras tebes.

¹⁹ Husi rai neʼebé dook, haʼu-nia povu nia oan-feto

Hasaʼe lian halerik hodi husu ajuda:

“Jeová la hela ona iha Siaun ka?

Ninia liurai la iha ona iha neʼebá ka?”

“Tanbasá mak sira halo haʼu laran-kanek ho sira-nia estátua neʼebé bahat ona,

Maibé ita la hetan salvasaun!”

²¹ Haʼu sente laran-rahun tanba haʼu-nia povu nia oan-feto nia situasaun aat;

Haʼu sente laran-triste.

Taʼuk mak falun metin haʼu.

²² Iha Jílead, mina-bálsamu la iha ka?

Iha neʼebá doutór la iha ka?

9 Oh, se karik haʼu-nia ulun mak bee-matan,

No haʼu-nia matan mak hun ba matan-been!

Se nuneʼe, haʼu bele tanis loron no kalan

Ba haʼu-nia povu sira neʼebé ema oho tiha ona.

² Oh, se karik iha rai-fuik iha fatin ba ema laʼo-rai neʼebé haʼu bele toba!

Se nuneʼe, haʼu bele husik hela haʼu-nia povu no laʼo dook husi sira,

Tanba sira hotu mak halo sala-foʼer,

Sira hotu mak traidór.

³ Sira halo kleʼuk sira-nia nanál hanesan rama-inan;

Lia-bosok mak nakonu iha rai neʼe, laʼós hahalok laran-metin.

“Sira laʼo husi hahalok aat ba hahalok aat liután.

No sira la rona haʼu”, Jeová dehan.

⁴ “Imi hotu, kuidadu an bá husi imi-nia maluk,

No ba imi-nia maun-alin sira mós imi keta tau fiar.

Tanba maun-alin sira hotu mak traidór,

No maluk sira hotu mak bosok-teen.

⁵ Sira ida-idak lohi sira-nia maluk,

No la iha ida mak koʼalia lia-­loos.

Sira hanorin sira-nia nanál atu koʼalia bosok.

Sira hakole sira-nia an ho hahalok sala.

⁶ Ó hela daudaun iha lia-bosok nia leet.

Tanba sira-nia lia-bosok, sira lakohi hatene haʼu”, Jeová dehan nuneʼe.

⁷ Tan neʼe, Jeová, ukun-naʼin ba tropa lalehan nian, dehan:

“Haʼu sei hamoos sira, no haʼu sei koko sira,

Tanba buat saida tan mak haʼu bele halo ba haʼu-nia povu nia oan-feto?

⁸ Sira-nia nanál mak hanesan rama-oan neʼebé oho ema tanba koʼalia lia-bosok.

⁹ Jeová dehan: “Haʼu tenke haruka sira hatán kona-ba sira-nia hahalok hirak-neʼe, loos ka lae?

Haʼu tenke fó kastigu ba nasaun hanesan neʼe, loos ka lae?

¹⁰ Haʼu sei tanis no halerik ba foho sira

No haʼu sei hananu knananuk lelir nian ba duʼut sira iha rai-fuik,

Tanba ahi han mohu ona buat hotu no la iha ema ida mak hakat liu,

No mós la bele rona ona animál hakiak sira-nia lian.

Manu sira iha lalehan no animál sira mós halai lakon; sira hotu la iha tan.

No haʼu sei halo Judá nia sidade sira sai fatin fuik, neʼebé la iha ema ida mak hela.

¹² Sé mak iha matenek atubele komprende ida-neʼe?

Ba sé mak Jeová koʼalia atu nia bele haklaken ida-neʼe?

Tansá mak rai neʼe tenke halakon?

Toʼo ema ida mós la bele hakat liu?”

¹³ Jeová hatán: “Tanba sira lakohi simu haʼu-nia ukun-fuan neʼebé haʼu fó ba sira, no tanba sira la laʼo tuir ukun-fuan neʼe no la halo tuir haʼu-nia lia­fuan. ¹⁴ Maibé ho ulun-toos sira laʼo tuir sira-nia laran rasik, no sira laʼo tuir Baal nia estátua sira, neʼebé sira-nia aman hanorin ona ba sira. ¹⁵ Tan neʼe, Jeová, ukun-naʼin ba tropa lalehan nian, Maromak Izraél nian, dehan: ‘Agora haʼu sei halo povu neʼe han ai-tahan neʼebé moruk tebes, no haʼu sei halo sira hemu bee venenu. ¹⁶ Haʼu sei halo sira namkari iha nasaun sira-nia leet, iha nasaun seluk neʼebé sira no mós sira-nia aman seidauk hatene, no haʼu sei haruka surik duni tuir sira toʼo haʼu halakon sira.’

¹⁷ Jeová, ukun-naʼin ba tropa lalehan nian, dehan:

‘Hanoin didiʼak buat neʼebé akontese daudaun bá.

Bolu bá feto sira neʼebé hatene hananu knananuk lelir nian,

No haruka feto matenek sira-neʼe mai.

