Liafuan atu ramata

KARIK ita uza ona tempu barak atu buka informasaun ba ita-nia diskursu. No mós, karik ita prepara ona liafuan atu hahú diskursu neʼebé sei dada rona-naʼin nia atensaun. Maibé, ita presiza halo buat ida tan. Neʼe mak prepara liafuan atu ramata ita-nia diskursu. Labele hanoin katak ida-neʼe ladún importante. Tuir loloos, liafuan atu ramata diskursu mak buat neʼebé rona-naʼin hanoin-hetan ba tempu kleur. Se liafuan atu ramata diskursu ladún diʼak, buat hotu neʼebé ita hatete durante ita-nia diskursu sei la book ema nia laran.

Hanoin toʼok kona-ba neʼe: Kuandu Josué besik ona atu mate, nia hatoʼo diskursu ba katuas sira husi nasaun Izraél. Depois Josué konta tiha ba sira buat hotu neʼebé Jeová halo ona ba ema Izraél husi Abraão nia tempu, Josué ramata ninia diskursu hodi repete fali deʼit liafuan balu ka lae? Tuir loloos, lae. Maibé ho laran-manas, nia hatete ba povu: “Taʼuk ba Jeová no serbí nia ho laran-metin no lia-loos.” Ita bele lee rasik liafuan neʼebé Josué uza atu ramata ninia diskursu iha Josué (Yosua) 24:14, 15.

Ita mós bele hetan diskursu kapás seluk tan iha Apóstolu 2:14-36. Apóstolu Pedro mak hatoʼo diskursu neʼe iha Jeruzalein iha loron Festa Pentekostes nian iha tinan 33. Ulukliu, nia esplika katak sira haree daudaun Maromak kumpre profeta Joel nia liafuan kona-ba fakar espíritu santu ba ema oioin. Tuirmai, nia hatudu oinsá ida-neʼe liga ho liafuan iha livru Salmos neʼebé fó-hatene nanis kona-ba Jesus Kristu nia moris-hiʼas no oinsá nia hetan glória iha Maromak nia liman-loos. Ikusliu, nia ramata nia diskursu hodi esplika oinsá neʼe kona sira-nia moris. Nia hatete: “Nuneʼe, Izraél nia umakain hotu hatene ho loloos bá katak Jesus neʼe, neʼebé imi hedi ba ai-riin, Maromak halo ona nia nuʼudar Naʼi no Kristu.” Ema hotu neʼebé rona husu: “Maluk sira, ami tenke halo saida?” Pedro hatán dehan: “Hakribi sala bá, no imi ida-idak hetan batizmu hodi Jesus Kristu nia naran.” (Apóstolu 2:37, 38) Iha loron neʼe, ema naʼin-3.000 neʼebé rona Pedro simu lia-loos kona-ba Jesus Kristu, tanba ida-neʼe book duni sira-nia laran.

Pontu atu hanoin-hetan. Buat neʼebé ita hatete atu ramata diskursu tenke liga ho títulu ba ita-nia diskursu. Ita-nia liafuan atu ramata diskursu tenke tuir pontu importante sira neʼebé ita temi iha ita-nia diskursu. Ita mós bele hili atu temi fali liafuan balu husi títulu ba ita-nia diskursu.

Kuandu ita hatoʼo diskursu, baibain ita-nia hakarak mak atu fó laran-manas ba rona-naʼin atu halo tuir informasaun neʼebé ita hatoʼo. Objetivu ida husi ita-nia liafuan atu ramata mak atu hatudu ba sira saida mak sira presiza halo. Bainhira ita hili tema no pontu importante ba ita-nia diskursu, diʼak mós atu hanoin tansá mak informasaun neʼe folin-boot ba rona-naʼin no saida mak ita hakarak kumpre iha diskursu neʼe. Se hanoin ona kona-ba neʼe, ita sei hatene saida mak ita hakarak rona-naʼin atu halo. Nuʼudar ita hatoʼo diskursu ita sei esplika kona-ba saida mak ita hakarak sira atu halo no fó ezemplu balu kona-ba oinsá atu halo tuir ida-neʼe.

Liután neʼe, ita-nia liafuan atu ramata diskursu tenke book rona-naʼin nia laran. Ita presiza ajuda rona-naʼin fiar katak sira sei hetan rezultadu diʼak hodi halo tuir informasaun neʼe. Se ita hili ho didiʼak liafuan ikus atu ramata diskursu no koʼalia iha dalan neʼebé diʼak, ita-nia diskursu tomak sei book duni ema nia laran.

