Hakarak hatene?

Ema-boot husi Etiópia uza transporte saida bainhira Filipe haklaken ba nia?

LIAFUAN orijinál neʼebé tradús nuʼudar “kuda-karreta” iha Tradusaun Mundu Foun bele refere ba kuda-karreta oioin. (Após 8:​28, 29, 38) Maibé, haree hanesan ema-boot husi Etiópia neʼe saʼe kuda-karreta neʼebé boot liu fali kuda-karreta neʼebé baibain tropa sira uza, ka ema uza hodi halai-taru. Haree toʼok esplikasaun balu tuirmai.

Ema-boot husi Etiópia neʼe halaʼo viajen neʼebé dook tebes. Nia mak mane “neʼebé iha kbiit iha liurai-feto Etiópia, Kandase, nia okos, no nia tau matan ba liurai-feto neʼe nia rikusoin tomak”. (Após 8:27) Etiópia antigu iha tempu modernu mak inklui rai-Sudaun no rai-Ejitu nia parte súl. Karik mane neʼe laʼós uza deʼit transporte neʼebé hanesan durante ninia viajen, no tanba viajen neʼe mak dook, nia tenke lori buat barak ba ninia presiza. Iha apóstolu sira-nia tempu, transporte neʼebé ema uza atu tula pasajeiru mak kuda-karreta ho roda haat no iha kakuluk. Livru Acts—An Exegetical Commentary hatete: “Kuda-karreta hanesan neʼe iha fatin mamuk neʼebé natoon atu tula pasta no sasán seluk, halo viajen sente seguru, no karik ajuda ema atu halo viajen ba fatin neʼebé dook liu.”

Ema-boot husi Etiópia neʼe lee daudaun kuandu Filipe hakbesik ba nia. Bíblia hatete katak “Filipe halai iha kuda-karreta nia sorin no rona nia lee profeta Isaias nia livru ho lian makaʼas”. (Após 8:30) Kuda-karreta neʼebé uza atu halo viajen labele halai ho lalais. Tanba kuda-karreta neʼe halai neineik, neʼe halo ema-boot neʼebé iha kuda-karreta laran bele lee, no Filipe mós bele halai toman kuda-karreta neʼe.

Ema-boot husi Etiópia neʼe “konvida Filipe atu saʼe no tuur ho nia”. (Após 8:31) Ema presiza hamriik deʼit se sira saʼe kuda-karreta neʼebé uza atu halai-taru. Maibé kuda-karreta neʼebé uza atu halo viajen, iha fatin ba ema-boot neʼe no Filipe atu tuur.

Tanba buat neʼebé livru Apóstolu kapítulu 8 hatete no evidénsia husi istória, agora ita-nia publikasaun sira fó sai dezeñu kona-ba ema-boot Etiópia neʼe saʼe kuda-karreta neʼebé boot duké kiʼik neʼebé tropa sira uza ka ema uza hodi halai-taru.