Oinsá mak ita bele hanoin-hetan informasaun sira?

MAROMAK JEOVÁ kria ema nia kakutak ho kbiit atu hanoin-hetan informasaun sira. Nia halo ema nia kakutak hodi rai-hela informasaun neʼebé ema bele foti fali se sira presiza, no informasaun neʼe nunka sai nakonu iha ita-nia kakutak. Maromak kria ema nia kakutak tuir duni ninia hakarak, neʼe mak atu ema moris ba nafatin.—Salmo (Mazmur) 139:14; João 17:3.

Maibé karik ita sente katak buat barak neʼebé ita hatama iha ita-nia kakutak lakon hotu no la bele hetan kuandu ita presiza. Entaun, saida mak ita bele halo atu ajuda ita hanoin-hetan informasaun sira?

Hatudu interese

Atu hanoin-hetan buat ruma, ita presiza duni atu hatudu interese. Se ita iha toman atu haree didiʼak ba buat ruma, hatudu interese ba ema no ba buat neʼebé akontese haleʼu ita, ida-neʼe sei book duni ita-nia neon. Tuirmai, ida-neʼe sei halo fasil ba ita atu hatudu interese kuandu ita lee ka rona buat ruma neʼebé iha folin-boot.

Tuir loloos, dala barak susar atu hanoin-hetan ema nia naran. Maibé, nuʼudar ema kristaun, ita hatene katak ema seluk mak importante, hanesan ita-nia maluk kristaun, ema neʼebé ita haklaken bá, no ema seluk neʼebé ita hasoru beibeik nuʼudar ita halaʼo ita-nia atividade loroloron nian. Entaun, saida mak bele ajuda ita atu hanoin-hetan sira neʼebé ita tenke hatene sira-nia naran? Apóstolu Paulo temi ema naʼin-26 nia naran iha ninia karta neʼebé nia hakerek ba kongregasaun ida. Ita bele hatene katak nia hatudu interese ba sira tanba nia la temi deʼit sira-nia naran, maibé nia mós temi buat diʼak neʼebé sira halo. (Roma 16:3-16) Ohin loron, katuas área nian barak neʼebé vizita kongregasaun sira, hakaʼas an duni atu hanoin-hetan ema nia naran, maski semana-semana sira muda husi kongregasaun ida ba kongregasaun seluk. Saida mak ajuda sira? Karik sira hakaʼas an atu uza ema nia naran beibeik kuandu sira koʼalia ho ema neʼe. Sira hakaʼas an atu hanoin-hetan ema nia oin no naran. Liután neʼe, sira uza tempu hamutuk ho ema ida-idak hodi haklaken no han hamutuk. Kuandu ita hasoru ema ida, ita sei hanoin-hetan ema neʼe nia naran ka lae? Buat neʼebé bele ajuda ita mak hodi hanoin kona-ba razaun tansá ita lakohi atu haluha ema neʼe nia naran; depois neʼe koko atu halo tuir buat neʼebé foin temi iha leten.

Importante mós atu hanoin-hetan buat neʼebé ita lee. Saida mak bele ajuda ita atu halo ida-neʼe? Ita bele hanoin-hetan informasaun ruma se ita gosta informasaun neʼe no buka atu komprende. Sin, atu tau ita-nia atensaun tomak ba buat neʼebé ita lee, ita presiza gosta ida-neʼe. Susar atu rai-hela informasaun ruma se ita-nia hanoin iha fatin seluk kuandu ita koko atu lee. Ita bele komprende liután se ita liga informasaun neʼe ho buat neʼebé ita hatene ona ka buat neʼebé ita aprende ona. Husu ba ita-nia an: ‘Oinsá no bainhira mak haʼu presiza halo tuir informasaun neʼe iha haʼu-nia moris? Oinsá mak haʼu bele uza ida-neʼe atu ajuda ema seluk?’ Atu komprende liután buat neʼebé ita lee, diʼak atu lee liafuan balu hamutuk, laʼós nuʼudar liafuan ida-idak. Ida-neʼe sei ajuda ita komprende ho klaru ideia ruma, hatene pontu importante, no sei halo fasil ba ita atu hanoin-hetan.

