Hatais no hadiʼa an

DALAN neʼebé ita hatais no hadiʼa an bele hatudu ita ema oinsá. Maski Jeová haree ba ema nia laran, maibé baibain ema tesi lia husi “buat neʼebé matan bele haree”. (1 Samuel 16:7) Se ita hadiʼa an iha dalan neʼebé moos no kabeer, ema seluk sei hatene katak ita respeitu ita-nia an no neʼe bele book sira atu rona ba ita. Kuandu ita hatais ho diʼak, neʼe sei lori naran diʼak ba organizasaun neʼebé ita reprezenta no ita-nia rona-naʼin bele iha hanoin neʼebé diʼak kona-ba Maromak neʼebé ita adora.

Matadalan atu halo tuir. Maski Bíblia la iha ukun-fuan barak kona-ba hatais no hadiʼa an, maibé Bíblia iha matadalan neʼebé bele ajuda ita foti desizaun neʼebé diʼak. No buat neʼebé importante liu mak “halo buat hotu-hotu ba Maromak nia glória”. (1 Korinto 10:31) Matadalan saida deʼit mak kona dalan neʼebé ita hatais no hadiʼa an?

1. Bíblia hatudu katak Maromak hakarak ita-nia isin no hatais moos nafatin. Jeová fó Ukun-Fuan ba Izraél kona-ba oinsá atu moos nafatin. Porezemplu, kuandu amlulik sira halaʼo hela sira-nia knaar, sira presiza hariis no fase sira-nia roupa tuir tempu neʼebé nia fó sai ona. (Levítico [Imamat] 16:4, 24, 26, 28) Maski ema kristaun sira la tuir ona Moisés nia Ukun-Fuan, maibé matadalan husi Ukun-Fuan neʼe sei vale nafatin. (João 13:10; Apokalipse 19:8) Kuandu ita tuir reuniaun ka bá haklaken, ita-nia isin no roupa tenkesér moos no ibun nia iis tenke fresku hodi ema seluk la hanoin aat kona-ba ita. Irmaun-irmán sira neʼebé hatoʼo diskursu ka halo drama kiʼik sira iha kongregasaun presiza hatudu ezemplu diʼak kona-ba neʼe. Se ita kuidadu ho dalan neʼebé ita hatais no hadiʼa an, neʼe hatudu respeitu ba Jeová no ba ninia organizasaun.

2. Bíblia haruka ita atu hatudu respeitu no iha hanoin neʼebé loos. Apóstolu Paulo fó laran-manas ba feto kristaun sira atu “hatais . . . ho respeitu no ho hanoin loos, laʼós hodi halo fuuk ho modelu oioin ka tau osan-mean ka fatuk-murak ka roupa neʼebé karun loos. Maibé sira tenke halo furak sira-nia an ho hahalok diʼak, katak hatais iha dalan neʼebé loos ba feto sira neʼebé dehan sira adora Maromak”. (1 Timóteo 2:9, 10) Importante mós ba mane sira atu hatudu respeitu no iha hanoin neʼebé loos kona-ba dalan neʼebé sira hatais no hadiʼa an.

Ema neʼebé hatais ho respeitu sempre kuidadu atu la halo ema seluk sidi no la dada atensaun demais ba ninia an. Hanoin neʼebé loos katak hatudu matenek no foti desizaun neʼebé diʼak. Ema neʼebé hatudu hahalok hanesan neʼe, sira bele tetu didiʼak sira-nia desizaun hodi hatudu respeitu ba Maromak nia matadalan. Ida-neʼe la dehan katak la bele hatais modelu neʼebé jeitu, maibé ida-neʼe ajuda ita atu hatais ho loloos no hadiʼa an iha dalan neʼebé la dada atensaun. (1 João 2:16) Ita hakarak halo tuir matadalan neʼe maski ita tuir reuniaun, bá haklaken, ka halo buat seluk. Ita-nia hatais kuandu ita halimar mós tenkesér hatudu respeitu. Karik iha eskola ka serbisu-fatin, ita hetan oportunidade atu haklaken ba ema. Iha tempu neʼe, karik ita la hatais hanesan ita bá reuniaun, maibé iha situasaun hotu, ita-nia hatais presiza moos, kabeer no hatudu respeitu.

