Bíblia—Livru neʼebé fó sai profesia ho loloos, Parte 1

“Haʼu sei halo ó sai nasaun boot ida”

Livru “Matan-moris bá!” fó sai série ida neʼebé fahe ba parte ualu atu esplika kona-ba buat ida neʼebé úniku tebes husi Bíblia. Neʼe mak profesia. Informasaun sira-neʼe sei ajuda Ita atu hatán ba pergunta hanesan: Ema mak inventa deʼit profesia sira husi Bíblia, ka neʼe mai husi Maromak? Mai ita haree didiʼak evidénsia sira.

ATITUDE ida neʼebé ohin loron ema barak hatudu mak dúvida no lakohi fiar ba buat ida. Tan neʼe ema barak iha dúvida kona-ba Bíblia. Triste mak ema barak la fahe tempu atu estuda didiʼak no buka evidénsia. Sira forma sira-nia ideia hodi bazeia deʼit ba buat neʼebé ema seluk hatete. Ami espera katak Ita la hanesan neʼe. Se Ita hakarak buka evidénsia, mai ita halo viajen ba tempu pasadu no buka-hatene faktu sira neʼebé hatudu katak Bíblia fó sai informasaun neʼebé loos.

Ita-nia viajen komesa ho mane Ebreu ida neʼebé ema barak respeitu, inklui ema Kristaun, Judeu, no Izlaun. Nia moris iha tinan 2018 AEC toʼo 1843 AEC.a Ninia naran mak Abraão.b

Abraão mak ema ida neʼebé importante ba profesia antigu sira iha Bíblia, tanba profesia sira-neʼe kona mós ita ohin loron. (Haree kaixa “Bensaun ba ‘nasaun sira hotu’”.) Tuir livru Génesis, profesia sira-neʼe inklui: (1) Abraão nia jerasaun sei sai nasaun boot ida. (2) Durante prosesu atu sai nasaun boot ida, sira sei sai atan iha rai seluk. (3) Ikusmai sira sei sai livre no tama ba rai-Kanaan. Mai ita haree didiʼak kona-ba profesia tolu neʼe.

Profesia tolu neʼebé sai loos

Profesia 1: “Haʼu sei halo ó [Abraão] sai nasaun boot ida.”​—Génesis 12:2.

Sai loos: Abraão nia jerasaun neʼebé mai husi Isaac no Jacob (naran seluk mak Izraél) ikusmai sai nasaun Izraél antigu neʼebé iha liurai rasik.

Evidénsia mak saida:

● Bíblia konta istória barak kona-ba Abraão no ninia liña jerasaun neʼebé mai husi Isaac, Jacob, no Jacob nia oan-mane naʼin-12. Liña jerasaun neʼe inklui liurai sira neʼebé ukun nasaun Izraél ka Judá. Husi liurai sira-neʼe, naʼin-17 nia naran mak fó sai iha dokumentu antigu sira neʼebé arkeólogu sira hetan, no informasaun sira-neʼe apoia duni Bíblia nia istória kona-ba oinsá Abraão nia jerasaun liuhusi Isaac no Jacob sai nasaun ida.c

Profesia 2: “Ó-nia [Abraão nia] bei-oan sei sai ema estranjeiru iha rai neʼebé laʼós sira-nian, no ema iha neʼebá sei halo sira sai atan . . . Maibé iha jerasaun haat, ó-nia bei-oan sira sei fila fali mai iha neʼe.”​—Génesis 15:13, 16.

Sai loos: Tanba rai-hamlaha mosu iha Kanaan, Abraão nia bei-oan sira muda ba Ejitu no hela iha neʼebá toʼo jerasaun haat, foufoun nuʼudar ema estranjeiru, maibé ikusmai sai atan neʼebé halo bloku husi rai-mean no duʼut-maran. Mai ita hanoin kona-ba ema ida husi Abraão nia jerasaun. Neʼe mak Levi, nia muda ba Ejitu hamutuk ho ninia aman neʼebé idade ona. Jerasaun haat husi Levi mak (1) Levi, (2) ninia oan Kohat, (3) Kohat nia oan Amram, no (4) Amram nia oan Moisés. (Éxodo 6:16, 18, 20) Iha tinan 1513 AEC, Moisés lori ema Izraél sai husi Ejitu.​—Haree liña tempu iha kraik no kaixa “Tempu neʼebé sura ho didiʼak”

Evidénsia mak saida:

● Profesór James K. Hoffmeier neʼebé estuda arkeolojia iha Bíblia nia tempu hatete katak ema Ejitu nia dokumentu no sasán antigu sira neʼebé arkeólogu sira hetan hatudu katak ema Ejitu fó lisensa ba Sem nia jerasaun (inklui ema Ebreu) atu tama sira-nia rai hamutuk ho animál-hakiak durante tempu rai-hamlaha. Maibé ema Izraél ikusmai sai atan duni iha Ejitu no halo bloku ka lae?

