Habelun ho ema oioin

Problema

Se ita hadook an husi ema neʼebé ita haree iha dalan negativu, karik ita sei diskrimina ema liután. No se ita ransu deʼit ho ema neʼebé hanesan ho ita, karik ita sei komesa sente katak ita-nia dalan atu hanoin ka halo buat ruma mak loos liu fali ema seluk nian.

Bíblia nia prinsípiu

‘Loke luan imi-nia laran bá.’​—2 KORINTO 6:13.

Neʼe katak sá? Ita-nia “laran” bele refere ba ita-nia emosaun sira. Se ita gosta deʼit ema neʼebé hanesan ho ita, ita labele loke laran ba ema seluk. Atu ida-neʼe la akontese, ita tenkesér prontu atu habelun ho ema neʼebé la hanesan ho ita.

Tanbasá diʼak atu habelun ho ema oioin?

Bainhira ita koñese didiʼak ema ruma, ita komesa komprende tanbasá sira-nia hahalok la hanesan ho ita-nian. No nuʼudar ita sai besik liu ba sira, ita komesa haree katak diferensa sira-neʼe laʼós buat neʼebé importante. Ita sei hafolin sira, no ita sei sente sira-nia kontente no triste.

Hanoin toʼok feto ida naran Nazaré nia ezemplu. Uluk nia la gosta imigrante sira. Nia esplika saida mak ajuda nia: “Haʼu gasta tempu ho sira no serbisu ho sira. Haʼu haree katak sira la hanesan duni ho buat neʼebé ema koʼalia. Bainhira ita habelun ho ema husi kultura neʼebé la hanesan, ita aprende atu la tesi-lia ba sira, no ita haburas domin ba sira no hafolin sira.”

Saida mak Ita bele halo

Buka oportunidade atu koʼalia ho ema husi rai, rasa, ka língua neʼebé la hanesan ho ita. Ita bele

• Husu sira atu konta kona-ba sira-nia an.

• Konvida sira han hamutuk.

• Rona didiʼak ba buat neʼebé sira konta no buka-hatene saida mak importante ba sira.

Se ita koko atu komprende buat neʼebé sira hasoru iha sira-nia moris, ita bele komprende sira liután no neʼe sei ajuda ita atu hanoin pozitivu kona-ba sira-nia grupu.