Organizasaun neʼebé halo Jeová nia hakarak

IHA mundu tomak, iha organizasaun relijiaun, polítiku, komersiál no sosiál neʼebé iha objetivu, hanoin, filozofia no hatudu hahalok oioin. Maibé iha organizasaun ida neʼebé la hanesan duni ho organizasaun sira seluk. Maromak nia Liafuan hatudu ho klaru katak organizasaun neʼe mak Testemuña ba Jeová.

² Ita kontente tanba sai ona parte ba Jeová nia organizasaun. Ita hatene ona Maromak nia hakarak, Ita mós fiar no halo tuir ida-neʼe. (Sal 143:10; Rom 12:2) Ita mak haklaken-naʼin neʼebé serbisu hamutuk ho Ita-nia maluk fiar-naʼin neʼebé hadomi malu iha mundu tomak. (2 Kor 6:4; 1 Ped 2:17; 5:9) Hanesan Maromak promete ona iha Ninia Liafuan, serbisu neʼe lori bensaun barak no ksolok boot. (Prov 10:22; Mc 10:30) Bainhira Ita halo tuir Jeová nia hakarak ho laran-metin, neʼe prepara Ita atu simu moris ba nafatin no futuru neʼebé kapás.​—1 Tim 6:18, 19; 1 João 2:17.

³ Ita-nia Kriadór Boot iha organizasaun úniku ida iha mundu tomak neʼebé halaʼo iha dalan teokrátiku. Liafuan “teokrátiku” signifika Jeová rasik mak dirije organizasaun neʼe, nia mak Ulun ba buat hotu. Maromak nia povu tau fiar tomak ba nia. Nia mak ita-nia Juís, Ida neʼebé Fó Ukun-Fuan, no ita-nia Liurai. (Isa 33:22) Tanba Maromak sempre organiza buat hotu ho loloos, nia mós halo arranju atu ita bele “serbisu hamutuk” ho nia hodi kumpre ninia hakarak.​—2 Kor 6:1, 2.

⁴ Nuʼudar mundu aat neʼe nia rohan besik daudaun, ita nafatin laʼo ba oin hodi halo tuir Kristu Jesus, ita-nia Ulun-Naʼin no Liurai neʼebé Maromak hili. (Isa 55:4; Apok 6:2; 11:15) Jesus rasik fó-hatene nanis katak ninia dixípulu sira sei halo serbisu neʼebé boot liu fali serbisu neʼebé nia halo iha rai. (João 14:12) Neʼe katak Jesus nia dixípulu sira sei aumenta barak liután, halaʼo serbisu haklaken ba tempu neʼebé kleur liu no iha fatin barak liu. Sira sei haklaken liafuan diʼak kona-ba Maromak nia Ukun iha mundu tomak.​—Mt 24:14; 28:19, 20; Após 1:8.

⁵ Jesus nia liafuan neʼe sai realidade duni. Maibé hanesan Jesus mós esplika, serbisu atu haklaken liafuan diʼak sei remata iha tempu neʼebé Jeová deside ona. Profesia sira neʼebé temi iha Maromak nia Liafuan hatudu ho klaru katak Jeová nia loron neʼebé boot no kmanek besik ona.​—Joel 2:31; Sof 1:14-18; 2:2, 3; 1 Ped 4:7.

⁶ Bainhira ita komprende didiʼak Jeová nia hakarak iha loron ikus sira-neʼe, ita presiza hakaʼas an liután atu halo tuir ninia hakarak. Tan neʼe, ita tenke hatene didiʼak oinsá Jeová nia organizasaun halaʼo serbisu, no ita presiza apoia ida-neʼe ho laran tomak. Buat hotu neʼebé organizasaun halo mak bazeia ba Bíblia nia prinsípiu, mandamentu, ukun-fuan, orden, regra no hanorin sira.​—Sal 19:7-9.

⁷ Bainhira Jeová nia povu kaer metin ba matadalan husi Bíblia, sira bele serbisu hamutuk ho dame no unidade. (Sal 133:1; Isa 60:17; Rom 14:19) Tanbasá mak ita no maluk fiar-naʼin hotu hatudu laran-metin ba malu? Tanba domin. Ita halo buat hotu tanba domin no ita tau domin nuʼudar ita-nia roupa. (João 13:34, 35; Kol 3:14) Buat hotu neʼe tuir Jeová nia hakarak, tan neʼe ita bele laʼo ba oin hamutuk ho Jeová nia organizasaun parte lalehan nian.