¹⁸ Atu sira bele mai lalais no hananu knananuk halerik nian ba ita,

Hodi nuneʼe ita-nia matan-been bele suli tun

¹⁹ Tanba bele rona lian hananu halerik nian husi Siaun, dehan:

“Ema harahun ami toʼo mohu ona!

Ami sente moe tebes!

Tanba ami husik tiha rai neʼe no sira estraga ona ami-nia hela-fatin hotu.”

²⁰ Imi feto sira, rona Jeová nia lia­fuan bá.

No see tilun ba lia­fuan husi ninia ibun bá.

No hanorin ba malu bá, knananuk lelir nian neʼe.

Mate neʼe tama mai ona iha ita-nia uma-aas neʼebé seguru

Atu foti labarik iha lurón sira

No mane joven iha sidade nia fatin públiku sira.’

²² Hatete bá: ‘Jeová dehan nuneʼe:

“Ema nia mate-isin sira sei namtate hanesan rai-metan iha toʼos,

La iha ema ida mak sei halibur sira.”’”

²³ Jeová dehan nuneʼe:

Ema neʼebé forsa boot keta gaba an kona-ba ninia forsa;

²⁴ “Maibé ema neʼebé gaba an, gaba an bá kona-ba ida-neʼe:

Katak nia iha matenek no hatene kona-ba haʼu,

Katak haʼu mak Jeová, Ida neʼebé hatudu domin neʼebé laran-metin, justisa, no hahalok loos iha rai,

²⁵ “Haree bá! Loron sira sei toʼo mai”, Jeová dehan, “no haʼu sei tesi lia ba ema hotu neʼebé hetan ona sirkunsizaun maibé tuir loloos seidauk hetan sirkunsizaun, ²⁶ ba ema Ejitu, Judá no Edom, no mós ema Ammon no Moab, no ba ema hotu neʼebé hela iha rai-fuik, neʼebé koir tiha sira-nia fuuk iha tilun-hun; tanba nasaun sira-neʼe hotu seidauk hetan sirkunsizaun, no umakain Izraél nian tomak mós seidauk hetan sirkunsizaun iha laran.”

10 Oh umakain Izraél, rona bá Jeová nia lia­fuan neʼebé dehan ona ba imi.

² Jeová dehan nuneʼe:

“Keta aprende nasaun sira seluk nia hahalok,

No keta sai taʼuk ba sinál sira iha lalehan

Tanba nasaun sira mak taʼuk ba buat sira-neʼe.

No sira prega metin ida-neʼe ho martelu no pregu hodi labele monu.

⁵ Hanesan ho boneka duʼut iha toʼos pepinu nian, estátua sira mós la bele koʼalia;

Ema mak tenke lori sira, tanba sira la bele laʼo.

Keta taʼuk ba sira, tanba sira la bele halo aat ba imi,

No sira mós la bele halo buat diʼak.”

⁶ Oh Jeová, la iha ida mak hanesan Ita-Boot.

La iha ida mak hanesan Ita-Boot.

⁸ Sira hotu la iha hanoin no beik-teen.

Ai-hun nia matadalan mak hanesan anin deʼit.

Badain sira no badain-besi nian uza buat hirak-neʼe atu falun ai,

Sira-neʼe hotu badain matenek sira mak halo.

¹⁰ Maibé loloos Jeová mak Maromak.

Rai sei nakdoko makaʼas tanba ninia hirus,

¹¹ Imi tenke hatete ba sira:

“Maromak sira neʼebé la kria lalehan no rai,

¹³ Bainhira nia hasaʼe lian,

Bee iha lalehan sai siʼak,

No nia halo kalohan sira saʼe husi rai nia rohan.

Nia halo rai-lakan ba udan,

No nia lori sai anin husi fatin tau anin nian.

Badain-besi hotu sei hetan moe boot tanba estátua neʼebé sira bahat;

Tanba sira-nia estátua besi nian mak falsu,

No estátua sira-neʼe nia iis moris nian la iha.

¹⁵ Estátua hotu neʼebé badain halo mak folin-laek no merese ema hatete aat.

Bainhira sira-nia loron atu simu tesi-lia nian toʼo mai, sira sei lakon mohu.

¹⁶ Maibé Jakob nia Maromak laʼós hanesan estátua sira-neʼe,

Tanba nia mak Ida neʼebé kria buat hotu-hotu,

Ninia naran mak Jeová ukun-naʼin ba tropa lalehan nian.

Haloot bá ó-nia sasán sira husi rai.

¹⁸ Tanba Jeová dehan:

“Iha tempu neʼe, haʼu soe sai ema husi rai neʼe,

No haʼu sei halo sira hetan terus.”

¹⁹ Susar ba haʼu tanba haʼu-nia situasaun aat!

Haʼu-nia kanek kura la bele.

Haʼu-nia oan-mane sira husik ona haʼu no la iha tan.

La iha ema ida mak dada ka hasaʼe fali haʼu-nia hena tenda nian.

²¹ Tanba bibi-atan sira hatudu hahalok beik,

No sira la buka ba Jeová.