Uza tempu atu hanoin fali

Matenek-naʼin sira kona-ba edukasaun dehan katak importante duni atu hanoin fali informasaun ruma. Iha profesór ida nia relatóriu, nia hatudu katak hodi uza minutu ida deʼit atu hanoin fali informasaun neʼebé ita foin lee, ita sei hanoin-hetan informasaun barak liután. Entaun, depois ita lee tiha informasaun ruma, koko atu hanoin fali informasaun sira-neʼe iha ita-nia neon hodi ita bele rai-hela ida-neʼe. Hanoin kona-ba oinsá mak ita bele esplika informasaun foun neʼe tuir ita-nia liafuan rasik. Hodi hanoin fali informasaun ruma depois ita lee, ida-neʼe sei ajuda ita atu hanoin-hetan ba tempu kleur.

No iha loron sira tuirmai, buka oportunidade atu hanoin fali kona-ba buat neʼebé ita lee hodi fahe informasaun neʼe ba ema seluk. Karik ita bele fahe ida-neʼe ba ita-nia família, ema iha kongregasaun, ita-nia maluk serbisu, kolega eskola, viziñu, ka ema neʼebé ita hasoru iha serbisu haklaken. Koko atu fahe ba sira laʼós deʼit informasaun, maibé eskritura neʼebé apoia informasaun neʼe. Hodi halo nuneʼe, ida-neʼe sei ajuda ita atu hanoin-hetan buat neʼebé importante, no ida-neʼe mós sei ajuda ema seluk.

Hanoin kleʼan kona-ba buat neʼebé importante

Sin, diʼak atu hanoin fali informasaun neʼebé ita lee no fó-hatene ema seluk kona-ba neʼe. Maibé atu hetan buat diʼak husi buat neʼebé ita lee, diʼak atu hanoin kleʼan kona-ba informasaun neʼebé importante. Hakerek-naʼin Bíblia nian naran Asaf no David halo nuneʼe duni. Asaf dehan: “Haʼu sei hanoin-hetan Jah nia serbisu sira; haʼu sei hanoin-hetan Ita-nia hahalok furak husi tempu uluk. No haʼu sei hanoin kleʼan kona-ba Ita-nia serbisu hotu, no sei hanoin beibeik kona-ba Ita-nia hahalok sira.” (Salmo [Mazmur] 77:11, 12) David mós hakerek dehan: “Haʼu sei hanoin kleʼan kona-ba Ita iha kalan”, no “haʼu hanoin fali kona-ba loron sira husi tempu uluk; haʼu hanoin kleʼan kona-ba Ita-nia hahalok hotu”. (Salmo [Mazmur] 63:6; 143:5) Ita rasik mós halo ida-neʼe ka lae?

Bainhira ita hanoin kleʼan kona-ba buat neʼebé Jeová halo, ninia hahalok sira, no ninia hakarak, neʼe sei ajuda ita atu hanoin-hetan buat barak. Liután neʼe, se ita haburas toman atu hanoin kleʼan, ida-neʼe sei ajuda ita atu rai buat importante iha ita-nia laran. Ida-neʼe sei book ita-nia laran no hadiʼa ita. Buat neʼebé ita rai-hela iha ita-nia neon sei troka ita-nia laran.—Salmo (Mazmur) 119:16.

Ajuda husi Maromak nia espíritu

Ita mós bele simu ajuda atu hanoin-hetan lia-loos kona-ba Maromak Jeová nia hahalok sira no kona-ba buat neʼebé Jesus Kristu koʼalia ona. Iha kalan ikus antes Jesus mate, nia fó-hatene ba ninia dixípulu sira: “Kuandu haʼu hamutuk ho imi, haʼu koʼalia buat sira-neʼe ba imi. Maibé ajuda-naʼin neʼe, katak espíritu santu neʼebé Aman sei haruka ba imi hodi haʼu-nia naran, espíritu neʼe sei hanorin imi buat hotu no halo imi hanoin-hetan fali buat hotu neʼebé haʼu hatete ona ba imi.” (João 14:25, 26) Mateus no João mós hamutuk ho dixípulu sira seluk kuandu Jesus koʼalia liafuan sira-neʼe. Entaun, espíritu santu sai duni nuʼudar ajuda-naʼin ba sira ka lae? Loos duni! Maizumenus tinan ualu depois neʼe, Mateus hakerek istória primeiru kona-ba Kristu nia moris, neʼe inklui diskursu furak neʼebé Jesus hatoʼo iha foho ida, no mós kona-ba sinál neʼebé hatudu katak Kristu toʼo ona mai no mundu aat neʼe sei lakon. Tinan 65 depois Jesus mate, apóstolu João hakerek ninia Evanjellu, neʼebé inklui istória kompletu kona-ba saida mak Jesus dehan ba ninia apóstolu sira iha kalan ikus antes nia entrega ninia moris. Klaru katak, Mateus no João hanoin-hetan buat neʼebé Jesus dehan no halo kuandu nia hamutuk ho sira, maibé espíritu santu mak ajuda duni sira atu la bele haluha buat importante ruma neʼebé Jeová hakarak atu sira hakerek iha ninia Liafuan.

