PERGUNTA HUSI JOVEN SIRA
Oinsá se haʼu-nia belun hakanek haʼu-nia laran?
Buat neʼebé Ita presiza hatene
La iha relasaun belun nian neʼebé dook husi problema. Tanba ita ema la perfeitu, Ita-nia belun neʼebé diʼak liu mós dala ruma bele hakanek Ita liuhusi buat neʼebé sira halo ka koʼalia. Loloos, Ita rasik mós la perfeitu. Tan neʼe, koko hanoin-hetan toʼok, Ita hakanek ona ema seluk nia laran ka lae?—Tiago 3:2.
Fasil liu ba ema atu hakanek Ita liuhusi média sosiál. Porezemplu, mane joven ida naran David dehan: “Bainhira ita online iha média sosiál no haree kolega sira-nia foto neʼebé sira hasai iha festa, karik ita komesa hanoin tanbasá sira la konvida haʼu. No tuirmai ita sente laran-triste no sente sira sai traidór ba ita.”
Ita bele aprende oinsá atu rezolve problema neʼe.
Buat neʼebé Ita bele halo
Buka-hatene kona-ba Ita-nia an. Bíblia hatete: “Keta sente an lalais, tanba hahalok sente an lalais mak ema beik nia hahalok.”—Eclesiastes 7:9, nota-rodapé.
“Dala ruma, ita rekoñese katak ita sai hirus ba buat neʼebé laʼós problema boot.”—Alyssa.
Hanoin toʼok: Ita mak ema neʼebé sente an lalais ka lae? Ita bele ka lae aprende atu hatudu pasiénsia ba ema seluk?—Eclesiastes 7:21, 22.
Benefísiu neʼebé Ita hetan tanba fó perdua. Bíblia hatete: ‘Buat furak mak la hanoin fali kona-ba ema nia sala.’—Provérbios 19:11.
“Maski ita sente iha duni razaun atu muramura, diʼak tebes atu fó perdua ho laran, neʼe katak labele fó-hanoin beibeik ema neʼe kona-ba ninia sala no obriga nia atu husu deskulpa. Se ita fó perdua ona, lalika temi tan kona-ba neʼe.”—Mallory.
Hanoin toʼok: Problema neʼe mak boot duni ka lae? Ita bele ka lae fó perdua deʼit atu bele iha dame nafatin?—Koloso 3:13.
Se ita sempre halo problema kiʼik sai problema boot, neʼe hanesan loke beibeik odamatan no husik anin boot tama uma laran neʼebé kabeer no estraga buat hotu
Hanoin ema seluk nia sentimentu. Bíblia hatete: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
“Bainhira domin no respeitu mak sai nuʼudar hun ba relasaun belun, ita iha razaun forte atu rezolve lalais problema tanba neʼe mak buat neʼebé folin-boot ba ita. Tanba ita hakaʼas an ona iha relasaun neʼe, ita lakohi lakon ita-nia relasaun belun nian.”—Nicole.
Hanoin toʼok: Ita bele hanoin razaun tanbasá Ita-nia belun hatudu hahalok hanesan neʼe?—Filipe 2:3.
Buat neʼebé importante: Hodi hatene oinsá atu tahan hasoru sentimentu laran-kanek mak abilidade ida neʼebé bele ajuda ita bainhira sai ema boot. Tan neʼe, diʼak atu aprende agora, loos ka lae?