2 | ‘Eskritura fó kmaan mai ita’

BÍBLIA DEHAN: “Buat hotu neʼebé hakerek ona horiuluk kedas, hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita.”—ROMA 15:4.

Neʼe katak sá

Bíblia nia liafuan bele fó kmaan no fó forsa mai ita atu tahan hasoru hanoin negativu. Bíblia mós fó esperansa katak lakleur tan ita sei moris kontente hodi sai livre husi sentimentu triste.

Oinsá mak bele ajuda

Ita hotu dala ruma hanoin barak no estrese. Maibé ema neʼebé iha moras depresaun ka laran-taridu sempre luta hasoru problema emosaun. Oinsá Bíblia bele ajuda?

Bíblia fó sai hanoin pozitivu hodi ajuda ita troka hanoin negativu. (Filipe 4:8) Neʼe halo ita-nia neon sente kalma no ajuda ita kontrola ita-nia emosaun.—Salmo 94:18, 19.
Bíblia bele ajuda ita kontra hanoin neʼebé sala katak ita la iha folin.—Lucas 12:6, 7.
Eskritura barak husi Bíblia halo ita fiar katak ita la mesak, no Maromak neʼebé kria ita komprende ho loloos ita-nia sentimentu.—Salmo 34:18; 1 João 3:19, 20.
Bíblia promete katak Maromak sei halakon ita-nia memória aat hotu. (Isaias 65:17; Apokalipse 21:4) Kuandu ita laran-susar no hanoin barak, promesa neʼe bele fó forsa mai ita atu kontinua tahan.

Oinsá Bíblia ajuda Jessica

Oinsá mak depresaun afeta haʼu

“Bainhira haʼu tinan 25, haʼu sente estrese demais no doutór dehan katak haʼu kona moras depresaun neʼebé sériu. Haʼu sente terus tanba iha memória aat kona-ba haʼu-nia pasadu. Doutór sira ajuda haʼu komprende katak haʼu-nia depresaun iha ligasaun ho hanoin negativu tanba akontesimentu oioin neʼebé halo haʼu trauma. Haʼu presiza hemu ai-moruk, no mós presiza hetan terapia hodi bele hadiʼa haʼu-nia hanoin negativu.”

Oinsá Bíblia ajuda haʼu

“Iha tempu neʼebé haʼu-nia depresaun sai aat, haʼu sai pániku, laran-taridu demais, no toba la dukur. Dala barak haʼu-nia neon la hakmatek toʼo labele kontrola. Maibé hanesan hakerek iha Salmo 94:19, Maromak bele fó kmaan mai ita kuandu ita sente laran-taridu tebes. Tan neʼe, haʼu sempre tau Bíblia besik haʼu-nia kama no mós kadernu neʼebé hakerek eskritura sira neʼebé anima haʼu. No kuandu haʼu labele toba, haʼu lee eskritura balu no husik Maromak nia hanoin fó kmaan mai haʼu.

“Bíblia anima ita atu halakon ideia neʼebé kontra lia-loos kona-ba Maromak. Uluk, haʼu hanoin haʼu la iha folin no la merese simu domin. Maibé haʼu aprende katak hanoin hanesan neʼe mak kontra Bíblia, tanba tuir loloos Maromak mak Aman neʼebé hadomi no hanoin ita ida-idak. Neineik-neineik haʼu konsege kontrola haʼu-nia hanoin duké husik haʼu-nia hanoin mak kontrola haʼu. Haʼu aprende atu haree haʼu-nia an hanesan Maromak haree haʼu. Neʼe mak hakat importante neʼebé ajuda haʼu atu halakon hanoin negativu kona-ba haʼu-nia an rasik.

“Haʼu hein namanas ba tempu neʼebé ema sei la iha tan memória aat ka ideia neʼebé negativu. Hodi hatene katak aban-bainrua sei la iha tan problema kona-ba saúde mentál, neʼe fó forsa mai haʼu atu tahan haʼu-nia problema agora, no iha futuru haʼu la presiza tan luta hasoru moras depresaun.”