Mundu neʼe sei lakon ka lae? Saida mak “Apokalipse”?
Bainhira Ita rona liafuan “apokalipse”, Ita imajina kona-ba saida? Karik Ita hanoin kona-ba dezastre boot ruma neʼebé halakon buat hotu iha mundu tomak. Ema balu fiar katak lakleur tan sei akontese dezastre boot hanesan neʼe, liuliu kuandu sira haree notísias hanesan tuirmai:
“Iha posibilidade boot atu akontese funu nukleár. Karik funu neʼe sei akontese ho neon ka asidente ka tanba komprende sala.”—Bulletin of the Atomic Scientists.
“Durante tinan 10 foin lalais neʼe, dezastre boot akontese barak tebes iha mundu tomak hanesan anin-fuik boot, ahi han foho, udan la tau no rai maran, ahu-ruin mate, anin manas, no inundasaun.”—National Geographic.
“Iha rai-Áfrika gafañotu lubun sai barak liu no estraga buat barak tebes se kompara ho tinan sira seluk.”—The Associated Press.
Mundu neʼe sei lakon ho dezastre boot ka lae? Bíblia dehan saida?
Planeta mundu sei lakon ka lae?
Lae. Maromak nia Liafuan Bíblia fó garantia hodi dehan katak planeta mundu sei iha ba nafatin. (Eclesiastes 1:4) Maromak sei la husik buat ida atu halakon planeta mundu neʼebé nia kria, maibé nia sei “halakon sira neʼebé estraga daudaun mundu”.—Apokalipse 11:18.
Mundu neʼe sei lakon ka lae?
Kuandu Bíblia koʼalia kona-ba “mundu” neʼebé sei lakon, neʼe refere ba ema neʼebé lakohi halo tuir Maromak no buka deʼit sira-nia hakarak rasik. Hanesan akontese iha Noé nia tempu, Maromak sei halakon duni “mundu neʼebé nakonu ho ema aat”.—2 Pedro 2:5; 3:7.
1 João 2:17 hatete: “Mundu neʼe no ninia hakarak sira sei lakon tiha.” Eskritura neʼe hatudu katak Maromak sei halakon ema neʼebé kontinua halo tuir sira-nia hakarak aat, laʼós planeta mundu.
Bainhira mak mundu nia rohan sei mai?
Bíblia la fó-hatene mai ita loron no oras neʼebé mundu neʼe sei remata. (Mateus 24:36) Maski nuneʼe, Bíblia fó-hatene nanis akontesimentu tuirmai neʼe hodi hatudu katak mundu neʼe besik ona atu remata:
Funu, hamlaha, moras-peste no rai-nakdoko makaʼas akontese “iha fatin oioin”.—Mateus 24:3, 7, 14; Lucas 21:10, 11; Apokalipse 6:1-8.
Ema barak sei hanoin an deʼit. Porezemplu, sira sei “hadomi osan”, “la hatene fó agradese”, no “la kontrola an”.—2 Timóteo 3:1-5.
Ema barak konkorda katak husi tinan 1914, mundu nia situasaun sai duni hanesan buat neʼebé Bíblia hatete nanis no neʼe katak mundu nia rohan besik ona. Atu hetan informasaun liután, haree “Saida deʼit mak sinál ba ‘loron ikus sira’, ka ‘mundu nia rohan’?” no “Apa yang Nubuat Alkitab Tunjukkan tentang Tahun 1914?”
Liafuan “apokalipse” neʼebé Bíblia temi signifika saida?
Iha liafuan orijinál Gregu neʼebé tradús nuʼudar “apokalipse” signifika katak “loke buat neʼebé taka hela”. Dala barak liafuan neʼe fó ideia katak hatudu sai informasaun neʼebé subar hela. Bíblia mós koʼalia kona-ba Jesus nia apokalipse hodi tradús nuʼudar “Naʼi Jesus mosu mai” ka “Kristu hatudu sai ninia an”. Neʼe sei akontese bainhira Jesus mai ho kbiit atu halakon buat aat hotu husi mundu no fó kolen ba ema neʼebé adora Maromak.—2 Tesalónika 1:6, 7; 1 Pedro 1:7, 13.
Livru ikus husi Bíblia iha naran Apokalipse, tanba livru neʼe fó sai kona-ba buat neʼebé sei akontese iha futuru. (Apokalipse 1:1) Livru neʼe mós fó sai liafuan diʼak no esperansa ba futuru. (Apokalipse 1:3) Neʼe hatudu katak Maromak sei halakon buat hotu neʼebé la iha justisa no halo mundu tomak sai fali paraízu. Iha tempu neʼebá, ema sei la hetan tan terus, susar, no mate.—Apokalipse 21:3, 4.
Ita hakarak aprende liután Bíblia nia promesa furak sira ka lae? Testemuña ba Jeová oferese programa Estudu Bíblia gratuitu neʼebé bele ajuda Ita. Ho laran haksolok ami konvida Ita atu kontaktu ami.