Mane joven ida haree daudaun ema neʼebé laʼo tama ba Reuniaun-Fatin

PERGUNTA HUSI JOVEN SIRA

Tanbasá tuir reuniaun sira iha Reuniaun-Fatin?

Dala rua semana-semana, Testemuña ba Jeová halaʼo sira-nia reuniaun iha fatin neʼebé bolu nuʼudar Reuniaun-Fatin. Saida deʼit mak sira halo iha neʼebá, no oinsá mak Ita bele hetan benefísiu hodi tuir reuniaun?

Saida mak akontese iha Reuniaun-Fatin?

Reuniaun-Fatin mak fatin atu aprende Bíblia nia hanorin no matadalan. Reuniaun sira bele ajuda Ita atu:

aprende lia-loos kona-ba Maromak.
komprende signifikadu husi akontesimentu sira iha mundu ohin loron.
sai ema neʼebé diʼak liu.
hetan belun neʼebé diʼak.

Hatene ka lae? Testemuña ba Jeová nia fatin adorasaun hanaran Reuniaun-Fatin, no iha fatin neʼe mak sira aprende beibeik kona-ba Maromak nia Ukun.—Mateus 6:9, 10; 24:14; Lucas 4:43.

Tanbasá Ita presiza tuir?

Informasaun sira neʼebé bele ajuda Ita. Informasaun sira husi Testemuña ba Jeová nia reuniaun sira mak bazeia ba Bíblia no neʼe bele ajuda Ita atu “hetan matenek”. (Provérbios 4:5) Neʼe katak Bíblia bele ajuda Ita atu halo desizaun neʼebé diʼak iha Ita-nia moris. Ida-neʼe mós bele ajuda Ita hetan resposta ba pergunta sira kona-ba moris, hanesan:

Tuirmai mak títulu balu ba diskursu sira neʼebé baibain hatoʼo iha reuniaun findesemana:

Tansá diʼak atu halo tuir Bíblia nia matadalan?
Iha neʼebé mak ita bele hetan ajuda kuandu hasoru susar?
Saida mak Maromak nia Ukun halo mai ita ohin loron?

“Kolega mane husi haʼu-nia eskola tuir reuniaun. Nia tuur hamutuk ho haʼu-nia família, no ami mós fó ami-nia livru ba nia. Nia hatete ba haʼu katak nia gosta tebes atu rona komentáriu neʼebé ema hatoʼo atu hola parte iha reuniaun. Nia mós hatete katak ninia igreja la iha informasaun atu estuda hanesan ita.”—Brenda.

Hatene ka lae? Tuir reuniaun iha Reuniaun-Fatin mak gratuitu, ami mós la husu ezmola.

Ransu malu neʼebé bele anima Ita. Bíblia esplika razaun ida tanbasá ema Kristaun presiza halibur hamutuk mak atu “fó aten-brani ba malu”. (Ebreu 10:24, 25) Ransu ho ema neʼebé tau uluk Maromak no mós ema seluk duké sira-nia an rasik, bele lori kmaan ba Ita, tanba ohin loron Ita moris iha mundu neʼebé hatudu hahalok hanoin an deʼit.

“Depois tuir eskola ba loron tomak, haʼu sente triste no kole, maibé ema iha Reuniaun-Fatin sempre halo haʼu sente kmaan. Depois fila husi reuniaun, haʼu sente kontente no prontu atu halaʼo atividade iha loron tuirmai.”—Elisa.

Hatene ka lae? Testemuña ba Jeová nia kongregasaun iha mundu tomak hamutuk 120.000 liu, iha fatin hamutuk 60.000 liu. Tinan-tinan, maizumenus iha Reuniaun-Fatin foun hamutuk 1.500.a

Ita-nia kolega hanoin saida

“Uluk, kuandu haʼu iha eskola sekundária, kolega eskola feto ida tuir reuniaun ba dala balu, no nia gosta tebes atu haree katak ema ho idade oioin tuur no estuda hamutuk. Foin daudaun, haʼu-nia patraun tuir reuniaun, no nia admira kuandu haree katak ita loke beibeik ita-nia Bíblia. Kuandu haree katak nia hafolin tebes ita-nia reuniaun, neʼe book haʼu rasik atu hafolin liután reuniaun!”—Jessica.

“Reuniaun ajuda haʼu atu para hanoin kona-ba problema moris nian no mós la laran-susar. Iha reuniaun, ita aprende oinsá atu iha moris neʼebé kontente, sai ema neʼebé diʼak liu, no buat seluk tan. Depois fila husi reuniaun, haʼu sempre sente laran-manas no kmaan.”—Timothy.

“Mane ida neʼebé haʼu konvida tuir reuniaun hatete: ‘Haʼu tuir reuniaun atu prova katak Testemuña nia fiar mak sala. Maibé ikusmai haʼu hatene katak haʼu-nia fiar mak sala!’ Mane neʼe mós hakfodak ho Jeová nia povu nia hahalok neʼebé hadomi malu. Nia hatete: ‘Maski haʼu foin mak hasoru imi, imi hatudu domin mai haʼu hanesan imi koñese haʼu ba tinan barak ona!’”—Jacob.

“Uluk dala ruma, haʼu hanoin: ‘Depois reuniaun remata, haʼu sei fila kedas.’ Maibé durante reuniaun, sentimentu neʼe lakon tiha. Depois reuniaun, haʼu koʼalia ba ema sira no haʼu haluha tanbasá ohin haʼu hanoin atu fila kedas. Reuniaun mak loke dalan mai haʼu atu iha belun sira.”—Madison.

a Atu hetan informasaun liután kona-ba Reuniaun-Fatin, klik pájina “Reuniaun sira” no klik “Buka reuniaun-fatin neʼebé besik Ita-nia área”.