PERGUNTA 10
Oinsá mak Bíblia bele ajuda haʼu-nia moris?
SAIDA MAK HAʼU SEI HALO?
Imajina toʼok situasaun neʼe: David lori hela karreta iha fatin neʼebé nia la hatene. Sinál sira iha estrada ninin hatudu katak neʼe laʼós fatin neʼebé nia hakarak atu bá. Loos duni, nia lakon dalan ona. Karik ida-neʼe akontese tanba nia liu iha dalan neʼebé sala durante ninia viajen.
Se ó mak iha David nia situasaun, saida mak ó sei halo?
PARA HODI HANOIN LAI!
Ó bele hili ida husi opsaun tuirmai neʼe:
Husu ba ema.
Loke mapa, ka ó-nia tablet atu buka-hatene dalan neʼebé loos.
Kontinua lori karreta hodi hein katak ó bele hetan dalan neʼebé loos.
Karik opsaun C ladún diʼak.
Opsaun B diʼak liu fali opsaun A, tanba ó bele lori ó-nia mapa ka tablet iha ó-nia viajen tomak, no neʼe ajuda ó atu la lakon dalan.
Bíblia mós bele ajuda ó iha dalan neʼebé hanesan!
Neʼe mak livru neʼebé fahe ona ba ema barak liu, no bele
ajuda ó atu rezolve problema oioin neʼebé mosu iha ó-nia moris
ajuda ó atu hatene didiʼak ó-nia an, no sai ema neʼebé diʼak liu
hanorin ó oinsá atu iha moris neʼebé diʼak liu hotu
RESPOSTA BA PERGUNTA IMPORTANTE SIRA
Husi tempu neʼebé ita foin bele koʼalia, ita husu pergunta barak.
Tanbasá mak lalehan kór azúl?
Fitun sira halo ho saida?
Ikusmai, ita mós komesa husu pergunta oioin kona-ba buat neʼebé akontese haleʼu ita.
Tanbasá mak buat aat akontese?
Tanbasá mak ema mate?
Oinsá se resposta ba pergunta sira-neʼe iha ona Bíblia laran?
Ema barak hanoin katak Bíblia nia istória laʼós istória neʼebé tebes. Sira dehan, Bíblia mak livru antigu deʼit, ka susar liu atu komprende. Maibé Bíblia mak hanesan neʼe duni ka lae? Ka ema mak hanoin sala kona-ba Bíblia?
Porezemplu, ema hanoin, Bíblia dehan katak Maromak mak ukun mundu. Maibé ida-neʼe loos ka lae? Mundu neʼe runguranga tebes! Mundu neʼe nakonu ho susar, terus, moras, mate, kiak no dezastre. Oinsá mak Maromak neʼebé domin bele halo hanesan neʼe?
Ó hakarak hatene resposta ba pergunta neʼe ka lae? Bíblia nia hanorin kona-ba neʼe sei halo ó hakfodak tebes!
Karik ó haree ona katak matadalan sira neʼebé fó sai iha livru neʼe foti husi Bíblia. Ami Testemuña ba Jeová fiar katak Bíblia nia matadalan bele ajuda ita atu halaʼo ita-nia moris. Neʼe tanba “Maromak mak leno Eskritura hotu no neʼe diʼak atu hanorin, atu hatudu sai buat neʼebé sala, atu hadiʼa buat hotu”. (2 Timóteo 3:16, 17) Entaun, ó sei halo saida? Ami fó laran-manas ba ó atu buka-hatene rasik kona-ba livru antigu neʼe, neʼebé ninia matadalan sira sei iha folin-boot toʼo ohin loron!