Tan neʼe mak sira hatudu hahalok la ho matenek,

No sira-nia bibi hotu halai namkari tiha.”

²² Rona bá! Lia-menon ida! Neʼe toʼo mai daudaun!

Tarutu makaʼas husi rai norte,

Atu halo rai-Judá nia sidade sira sai fatin fuik, sai asu-fuik sira-nia hela-fatin.

²³ Oh Jeová, haʼu hatene duni katak ema la iha kbiit atu hili ninia dalan rasik.

Ema neʼebé laʼo mós la iha kbiit atu hili ninia hakat.

²⁴ Oh Jeová, korrije haʼu ho Ita-nia justisa,

Maibé keta ho Ita-nia hirus, hodi nuneʼe Ita la halakon mohu haʼu.

²⁵ Fakar sai Ita-nia hirus ba nasaun sira neʼebé lakohi rona Ita

No ba umakain sira neʼebé la bolu Ita-nia naran.

Tanba sira han mohu ona Jakob,

Loos, sira han mohu ona nia toʼo la iha tan,

No sira estraga ona ninia hela-fatin.

11 Neʼe mak Jeová nia lia­fuan tun ba Jeremias, dehan: ² “Imi povu sira, rona bá lia­fuan aliansa neʼe!

No haʼu hatán: “Amen, oh Jeová.”

⁶ Tuirmai Jeová hatete mai haʼu: “Haklaken lia­fuan hotu neʼe iha sidade sira iha Judá no iha dalan sira iha Jeruzalein: ‘Rona ba lia­fuan aliansa neʼe, no halo tuir bá. ⁷ Tanba haʼu hanorin no fó avizu ba imi-nia beiʼala sira husi loron neʼebé haʼu lori sira sai husi rai-Ejitu toʼo ohin loron, haʼu hanorin sira fila-fila, dehan: “Halo tuir haʼu-nia lia­fuan bá.” ⁸ Maibé sira la rona no sira mós la see tilun; ho ulun-toos sira ida-idak kontinua laʼo tuir sira-nia laran aat rasik. Tan neʼe, haʼu halo ba sira tuir lia­fuan hotu husi aliansa neʼe, neʼebé haʼu haruka ona ba sira atu halo, maibé sira lakohi halo tuir.’”

⁹ Tuirmai Jeová hatete mai haʼu: “Ema Judá no ema neʼebé hela iha Jeruzalein, sira futu lia hasoru haʼu.

¹⁰ Sira fila fali ba sira-nia beiʼala nia sala, beiʼala sira iha tempu uluk neʼebé lakohi halo tuir haʼu-nia lia­fuan. Sira mós laʼo tuir maromak seluk no adora sira. Umakain Izraél no umakain Judá hotu la halo tuir haʼu-nia aliansa neʼebé haʼu halo ona ho sira-nia beiʼala.

¹¹ Tan neʼe Jeová dehan: ‘Haree bá, haʼu sei lori terus boot ba sira, terus neʼebé sira la bele halai-sees. Bainhira sira bolu haʼu atu husu ajuda, haʼu sei la rona ba sira. ¹² Nuneʼe, sidade sira iha Judá no ema neʼebé hela iha Jeruzalein sei bá buka maromak sira neʼebé sira hasaʼe sakrifísiu no husu ajuda, maibé maromak sira-neʼe sei la salva sira iha tempu neʼebé sira hasoru terus. ¹³ Tanba imi-nia maromak sira sai barak hanesan ho imi-nia sidade sira, oh Judá, no imi harii ona altár neʼebé barak hanesan ho imi-nia dalan sira iha Jeruzalein, altár ba maromak folin-laek neʼebé halo moe, altár sira atu hasaʼe sakrifísiu ba Baal.’

¹⁴ Kona-ba ó, ó keta halo orasaun ba povu neʼe nia diʼak. Keta halerik ka hasaʼe orasaun ba sira-nia diʼak, tanba haʼu sei la rona bainhira sira husu ajuda tanba sira-nia terus.

Maski sira barak mak halo ona planu aat oioin?

Ó hasaʼe sakrifísiu naʼan santu barak maibé bainhira terus toʼo mai, buat sira-neʼe bele hasees ó husi terus ka lae?

Iha tempu neʼebá, ó sei sente haksolok ka lae?

¹⁶ Uluk Jeová hanaran ó ai-oliveira buras,

Ai neʼebé furak ho fuan kapás.

No inimigu sira hatohar ona ai nia sanak sira.

¹⁷ “Jeová, ukun-naʼin ba tropa lalehan nian, Maromak neʼebé kuda ó, fó sai ona katak terus sei toʼo ba ó, tanba umakain Izraél no umakain Judá halo ona hahalok aat. Sira halo sakrifísiu ba Baal hodi hakanek haʼu-nia laran.”

¹⁸ Jeová fó-hatene ona mai haʼu;

Iha tempu neʼebá, oh Maromak, Ita halo ona haʼu haree buat neʼebé sira halo.

¹⁹ Haʼu hanesan bibi-malae oan neʼebé maus neʼebé ema lori ba atu oho.

