Koʼalia deʼit buat neʼebé loos

TANBASÁ mak dala ruma ema kristaun ida koʼalia kona-ba buat neʼebé ladún loos? Karik nia repete deʼit buat neʼebé nia rona husi ema seluk, no la uza tempu atu haree se ida-neʼe loos duni ka lae. Ka karik la ho neon, nia aumenta informasaun tanba nia ladún komprende ida-neʼe. Kuandu ita hakaʼas an atu fó sai deʼit informasaun neʼebé loos, maski neʼe kona-ba buat neʼebé kiʼik, ita-nia rona-naʼin sei haree katak sira bele tau fiar ba informasaun importante liu neʼebé ita hatoʼo.

Iha serbisu haklaken. Ema barak sente katak sira presiza aprende buat barak tan, no ida-neʼe halo sira dada an atu komesa haklaken. Maibé ikusmai, sira haree katak maski sira la hatene buat hotu kona-ba lia-loos, maibé sira bele fó sasin ba ema ho didiʼak. Oinsá? Hodi prepara ho didiʼak.

Antes bá haklaken, diʼak atu ita hatene buat neʼebé ita sei koʼalia ba uma-naʼin. Hanoin toʼok kona-ba pergunta sira neʼebé karik uma-naʼin sei husu. Prepara resposta husi Bíblia. Ida-neʼe sei ajuda ita atu fó resposta neʼebé tuir lia-loos no kalma nafatin. Ita atu halaʼo estudu Bíblia ho ema ka lae? Se nuneʼe, prepara didiʼak. Importante katak ita komprende oinsá mak eskritura sira apoia resposta ba pergunta sira iha parágrafu.

Oinsá se uma-naʼin ka kolega serbisu ida husu pergunta neʼebé ita ladún hatene ninia resposta? Se nuneʼe, labele siʼik deʼit. Bíblia hatete: “Ema loos hanoin kleʼan iha nia laran antes hatán.” (Provérbios [Amsal] 15:28) Karik ita bele hetan informasaun husi “Tópiku sira kona-ba Bíblia” iha Bíblia nia kotuk, ka husi livru Bertukar Pikiran mengenai Ayat-Ayat Alkitab neʼebé bele ajuda ita atu fó resposta. Maibé se ita la lori livru sira-neʼe, ita bele fó-hatene nia katak ita sei buka tan informasaun no depois vizita fali nia. Se ema neʼe iha duni interese, nia sei prontu atu hein hodi hetan resposta neʼebé loos. Karik nia mós kontente tanba ita hatudu haraik-an.

Kuandu ita haklaken hamutuk ho irmaun ka irmán ida neʼebé iha esperiénsia barak ona iha lia-loos, neʼe sei ajuda ita atu uza Maromak nia Liafuan ho matenek. Haree kona-ba eskritura neʼebé sira uza no oinsá sira esplika ida-neʼe. Kuandu sira hatudu dalan ba ita oinsá atu haklaken diʼak liután, simu neʼe ho haraik-an. Dixípulu Lucas koʼalia kona-ba Apolo nuʼudar ema neʼebé “matenek atu koʼalia”, “hatene didiʼak kona-ba Eskritura”, no “laran-manas ho espíritu hodi hanorin ho loloos kona-ba Jesus”. Maibé iha buat balu tan neʼebé nia presiza aprende. Tan neʼe, kuandu Prisila no Ákuila hatene kona-ba neʼe, sira “lori nia mesamesak no esplika diʼak liután ba nia kona-ba Maromak nia dalan”.—Apóstolu 18:24-28.

“Kaer metin ba liafuan neʼebé loos.” Kuandu hatoʼo diskursu iha reuniaun, ita tenke hatudu katak ita iha respeitu kleʼan ba kongregasaun neʼebé nuʼudar “ai-riin hodi tahan lia-loos”. (1 Timóteo 3:15) Atubele apoia lia-loos, importante tebes katak ita komprende eskritura neʼebé ita uza iha diskursu sira. Dala ruma, ita presiza lee versíkulu sira neʼebé haleʼu eskritura neʼe hodi komprende ho didiʼak eskritura neʼe katak sá.

