‘Rona haʼu bá, haʼu sei defende haʼu-nia an’

1, 2. Tanbasá Paulo bá Jeruzalein, no susar saida deʼit mak nia sei hasoru?

PAULO laʼo daudaun iha dalan neʼebé kloot no rame iha Jeruzalein! Tinan atus ba atus, sidade neʼe mak nuʼudar sentru ba adorasaun neʼebé loos. Ema barak iha Jeruzalein orgullu ho istória kona-ba sira-nia sidade no nasaun. Paulo hatene katak ema Kristaun barak iha Jeruzalein kaer metin ba pasadu, no la laʼo ba oin hodi tuir Jeová nia hakarak. Bainhira iha Éfeso, Paulo nota katak irmaun-irmán sira iha Jeruzalein presiza ajuda iha dalan fíziku no espirituál, tan neʼe nia planu atu bá fali neʼebá. (Após 19:21) Paulo hakarak kumpre ninia objetivu maski sei hasoru perigu.

² Susar saida deʼit mak Paulo sei hasoru iha Jeruzalein? Susar ida mak husi maluk Kristaun balu neʼebé sente laran-susar tanba rona lia-anin kona-ba nia. Maibé susar boot liután sei mai husi kontradór sira. Sira sei duun matak Paulo, baku nia, no ameasa atu oho nia. Situasaun susar sira-neʼe sei fó oportunidade ba Paulo atu defende ninia an. Paulo nia haraik an, aten-brani, no fiar hodi tahan hasoru susar sira-neʼe sai nuʼudar ezemplu kapás ba ema Kristaun ohin loron. Mai ita haree toʼok.

“Sira fó glória ba Maromak” (Apóstolu 21:18-20a)

3-5. (a) Paulo hasoru sé iha Jeruzalein, no sira koʼalia kona-ba saida? (b) Lisaun saida mak ita bele aprende husi Paulo no katuas sira-nia enkontru iha Jeruzalein?

³ Depois toʼo tiha Jeruzalein ba loron ida, Paulo ho ninia maluk sira bá hasoru katuas sira neʼebé dirije kongregasaun. Kona-ba tempu neʼe, Bíblia la temi apóstolu ruma nia naran, karik sira hotu bá ona fatin seluk atu haklaken. Maibé Jesus nia alin Tiago sei iha neʼebá. (Gal 2:9) Karik Tiago mak dirije enkontru bainhira “katuas sira hotu mós iha neʼebá” hamutuk ho Paulo.—Após 21:18.

⁴ Paulo kumprimenta katuas sira no “hahú konta ba sira buat hotu neʼebé Maromak halo ona iha nasaun sira-nia leet liuhusi ninia serbisu haklaken”. (Após 21:19) Ita bele imajina katak neʼe hametin tebes irmaun sira. Ohin loron, ita mós sente kontente bainhira rona katak serbisu haklaken laʼo ba oin iha rai barak.—Prov 25:25.

⁵ Bainhira Paulo konta ninia esperiénsia, karik nia mós temi kona-ba kontribuisaun neʼebé nia lori husi Europa. Klaru katak katuas sira-neʼe bele sente duni domin husi irmaun sira neʼebé hela iha fatin dook. Tan neʼe, depois rona tiha Paulo nia relatóriu, katuas sira-neʼe “fó glória ba Maromak”! (Após 21:20a) Ohin loron mós ema Kristaun neʼebé kona dezastre ka hetan moras todan sente agradese tebes bainhira maluk fiar-naʼin sira fó ajuda no mós liafuan anima iha tempu neʼebé loos.

