Eskola neʼebé fó treinu ba ita nuʼudar diskursu-naʼin no mestre

MASKI ita mak joven hela ka idade ona, feto ka mane, eskola neʼe sei ajuda duni ita atu fó sai ita-nia hanoin iha dalan neʼebé diʼak no mós aumenta ita-nia matenek nuʼudar mestre diʼak ba Maromak nia Liafuan.

Katuas eskola nian mak sei fahe knaar ba sira neʼebé hola parte iha Eskola Serbisu Kristaun nian. Iha pájina tolu tuirmai, ita sei haree lista ba pontu konsellu nian. Númeru antes pontu ida-idak hatudu kona-ba lisaun sira. Iha lisaun neʼe, ita sei hetan esplikasaun kona-ba saida deʼit mak inklui iha pontu konsellu neʼe no tansá mak pontu sira-neʼe importante. Ita mós bele haree matadalan diʼak hodi ajuda ita atu kumpre pontu konsellu ba lisaun neʼebé ita simu.

Fatin neʼebé iha kór iha lista ba pontu konsellu nian hatudu pontu neʼe uza ba knaar saida, hanesan (1) lee iha ema nia oin, (2) diskursu neʼebé hanesan drama kiʼik neʼebé ema naʼin-rua ka liu koʼalia ba malu, ka (3) diskursu ba kongregasaun. Katuas eskola nian mak sei deside kona-ba pontu konsellu neʼebé ita presiza halo. Diʼak liu atu halo pontu konsellu sira-neʼe ida ba ida. Ita sei hetan buat diʼak hodi halo tuir treinu iha lisaun sira-nia rohan. Se ita hatudu katak ita kumpre didiʼak matadalan iha lisaun neʼe, katuas eskola nian sei haruka ita atu muda fali ba lisaun seluk.

Se ita-nia knaar mak atu hatoʼo diskursu neʼebé hanesan drama kiʼik, ita presiza hili situasaun ida. Lista iha pájina 82 bele ajuda ita. Maibé neʼe la dehan katak ita la bele hili situasaun seluk. Katuas eskola nian karik sei husu ita atu uza situasaun ida hodi ita bele hetan esperiénsia, ka nia mós bele husik ita atu hili rasik situasaun neʼebé ita hakarak.

Lee livru neʼe no halo treinu sira iha lisaun nia rohan. Ita bele halo ida-neʼe maski ita la iha knaar iha eskola tanba buat sira-neʼe bele duni ajuda ita atu laʼo ba oin. Porezemplu, karik ita bele estuda no halo treinu ba pontu konsellu ida ka liu semana-semana.

Maski ita kleur ona ka foin hola parte iha eskola neʼe ka iha serbisu haklaken, maibé ita hotu bele kontinua laʼo ba oin. Ami hein katak ita sei hetan buat diʼak husi Eskola Serbisu Kristaun nian.