Hahalok diskriminasaun dala barak hahú husi informasaun neʼebé la loos. Haree toʼok ezemplu tuirmai:
Ema balu hanoin sala katak feto labele halo serbisu tékniku nian.
Ema balu hanoin katak estranjeiru sira mak hadau sira-nia serbisu.
Ema barak hanoin sala katak ema hotu neʼebé aleijadu ka iha defisiente hanoin sira-nia an la iha folin.
Ema neʼebé fiar ba hanoin sira hanesan neʼe, dala ruma buka ezemplu sira ka evidénsia neʼebé haree hanesan apoia sira-nia hanoin. No sira dehan katak ema neʼebé la konkorda ho sira-nia hanoin mak ema beik.
Neʼe katak sá? Se ita la hatene faktu neʼebé loos, ita sei halo desizaun neʼebé la diʼak. Se ita fiar liu ba istória neʼebé la loos, ita sei diskrimina ema.
Tanbasá diʼak atu buka-hatene faktu sira
Se ita hatene informasaun neʼebé loos kona-ba ema seluk, ita sei la tau fiar ba lia-bosok neʼebé ema seluk konta kona-ba sira. No bainhira ita rekoñese katak hanoin negativu ruma kona-ba grupu ruma mak la loos, ita sei la lalais atu fiar buat negativu ruma neʼebé ema konta kona-ba grupu sira seluk.
Saida mak Ita bele halo
Bainhira ema dehan katak grupu ida mak la diʼak, hanoin-hetan katak laʼós ema ida-idak husi grupu neʼe mak hanesan neʼe.
Rekoñese katak ita la hatene informasaun hotu kona-ba ema seluk.
Koko buka-hatene faktu husi informasaun neʼebé bele tau fiar.