JEOVÁ NIA ORGANIZASAUN PARTE LALEHAN NIAN

⁸ Profeta Isaias, Ezequiel no Daniel haree vizaun oioin kona-ba Jeová nia organizasaun parte lalehan nian. (Isa, kap. 6; Eze, kap. 1; Dan 7:9, 10) Apóstolu João mós haree vizaun ida kona-ba Maromak nia arranju iha lalehan, no nia hakerek kona-ba neʼe iha livru Apokalipse. João haree Jeová tuur iha kadunan neʼebé kmanek, no anju sira neʼebé haleʼu nia dehan: “Maromak Jeová mak santu, santu, santu. Nia mak Ida neʼebé Kbiit Boot Liu Hotu, neʼebé iha uluk, iha agora no atu mai.” (Apok 4:8) João mós haree “bibi-oan ida hamriik hela besik kadunan”, neʼe mak Maromak nia Bibi-Oan, Jesus Kristu.​—Apok 5:6, 13, 14; João 1:29.

⁹ Vizaun kona-ba Jeová neʼebé tuur iha ninia kadunan hatudu katak nia mak Ulun ba organizasaun neʼe. Kona-ba Jeová no ninia pozisaun neʼebé aas, 1 Krónikas 29:11, 12 hatete: “Oh Jeová, Ita mak boot no iha kbiit, Ita mak furak, iha dignidade no kmanek, tanba buat hotu iha lalehan no rai mak Ita-nian. Oh Jeová, Ita mak ukun-naʼin. Ita mak halo Ita-nia an nuʼudar ulun ba buat hotu. Rikusoin no glória mak husi Ita, Ita ukun buat hotu, no Ita-nia liman iha kbiit no forsa, no Ita-nia liman bele fó kbiit no forsa ba ema.”

¹⁰ Nuʼudar Jeová nia maluk serbisu-naʼin, Jesus Kristu simu pozisaun neʼebé aas iha lalehan no podér boot husi Maromak. Tuir loloos, Maromak “tau ona buat hotu iha Kristu nia ain okos, no halo nia sai nuʼudar ulun ba buat hotu iha kongregasaun”. (Éf 1:22) Apóstolu Paulo hatete kona-ba Jesus: “Maromak foti nia ba pozisaun neʼebé aas liu no ho laran-diʼak Maromak fó ba nia naran ida neʼebé boot liu naran sira seluk, atu nuneʼe, iha Jesus nia naran mak sira hotu neʼebé iha lalehan no iha rai no mós iha rai okos tenke hakneʼak, no sira hotu tenke fó sai iha ema nia oin katak Jesus Kristu mak Naʼi neʼebé lori glória ba Aman Maromak.” (Flp 2:9-11) Tan neʼe, ita bele tau fiar tomak ba Jesus Kristu nuʼudar Ulun-Naʼin neʼebé hatudu hahalok justisa.

¹¹ Profeta Daniel haree vizaun ida kona-ba “Naʼi husi Horiuluk Kedas” neʼebé tuur iha kadunan no “anju millaun ida serbí nia, no anju millaun atus ida hamriik iha ninia oin”. (Dan 7:9, 10) Bíblia esplika katak anju sira-neʼe mak kriatura espíritu neʼebé “halo serbisu santu” no “Maromak haruka sira atu serbí ema sira neʼebé sei hetan salvasaun”. (Ebr 1:14) Maromak organiza didiʼak kriatura espíritu sira-neʼe tuir sira ida-idak nia pozisaun no knaar iha Ninia organizasaun.​—Kol 1:16.

¹² Kuandu ita hanoin kleʼan kona-ba Jeová nia organizasaun parte lalehan nian, ita bele komprende Isaias nia sentimentu bainhira nia “haree Jeová tuur hela iha ninia kadunan neʼebé iha fatin aas tebes”, no iha kadunan nia parte leten “iha serafín sira”. Isaias dehan: “Susar ba haʼu! Haʼu sei mate duni, tanba haʼu mak mane ida neʼebé ibun la moos, no haʼu hela entre povu neʼebé ibun la moos; tanba haʼu-nia matan rasik haree ona Liurai Jeová neʼebé ukun tropa lalehan nian!” Loos duni, kuandu Isaias haree katak Jeová nia organizasaun mak boot no kmanek tebes, nia hakfodak no sente kiʼik deʼit. Vizaun neʼe book tebes Isaias nia laran. Tan neʼe, bainhira nia rona lian husi lalehan neʼebé husu nia atu halaʼo serbisu espesiál hodi fó sai Jeová nia liafuan tesi-lia nian, Isaias hatán: “Haʼu mak neʼe! Haruka haʼu bá!”​—Isa 6:1-5, 8.