Tuir loloos, ita hotu la presiza hatais iha dalan neʼebé hanesan deʼit. Ema ida-idak gosta modelu no jeitu oioin, no ida-neʼe loos. Maski nuneʼe, ita tenke halo tuir Bíblia nia matadalan iha tempu hotu.

Apóstolu Pedro dehan katak buat neʼebé importante liu fali roupa no fuuk ho modelu oioin, mak ita-nia laran. (1 Pedro 3:3, 4) Kuandu ita-nia laran nakonu ho domin, ksolok, dame, laran-diʼak no fiar neʼebé metin, hahalok sira-neʼe sei sai hanesan hatais espirituál nian neʼebé fó hahiʼi ba Maromak.

3. Bíblia haruka ita atu hanoin didiʼak se ita hatais ho loloos ka lae. Iha 1 Timóteo 2:9, temi kona-ba “hatais ho loloos”. Maski apóstolu Paulo koʼalia liafuan neʼe liuliu ba feto sira, maibé matadalan neʼe mós diʼak ba mane sira. Hatais ho loloos katak hatais neʼebé kabeer no la runguranga. Maski ita iha osan barak ka lae, maibé ita hotu bele hadiʼa an ho didiʼak.

Baibain, buat primeiru neʼebé ema haree kona-ba ita mak ita-nia fuuk. Ita-nia fuuk presiza sui no hadiʼa ho didiʼak. Dalan neʼebé ema halo sira-nia fuuk depende ba kultura no rasa, no apóstolu Paulo hanoin kona-ba buat sira-neʼe kuandu nia fó konsellu kona-ba oinsá atu hadiʼa fuuk iha 1 Korinto 11:14, 15. Maibé kuandu mane halo nia fuuk atu haree hanesan feto, no feto hakarak haree hanesan mane, neʼe mak kontra Bíblia nia matadalan.—Deuteronômio (Ulangan) 22:5.

Kona-ba mane sira, hadiʼa an ho didiʼak mós inklui koi hasarahun. Iha rai balu, ema haree ibun-rahun nuʼudar buat neʼebé diʼak ba mane sira. Se nuneʼe, mane sira presiza halo ibun-rahun kabeer.

4. Dalan neʼebé ita hatais no hadiʼa an labele haleno domin ba mundu no mundu nia hahalok. Apóstolu João fó avizu hodi dehan: “Keta hadomi mundu ka buat sira neʼebé mundu nian.” (1 João 2:15-17) Ema iha mundu neʼe iha hakarak aat oioin. Apóstolu João koʼalia kona-ba ema nia hakarak aat isin nian no foti-an kona-ba rikusoin. Bíblia mós koʼalia kona-ba ema neʼebé kontra hasoru ulun-naʼin sira. (Provérbios [Amsal] 17:11; Éfeso 2:2) Ema hatudu sai hahalok sira-neʼe liuhusi dalan neʼebé sira hatais no hadiʼa an. Sira-nia hatais la hatudu respeitu, hatudu isin, runguranga, no la kabeer. Tanba ita mak Jeová nia atan sira, ita la hatais roupa neʼebé la merese ba ema kristaun.

Duké halo tuir mundu, diʼak liu atu halo tuir ezemplu diʼak husi mane no feto kristaun sira iha kongregasaun neʼebé iha esperiénsia barak ona iha lia-loos. Irmaun joven sira neʼebé hakarak atu fó diskursu iha kongregasaun bele halo tuir irmaun sira neʼebé hetan ona knaar atu fó diskursu públiku no haree oinsá sira hadiʼa an. Ita hotu bele aprende husi irmaun-irmán sira neʼebé haklaken ho badinas ba tinan barak ona.—1 Timóteo 4:12; 1 Pedro 5:2, 3.