● Maski ema Ejitu nia dokumentu antigu sira la temi kedas kona-ba ema Izraél, maibé dezeñu iha ema Ejitu nia rate no surat-tahan lulun sira hatudu katak sira uza ema estranjeiru atu halo bloku husi rai-mean no duʼut-maran. Hodi tuir Bíblia, ema Ejitu nia sasán antigu sira mós hatudu katak xefe sira hakerek nota kona-ba bloku hira mak sira-nia atan prodús. (Éxodo 5:14, 19) Profesór James K. Hoffmeier dehan: “Ema Ejitu nia sasán antigu sira hatudu katak sira obriga ema estranjeiru atu halo serbisu . . . durante tempu neʼebé ema Izraél hasoru susar. Konkluzaun mak ema Ebreu antigu muda duni ba rai-Ejitu . . . durante rai-hamlaha no ikusmai sai atan.”

Profesia 3: “Haʼu sei fó rai-Kanaan tomak ba . . . ó-nia bei-oan sira.”​—Génesis 17:8.

Sai loos: Maski Moisés dirije nasaun Izraél sai husi Ejitu, Nun nia oan-mane Josué mak lori povu tama ba rai-Kanaan iha tinan 1473 AEC.

Evidénsia mak saida:

● Arkeólogu sira iha hanoin la hanesan kona-ba tempu neʼebé ema Izraél tama ba Kanaan. Maibé profesór K. A. Kitchen neʼebé estuda kona-ba Ejitu antigu, dehan: “Ita bele konkorda katak ema Izraél tama duni ba rai-Kanaan no hela iha neʼebá.”

● Bíblia konta katak Josué “sunu sidade Hazor [neʼe mak ema Kanaan nia sidade ida]”. (Josué 11:10, 11) Bainhira arkeólogu sira keʼe rai no hetan sidade antigu neʼe, sira hetan ema Kanaan nia templu tolu neʼebé rahun ona. Sira mós hetan evidénsia katak ema sunu sidade neʼe maizumenus entre tinan 1400 toʼo 1300 AEC. Faktu sira-neʼe apoia duni buat neʼebé Bíblia hatete.

● Ema Kanaan nia sidade ida seluk mak Gibeão, neʼebé maizumenus besik kilómetru 10 husi Jeruzalein. Arkeólogu sira identifika sidade neʼe bainhira sira hetan buli nia tilun hamutuk 30 neʼebé bahat sidade neʼe nia naran. La hanesan ho ema iha Hazor, ema Gibeão halo dame ho Josué, no Josué fó knaar ba sira atu “kuru bee”. (Josué 9:3-7, 23) Tanbasá Josué fó knaar hanesan neʼe ba sira? 2 Samuel 2:13 no Jeremias 41:12 hatudu katak sidade Gibeão iha kolan ho bee barak. Archaeological Study Bible, New International Version dehan: “Buat neʼebé kapás liu kona-ba Gibeão mak sidade neʼe iha bee barak, iha bee-matan boot ida no bee-matan kiʼik hitu.”

● Dokumentu antigu oioin temi ema barak nia naran neʼebé hakerek iha Bíblia. Lista ba naran neʼe inklui liurai naʼin-17 husi Abraão nia jerasaun neʼebé ukun nasaun Izraél ka Judá. Sira balu mak Acab, Acaz, David, Ezequias, Manasés, no Uzias. Ida-neʼe fó prova katak nasaun Izraél tama duni ba rai-Kanaan no hela iha fatin neʼe.

● Iha tinan 1896, peskizadór sira hetan Fatuk-Bahat Merneptá iha Tebas iha Ejitu. Fatuk neʼe fó sai kona-ba Faraó Merneptá nia kampaña militár atu tama rai-Kanaan maizumenus iha tinan 1210 AEC. Neʼe mak sasán antigu liu neʼebé temi kona-ba Izraél hodi apoia katak nasaun Izraél iha duni.

