Feto-faluk no mane-faluk saida mak sira presiza? Oinsá ita bele ajuda sira?

Joana, mesak iha ninia uma kiʼik ho dapur kiʼik, no nia ladún hanoin kona-ba buat neʼebé nia halo, nia tau deʼit bikan ho kanuru iha meza leten. Nia hatene katak nia presiza han buat ruma. Maibé lakleur, nia hakfodak hateke ba bikan rua iha nia oin, no ida-neʼe halo nia tanis. Nia tau bikan rua iha meza leten tanba nia toman atu halo ida-neʼe. Ninia kaben mate ona ba tinan rua.

EMA neʼebé seidauk hasoru situasaun hanesan neʼe, susar ba sira atu komprende terus neʼe mak oinsá. Tuir loloos, sira neʼebé hasoru ona situasaun hanesan neʼe presiza tempu atu neineik-neineik simu buat neʼebé foin akontese ba sira. Beryl, tinan 72, susar ba nia atu simu katak nia laʼen foin mate. Nia hatete: “Haʼu sente hanesan mehi. Haʼu la fiar katak nia sei la tama fali mai uma.”

Ema balu neʼebé lakon sira-nia ain ka liman, dala ruma sira “sente” nafatin katak sira seidauk lakon ida-neʼe. Nuneʼe mós ema neʼebé lakon sira-nia kaben, dala ruma sira sente katak sira “haree” sira-nia kaben iha ema-lubun nia leet, ka koʼalia ba sira-nia kaben neʼebé la iha ona!

Kuandu ema ida terus tanba lakon ninia kaben, dala barak família ka kolega sira la hatene halo saida atu ajuda. Ita hatene ema ruma neʼebé lakon ona ninia kaben ka lae? Se nuneʼe, oinsá mak ita bele ajuda nia? Saida mak ita presiza hatene atubele ajuda nia iha ninia tempu susar? Oinsá mak ita bele ajuda ema neʼebé lakon ninia kaben atu haksolok fali iha ninia moris?

Buat neʼebé ita labele halo

Karik família ka kolega sira mós sente laran-susar tanba ema faluk nia terus, no karik sira hakarak ajuda atu ema neʼe la triste ba tempu kleur. Maibé, matenek-naʼin ida neʼebé entrevista faluk sira hamutuk naʼin-700 hatete: “Ba ema neʼebé triste, la iha tempu neʼebé bele dehan toʼo ona.” Tan neʼe, duké hapara ema neʼebé lakon ninia kaben atu la triste tan, fó tempu ba nia atu fó sai ninia sentimentu.—Gênesis 37:34, 35; Jó 10:1.

Maski diʼak atu ajuda hodi prepara buat barak atu hakoi ema mate, maibé ita labele halo buat hotu ba sira. Paul, mane-faluk ida neʼebé tinan 49, hatete: “Haʼu kontente haʼu hetan ajuda, maibé haʼu kontente liután tanba sira husik haʼu atu halo desizaun rasik. Importante tebes ba haʼu atu buat hotu laʼo ho diʼak iha loron neʼebé hakoi haʼu-nia feen. Haʼu sente katak ida-neʼe mak dalan atu hatudu respeitu ba haʼu-nia feen ba dala ikus.”

Klaru katak ema neʼebé lakon sira-nia kaben hafolin tebes ajuda neʼebé ema seluk fó ba sira. Elena, feto-faluk neʼebé tinan 68, hatete: “Susar ba haʼu atu halo buat hotu atu hakoi-mate tanba haʼu seidauk bele halo desizaun ho loos. Tan neʼe haʼu kontente tebes katak haʼu-nia oan ho haʼu-nia feto-foun ajuda haʼu.”

No mós, lalika taʼuk atu koʼalia kona-ba ema neʼebé foin mate. Beryl, neʼebé temi uluk, hatete: “Haʼu-nia kolega sira ajuda haʼu barak tebes. Maibé, sira barak la koʼalia kona-ba John, haʼu-nia kaben. Ida-neʼe hanesan nia nunka iha, neʼe halo haʼu laran-moras.” Neineik-neineik, karik ema faluk hakarak koʼalia nakloke kona-ba sira-nia kaben. Ita hanoin-hetan hahalok diʼak ruma neʼebé ema mate neʼe uluk halo, ka istória diʼak ida kona-ba nia ka lae? Se nuneʼe, diʼak atu koʼalia kona-ba ida-neʼe ba ema neʼebé foin lakon ninia kaben. Lalika taʼuk atu koʼalia kona-ba neʼe. Se karik Ita sente katak diʼak atu hatete buat ruma, Ita bele fó sai saida mak Ita hafolin kona-ba ema neʼebé foin mate. Halo ida-neʼe bele ajuda ema neʼebé foin lakon ninia kaben atu haree katak ema seluk mós sente triste hanesan nia.—Roma 12:15.