5. Kuandu ita hili roupa, diʼak atu hanoin-hetan katak “Kristu rasik mós la buka atu fó ksolok ba nia an”. (Roma 15:3) Buat neʼebé importante liu ba Jesus mak halo tuir Maromak nia hakarak. Jesus mós hanoin liu atu ajuda ema seluk duké halo kontente ninia an rasik. Saida mak ita bele halo se dalan neʼebé ita hatais no hadiʼa an bele hanetik ema atu simu lia-loos? Ita bele banati-tuir dalan neʼebé Kristu hatudu haraik-an. Apóstolu Paulo hatudu matadalan kona-ba neʼe hodi hatete: “Ami la halo ema ida sidi kona-ba buat naran deʼit.” (2 Korinto 6:3) Tanba razaun neʼe mak karik ita sei deside atu la hili roupa ka hili modelu fuuk nian neʼebé hanetik ema atu simu ita-nia mensajen.

Hamriik. Dalan neʼebé ita hamriik mós importante tebes. Klaru katak ita hotu la hamriik ka laʼo iha dalan hanesan deʼit, no ita mós lakohi atu halo tuir deʼit ema seluk. Maski nuneʼe, Bíblia mós hatudu katak hodi hamriik loos, ida-neʼe halo ema hanoin katak ita respeitu sira. (Levítico [Imamat] 26:13; Lucas 21:28) Maibé, karik irmaun-irmán balu la bele hamriik loos tanba ba tinan barak sira sempre hakruʼuk hodi halo serbisu ka tanba sira idade ona. Karik irmaun-irmán sira-neʼe presiza sadere ba buat ruma. Maibé, ba ema neʼebé bele hamriik loos, diʼak atu halo nuneʼe kuandu koʼalia ho ema seluk atu sira la hanoin sala katak nia baruk ka moe tebes. Hanesan neʼe mós, maski la sala atu irmaun ida tau nia liman ba pódiu (katak fatin atu tau surat tahan kuandu hatoʼo diskursu), maibé se nia sadere ba pódiu, neʼe la hatudu respeitu ba rona-naʼin.

Sasán sira presiza moos no kabeer. Importante ba ita atu hatais no hadiʼa an ho didiʼak maibé sasán neʼebé ita uza iha serbisu haklaken mós presiza kabeer no moos.

Porezemplu, haree toʼok ita-nia Bíblia. Se ita-nia Bíblia bosan ona, karik bele koko makaʼas atu hetan fali Bíblia foun. Maibé, ita hotu presiza hatudu katak ita hafolin ita-nia Bíblia.

Maski iha dalan oioin atu tau livru sira iha ita-nia pasta haklaken nian, maibé importante atu la runguranga. Ita haree tiha ona ka lae, haklaken-naʼin ida ka diskursu-naʼin ida foin loke ninia Bíblia atu lee eskritura no surat-tahan sira monu sai husi Bíblia laran? Ida-neʼe dada ema nia atensaun, loos ka lae? Se ita dada ema nia atensaun tanba ita rai surat-tahan sira iha Bíblia laran, karik diʼak liu atu rai iha fatin seluk hodi ita-nia sasán sempre arruma ho didiʼak. Importante mós atu hatene katak iha kultura balu, se ita tau Bíblia no livru sira seluk kona-ba Bíblia iha rai, neʼe la hatudu respeitu.

Importante tebes ba ita atu hatais no hadiʼa an ho didiʼak. Ida-neʼe mós kona ema seluk nia haree kona-ba ita. Maibé importante liu hotu, ita tau matan ba buat sira-neʼe tanba ita hakarak “lori hahiʼi ba hanorin neʼebé mai husi Maromak, ita-nia Salvadór”.—Tito 2:10.