4 | Bíblia fó matadalan diʼak

Neʼe katak sá

Maski Bíblia laʼós livru médiku, maibé iha duni sujestaun diʼak neʼebé ita bele aplika. Bíblia nia matadalan bele ajuda ema neʼebé hasoru daudauk problema ho saúde mentál. Haree toʼok ezemplu balu tuirmai.

Oinsá mak bele ajuda

“Ema neʼebé isin-diʼak la presiza doutór, maibé ema moras presiza.”​—MATEUS 9:12.

Bíblia fó sai katak dala ruma ita presiza buka tratamentu médiku. Ema barak hetan ajuda hodi buka informasaun neʼebé loos kona-ba tratamentu saida mak diʼak ba sira-nia saúde mentál no simu ajuda husi doutór sira.

“Halo ezersísiu lori buat diʼak.”​—1 TIMÓTEO 4:8, nota-rodapé.

Halo buat neʼebé diʼak ba ita-nia saúde fíziku bele ajuda mós ita-nia saúde mentál. Toman diʼak hanesan neʼe inklui halo ezersísiu beibeik, han ai-han neʼebé saudavel, no deskansa ho didiʼak.

“Laran neʼebé kontente mak ai-moruk neʼebé diʼak, maibé laran-triste halakon ema nia forsa.”​—PROVÉRBIOS 17:22.

Hodi lee eskritura husi Bíblia neʼebé anima ita no iha planu neʼebé bele kumpre, neʼe bele ajuda ita atu sente kontente. Se ita iha hanoin pozitivu no fiar katak ita-nia situasaun sei sai diʼak, neʼe sei ajuda ita atu tahan hasoru problema ho saúde mentál.

“Matenek sei hamutuk ho ema neʼebé haraik an.”​—PROVÉRBIOS 11:2.

Kuandu hatene katak Ita labele halo buat hotu neʼebé Ita hakarak halo, diʼak atu simu ema seluk nia ajuda. Karik Ita-nia família no belun sira kontente atu ajuda Ita maibé la hatene oinsá. Fó-hatene sira buat saida deʼit mak bele ajuda Ita. Keta espera demais, maibé sempre hatudu agradese ba buat neʼebé sira halo atu ajuda Ita.

Oinsá mak Bíblia nia matadalan ajuda ema balu

“Haʼu sente buat ruma la loos ho haʼu-nia mentál, tan neʼe haʼu bá konsulta. Doutora hatene haʼu-nia moras, no neʼe ajuda haʼu atu komprende haʼu-nia kondisaun no hetan tratamentu médiku.”​—Nicole,a neʼebé iha moras bipolar.

“Lee Bíblia hamutuk ho haʼu-nia feen iha dadeer ajuda haʼu atu iha hanoin pozitivu kuandu hahú loron foun. No dala barak kuandu haʼu sente susar atu tahan, haʼu hanoin-hetan eskritura neʼebé anima haʼu.”​—Peter, neʼebé iha moras depresaun.

“Susar ba haʼu atu fó-hatene ema seluk kona-ba haʼu-nia problema tanba haʼu sente moe tebes. Maibé haʼu-nia belun ida rona didiʼak haʼu no hakaʼas an atu komprende haʼu-nia situasaun no sentimentu. Nia ajuda tebes haʼu atu sente diʼak no halo haʼu hatene katak haʼu la mesak.”​—Ji-yoo, neʼebé iha distúrbio alimentar (problema kona-ba han).

“Bíblia ajuda haʼu atu iha hanoin neʼebé loos kona-ba serbisu no deskansa. Neʼe ajuda duni haʼu atu luta hasoru haʼu-nia problema kona-ba emosaun.”​—Timothy, neʼebé iha distúrbio obsessivo-compulsivo.