Ema barak nafatin “laran-manas atu halo tuir Ukun-Fuan” (Apóstolu 21:20b, 21)

6. Paulo rona kona-ba problema saida?

⁶ Tuirmai katuas sira fó-hatene Paulo kona-ba problema ida iha Judeia neʼebé liga ho nia. Sira hatete: “Ami-nia belun, ó hatene katak iha ona ema Judeu rihun ba rihun neʼebé sai fiar-naʼin, no sira hotu laran-manas atu halo tuir Ukun-Fuan. Maibé sira rona lia-anin katak ó hanorin ona ema Judeu hotu iha nasaun seluk nia leet kona-ba buat neʼebé kontra Moisés nia Ukun-Fuan no atu husik Ukun-Fuan neʼe, hodi fó-hatene sira atu la halo sirkunsizaun ba sira-nia oan no la halo tuir sira-nia toman.”a—Após 21:20b, 21.

7, 8. (a) Ema Kristaun Judeu barak ladún komprende kona-ba saida? (b) Tanbasá ema Kristaun Judeu nia hanoin neʼebé sala la dehan katak sira kontra lia-loos?

⁷ Tanbasá ema Kristaun barak nafatin kaer metin ba Moisés nia Ukun-Fuan neʼebé la vale ona ba tinan 20 liu? (Kol 2:14) Iha tinan 49 EC, apóstolu no katuas sira halo enkontru iha Jeruzalein no haruka karta ba kongregasaun sira hodi esplika katak ema Kristaun husi nasaun seluk la presiza halo sirkunsizaun no la presiza halo tuir Moisés nia Ukun-Fuan. (Após 15:23-29) Maibé, karta neʼe la temi kona-ba ema Judeu neʼebé sai ona Kristaun, no sira barak la komprende katak sira la presiza tan halo tuir Moisés nia Ukun-Fuan.

⁸ Tanba ema Kristaun Judeu sira-neʼe iha hanoin neʼebé sala, neʼe katak sira la kumpre kritéria nuʼudar ema Kristaun ka lae? Lae. Sira la hanesan ho ema neʼebé uluk adora maromak falsu no nafatin halo tuir toman husi relijiaun falsu. Moisés nia Ukun-Fuan mak mai husi Jeová. Tan neʼe, Ukun-Fuan laʼós buat neʼebé la diʼak. Maibé Ukun-Fuan neʼe liga ho aliansa tuan, no ema Kristaun tama ona ba aliansa foun. Tan neʼe, sira la presiza halo tuir tan Moisés nia Ukun-Fuan. Ema Kristaun Judeu neʼebé kaer metin ba Moisés nia Ukun-Fuan ladún komprende kona-ba Jeová nia arranju foun no la tau fiar ba ida-neʼe. Sira presiza hadiʼa sira-nia hanoin hodi tuir arranju foun atu adora Jeová.b—Jer 31:31-34; Lc 22:20.

“Lia-anin neʼebé ema koʼalia kona-ba ó mak la loos” (Apóstolu 21:22-26)

9. Saida mak Paulo hanorin kona-ba Moisés nia Ukun-Fuan?

⁹ Oinsá ho lia-anin neʼebé dehan katak Paulo bandu ema Judeu iha nasaun seluk nia leet “atu la halo sirkunsizaun ba sira-nia oan no la halo tuir sira-nia toman”? Paulo mak apóstolu ba ema husi nasaun seluk, no nia apoia desizaun kona-ba ema husi nasaun seluk la presiza halo tuir Moisés nia Ukun-Fuan. Nia mós fó sai katak ema Kristaun Judeu labele obriga ema Kristaun husi nasaun seluk atu hetan sirkunsizaun no halo tuir Moisés nia Ukun-Fuan. (Gal 5:1-7) Paulo mós haklaken ba ema Judeu iha sidade sira neʼebé nia vizita. Nia esplika ba sira neʼebé rona katak Jesus nia mate halo Moisés nia Ukun-Fuan la vale ona no katak ema ida bele sai laran-loos tanba ninia fiar, laʼós tanba halo tuir Ukun-Fuan.—Rom 2:28, 29; 3:21-26.