“Mai ita tesi tiha ai-hun neʼe ho nia fuan,

Mai ita estraga tiha nia husi ema moris nia rai,

Atu nuneʼe ema la hanoin-hetan tan ninia naran.”

²⁰ Maibé Jeová, ukun-naʼin ba tropa lalehan nian, halaʼo tesi-lia ho justisa;

Nia haree didiʼak ema nia hanoin no laran.

Tanba haʼu entrega ona haʼu-nia kazu ba Ita.

²¹ Nuneʼe, neʼe mak Jeová nia lia­fuan ba ema Anatot sira neʼebé buka daudaun atu oho ó no sira dehan: “Ó labele fó sai lia­fuan nuʼudar profeta hodi Jeová nia naran, se lae, ó sei mate iha ami-nia liman”, ²² tan neʼe Jeová, ukun-naʼin ba tropa lalehan nian dehan: “Haree bá, haʼu sei fó kastigu ba sira. Mane joven sira sei mate ho surik, sira-nia oan-mane no oan-feto sei mate tan hamlaha. ²³ Sei la iha tan ema restu neʼebé sei moris, tanba haʼu sei fó-terus ba ema Anatot sira iha tinan neʼebé sira hetan kastigu.”

12 Oh Jeová, Ita-nia hahalok mak loos.

Bainhira haʼu halerik ba Ita,

Maibé tansá mak ema aat sira-nia moris diʼak,

No tansá mak ema laran-makerek sira nunka sente laran-taridu?

² Ita mak kuda tiha sira, no sira-nia abut sai naruk.

Sira sai buras ba beibeik no fó fuan.

Sira temi Ita ho ibun-tutun, maibé sira-nia laran dook husi Ita.

Ita haree haʼu-nia laran no hatene ona katak haʼu-nia laran ida deʼit ho Ita.

No haketak sira ba loron oho nian.

⁴ Toʼo bainhira loos mak rai neʼe tenke sai maran

No modo sira iha toʼos hotu tenke sai maran?

Tanba sira neʼebé hela iha rai neʼe nia hahalok aat,

Animál no manu sira lakon mohu.

Tanba sira dehan: “Nia la bele haree buat neʼebé sei akontese ba ita.”

⁵ Tuirmai Maromak dehan mai haʼu: “Se ó halai hamutuk ho halaidór sira halo ó sente kole ona,

Oinsá mak ó bele halai-taru ho kuda sira?

⁶ Tanba maski sira ó-nia maun-alin rasik, husi ó-nia aman rasik nia umakain,

Sira laran-makerek ba ó.

Sira hakilar makaʼas hasoru ó.

Keta tau fiar ba sira,

Maski sira koʼalia buat diʼak deʼit ba ó.

Haʼu fó ona haʼu-nia doben murak ba ninia inimigu nia liman.

⁸ Ba haʼu, haʼu-nia liman-rohan sai ona hanesan leaun iha ai-laran.

Tan neʼe mak haʼu odi nia.

⁹ Ba haʼu, haʼu-nia liman-rohan mak hanesan manu-makikit neʼebé kór oioin;

Manu-makikit sira seluk mai haleʼu nia no ataka nia.

Mai han bá.

Sira sama estraga tiha haʼu-nia rai.

¹¹ Rai neʼe sai fatin neʼebé estraga tiha ona.

Nia maran tiha ona;

Haʼu haree rai neʼe fuik loos ona.

Rai tomak sai fuik no mamuk ona,

Maibé la iha ema ida mak hanoin kona-ba neʼe.

La iha ema ida mak hetan dame.

¹³ Sira kuda trigu maibé sira koʼa deʼit ai-tarak.

Sira hakole an maibé la hetan buat diʼak.

Sira sei sente moe ba buat neʼebé sira koʼa

Tanba Jeová nia hirus neʼebé lakan makaʼas.”

¹⁴ Neʼe mak lia­fuan neʼebé Jeová dehan: “Haʼu-nia viziñu sira hotu neʼebé aat, neʼebé book daudaun liman-rohan neʼebé haʼu fó ba haʼu-nia povu Izraél, haʼu sei fokit sai sira husi sira-nia rai, no haʼu sei fokit sai umakain Judá husi sira-nia leet.

¹⁵ Maibé bainhira haʼu fokit sai tiha sira, haʼu sei hatudu laran-sadiʼa ba sira no lori sira ida-idak fila fali ba sira-nia liman-rohan no ba sira-nia rai.”

¹⁶ “No se sira aprende haʼu-nia povu nia dalan sira no se sira jura hodi haʼu-nia naran dehan: ‘Ami jura hodi Jeová neʼebé moris!’ hanesan uluk sira hanorin haʼu-nia povu jura hodi Baal nia naran, se nuneʼe sira sei hela metin iha haʼu-nia povu nia leet. ¹⁷ Maibé se nasaun sira-neʼe ida lakohi halo tuir, haʼu sei fokit sai nasaun neʼe, fokit sai no halakon tiha nia”, Jeová dehan nuneʼe.