Kuandu atu fó ajuda, labele fó konsellu barak demais ba ema neʼebé foin lakon ninia kaben. Labele obriga nia atu halo desizaun ruma kedas.a Diʼak atu husu Ita-nia an: ‘Saida deʼit mak haʼu bele halo atu ajuda família ka kolega neʼebé foin lakon ninia kaben atubele tahan tempu neʼebé susar liu iha ninia moris?’

Buat neʼebé ita bele halo

Loron balu depois ema neʼebé nia kaben foin mate, nia sei kontente atu simu ajuda. Ita bele ajuda hodi teʼin hahán, fó fatin ba família neʼebé mai husi dook atu hakoi-mate, ka bele fó tempu atu hamutuk ho ema neʼebé ninia kaben foin mate.

Ita mós presiza komprende katak mane no feto neʼebé lakon sira-nia kaben tahan hasoru susar neʼe iha dalan neʼebé la hanesan. Porezemplu, iha nasaun balu, mane neʼebé faluk porsentu limanulu liu la hein toʼo fulan 18 atu kaben fali. Maibé, ida-neʼe ladún akontese ho feto-faluk. Tansá mak la hanesan?

Maski ema barak fiar katak mane sira kaben fali tan deʼit sira buka sira-nia presiza isin nian ka presiza seksuál nian, maibé ida-neʼe laloos. Tuir loloos, tanba mane sira koʼalia nakloke ba sira-nia kaben deʼit, tan neʼe kuandu sira-nia kaben mate, ida-neʼe halo sira sente mesak tebes. Nuneʼe mak mane-faluk barak hanoin katak dalan atu halakon sira-nia sentimentu triste mak hodi kaben fali lalais, maski ida-neʼe bele hamosu problema seluk. Maibé, feto-faluk sira la hanesan neʼe, tanba sira bele hetan apoiu husi sira-nia belun. Nuneʼe, maski feto-faluk sira sente triste tanba mesak, maibé sira bele tahan ho sentimentu neʼe diʼak liu fali mane-faluk.

Saida mak ita bele halo atu fó kmaan ba sira neʼebé sente mesak tanba lakon sira-nia kaben? Helen, feto-faluk ida neʼebé tinan 49, hatete: “Ema barak hakarak ajuda, maibé la halo. Dala barak sira hatete: ‘Se presiza buat ruma, husu deʼit.’ Maibé haʼu hafolin tebes kuandu ema ida hatete: ‘Haʼu bá hola sasán. Hakarak mai hamutuk?’” Paul, neʼebé lakon ninia kaben tanba moras kankru, esplika tansá nia kontente kuandu ema konvida nia atu sai. Nia hatete: “Dala ruma, haʼu sente haʼu lakohi hamutuk ho ema ka koʼalia kona-ba haʼu-nia situasaun. Maibé kuandu haʼu ransu hamutuk ho kolega, haʼu sente diʼak liu, no haʼu la sente mesak. Haʼu sente katak ema hanoin haʼu, no ida-neʼe ajuda haʼu atu tahan.”b

Komprende ema nia sentimentu

Helen sente katak nia presiza tebes ema atu koʼalia ho nia liuliu kuandu ninia família barak fila fali ba sira-nia moris loroloron nian. Nia hatete: “Família no kolega fó ajuda barak kuandu haʼu-nia laʼen foin mate, maibé lakleur sira fila fali ba sira-nia moris baibain. Maibé haʼu seidauk bele halo ida-neʼe.” Hodi komprende katak ema faluk presiza maluk atu hamutuk ho sira, kolega neʼebé loos sei fó ajuda nafatin.

Karik faluk sira presiza ema atu hamutuk ho sira liuliu iha loron neʼebé sira la bele haluha, hanesan loron neʼebé sira selebra loron-kaben ka loron neʼebé sira-nia kaben mate. Elena, neʼebé temi uluk, hatete katak ninia oan-mane ajuda nia atu tahan sentimentu triste no mesak iha loron neʼebé nia hanoin fali ninia loron-kaben nian. Nia hatete: “Tinan-tinan, haʼu-nia oan Kevin lori haʼu sai loron tomak. Ami han-meiudia hamutuk, no ida-neʼe espesiál tebes ba ami naʼin-rua.” Diʼak atu hanoin kona-ba loron neʼebé susar liu ba ema faluk tanba neʼe mak tempu neʼebé sira hanoin fali sira-nia loron-kaben ka loron neʼebé sira-nia kaben mate. Karik ita bele halo planu hodi ita ka ema seluk atu hamutuk ho sira durante tempu neʼe.—Provérbios 17: 17.