10. Paulo hanoin oinsá kona-ba Moisés nia Ukun-Fuan no sirkunsizaun?

¹⁰ Maski nuneʼe, Paulo la kritika ema neʼebé kontente halo tuir ema Judeu nia toman, hanesan la halo serbisu iha loron Sábadu ka la han hahán balu. (Rom 14:1-6) No nia mós la halo lei oioin kona-ba sirkunsizaun. Tuir loloos, Paulo husu Timóteo atu hetan sirkunsizaun hodi nuneʼe ema Judeu sira la sidi, tanba Timóteo nia aman mak ema Gregu. (Após 16:3) Sirkunsizaun mak ema ida-idak nia desizaun. Paulo fó-hatene ema iha Galásia: “Maski sira hetan sirkunsizaun ka la hetan, neʼe la iha folin, maibé fiar neʼebé sira hatudu liuhusi domin mak iha folin.” (Gal 5:6) Maibé, sala se ema ida hetan sirkunsizaun tanba hanoin katak nia presiza halo tuir Ukun-Fuan atu Jeová bele simu nia. Neʼe hatudu katak ema neʼe ladún iha fiar.

11. Katuas sira fó matadalan saida ba Paulo, no karik neʼe envolve saida? (Haree mós nota-rodapé.)

¹¹ Entaun, maski lia-anin neʼe la loos, ema Kristaun Judeu nafatin hanoin barak. Tan neʼe, katuas sira fó matadalan ba Paulo: “Iha mane naʼin-haat iha ami-nia leet neʼebé halo ona juramentu. Lori mane sira-neʼe ho ó no hamoos ó-nia an tuir ukun-fuan hamutuk ho sira no selu buat neʼebé sira presiza, atu nuneʼe sira bele koi tiha sira-nia fuuk. Tuirmai, ema hotu sei hatene katak lia-anin neʼebé ema koʼalia kona-ba ó mak la loos, maibé katak ó-nia hahalok loos no ó rasik mós halo tuir Ukun-Fuan.”c—Após 21:23, 24.

12. Oinsá mak Paulo hatudu katak nia prontu atu serbisu hamutuk ho katuas sira iha Jeruzalein no la ulun-toos?

¹² Paulo bele deʼit dehan katak problema nia hun mak laʼós lia-anin kona-ba nia, maibé ema Kristaun Judeu neʼebé kaer metin ba Moisés nia Ukun-Fuan. Maski nuneʼe, Paulo prontu halo tuir buat neʼebé katuas sira husu, naran katak neʼe la kontra Maromak nia hakarak. Antes neʼe, nia hakerek: “Ba sira neʼebé iha ukun-fuan nia okos haʼu sai hanesan ema neʼebé iha ukun-fuan nia okos, maski haʼu laʼós iha ukun-fuan nia okos, atu nuneʼe haʼu bele manán sira neʼebé iha ukun-fuan nia okos.” (1 Kor 9:20) Iha situasaun neʼe, Paulo serbisu hamutuk ho katuas sira iha Jeruzalein no sai “hanesan ema neʼebé iha ukun-fuan nia okos”. Hodi halo nuneʼe, nia hatudu ezemplu diʼak mai ita atu serbisu hamutuk ho katuas sira no la ulun-toos.—Ebr 13:17.

“Nia la merese atu moris!” (Apóstolu 21:27–22:30)

13. (a) Tanbasá mak ema Judeu hamosu problema iha templu? (b) Oinsá mak Paulo konsege sees husi perigu?

¹³ Tuirmai, Paulo hasoru perigu iha área templu nian. Bainhira tempu besik ona ba mane naʼin-haat neʼe atu remata sira-nia juramentu, ema Judeu husi Ázia haree Paulo, no sira duun katak Paulo lori ema husi nasaun seluk tama ba templu, no neʼe hamosu problema boot. Se komandante Roma la mai, ema sei baku mate Paulo. Entaun, komandante neʼe kaer Paulo no lori nia. Husi tempu neʼebá, Paulo presiza hein ba tinan haat liu atu bele livre fali. No Paulo kontinua hasoru perigu. Bainhira komandante husu ba ema Judeu tanbasá sira ataka Paulo, sira hakilar hodi duun Paulo ho razaun oioin. Tanba sira hakilar ho lian makaʼas, komandante neʼe labele komprende buat ida. Ikusmai, soldadu sira hiʼit Paulo no lori nia sai husi fatin neʼe. Bainhira Paulo no soldadu sira besik ona atu tama ba fatin tropa nian, Paulo hatete ba komandante neʼe: “Haʼu husu Ita, fó lisensa mai haʼu atu koʼalia ba povu neʼe.” (Após 21:39) Komandante fó lisensa ba Paulo, no Paulo defende ninia fiar ho aten-brani.