13 Jeová dehan nuneʼe mai haʼu: “Bá no sosa sintu ida neʼebé halo ho hena-liñu no kesi ba ó-nia knotak, maibé keta halo kona bee.” ² Nuneʼe haʼu sosa tiha sintu ida hodi halo tuir Jeová nia lia­fuan, no kesi ba haʼu-nia knotak.

³ No Jeová nia lia­fuan tun mai haʼu dala ida tan dehan: ⁴ “Lori sintu neʼe neʼebé ó sosa ona, neʼebé iha ó-nia knotak no bá toʼo Mota Eufrates, no hakoi sintu neʼe iha fatuk-boot nia kuak.” ⁵ Nuneʼe haʼu bá toʼo Mota Eufrates no hakoi sintu neʼe, hodi halo tuir lia­fuan neʼebé Jeová haruka mai haʼu.

⁶ Maibé liutiha loron barak Jeová dehan mai haʼu: “Bá Mota Eufrates, no foti fali sintu neʼebé haʼu haruka ó hakoi iha neʼebá.” ⁷ Nuneʼe haʼu bá toʼo Mota Eufrates no keʼe sai sintu neʼe husi fatin neʼebé haʼu hakoi, no haʼu haree katak sintu neʼe aat tiha ona, la bele uza tan ba buat ida.

¹² “No ó tenke hatoʼo lia­fuan tuirmai neʼe ba sira: ‘Jeová, Maromak Izraél nian dehan: “Sanan-rai boot hotu tenke enxe tua-uvas toʼo nakonu.”’ No sira sei hatán ba ó dehan: ‘Ó hanoin ami la hatene ka, katak sanan-rai boot hotu tenke enxe tua-uvas toʼo nakonu?’ ¹³ Tuirmai ó tenke dehan ba sira: ‘Jeová dehan nuneʼe: “Haree bá, ba ema hotu neʼebé hela iha rai neʼe, liurai sira neʼebé tuur iha David nia kadunan, amlulik sira, profeta sira no ema hotu neʼebé hela iha Jeruzalein, haʼu sei halo sira nakonu ho tua-uvas toʼo sira lanu. ¹⁴ Hanesan sanan-rai ho sanan-rai kona malu no rahun, haʼu sei halo ema sira-neʼe harahun malu, aman no oan-mane mós sei harahun malu”, Jeová dehan. “Haʼu sei la hatudu laran-diʼak ka laran-triste ka laran-sadiʼa ba sira; la iha buat ida mak bele hapara haʼu atu halakon sira.”’

¹⁵ Rona no see tilun bá.

Keta sai foti-an, tanba Jeová koʼalia tiha ona.

¹⁶ Fó hahiʼi ba Jeová imi-nia Maromak bá,

Antes nia lori nakukun toʼo mai

Imi sei hein ba naroman,

Maibé nia sei lori lalatak metan tebes toʼo mai;

Nia sei halo naroman sai nakukun tebes.

¹⁷ No se imi lakohi rona,

Haʼu sei tanis subasubar tanba imi foti-an.

Tanba ema lori sai ona Jeová nia bibi-lubun nuʼudar dadur.

¹⁸ Hatete ba liurai no ba liurai nia inan: ‘Bá tuur iha fatin neʼebé iha kraik liu,

²⁰ Foti ó-nia matan no haree sira neʼebé mai daudaun husi parte norte.

Ó-nia bibi-malae furak sira iha neʼebé? Bibi-lubun neʼebé fó ona ba ó iha neʼebé?

²¹ Bainhira kastigu toʼo ba ó husi ó-nia belun diʼak,

Sira neʼebé ó habelun husi uluk kedas, saida mak ó sei dehan?

Moras tuur-ahi nian sei toʼo ba ó derrepente deʼit hanesan feto neʼebé atu tuur ahi, loos ka lae?

²² No bainhira iha ó-nia laran ó husu ba ó-nia an: ‘Tansá mak buat sira-neʼe akontese ba haʼu?’

Neʼe tanba ó-nia sala boot, tan neʼe ó-nia saia kolu sai ona

No ema halo ó-nia ain-tuban sente moras tebes.

²³ Ema Kus bele troka ninia kulit ka lae? Leopardu bele troka ninia kór ka lae?

Se sira bele, imi mós bele halo hahalok diʼak,

Imi neʼebé toman ona halo hahalok aat.

²⁴ Tan neʼe, haʼu sei halo sira namkari, hanesan anin iha rai-fuik huu duʼut-maran halo namkari.

²⁵ Neʼe mak ó-nia parte, parte neʼebé haʼu sukat tiha ona ba ó”, Jeová dehan,

“Tanba ó haluha ona haʼu no tau fiar ba lia-bosok.

No ó-nia moe ema sei haree,

²⁷ Ó halo beibeik sala-foʼer no kaan malu makaʼas,

Ó halo hahalok feto-aat nian neʼebé foʼer tebes.

Iha foho-oan sira no iha rai-luan,

Susar ba ó, oh Jeruzalein!