Karik ema sei repete fali buat neʼebé ita hatete iha reuniaun kristaun. Bíblia hatete: “Ita hotu halo sala dala barak.” (Tiago 3:2) Maski ida-neʼe loos, maibé importante atu ita hakaʼas an hodi koʼalia buat neʼebé loos. Irmaun barak neʼebé hola parte ona iha Eskola Serbisu Kristaun nian, ikusmai sira bele sai katuas iha kongregasaun. Liuliu irmaun sira neʼebé serbí nuʼudar katuas tenke kumpre sira-nia knaar “ho didiʼak”. (Lucas 12:48) Se katuas ida fó konsellu neʼebé sala ba ema ida iha kongregasaun no ikusmai ida-neʼe hamosu problema boot, karik Maromak sei la kontente ho katuas neʼe. (Mateus 12:36, 37) Tan neʼe, irmaun ida neʼebé kumpre kritériu atu serbí nuʼudar katuas iha kongregasaun, ema tenke haree katak nia “kaer metin ba liafuan neʼebé loos iha dalan neʼebé nia hanorin”.—Tito 1:9.

Kuandu ita esplika buat ruma, ita-nia hanorin tenke tuir “liafuan loloos” neʼebé hakerek iha Bíblia laran. (2 Timóteo 1:13) Maibé keta sai estrese kona-ba neʼe. Karik ita presiza hakaʼas an atu lee Bíblia tomak. Nuʼudar ita halo nuneʼe, haree oinsá mak matadalan sira tuirmai neʼe bele ajuda ita atu hanoin didiʼak kona-ba informasaun neʼebé ita hakarak uza atu hanorin.

Ulukliu, husu ba ita-nia an: ‘Informasaun neʼe tuir buat neʼebé haʼu aprende ona husi Bíblia ka lae? Ida-neʼe sei dada rona-naʼin nia atensaun ba Jeová, ka book sira atu sadere ba mundu neʼe nia matenek?’ Jesus hatete: “Ita-nia liafuan mak lia-loos.” (João 17:17; Deuteronômio [Ulangan] 13:1-5; 1 Korinto 1:19-21) No depois neʼe, uza ita-nia livru sira husi atan laran-metin no matenek. Livru sira-neʼe la ajuda deʼit ita atu komprende didiʼak eskritura sira, maibé mós ajuda ita hatene oinsá atu uza iha dalan neʼebé loos. Se ita-nia diskursu tuir “liafuan loloos” no uza livru sira husi Jeová nia organizasaun atu esplika no hatudu oinsá atu halo tuir eskritura sira, se nuneʼe ita sei koʼalia duni buat neʼebé loos.

Buka-hatene se informasaun mak loos duni. Kuandu fó ezemplu ka hanorin pontu ruma, karik ita temi liafuan husi notísias, jornál, ka husi ema nia esperiénsia ruma. Maibé oinsá mak ita bele hatene katak buat sira-neʼe mak loos? Dalan ida mak hodi haree didiʼak se informasaun neʼe laʼós tuan liu no foti husi fatin neʼebé loos. Nuʼudar tempu liu daudaun, relatóriu ruma bele sai laloos ona. Dala ruma sientista sira hetan fali buat foun, no nuʼudar ema komprende liután kona-ba istória no língua antigu nian, sira presiza hadiʼa fali buat neʼebé sira hanorin uluk. Se ita hanoin atu uza informasaun ruma husi jornál, televizaun, rádiu, e-mail, ka husi internét, ita presiza kuidadu tebes. Provérbios (Amsal) 14:15 fó avizu hodi hatete: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin uluk kona-ba nia hakat sira.” Husu ita-nia an: ‘Informasaun neʼe mai husi fatin neʼebé ema barak tau fiar ka lae? Informasaun neʼe loos hodi tuir informasaun seluk ka lae?’ Keta uza informasaun neʼe se ita iha dúvida.

Liután neʼe, importante mós atu hanoin didiʼak oinsá mak ita sei uza informasaun neʼe. Kuandu ita temi relatóriu ka liafuan ruma husi livru ida, haree mós katak buat sira-neʼe liga ho informasaun seluk husi livru neʼe. Maski ita tau énfaze ba pontu importante, maibé kuidadu katak ita la troka liafuan hanesan “ema balu” sai fali “ema barak”, ka “ema barak” sai fali “ema hotu”, ka troka liafuan “iha situasaun balu” sai fali “iha situasaun hotu”. Se ita aumenta liu informasaun kuandu ita temi relatóriu ruma, ema sei iha dúvida no la bele tau fiar ba ita-nia liafuan.

Se ita sempre koʼalia deʼit buat neʼebé loos, ema sei haree katak ita iha duni respeitu kleʼan ba lia-loos. Ida-neʼe sei fó naran diʼak ba Testemuña ba Jeová nuʼudar grupu, no importante liu, ida-neʼe sei fó hahiʼi ba “Jeová, Maromak lia-loos nian”.—Salmo (Mazmur) 31:5.