Hanorin neʼebé fó esperansa mai ita

Maromak sei halakon ema aat sira

“Bainhira ema aat sira sai buras hanesan duʼut no ema hotu neʼebé halo sala sai barak, neʼe akontese atu sira lakon ba nafatin.”—SALMO 92:7.

Hanesan ita aprende ona iha informasaun antes neʼe, buat aat aumenta barak liután. Maski nuneʼe, ita la hakfodak tanba Bíblia fó-hatene nanis ona iha 2 Timóteo 3:1-5 katak durante “loron ikus sira” ema nia hahalok sei sai aat tebes. Neʼe mak loron ikus ba saida? Loron ikus ba ema neʼebé la halo tuir Maromak. Lakleur tan, Maromak sei halakon ema neʼebé lakohi troka sira-nia hahalok aat. Tuirmai, ema neʼebé halo tuir Maromak deʼit mak sei hela iha mundu. “Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:29.

Maromak sei halakon Satanás

“Maromak neʼebé fó dame sei harahun Satanás.”—ROMA 16:20.

Kuandu Satanás, anju aat sira, no ema aat sira lakon tiha, mundu neʼe sei nakonu ho dame. Ita-nia Kriadór promete: ‘Sei la iha ema ida mak halo imi taʼuk.’—Miqueias 4:4.

Maromak sei halakon moras no mate

“Maromak nia tenda hamutuk ho ema . . . Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.”—APOKALIPSE 21:3, 4.

Maromak sei halakon terus no moras hodi hadiʼa buat aat hotu neʼebé mosu tanba Satanás, Adão ho Eva, no mós tanba ita ema la perfeitu. Rezultadu mak “mate sei la iha tan”. Ema neʼebé hadomi no halo tuir ita-nia Kriadór sei moris ba nafatin. Maibé sira sei hela iha neʼebé?

Ita-nia Kriadór sei halo mundu neʼe sai paraízu

“Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—ISAIAS 35:1.

Kuandu Maromak halakon tiha buat aat hotu, mundu sei sai paraízu! Ema sei haksolok ho jardín neʼebé furak no toʼos neʼebé prodús ai-han barak. (Salmo 72:16) Tasi, lagoa no mota sira sei sai moos no nakonu ho kriatura sira. No ema sei la temi tan liafuan “poluisaun”! Ema hotu sei harii sira-nia uma rasik no hela iha laran. La iha tan hamlaha no kiak.—Isaias 65:21, 22.

Maromak sei halo ema neʼebé mate ona moris-hiʼas fali

“Maromak sei fó moris-hiʼas.”—APÓSTOLU 24:15.

Ita hakarak hasoru fali família ka belun neʼebé mate ona ka lae? Maromak aas liu hotu sei halo sira moris-hiʼas fali iha mundu Paraízu. Ita sei rekoñese sira, no sira mós sei rekoñese Ita. Imajina toʼok Ita no sira sei kontente tebes! Oinsá mak ita bele fiar katak neʼe sei sai loos? Tanba Bíblia fó ezemplu balu kona-ba ema boot no labarik sira neʼebé Maromak halo sira moris-hiʼas no hamutuk fali ho sira-nia família. Jesus mós fó moris-hiʼas ba ema balu neʼebé mate ona iha ema barak nia oin.—Lucas 8:49-56; João 11:11-14, 38-44.