Toʼo bainhira mak ó nafatin foʼer hanesan neʼe?”

14 Jeová nia lia­fuan tun ba Jeremias, kona-ba rai maran tanba udan la tun, dehan:

² Judá halerik, no ninia portaun sira aat ona.

Portaun sira monu ba rai ho triste,

No Jeruzalein hasaʼe lian halerik.

³ No ninia naʼi sira haruka atan sira bá buka bee.

Atan sira bá buka bee iha rai-kuak maibé bee la iha.

Sira fila deʼit ho sanan-rai mamuk.

Sira sente moe no triste,

No sira taka sira-nia ulun.

Tanba rai maran tebes toʼo nakfera,

Tanba udan la tun ba rai.

Tanba duʼut la iha.

⁶ Kuda-burru fuik sira hamriik iha foho-oan sira neʼebé molik.

Sira dada iis boot hanesan asu-fuik;

Sira-nia matan sai aat tanba ai-horis la iha.

⁷ Maski ami-nia sala rasik fó sasin hasoru ami,

Oh Jeová, ajuda ami bá tanba Ita-Boot nia naran.

Ami halo sala hasoru Ita-Boot.

⁸ Oh Ita-Boot mak Izraél nia esperansa, ninia Salvadór iha tempu susar,

Tansá mak Ita sai fali hanesan ema husi rai seluk iha rai neʼe,

Hanesan ema laʼo-rai neʼebé toba ba kalan ida deʼit iha neʼe?

⁹ Tansá mak Ita-Boot sai hanesan mane ida neʼebé bilán deʼit,

Hanesan asuwaʼin neʼebé la iha kbiit atu salva ninia povu?

Tanba Ita-Boot iha ami-nia leet, oh Jeová,

No ami mak lori Ita-nia naran.

Keta soe hela ami.

¹⁰ Jeová dehan nuneʼe kona-ba povu neʼe: “Sira gosta laʼo-lemo deʼit, no sira la hapara sira-nia ain. Tan neʼe Jeová la kontente ho sira. Agora nia sei hanoin-hetan sala neʼebé sira halo no fó kastigu ba sira-nia sala.”

¹¹ Tuirmai Jeová dehan mai haʼu: “Keta halo orasaun ba povu neʼe nia diʼak. ¹² Bainhira sira jejún, haʼu la rona ba sira-nia harohan, no bainhira sira hasaʼe sakrifísiu sunu nian no sakrifísiu fini nian, buat sira-neʼe la monu loos ba haʼu-nia laran, tanba haʼu sei halakon sira ho surik, ho hamlaha no ho moras-peste.”

¹³ Nuneʼe haʼu dehan: “Oh, Naʼi Jeová Ukun-Naʼin Boot Liu! Profeta sira koʼalia daudauk ba povu neʼe dehan: ‘Imi sei la haree surik, hamlaha sei la kona imi, maibé haʼu sei fó dame neʼebé loos ba fatin neʼe.’”

¹⁷ “Ó tenke hatoʼo lia­fuan neʼe ba sira:

Ninia kanek todan tebes.

¹⁸ Se haʼu sai bá rai-luan no hateke,

Haʼu haree mate-isin tanba surik!

Se haʼu mai iha sidade laran,

Haʼu haree moras oioin tanba hamlaha!

Tanba profeta no amlulik laʼo-lemo iha rai ida neʼebé sira la hatene.’”

¹⁹ Ita-Boot la simu ona Judá ka? Ita-Boot hakribi ona Siaun ka?

Tansá mak Ita-Boot hakanek ami toʼo kura la bele?

²⁰ Oh Jeová, ami hatene katak ami-nia hahalok aat duni,

No ami-nia beiʼala sira mós halo sala.

Ami halo ona sala hasoru Ita-Boot.

²¹ Tanba Ita-Boot nia naran, keta husik ami;

Keta hakribi Ita-nia kadunan furak.

Hanoin-hetan bá, no keta hakotu aliansa neʼebé Ita halo ona ho ami.

²² Nasaun sira-nia estátua sira neʼebé folin-laek bele fó udan ka lae?

Ka lalehan rasik bele halo udan boot tun ka lae?

Oh Jeová ami-nia Maromak, Ita-Boot mesak deʼit mak bele halo ida-neʼe, loos ka lae?

No ami tau esperansa ba Ita-Boot,

15 Tuirmai Jeová dehan mai haʼu: “Maski Moisés no Samuel hamriik iha haʼu-nia oin, haʼu sei la hanoin povu neʼe. Duni sai sira husi haʼu-nia oin. Husik sira bá ona. ² No se sira hatete ba ó: ‘Ami sei bá loos neʼebé?’, ó tenke hatete ba sira: ‘Jeová dehan nuneʼe:

“Sira neʼebé atu hetan moras-peste, hetan moras-peste bá!

Sira neʼebé atu mate ho surik, mate ho surik bá!

Sira neʼebé atu sai hamlaha, sai hamlaha bá!

No sira neʼebé atu sai dadur, sai dadur bá!”’

