3 | Ezemplu husi Bíblia bele ajuda ita

BÍBLIA KONTA . . . Istória kona-ba fiar-naʼin sira neʼebé “iha sentimentu hanesan ita”.—TIAGO 5:17.

Neʼe katak sá

Bíblia konta istória barak kona-ba mane no feto neʼebé fó sai sentimentu no emosaun oioin. Kuandu ita lee sira-nia esperiénsia husi Bíblia, ita bele hetan ema neʼebé iha sentimentu hanesan ho ita.

Oinsá mak bele ajuda

Ita hotu presiza sente katak ema seluk komprende ita, liuliu kuandu ita iha problema ho saúde mentál. Bainhira ita lee ema seluk nia esperiénsia iha Bíblia, ita bele hetan ema neʼebé iha hanoin no sentimentu hanesan ho ita. Rezultadu mak ita bele rekoñese katak ita la mesak kuandu tahan hasoru laran-taridu ka emosaun neʼebé haterus ita.

Bíblia fó sai ema nia sentimentu oioin bainhira sira lakon forsa no esperansa. Karik ita hanoin: ‘Haʼu labele tahan ona.’ Moisés, Elias, no David mós sente hanesan neʼe.—Números 11:14; 1 Reis 19:4; Salmo 55:4.
Bíblia konta kona-ba feto ida naran Ana, neʼebé sente “laran-susar tebes” tanba nia labele iha oan no mós tanba ninia laʼen nia feen-kiʼik trata aat nia.—1 Samuel 1:6, 10.
Bíblia mós konta kona-ba mane ida naran Job, neʼebé hetan susar boot. Maski nia mak ema neʼebé fiar metin, nia sente estrese tebes toʼo hatete: “Haʼu odi haʼu-nia moris; haʼu lakohi moris tan.”—Job 7:16.

Hodi aprende oinsá mak ema sira-neʼe konsege halakon sira-nia hanoin negativu, ita mós bele hetan forsa neʼebé ita presiza atu tahan susar.

Oinsá Bíblia ajuda Kevin

Oinsá mak moras bipolar afeta haʼu

“Bainhira haʼu besik tinan 50, haʼu kona moras bipolar (moras mentál oin ida neʼebé halo sentimentu tun-saʼe makaʼas). Dala ruma haʼu sente haʼu bele manán hasoru problema naran deʼit, maibé dala ruma haʼu sente haʼu la merese moris.”

Oinsá Bíblia ajuda haʼu

“Ema ida husi Bíblia neʼebé sente hanesan ho haʼu mak apóstolu Pedro. Nia halo sala neʼebé halo nia sente la iha folin. Maibé duké kontinua hanoin negativu, nia buka atu ransu ho belun sira neʼebé bele ajuda nia. Bainhira moras bipolar afeta haʼu makaʼas, haʼu sente laran-taridu tebes kona-ba haʼu-nia fraku no sente la iha folin. Maibé hanesan ho Pedro, haʼu aprende atu hakaʼas an besik ho haʼu-nia belun sira neʼebé hakarak ajuda haʼu atu la rende an.

“Ema ida seluk neʼebé halo haʼu sente kmaan mak Liurai David. Dala barak nia sente laran-kraik kona-ba ninia situasaun no arrepende ninia sala. Haʼu bele komprende nia tanba haʼu mós dala ruma halo ka koʼalia buat neʼebé ikusmai arrepende. Maibé David nia liafuan iha Salmo 51 halo haʼu sente kmaan. Iha versu 3, David hatete: ‘Haʼu hatene ho didiʼak haʼu-nia sala sira, no haʼu-nia sala sempre iha haʼu-nia oin.’ Neʼe mak buat neʼebé haʼu sente, no susar atu iha hanoin pozitivu kona-ba haʼu-nia an. Maibé haʼu mós sente hanesan David iha versu 10: ‘Oh Maromak, fó laran neʼebé moos ba haʼu, no fó espíritu foun no neon metin ba haʼu.’ Haʼu mós harohan ba Maromak hodi husu ajuda atu troka haʼu-nia hanoin kona-ba haʼu-nia an. Ikusmai, versu 17 halo haʼu sente kmaan. Neʼe dehan: ‘Oh Maromak, Ita sei la hakribi ema neʼebé laran-triste no neon-susar.’ Eskritura neʼe fó fiar mai haʼu katak Maromak hadomi haʼu.

“Hodi fokus ba ezemplu husi Bíblia no buat neʼebé Maromak fó ona mai haʼu, neʼe hametin haʼu-nia esperansa ba futuru. Bíblia nia promesa sai realidade no neʼe ajuda duni haʼu atu kontinua tahan.”