¹³ Bainhira ita komprende didiʼak kona-ba Jeová nia organizasaun no hafolin ida-neʼe, neʼe mós sei book ita-nia laran hanesan ho Isaias. Jeová nia organizasaun kontinua laʼo ba oin, tan neʼe ita mós presiza hakaʼas an atu laʼo tuir organizasaun neʼe. Ita hotu hakarak hatudu katak ita tau fiar ba Jeová nia organizasaun ohin loron.

JEOVÁ NIA ORGANIZASAUN KONTINUA LAʼO BA OIN

¹⁴ Profesia husi Ezequiel kapítulu 1 esplika katak Jeová lori karreta lalehan nian neʼebé boot tebes. Karreta kmanek neʼe reprezenta Jeová nia organizasaun parte lalehan nian neʼebé ita labele haree ho matan. Jeová dirije ninia organizasaun neʼe ho domin hodi kumpre ninia hakarak.​—Sal 103:20.

¹⁵ Roda ida-idak iha karreta neʼe iha roda seluk iha laran no iha medida hanesan. Roda ida junta ho roda seluk hodi sai kabuar. Tan neʼe, roda sira-neʼe bele “muda ba diresaun naran deʼit husi diresaun haat”. (Eze 1:17) Roda sira-neʼe bele troka diresaun lalais. Maibé, neʼe la dehan katak karreta neʼe halai arbiru no la iha mak kontrola. Jeová la husik ninia organizasaun atu halai ba diresaun arbiru deʼit. Ezequiel 1:20 dehan: “Sira bá fatin naran deʼit neʼebé espíritu hakarak sira atu bá.” Neʼe katak Jeová uza ninia espíritu atu dirije ninia organizasaun tuir ninia hakarak. Se nuneʼe, pergunta neʼebé Ita presiza husu ba Ita-nia an mak: ‘Haʼu laʼo tuir karreta lalehan nian ka lae?’

¹⁶ “Laʼo tuir” Jeová nia organizasaun la dehan katak ita tuir deʼit reuniaun sira no bá haklaken. Loloos, liafuan “laʼo tuir” signifika ita laʼo ba oin no hametin ita-nia relasaun ho Maromak. Ita “buka-hatene loloos buat sira neʼebé importante liu” no kontinua simu ai-han espirituál neʼebé foun liu. (Flp 1:10; 4:8, 9; João 17:3) Ita mós presiza hanoin-hetan katak baibain organizasaun iha arranju oioin no ema tenke serbisu hamutuk. Tan neʼe, ita presiza uza didiʼak ita-nia tempu, forsa, talentu, rikusoin no sasán neʼebé Jeová fó mai ita atu kumpre ninia serbisu. Bainhira ita laʼo tuir Jeová nia karreta lalehan nian, ita hatudu katak ita moris tuir mensajen neʼebé ita haklaken.

¹⁷ Jeová nia organizasaun ajuda ita hotu atu laʼo ba oin no halo tuir ninia hakarak. Ita labele haluha katak Jeová mak lori ninia karreta lalehan nian. Tan neʼe, bainhira ita laʼo tuir karreta neʼe, ita hatudu katak ita respeitu no tau fiar ba Jeová neʼebé sai nuʼudar ita-nia Fatuk Boot. (Sal 18:31) Bíblia promete: “Jeová sei fó forsa ba ninia povu. Jeová sei haraik dame nuʼudar bensaun ba ninia povu.” (Sal 29:11) Bainhira ita sai parte ba Jeová nia organizasaun ohin loron, nia haraik mai ita kbiit no dame nuʼudar ninia povu. Sin, ita fiar duni katak ita sei kontinua simu bensaun barak liután bainhira ita halo tuir Jeová nia hakarak agora no ba nafatin.