Paulo bá Roma

Paulo nia viajen terseiru remata iha Jeruzalein. Iha neʼebá, ema kaer nia no hatama nia ba komarka. Kalan ida, Jesus mosu iha vizaun no dehan ba Paulo: ‘Ó sei bá Roma atu haklaken liafuan diʼak.’ Tuirmai ema lori Paulo husi Jeruzalein ba Sezareia, no nia iha komarka laran durante tinan rua. Bainhira Governadór Festo tesi-lia ba Paulo, Paulo dehan: ‘Haʼu hakarak César mak tesi-lia mai haʼu iha Roma.’ Festo dehan: ‘Tanba ó husu nuneʼe, ó sei bá César.’ Paulo saʼe ró bá Roma hamutuk ho Lucas no Aristarco.

Iha tasi klaran, anin boot huu makaʼas ba loron barak. Ema hotu hanoin katak sira sei mate. Maibé Paulo dehan: ‘Maluk sira, anju ida mosu iha haʼu-nia mehi no dehan: “Keta taʼuk Paulo. Ó sei toʼo duni iha Roma no ema hotu iha ró laran sei la mate.” Tan neʼe, aten-brani bá! Ita sei la mate.’

Anin no laloran boot baku ró neʼe ba loron 14. Tuirmai, sira haree illa ida. Neʼe mak illa Malta. Ró neʼe kona rai-henek iha tasi okos no rahun, maibé ema hotu iha ró laran naʼin-276 seguru. Ema balu nani, no ema seluk kaer ró nia parte neʼebé rahun hodi bele toʼo tasi-ibun. Ema iha Malta tau matan ba sira no sunu ahi atu haneruk.

Fulan tolu liu tiha, soldadu sira lori Paulo bá Roma ho ró seluk. Bainhira Paulo toʼo Roma, maluk Kristaun sira bá hasoru nia. Kuandu haree sira, Paulo fó agradese ba Jeová no sai aten-brani. Maski Paulo mak dadur, maibé nia hela iha uma neʼebé aluga no soldadu ida mak hein nia. Nia hela iha neʼebá durante tinan rua. Ema bá vizita nia no nia haklaken kona-ba Maromak nia Ukun no hanorin kona-ba Jesus. Paulo mós hakerek karta sira ba kongregasaun oioin iha Ázia Menór no Judeia. Jeová uza duni Paulo atu habelar liafuan diʼak ba nasaun sira.