³ “‘No haʼu sei foti terus haat no fó ba sira’, Jeová dehan, ‘surik atu oho ema, asu sira atu rasta mate-isin, no manu sira iha lalehan ho animál sira iha rai atu han mohu no atu halakon. ⁴ Nasaun hotu iha mundu sei sai taʼuk bainhira haree buat neʼebé haʼu halo ba povu neʼe tanba buat neʼebé Ezekias nia oan-mane Manase, liurai ba rai-Judá, halo ona iha Jeruzalein.

⁵ Oh Jeruzalein, sé mak sei hatudu laran-sadiʼa ba ó?

Sé mak sei hanoin ó?

No sé mak sei mai atu husu buat diʼak kona-ba ó?’

⁶ ‘Ó husik hela ona haʼu’, Jeová dehan.

‘Ó kontinua fila kotuk ba haʼu.

Tan neʼe haʼu sei foti liman hasoru ó no halakon ó.

Haʼu baruk ona atu sente laran-sadiʼa ba ó.

Haʼu sei halakon sira-nia oan.

Haʼu sei halakon haʼu-nia povu,

Tanba sira lakohi troka sira-nia hahalok.

⁸ Iha haʼu-nia oin, sira-nia feto-faluk sei sai barak liu fali rai-henek iha tasi.

Iha oras meiudia, haʼu sei lori inimigu ataka sira, ataka inan no mane joven sira.

Nia susar atu dada iis.

Ninia loro-matan tun ona maski loron hela,

Neʼe lori moe ba nia no hamoe tebes nia.’

‘No sira balu neʼebé moris hela

Haʼu sei fó sira ba sira-nia inimigu nia surik’, Jeová dehan.”

Maibé sira hotu fó-malisan ba haʼu.

¹¹ Jeová dehan: “Iha tempu terus no susar boot,

Haʼu sei husu laran-sadiʼa husi inimigu sira ba ó;

Haʼu sei ajuda ó ba ó-nia diʼak.

¹² Iha ema neʼebé bele harahun besi,

Besi husi norte, no mós bele harahun riti ka lae?

Laʼós atu hetan osan, maibé tanba sala hotu neʼebé ó halo ona iha ó-nia rai tomak.

¹⁴ Haʼu sei fó rikusoin sira-neʼe ba ó-nia inimigu sira

Atu lori ba rai neʼebé ó la hatene.

Tanba haʼu-nia hirus hanesan ahi neʼebé sunu,

No ida-neʼe lakan makaʼas hasoru imi.”

¹⁵ Ita-Boot rasik hatene haʼu-nia susar, oh Jeová.

Hanoin-hetan haʼu no tau matan haʼu bá.

Selu aat ba ema neʼebé haterus haʼu.

Keta husik haʼu lakon mohu tanba Ita mak ida neʼebé la hirus lalais.

Hatene bá katak haʼu tahan hasoru susar neʼe tanba Ita.

¹⁶ Haʼu hetan Ita-nia lia­fuan sira, no haʼu han tiha;

No Ita-nia lia­fuan sai buat neʼebé halo haʼu-nia laran kontente no haksolok,

Tanba haʼu lori Ita-nia naran, oh Jeová, Maromak ukun-naʼin ba tropa lalehan nian.

¹⁷ Haʼu la tuur iha ema halimardór sira-nia leet no haksolok hamutuk.

Tanba Ita-nia liman tula mai haʼu, haʼu tuur mesak,

Tanba Ita halo nakonu ona haʼu ho laran-nakali.

¹⁸ Tansá mak haʼu sente moras nafatin no haʼu-nia kanek la bele kura?

Kanek neʼe lakohi sai diʼak fali.

Ita sei sai hanesan bee-matan falsu ba haʼu

Neʼebé haʼu la bele tau fiar ka?

¹⁹ Tan neʼe Jeová dehan:

“Se ó fila fali mai haʼu, haʼu sei simu ó,

No ó sei hamriik iha haʼu-nia oin.

Se ó haketak buat neʼebé folin-boot ho buat neʼebé la iha folin,

Ó sei sai haʼu-nia lia-naʼin.

Sira sei fila fali ba ó,

Maibé ó rasik sei la fila fali ba sira.”

²⁰ “Haʼu sei halo ó sai hanesan moru neʼebé halo ho riti neʼebé metin iha povu neʼe nia leet.

No sira sei halo duni funu hasoru ó,

Maibé sira sei la manán,

²¹ “No haʼu sei hasai ó husi ema aat sira-nia liman

No halo ó livre husi aat-naʼin sira-nia liman-laran.”

16 Dala ida tan, Jeová nia lia­fuan tun mai haʼu dehan: ² “Ó keta hola feto, no ó keta iha oan-mane ka oan-feto iha fatin neʼe. ³ Tanba, kona-ba oan-mane no oan-feto sira neʼebé moris iha fatin neʼe no kona-ba inan sira neʼebé tuur ahi oan sira-neʼe no kona-ba aman sira neʼebé halo oan sira-neʼe moris iha rai ida-neʼe, Jeová dehan nuneʼe: ⁴ ‘Sira sei mate tanba kona moras aat, maibé la iha ema ida mak lelir ba sira ka hakoi sira; sira sei sai hanesan rai-metan ba rai. Sira sei mate ho surik no ho hamlaha, no sira-nia mate-isin sei sai ai-han ba manu sira iha lalehan no ba animál sira iha rai.’