Ema balu neʼebé lakon sira-nia kaben hetan mós ajuda hodi ransu hamutuk ho ema neʼebé hanesan ho sira. Ana, neʼebé feto-faluk ba tinan ualu ona, hatete katak ransu hamutuk ho kolega ida seluk neʼebé mós feto-faluk ajuda nia. Nia hatete: “Ninia hakaʼas-an atu tahan situasaun susar neʼe book haʼu atu halo hanesan, no fó laran-manas ba haʼu atu la husik ida-neʼe hanetik haʼu atu moris kontente fali.”

Sin, kuandu ema faluk tahan sira-nia susar hanesan neʼe, ikusmai sira mós bele fó forsa no ajuda ema seluk neʼebé mós lakon sira-nia kaben. Bíblia temi kona-ba feto-faluk naʼin-rua, Rute no ninia banin Noemi, neʼebé ajuda malu. Sira-nia istória hatudu oinsá mak hodi tau matan ba malu, ajuda sira atu tahan sira-nia situasaun susar tanba lakon sira-nia kaben.—Rute 1:15-17; 3:1; 4:14, 15.

Tempu atu kura

Maski ema faluk hanoin tebes sira-nia kaben neʼebé mate, maibé atubele kontente fali iha sira-nia moris, ema faluk presiza mós atu tau matan ba sira-nia moris loroloron nian. Liurai Salomão rekoñese katak iha “tempu atu tanis”, maibé nia mós hatete katak ema mós presiza “tempu atu kura”.—Eclesiastes 3:3, 4.

Paul, neʼebé temi uluk, esplika tansá susar ba nia atu haluha kona-ba tempu neʼebé nia kaben sei moris. Nia hatete: “Haʼu ho haʼu-nia kaben hanesan ai-hun rua neʼebé bobar hamutuk. Maibé kuandu ai-hun ida mate no lakon, ida seluk neʼebé hela haree la furak ona. Haʼu la sente diʼak atu mesak deʼit.” Tanba ema faluk balu laran-metin ba sira-nia kaben neʼebé mate ona, sira lakohi haluha kona-ba sira-nia kaben. Ema faluk seluk taʼuk atu halo buat ruma hodi kontente tanba hanoin katak halo ida-neʼe hanesan sira la laran-metin ona ba sira-nia kaben. Tan neʼe kuandu ema ruma konvida sira atu sai, sira lakohi. Oinsá mak ita bele ajuda atu kura sira neʼebé sente todan atu sai kmaan fali?

Buat ida neʼebé ita bele halo mak ajuda nia atu la taʼuk atu fó sai ninia sentimentu. Herbert, neʼebé faluk tinan neen ona, hatete: “Haʼu hafolin tebes kuandu ema neʼebé mai vizita haʼu tuur deʼit hodi rona haʼu koʼalia kona-ba buat neʼebé haʼu hanoin-hetan ka rona haʼu fó sai haʼu-nia hanoin ruma. Haʼu hatene katak susar uitoan ba ema seluk atu hamutuk ho haʼu, maibé haʼu hafolin tebes kuandu sira hatudu katak sira komprende haʼu-nia situasaun.” Paul mós hafolin ninia kolega ida neʼebé vizita nia beibeik atu husu nia sente oinsá. Paul hatete: “Haʼu hafolin tebes laran-diʼak no laran-maus neʼebé nia hatudu kuandu nia koʼalia mai haʼu, no ida-neʼe book haʼu atu fó sai ba nia oinsá haʼu sente.”—Provérbios 18:24.

Kuandu ema neʼebé lakon sira-nia kaben fó sai sira-nia sentimentu, hanesan sente sala, ka hirus, ida-neʼe importante tebes ba sira atu tahan no simu fali situasaun foun. Iha tempu uluk, buat neʼebé ajuda Liurai David hetan forsa atubele “hamriik” fali no atu simu situasaun kona-ba ninia oan mate, mak loke ninia laran ba Ida neʼebé diʼak liu hotu, Maromak Jeová.—2 Samuel 12:19-23.

