Fó razaun neʼebé halo ema fiar

BAINHIRA ita fó sai buat ruma, karik ema bele husu: “Tanbasá mak liafuan sira-neʼe loos? Tanbasá mak haʼu bele fiar ó-nia liafuan?” Ita iha responsabilidade atu hatán sira-nia pergunta, ka ajuda sira atu hetan resposta ba pergunta sira-neʼe. Kuandu ita esplika buat neʼebé importante, ita tenke fó razaun neʼebé loos, neʼebé ema labele nega. Ida-neʼe sei book ema atu simu no fiar ita-nia liafuan.

Apóstolu Paulo hanorin hodi halo ema fiar. Nia hatudu razaun tansá mak buat neʼebé nia hanorin mak loos, no mós nia koʼalia ho laran-manas. Nia hakaʼas an hodi halo ema troka sira-nia hanoin. Nia fó ezemplu diʼak mai ita hotu. (Apóstolu 18:4; 19:8) Maibé, iha mós mestre balu neʼebé lohi ema hodi halo sira fiar buat neʼebé la loos. (Mateus 27:20; Apóstolu 14:19; Koloso 2:4) Sira koʼalia buat neʼebé sala, no fó razaun neʼebé la tuir realidade ka hatoʼo informasaun husi ema neʼebé la hatene loloos situasaun. Ho neon, sira subar informasaun neʼebé la apoia sira-nia hanorin, no sira buka atu book deʼit ema nia sentimentu duké esplika razaun loos. Ita labele halo hanesan neʼe.

Hanorin husi Maromak nia Liafuan. Ita labele hanorin buat neʼebé mai husi ita-nia hanoin rasik. Ita-nia hakarak mak atu fahe saida mak ita aprende ona husi Bíblia. Livru husi atan laran-metin no matenek ajuda tebes ita atu bele hanorin ho diʼak no ajuda ita atu estuda didiʼak eskritura sira. Tuirmai, ita bele ajuda fali ema seluk atu estuda Bíblia. Ita-nia hakarak laʼós deʼit atu hatudu ita-nia hanorin mak loos, maibé ho haraik-an ajuda sira haree rasik saida mak Bíblia hanorin. Ita-nia hanoin mak hanesan Jesus Kristu nian. Iha orasaun ba ninia Aman, nia dehan: “Ita-nia liafuan mak lia-loos.” (João 17:17) La iha ida neʼebé iha kbiit boot liu fali Maromak Jeová, Kriadór ba lalehan no rai. Tan neʼe, ita tenke uza Bíblia atu bele fó razaun neʼebé loos.

Dala ruma, ita koʼalia ba ema neʼebé la fiar katak Bíblia mak Maromak nia liafuan ka la hatene saida mak Bíblia hanorin. Se nuneʼe, ita presiza hanoin kona-ba oinsá no bainhira mak ita sei loke eskritura ba nia. Maibé lalika demora atu dada sira-nia atensaun ba Bíblia tanba ida-neʼe mak hun ba lia-loos.

Se ita lee tiha eskritura ida ba ema, ida-neʼe sei halo nia fiar kedas ka lae? Dala ruma lae. Karik ita presiza esplika eskritura sira neʼebé haleʼu eskritura neʼe atu bele hatudu katak ida-neʼe apoia duni buat neʼebé ita hanorin. Dala ruma, eskritura ida deʼit la toʼo atu apoia buat neʼebé ita hanorin, neʼe katak ita presiza uza tan razaun seluk. Ita bele uza eskritura seluk tan hodi halo ema fiar katak matadalan neʼe mai husi Bíblia.

Lee didiʼak eskritura neʼebé apoia informasaun. Keta aumenta buat seluk se eskritura la dehan nuneʼe. Maski eskritura neʼe karik liga ho informasaun neʼebé ita hatoʼo, maibé atu bele book rona-naʼin nia laran, eskritura neʼe tenkesér apoia duni buat neʼebé ita hanorin.

Uza informasaun seluk. Dala ruma, diʼak atu halo ida-neʼe atu hatudu katak Bíblia hanorin duni lia-loos. Maibé, ita tenke uza informasaun neʼebé loos.