Ita-nia liafuan tenke hatudu sai katak ita-nia diskursu besik ona atu ramata. Dalan neʼebé ita koʼalia mós tenke natoon. Labele koʼalia lalais liu toʼo diskursu nia rohan no para derrepente deʼit. Iha parte seluk, ita-nia lian labele sai neineik liu. Rona-naʼin tenke rona ita-nia lian maibé labele makaʼas liu. Ita-nia liafuan ikus tenke hatudu katak ita-nia diskursu neʼe atu ramata ona. Ita presiza hatoʼo ida-neʼe ho laran-manas. Kuandu ita prepara ita-nia diskursu, la haluha mós atu treinu liafuan atu ramata.

Ita-nia liafuan atu ramata presiza naruk ka lae? Tuir loloos, situasaun ida-idak la hanesan. Maibé, ita-nia liafuan atu ramata labele naruk liu. Tempu neʼebé ita uza atu hatoʼo liafuan ikus depende ba oinsá mak ida-neʼe ajuda rona-naʼin. Dala barak, diʼak liu atu ramata diskursu hodi uza liafuan simples no koʼalia klaru kedas kona-ba pontu importante. Dala ruma, se ita prepara didiʼak ona, ita mós bele ramata diskursu hodi uza ai-knanoik badak ida. Kompara toʼok liafuan badak atu ramata livru Eclesiastes tomak iha Eclesiastes (Pengkhotbah) 12:13, 14 ho liafuan atu ramata Jesus nia diskursu iha foho ida, iha Mateus 7:24-27.

Iha serbisu haklaken. Liafuan atu ramata ita-nia koʼalia importante tebes kuandu ita haklaken. Entaun, hodi prepara ho didiʼak no hanoin ema, ita bele hetan rezultadu diʼak. Ita mós bele halo tuir matadalan sira iha lisaun neʼe kuandu ita haklaken ba ema.

Dala ruma, ita haklaken ba ema ba tempu uitoan deʼit. Karik tanba uma-naʼin okupadu, entaun ita koʼalia ba nia ba minutu ida deʼit. Se ita iha oportunidade, ita bele hatete hanesan neʼe: “Haʼu komprende katak ita okupadu. Maibé haʼu hakarak husik buat ruma ba ita atu hanoin. Bíblia hatudu katak ita-nia Kriadór iha planu neʼebé kapás tebes, neʼe mak atu halo mundu neʼe sai furak hodi ema bele moris haksolok ba nafatin. Ita hotu bele hela iha fatin kapás neʼe, maibé ita presiza aprende saida mak Maromak hakarak ita atu halo.” Ka ita bele hatete katak ita bele mai fali iha tempu seluk.

Maski uma-naʼin la gosta ka hirus ba ita, maibé ita bele nafatin hetan rezultadu diʼak. Hanoin-hetan Bíblia nia konsellu iha Mateus 10:12, 13 no Roma 12:17, 18. Kuandu ita hatán nafatin ho laran-diʼak, ida-neʼe bele troka ema nia hanoin kona-ba Testemuña ba Jeová.

Iha parte seluk, karik uma-naʼin gosta tebes rona ba ita. Se nuneʼe, diʼak atu temi fali pontu importante neʼebé ita hakarak nia atu hanoin-hetan, no hatudu tansá mak diʼak ba nia atu halo tuir ida-neʼe iha ninia moris.

Se ita haree katak uma-naʼin iha interese no hakarak atu ita vizita fali nia iha tempu seluk, ita bele rai-hela pergunta ida ba nia. Ita bele hili pergunta ida husi livru Bertukar Pikiran mengenai Ayat-Ayat Alkitab ka husi livru ruma neʼebé ita uza atu estuda ho ema. La haluha kona-ba ita-nia objetivu, neʼe mak atu halo tuir Jesus nia mandamentu iha Mateus 28:19, 20.

Kuandu ita atu ramata estudu ida-idak ho uma-naʼin, diʼak atu temi fali tema ba lisaun neʼe. Ida-neʼe sei ajuda ema atu hanoin-hetan buat neʼebé ita foin koʼalia. Hodi uza pergunta sira atu hanoin fali informasaun, neʼe ajuda estudante atu hanoin kona-ba pontu importante sira, liuliu se ita la ansi atu koʼalia kona-ba pergunta sira-neʼe. Hodi husu kona-ba oinsá mak informasaun neʼe ajuda estudante nia moris ka oinsá nia bele fahe ida-neʼe ba ema seluk, neʼe sei ajuda nia atu hanoin kona-ba dalan oioin neʼebé nia bele uza informasaun neʼebé nia foin aprende.—Provérbios (Amsal) 4:7.

Hanoin-hetan, ita-nia liafuan atu ramata sei kona rona-naʼin nia hanoin kona-ba ita-nia diskursu tomak.