Maski susar kuandu ema ida foin lakon ninia kaben, maibé importante ba nia atu fila fali ba ninia moris loroloron nian. Ita bele konvida nia iha ita-nia atividade balu loroloron nian, hanesan bá hola sasán, ka laʼo pasiar. Ita bele husu nia atu ajuda ita halo buat ruma. Ida-neʼe dalan ida seluk atu ajuda ema neʼebé lakon ninia kaben atu la sente mesak deʼit. Porezemplu, ita bele husu nia atu tau matan ba ita-nia oan ka husu nia hatudu oinsá atu teʼin ai-han ruma neʼebé nia gosta liu. Karik ita mós bele husu nia atu ajuda ita hadiʼa buat ruma iha uma. Hodi husu ema neʼebé lakon ninia kaben atu halo buat hirak-neʼe sei ajuda nia atu sente katak ninia moris iha folin.

Kuandu ema neʼebé lakon ninia kaben loke nia laran hodi fó sai ninia sentimentu ba ema seluk, ida-neʼe bele ajuda nia atu neineik-neineik kontente fali iha ninia moris. Yonette, feto-faluk ida neʼebé tinan 44 hatete: “Susar tebetebes ba haʼu atu fila fali ba haʼu-nia moris loroloron nian, hanesan halo serbisu uma laran, kontrola osan, no tau matan ba haʼu-nia oan naʼin-tolu.” Maibé, neineik-neineik Yonette hadiʼa nia moris no la husik atu sai runguranga deʼit, no nia mós hakaʼas an atu koʼalia iha dalan diʼak liután ho ninia oan sira. Nia mós sai prontu atu simu apoiu husi ninia belun sira.

“Moris mak prezente neʼebé folin-boot”

Atubele ajuda ema faluk iha dalan neʼebé fó rezultadu diʼak, família no kolega sira tenke hanoin tuir realidade neʼebé ema faluk hasoru. Karik ema faluk presiza fulan balu, ka tinan balu, atu neineik-neineik sai kontente fali iha ninia moris, tanba dala ruma nia bele sente diʼak maibé dala ruma mós nia bele sente triste fali. Loos duni, sira ‘laran susar’ tebetebes.—1 Reis 8:38, 39.

Kuandu ema neʼebé lakon ninia kaben triste fali, neʼe mak tempu neʼebé nia presiza ajuda atu halo desizaun diʼak no atu la hadook an husi ema seluk. Apoiu hanesan neʼe ajuda ema faluk barak atu foti desizaun diʼak iha sira-nia moris. Cláudio, faluk ida neʼebé tinan 60 hela iha rai-Áfrika, nia haklaken Maromak nia Liafuan hodi uza oras barak. Nia hatete: “Haʼu sente katak moris mak prezente neʼebé folin-boot maski haʼu laran-moras tanba lakon haʼu-nia feen.”

Kuandu ema ida lakon ninia kaben tanba mate, ninia moris la hanesan uluk ona. Maski nuneʼe, nia bele halo buat barak atu ajuda fali ema seluk.—Eclesiastes 11:7, 8.

[Nota-rodapé]

[Liafuan neʼebé foti husi pájina 11]

Kolega neʼebé loos sei hamutuk ho ema faluk iha sira-nia tempu susar no sei ajuda nafatin sira

[Kaixa/Dezeñu iha pájina 12]

Diʼak atu rai sasán husi kaben neʼebé mate ona ka lae?

Helen, neʼebé lakon ninia laʼen tinan balu liubá, hatete: “Haʼu rai nafatin haʼu-nia laʼen nia sasán barak. Haʼu lakohi soe sasán sira-neʼe tanba sasán sira-neʼe halo haʼu hanoin nafatin kona-ba buat barak neʼebé halo haʼu kontente.”

Cláudio fali, neʼebé lakon ninia feen tinan lima liu ona, hatete: “Tuir haʼu-nia hanoin, haʼu la presiza rai ninia sasán atu bele hanoin fali nia. Maibé hodi soe ninia sasán, ida-neʼe ajuda haʼu atu simu realidade katak nia mate ona.”

Ema sira-neʼe nia liafuan hatudu katak ema iha hanoin lahanesan kona-ba halo saida ho kaben neʼebé mate ona nia sasán. Nuneʼe, diʼak atu família no kolega sira la hatete sai sira-nia hanoin kona-ba halo saida ho sasán neʼe.—Galasia 6:2, 5.

[Dezeñu iha pájina 9]

Ema faluk sei hafolin ita-nia ajuda iha loron neʼebé susar liu ba sira

[Dezeñu iha pájina 9]

Keta haluha atu konvida sira atu bá fatin ruma

[Dezeñu iha pájina 10]

Ita bele konvida ema faluk iha ita-nia atividade loroloron nian ka halimar nian