Ohin loron, espíritu santu sei sai nuʼudar ajuda-naʼin ba Maromak nia atan sira ka lae? Loos duni! Maski espíritu santu sei la tau iha ita-nia neon buat neʼebé ita seidauk aprende, maibé espíritu neʼe bele sai nuʼudar ajuda-naʼin hodi halo ita hanoin fali buat importante neʼebé ita aprende ona. (Lucas 11:13; 1 João 5:14) No kuandu presiza, espíritu neʼe sei book ita-nia neon hodi “hanoin-hetan liafuan sira neʼebé uluk koʼalia liuhusi profeta santu sira no mós hanoin-hetan mandamentu husi Naʼi no Salvadór”.—2 Pedro 3:1, 2.

‘Imi keta haluha’

Maromak Jeová fó avizu beibeik ba ema Izraél hodi dehan: ‘Imi keta haluha.’ Neʼe laʼós katak Maromak hakarak sira atu hanoin-hetan buat hotu ho didiʼak. Maibé nia hakarak sira atu la hanoin demais hodi buka sira-nia hakarak rasik toʼo haluha tiha buat neʼebé Jeová halo ona ba sira. Sira presiza hanoin nafatin oinsá mak Jeová salva sira kuandu ninia anju oho ema Ejitu nia oan-mane primeiru no mós kona-ba oinsá mak Jeová fahe Tasi Mean no tuirmai taka fali, hodi halo liurai Ejitu no ninia tropa sira mout iha tasi. Ema Izraél sira tenke hanoin-hetan katak Maromak fó Ukun-Fuan ba sira iha Foho Sinai no tuirmai lori sira hodi laʼo liuhusi rai-maran toʼo ba rai neʼebé Maromak promete. Sira labele haluha kona-ba neʼe, ida-neʼe katak buat sira-neʼe tenke kona sira-nia moris loroloron nian.—Deuteronômio (Ulangan) 4:9, 10; 8:10-18; Êxodo (Keluaran) 12:24-27; Salmo (Mazmur) 136:15.

Ita mós tenke hakaʼas an atu labele haluha buat neʼebé Jeová halo. Nuʼudar ita tahan hasoru susar sira neʼebé mosu iha ita-nia moris, ita presiza hanoin-hetan Jeová, hanoin-hetan kona-ba nia mak Maromak oinsá no mós kona-ba domin neʼebé nia hatudu ona hodi fó nia Oan-Mane, neʼebé fó nia moris ba ita hodi hamoos ita-nia sala atu nuneʼe ita bele hetan moris ba nafatin. (Salmo [Mazmur] 103:2, 8; 106:7, 13; João 3:16; Roma 6:23) No hodi lee Bíblia beibeik, fó komentáriu iha reuniaun kongregasaun nian no haklaken beibeik, ida-neʼe sei ajuda ita atu hanoin-hetan nafatin lia-loos furak sira-neʼe.

Kuandu ita presiza halo desizaun ruma, maski ida-neʼe mak kiʼik ka boot, diʼak atu hanoin-hetan fali lia-loos importante sira-neʼe, no husik neʼe atu book ita-nia hanoin. Keta haluha atu buka Jeová nia matadalan sira. Duké haree problema sira-neʼe tuir deʼit hanoin isin nian, diʼak atu husu ba ita-nia an: ‘Konsellu ka matadalan saida husi Maromak nia Liafuan mak kona haʼu-nia desizaun neʼe?’ (Provérbios [Amsal] 3:5-7; 28:26) Ita sei la hanoin-hetan buat neʼebé ita seidauk lee ka rona. Maibé, nuʼudar ita aumenta ita-nia matenek no domin ba Jeová, Maromak nia espíritu bele ajuda ita hanoin-hetan buat neʼebé ita aprende, no ita-nia domin ba Jeová sei book ita atu halo tuir ninia matadalan sira.