Informasaun espesífiku lori benefísiu mai ita

Hanesan ita haree ona, Bíblia fó sai informasaun espesífiku barak kona-ba ema, fatin, no akontesimentu sira. Informasaun sira-neʼe ajuda ita atu kompara Bíblia ho informasaun seluk neʼebé laʼós mai husi Bíblia, hodi ita bele hatene ho loloos oinsá mak profesia sira iha Bíblia sai loos. Kona-ba Abraão no ninia jerasaun, evidénsia sira hatudu katak Maromak nia promesa sira sai loos duni. Abraão nia jerasaun sai nasaun ida, sira sai atan iha Ejitu, no depois sira hela iha rai-Kanaan. Buat sira-neʼe hotu fó-hanoin ita kona-ba apóstolu Pedro nia liafuan, neʼebé dehan: “Profesia la fó sai husi ema nia hakarak, maibé ema koʼalia liafuan husi Maromak tanba espíritu santu book sira atu fó sai liafuan sira-neʼe.”​—2 Pedro 1:21.

Durante tinan atus ba atus depois nasaun Izraél tama ba rai-Kanaan, nasaun Izraél iha mudansa boot neʼebé lori konsekuénsia aat tebes. Maibé kona-ba ida-neʼe mós Bíblia fó sai nanis ona. Mai ita haree informasaun tuirmai.

[Nota-rodapé]

[Kaixa]

BENSAUN BA “NASAUN SIRA HOTU”

Maromak promete katak ema iha “nasaun sira hotu” sei hetan bensaun liuhusi Abraão nia jerasaun. (Génesis 22:18) Razaun importante tanbasá Maromak forma nasaun ida husi Abraão nia jerasaun mak atu loke dalan ba Mesias neʼebé sei fó ninia moris ba ema hotu.d Tan neʼe, Maromak nia promesa ba Abraão sei kona mós Ita! João 3:16 hatete: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.”

[Nota-rodapé]

[Kaixa]

TEMPU NEʼEBÉ SURA HO DIDIʼAK

Ezemplu ida kona-ba tempu neʼebé sura ho didiʼak iha Bíblia mak fó sai iha 1 Reis 6:1, neʼebé temi kona-ba tempu neʼebé Liurai Salomão sei komesa harii templu iha Jeruzalein. Eskritura neʼe dehan: “Iha tinan haat husi tempu neʼebé Salomão sai liurai ba rai-Izraél, iha fulan-Ziv, neʼe katak fulan-segundu, tinan 480 [tinan 479 kompletu] husi tempu neʼebé ema Izraél sai husi rai-Ejitu, Salomão komesa harii Jeová nia uma.”

Tuir Bíblia nia kronolojia, tinan 4 husi Salomão nia ukun mak tinan 1034 AEC. Hodi sura ba kotuk tinan 479, ita sei toʼo iha tinan 1513 AEC, tinan neʼebé ema Izraél sai husi rai-Ejitu.

[Kaixa]

ABRAÃO NIA ISTÓRIA LAʼÓS INVENTA DEʼIT

● Fatuk bahat antigu sira (maizumenus husi tinan 3.800 liubá) neʼebé arkeólogu sira hetan fó sai sidade sira neʼebé hanesan deʼit ho Abraão nia família nia naran. Sidade sira-neʼe inklui Peleg, Serug, Naor, Tera no ­Haran.​—Génesis 11:17-32.

● Tuir Génesis 11:31, Abraão no ninia família sai husi “Ur, ema Kaldeia nia rai”. Arkeólogu sira hetan sidade Ur iha parte sudeste iha rai-Irake. Bíblia mós fó sai katak Abraão nia aman Tera mate iha sidade Haran, neʼebé karik iha rai-Turkia, no Abraão nia feen Sara mate iha Hebron. Hebron mak sidade ida iha Médiu Oriente neʼebé antigu liu, neʼebé ema sei kontinua hela toʼo ohin loron.​—Génesis 11:32; 23:2.

[Tabela]

LIÑA TEMPU BA ABRAÃO NIA JERASAUN NO IZRAÉL SAI HUSI EJITU

Jerasaun haat husi Abraão nia liña jerasaun

Levi

Kohat

Amram

Moisés

(AEC)

1843 Abraão mate

1728 Jacob no ninia família muda ba Ejitu

1711 Jacob mate

1657 José mate

1593 Moisés moris

1513 Moisés dirije ema Izraél sai husi Ejitu

1473 Moisés mate. Josué dirije ema Izraél tama ba rai-Kanaan

Juís sira-nia tempu

1117 Samuel hili Saul nuʼudar Izraél nia liurai primeiru

1107 David moris

1070 David sai liurai ba Izraél

1034 Salomão komesa harii templu

[Dezeñu]

Iha monumentu Stela vitória, iha liafuan “David nia uma” neʼebé bahat iha neʼe, neʼe mak evidénsia neʼebé temi katak liurai sira neʼebé ukun iha Izraél ka Judá mai husi Abraão nia jerasaun

[Credit Line]

© Israel Museum, Jerusalem/The Bridgeman Art Library International