⁵ Tanba Jeová dehan nuneʼe:

No keta bá atu lelir ka hatudu sentimentu triste ho sira.’

‘Tanba haʼu foti tiha ona haʼu-nia dame,

Haʼu-nia laran-sadiʼa no domin neʼebé laran-metin husi povu neʼe’, Jeová dehan,

⁶ ‘Ema hotu, boot ka kiʼik, sei mate iha rai neʼe.

La iha ema ida mak hakoi sira

Ka lelir ba sira,

No la iha ema ida mak sei hakanek an ka koir fuuk halo botak tanba sira.

⁷ No la iha ema ida mak sei fahe hahán ba sira neʼebé lelir hela,

Atu fó kmaan ba sira tanba mate neʼe;

⁸ No ó keta tama ba uma neʼebé halo festa

Hodi tuur no han-hemu hamutuk ho sira.’

⁹ “Tanba Jeová, ukun-naʼin ba tropa lalehan nian, Maromak Izraél nian, dehan: ‘Iha fatin ida-neʼe, iha imi-nia tempu, imi-nia matan rasik sei haree katak haʼu sei hapara lian haksolok nian no lian haklalak nian, lian noivu nian no lian noiva nian.’

¹⁰ “Bainhira ó fó-hatene ba povu lia­fuan hirak-neʼe hotu, sira sei husu ba ó: ‘Tansá mak Jeová fó sai susar boot hotu neʼe hasoru ami? Sala saida mak ami halo ona neʼebé kontra hasoru Jeová ami-nia Maromak?’ ¹¹ Ó tenke hatán ba sira: ‘Jeová dehan: “Tanba imi-nia beiʼala sira husik ona haʼu no sira kontinua laʼo tuir maromak seluk hodi serbí no hakruʼuk an ba sira. Maibé sira husik ona haʼu no la halo tuir haʼu-nia ukun-fuan. ¹² No imi-nia hahalok aat liu fali imi-nia beiʼala sira, no imi ida-idak ho ulun-toos laʼo tuir imi-nia laran-aat no lakohi halo tuir haʼu. ¹³ Tan neʼe haʼu sei soe imi sai husi rai neʼe ba rai ida neʼebé imi no imi-nia beiʼala sira la hatene, no iha neʼebá imi tenke serbí maromak seluk loron no kalan, tanba haʼu sei la hatudu laran-diʼak ba imi.”’

¹⁴ “Jeová dehan: ‘Maski nuneʼe, loron sira sei toʼo mai bainhira sira sei la koʼalia tan: “Haʼu jura hodi Jeová neʼebé moris, neʼebé lori povu Izraél sai husi rai-Ejitu!”, ¹⁵ maibé sira sei hatete fali: “Haʼu jura hodi Jeová neʼebé moris, neʼebé lori sai povu Izraél husi rai norte no husi rai hotu neʼebé nia halo ona sira namkari!” no haʼu sei lori sira fila fali ba sira-nia rai neʼebé haʼu fó ona ba sira-nia beiʼala.’

¹⁶ Jeová dehan: ‘Haʼu sei haruka peskadór barak,

Atu buka sira hanesan buka ikan.

Tuirmai haʼu sei haruka kasadór barak,

Atu kasa sira iha foho no foho-oan hotu

No iha fatuk-boot nia kuak sira.

¹⁷ Tanba haʼu-nia matan haree ba buat hotu neʼebé sira halo.

Sira la bele subar husi haʼu,

¹⁸ Ulukliu, haʼu sei selu fali ba sira buat hotu neʼebé sira merese simu tanba sira-nia sala,

Tanba sira hafoʼer ona haʼu-nia rai ho estátua barak neʼebé la moris no foʼer tebes

No sira halo nakonu haʼu-nia rai ho buat neʼebé halo haʼu hakribi tebes.’

¹⁹ Oh Jeová, Ita-Boot mak haʼu-nia kbiit no haʼu-nia fatin neʼebé seguru,

Fatin neʼebé haʼu halai bá bainhira tempu susar,

Nasaun sira sei toʼo mai husi rai nia rohan atu hakbesik Ita-Boot,

No sira sei dehan: “Ami-nia beiʼala simu ona maromak falsu nuʼudar liman-rohan,

Buat neʼebé hanesan anin deʼit no la iha folin duni.”

²⁰ Ema bele halo maromak barabarak ba sira-nia an ka lae?

Maibé loloos buat neʼebé ema halo laʼós maromak.

²¹ “Tan neʼe haʼu sei halo sira hatene,

Iha tempu neʼe haʼu sei halo sira hatene haʼu-nia forsa no haʼu-nia kbiit,

Nuneʼe sira sei hatene duni katak haʼu-nia naran mak Jeová.”