Estuda Bíblia mesak no estuda família nian mak importante
1. Saida mak Grupu Administradór hanoin mak importante liu ba ita ohin loron? Tanbasá?
1 Hanesan iha apóstolu sira-nia tempu, Grupu Administradór hanoin nafatin kona-ba Maromak Jeová nia povu nia diʼak. (Apos 15:6, 28) Hanesan kalohan metan neʼebé lori udan boot no anin fuik hakbesik rai ida, susar boot mós hakbesik daudaun ba mundu tomak. Nuneʼe, importante tebes atu haklaken-naʼin sira hotu iha relasaun neʼebé metin ho Maromak Jeová. Oinsá mak Ita sei uza tempu neʼebé uluk Ita uza atu tuir Reuniaun Estudu Livru nian? Ami hakarak atu imi uza tempu neʼe atu halaʼo adorasaun família nian. Hodi uza tempu neʼe ho matenek ita bele keʼe kleʼan liután Maromak nia Liafuan no bele kuru bee moris nian.—Sal 1:1-3; Rom 11:33, 34.
2. Oinsá mak Ita sei halaʼo Ita-nia adorasaun família nian?
2 Adorasaun família nian: Diʼak ba família nia ulun atu hakaʼas an atu halo sira-nia knaar iha Maromak Jeová nia oin hodi halaʼo programa estudu Bíblia família nian semana-semana. No mós atu halaʼo estudu neʼe iha dalan neʼebé diʼak ba família tomak. (Deut 6:6, 7) Irmaun no irmán klosan neʼebé la iha responsabilidade família nian bele uza tempu neʼe atu estuda Bíblia mesak no halo riset. Importante tebes katak ita hotu “uza buat hotu neʼebé diʼak”, neʼe inklui mós uza didiʼak ita-nia tempu hodi estuda no hanoin kleʼan, hodi nuneʼe bele hametin ita iha dalan espirituál atubele tahan hasoru ‘loron aat sira-neʼe’.—Ef 5:15, 16.
3, 4. Ita bele uza informasaun saida atu halaʼo adorasaun família nian? Tanbasá mak importante atu uza tempu ho diʼak atu halaʼo adorasaun neʼe?
3 Estuda uza livru saida: Ita bele uza Indeks Pokok Bahasan untuk Menara Pengawal iha Menara Pengawal husi 15 Dezembru kada tinan, ka Watchtower Library iha CD-ROM atu ajuda hili informasaun neʼebé bele halo Ita-nia estudu família nian halaʼo ho laran kontente. Família bele estuda informasaun iha Menara Pengawal, neʼebé mosu beibeik hanesan “Kunci Kebahagiaan Keluarga”, “Ajarlah Anak Anda”, no “Untuk Kaum Muda”. No mós, husi Sedarlah! neʼebé iha informasaun “Kaum Muda Bertanya” no informasaun seluk tan kona-ba kriasaun neʼebé kapás.
4 Hodi uza tempu atu lee Bíblia bele hametin liután Ita-nia fiar kona-ba Maromak nia matadalan no bele kona família hotu nia hanoin no laran. (Ebr 4:12) Dala ruma, karik Ita bele haree no koʼalia hamutuk kona-ba vídeo husi ita-nia organizasaun. Iha oportunidade barak atu halaʼo Ita-nia adorasaun família nian hodi uza informasaun oioin no iha dalan oioin. Diʼak atu husu ba Ita-nia nia família kona-ba saida mak sira gosta atu estuda iha adorasaun família nian, loos ka lae?
5. Tanbasá mak estuda Bíblia mesak no estuda família nian importante tebes agora?
5 Tansá importante agora: Hametin ita-nia relasaun ho Aman Jeová sei halo ita prontu atu “hamriik metin no haree salvasaun husi Maromak Jeová”. (Êx 14:13) Inan-aman presiza Maromak nia ajuda atu haboot oan sira “iha ema laran-aat no maksalak sira leet”. (Flp 2:15) Oan sira presiza inan-aman nia ajuda atu tahan hasoru problema morál nian neʼebé sai aat liután iha eskola sira ohin loron. (Prov 22:3, 6) Diʼak ba kaben-naʼin sira atu hametin liután sira-nia relasaun ho Maromak Jeová hanesan “tali tolu neʼebé bobar hamutuk”. (Ecle 4:12) Entaun, mai ita hotu uza ho matenek tempu uitoan antes susar boot neʼe toʼo atu hametin ka “halo boot liután” ita-nia fiar!—Jud 20.