14, 15. (a) Paulo esplika saida ba ema Judeu? (b) Komandante Roma halo saida deʼit atu bele hatene tanbasá ema Judeu sira hirus?

¹⁴ Paulo hatete: ‘Rona haʼu bá, haʼu sei defende haʼu-nia an.’ (Após 22:1) Paulo koʼalia ba ema-lubun ho lian Ebraiku, tan neʼe sira sai hakmatek. Nia koʼalia nakloke hodi esplika tanbasá nia sai Kristu nia dixípulu. Paulo koʼalia ho matenek hodi temi pontu balu neʼebé ema Judeu bele konfirma katak neʼe loos. Paulo hetan ona edukasaun husi Gamaliel neʼebé famozu, no fó-terus ba Kristu nia dixípulu sira. Ema balu neʼebé rona karik hatene kona-ba neʼe. Maibé iha dalan atu bá Damasku, nia haree vizaun ida no Kristu neʼebé moris hiʼas ona koʼalia ba nia. Sira neʼebé laʼo hamutuk ho Paulo bele haree naroman no rona lian ida, maibé sira la komprende liafuan sira-neʼe. (Haree nota estudu iha Após 9:7; 22:9, nwtsty-IN.) Tuirmai, ema neʼebé laʼo ho Paulo tenke lori nia toʼo Damasku tanba vizaun neʼe halo nia sai matan-delek, no Ananias neʼebé ema Judeu iha área neʼebá koñese mak kura Paulo liuhusi milagre.

¹⁵ Tuirmai, Paulo konta katak bainhira nia fila ba Jeruzalein, Jesus mosu ba nia iha templu. Rona tiha neʼe, ema Judeu sai hirus no hakilar: “Halakon tiha mane neʼe husi rai, tanba nia la merese atu moris!” (Após 22:22) Atu bele salva Paulo nia moris, komandante lori Paulo ba tropa nia fatin. Nia hakarak hatene tanbasá mak ema Judeu sira hirus Paulo, tan neʼe nia haruka soldadu sira atu baku Paulo no halo interrogasaun. Maibé, Paulo aproveita ninia direitu tuir lei hodi fó-hatene katak nia mak sidadaun Roma. Jeová nia povu ohin loron mós uza lei atu defende sira-nia fiar. (Haree kaixa “Roma nia lei no sidadaun Roma” no “Defende liafuan diʼak tuir lei iha tempu modernu”.) Bainhira rona katak Paulo mak sidadaun Roma, komandante neʼe rekoñese katak nia presiza uza dalan seluk atu buka informasaun liután. Loron tuirmai nia halibur ulun-naʼin sira husi Sinédriu, ema Judeu nia tribunál aas liu, no lori Paulo bá hasoru sira.

“Haʼu ema Farizeu ida” (Apóstolu 23:1-10)

16, 17. (a) Saida mak akontese bainhira Paulo koʼalia iha Sinédriu nia oin? (b) Bainhira Paulo hetan baku, oinsá nia hatudu ezemplu kona-ba haraik an?

¹⁶ Paulo komesa defende ninia an iha Sinédriu nia oin hodi hatete: “Maun-alin sira, toʼo agora haʼu sempre moris ho konxiénsia neʼebé moos iha Maromak nia oin.” (Após 23:1) Maibé ema ida korta ninia liafuan. Bíblia hatete: “Ho ida-neʼe, amlulik boot Ananias haruka sira neʼebé hamriik besik nia atu baku Paulo nia ibun.” (Após 23:2) Neʼe aat duni! Neʼe la justu tanba duun Paulo nuʼudar bosok-teen maski la iha prova! Tan neʼe, Paulo hatete: “Maromak mós sei baku ó, ó ema laran-makerek. Ó tuur atu tesi-lia ba haʼu tuir Ukun-Fuan ka? Maibé ó rasik kontra Ukun-Fuan hodi haruka ema baku haʼu.”—Após 23:3.