Porezemplu, atu hatudu katak Kriadór iha duni, karik ita bele husu ema atu hanoin kona-ba kriasaun. Ita bele uza ezemplu kona-ba lei natureza nian, hanesan forsa magnétiku, no esplika oinsá lei neʼe hatudu duni katak iha Ida neʼebé halo lei neʼe. Se buat neʼebé ita esplika tuir duni Bíblia, ida-neʼe mak informasaun neʼebé loos. (Jó [Ayub] 38:31-33; Salmo [Mazmur] 19:1; 104:24; Roma 1:20) Informasaun sira hanesan neʼe bele hatudu katak Bíblia nia hanorin tuir duni realidade.

Oinsá se ita hakarak ajuda ema atu fiar katak Bíblia mak Maromak nia liafuan? Karik ita bele uza matenek-naʼin sira-nia liafuan neʼebé apoia Bíblia, maibé ida-neʼe bele sai nuʼudar prova ka lae? Liafuan sira-neʼe karik sei ajuda deʼit ema neʼebé respeitu matenek-naʼin sira-neʼe. Maibé, ita bele uza uluk siénsia atu hatudu katak Bíblia mak loos ka lae? Sientista sira mós ema sala-naʼin. Tan neʼe, se ita uza uluk sira-nia hanoin, karik ita-nia razaun ladún metin. Diʼak liu atu hatudu uluk saida mak hakerek iha Bíblia, no tuirmai mak ita bele uza informasaun husi siénsia atu apoia ida-neʼe. Se ita halo nuneʼe, ita sei hanorin ho loos.

Atu bele halo ema simu hanorin ruma, ita presiza fó razaun neʼebé diʼak. No razaun sira-neʼe depende ba rona-naʼin. Porezemplu, se ita esplika ba ema kona-ba loron ikus iha 2 Timóteo 3:1-5, karik ita bele konta notísias ida atu hatudu katak ema “la hadomi malu”. Ezemplu neʼe karik toʼo ona atu hatudu katak agora liafuan neʼe sai loos ona.

Ema halo komparasaun atu hatudu katak buat ruma hanesan ho buat seluk. No neʼe mak dalan diʼak atu hanorin. Dala ruma, komparasaun deʼit la toʼo atu hatudu katak hanorin ida mak loos tuir Bíblia. Maibé komparasaun bele duni ajuda ema atu komprende hanorin ruma. Porezemplu, kuandu ita esplika ba ema katak Maromak nia Ukun mak governu ida, ita bele kompara ida-neʼe ho ema nia governu. Ita bele hatudu katak Maromak nia governu iha mós ukun-naʼin, povu, lei sira, tribunál no programa edukasaun nian.

Se ita hakarak hatudu katak moris tuir Bíblia nia konsellu lori diʼak ba ema, ita bele konta esperiénsia husi ema balu. Ita mós bele uza esperiénsia hanesan neʼe atu apoia buat neʼebé ita hanorin. Porezemplu, ita bele esplika kona-ba oinsá mak lee no estuda Bíblia lori diʼak ba ita-nia moris rasik. Apóstolu Pedro mós halo nuneʼe kuandu nia fó laran-manas ba maluk kristaun sira. Nia konta fali ninia esperiénsia kona-ba tempu neʼebé nia haree Jesus nakfila an. (2 Pedro 1:16-18) Apóstolu Paulo mós konta fali ninia esperiénsia rasik. (2 Korinto 1:8-10; 12:7-9) Maibé kuidadu atu la konta demais kona-ba ita-nia esperiénsia rasik hodi la dada atensaun ba ita-nia an.

Tanba ita ida-idak nia hanoin no situasaun moris nian la hanesan, dala ruma buat neʼebé halo ema ida fiar karik la toʼo atu halo ema seluk fiar. Tan neʼe, hanoin didiʼak kona-ba rona-naʼin nia situasaun, depois neʼe mak ita bele deside razaun saida deʼit mak diʼak no mós oinsá atu hatoʼo razaun neʼe. Provérbios (Amsal) 16:23 dehan: “Ema matenek nia laran book nia atu koʼalia ho matenek no halo ema bele tau fiar.”