Ita halo ona programa atu estuda Bíblia ka lae?
TINAN kotuk, Grupu Administradór fó-hatene kona-ba mudansa ba reuniaun kongregasaun nian atu iha tempu barak liután atubele estuda Bíblia no atu estuda nuʼudar família. Se karik Ita mak família nia ulun, importante atu Ita estuda Bíblia beibeik ho Ita-nia feen no oan sira atu bele lori diʼak ba sira. Feen-laʼen neʼebé seidauk iha oan presiza uza tempu atu estuda Bíblia hamutuk. Irmaun ka irmán klosan sira neʼebé la iha responsabilidade kona-ba família bele uza tempu neʼe ho didiʼak atu estuda Bíblia mesak.
Irmaun barak hatudu oinsá sira hafolin tebes arranju atu uza kalan ida atu halaʼo Adorasaun Família nian. Porezemplu, Kevin, neʼebé serbí nuʼudar katuas iha kongregasaun, hatete: “Liafuan ‘obrigadu’ latoʼo atu fó sai oinsá ami iha kongregasaun sente. Nuʼudar katuas, ami koʼalia tiha ona kona-ba oinsá ami bele aproveita tempu neʼebé uluk uza atu tuir reuniaun hodi nuneʼe ami bele halo tuir buat neʼebé Grupu Administradór husu, neʼe mak estuda ho ami-nia família.”
Jodi, neʼebé ninia laʼen serbí nuʼudar katuas iha kongregasaun, hatete: “Ami iha oan-feto naʼin-tolu, ho tinan 15, 11, no 2. Foin lalais ami muda ba kongregasaun tilun-diuk nian. Ami presiza hakaʼas an no uza tempu barak atubele prepara ba reuniaun hotu. Maibé ho mudansa ida-neʼe, agora ami iha kalan ida atu ami bele halaʼo adorasaun nuʼudar família!”
John no Joana, kaben-naʼin neʼebé serbí nuʼudar pioneiru regulár, hakerek: “Uluk, ami-nia estudu Bíblia nuʼudar família la halaʼo beibeik tanba ami tenke buka tempu atu halo ida-neʼe hamutuk ho atividade kongregasaun nian seluk. Arranju foun ida-neʼe mak prezente husi Maromak Jeová. Tan neʼe, se karik ami uza tempu neʼe iha dalan neʼebé loos, ami sente kmaan.”
Tony, irmaun klosan ho tinan 25, hili tersa kalan nuʼudar nia loron atu estuda Bíblia. Nia uza loron seluk atu prepara ba reuniaun kongregasaun nian. Maski nuneʼe, Tony hatete: “Haʼu sempre hein ba tersa kalan ho laran-kontente.” Tanbasá? Tony esplika: “Tanba kalan neʼe mak haʼu-nia tempu espesiál atu hamutuk ho Maromak Jeová. Durante oras rua nia laran haʼu estuda informasaun neʼebé hametin liután haʼu-nia relasaun ho Maromak Jeová. Tanba agora haʼu iha tempu barak liu, haʼu bele hanoin didiʼak kona-ba eskritura sira neʼebé haʼu lee.” Saida mak rezultadu? “Maromak Jeová nia konsellu tama kleʼan liután ba haʼu-nia laran.” Nia fó ezemplu ida kona-ba neʼe: “Iha livru Pemahaman, haʼu lee kona-ba oinsá David no Jónatas habelun malu. Haʼu aprende buat barak kona-ba Jónatas nia hahalok neʼebé la hanoin an deʼit. Ninia ezemplu ajuda haʼu atu komprende diʼak liután oinsá haʼu bele sai belun loos ida. Haʼu sempre hein toʼo tersa kalan atubele buka-hetan buat folin-boot barak liután!”
La iha dúvida katak Maromak Jeová nia atan hotu sei hetan rezultadu diʼak hodi uza tempu barak liután atubele estuda Bíblia no atu halaʼo adorasaun família nian.