¹⁷ Ema balu neʼebé rona hakfodak, laʼós tanba ema neʼebé baku Paulo, maibé tanba Paulo nia reasaun! Sira hatete: “Ó koʼalia aat hasoru Maromak nia amlulik boot ka?” Tuirmai Paulo fó ezemplu furak kona-ba haraik an no respeitu Ukun-Fuan. Nia hatete: “Maun-alin sira, haʼu la hatene katak nia mak amlulik boot. Tanba hakerek nanis ona: ‘Imi labele koʼalia aat hasoru ukun-naʼin ida iha imi-nia povu nia leet.’”d (Após 23:4, 5; Éx 22:28) Agora Paulo uza dalan seluk atu defende an. Paulo hatene katak membru balu husi Sinédriu mak ema Farizeu no Saduseu, tan neʼe nia dehan: “Maun-alin sira, haʼu ema Farizeu ida, no ema Farizeu nia oan. Ohin haʼu hetan tesi-lia tanba haʼu fiar katak ema mate sira sei moris hiʼas.”—Após 23:6.

18. Tanbasá Paulo temi ninia an nuʼudar ema Farizeu, no oinsá mak ita bele banati-tuir Paulo nia ezemplu?

¹⁸ Tanbasá Paulo temi ninia an nuʼudar ema Farizeu? Tanba nia mak “ema Farizeu nia oan”, neʼe katak nia husi família neʼebé fiar ba ema Farizeu nia hanorin. Tan neʼe, ema barak nafatin haree nia nuʼudar ema Farizeu.e Maibé, tanbasá Paulo temi ninia an nuʼudar ema Farizeu maski sira-nia fiar kona-ba moris-hiʼas mak la loos? Ema Farizeu fiar katak ema iha klamar neʼebé kontinua moris no ema laran-loos nia klamar sei moris fali iha ema nia isin-lolon. Paulo la fiar hanorin neʼe. Nia fiar kona-ba moris-hiʼas neʼebé Jesus hanorin. (João 5:25-29) Maski nuneʼe, Paulo konkorda ho ema Farizeu kona-ba iha duni esperansa ba ema neʼebé mate, no neʼe la hanesan ho ema Saduseu neʼebé la fiar katak sei iha moris-hiʼas iha futuru. Ita mós bele banati-tuir Paulo nia ezemplu bainhira koʼalia ho ema Katólika ka Protestante. Ita bele dehan katak hanesan sira, ita mós fiar ba Maromak. Maski sira fiar ba maromak Trindade no ita fiar ba Maromak neʼebé Bíblia hanorin, maibé ita hotu fiar katak Maromak iha.

19. Tanbasá mak enkontru iha Sinédriu sai runguranga tebes?

¹⁹ Paulo nia liafuan halo membru Sinédriu nian haketak malu. Bíblia hatete: “Ema barak hahú hakilar ho lian makaʼas, no eskriba balu husi grupu Farizeu hamriik no koʼalia ho hirus dehan: ‘Ami la hetan sala ida iha ema neʼe; karik tanba kriatura espíritu ida ka anju ida mak koʼalia ba nia.’” (Após 23:9) Ema Saduseu sira la konkorda ho liafuan neʼebé dehan katak karik anju ida mak koʼalia ba Paulo, tanba sira la fiar katak anju iha! (Haree kaixa “Grupu Saduseu no Farizeu”.) Situasaun sai runguranga tebes, tan neʼe dala ida tan komandante neʼe presiza salva Paulo. (Após 23:10) Maski nuneʼe, Paulo nafatin iha perigu laran. Saida mak sei akontese ba Paulo? Ita sei aprende iha kapítulu tuirmai.