Ideia balu kona-ba adorasaun família nian no estuda mesak
KOMESA husi fulan-Janeiru tinan 2009, kongregasaun husi Testemuña ba Jeová iha mundu tomak halo mudansa kona-ba ita-nia reuniaun semana-semana nian. Reuniaun neʼebé uluk ita halaʼo iha kalan rua iha loron baileet, agora ita halaʼo iha kalan ida deʼit. No Grupu Administradór fó laran-manas ba ita atu uza kalan ida atu halaʼo adorasaun família nian ka estuda mesak. Ita uza didiʼak tempu neʼe ka lae? Arranju neʼe lori rezultadu diʼak ba Ita ka lae?
Informasaun saida mak ita bele uza ba adorasaun família nian? Grupu Administradór la halo programa ida ba família hotu-hotu atu halo tuir, tanba ita hotu iha situasaun neʼebé la hanesan. Tan neʼe, diʼak ba família nia ulun ka ita ida-idak atu hanoin oinsá mak ita bele uza kalan neʼe iha dalan neʼebé diʼak.
Irmaun-irmán balu uza tempu neʼe atu prepara ba reuniaun sira, maibé laʼós ida-neʼe deʼit mak ita presiza halo kuandu halaʼo adorasaun família nian. Família balu lee Bíblia no koʼalia hamutuk kona-ba neʼe, no mós halo drama kiʼik, liuliu atu ajuda labarik sira. Tan neʼe, ita la presiza halaʼo adorasaun família nian hanesan ho reuniaun hodi uza pergunta no resposta. Kuandu família sente hakmatek no kontente, neʼe halo fasil ba sira atu koʼalia no fó ideia ba malu. Se família hotu sente kontente, ida-neʼe bele ajuda sira atu fó sai hanoin no halo buat oioin hodi tuir sira-nia ideia, no ida-neʼe halo sira haksolok tebes no la bele haluha tempu diʼak neʼebé sira halo.
Aman ida neʼebé iha oan naʼin-tolu hatete: “Ami halo buat oioin hodi tuir ami-nia programa atu lee Bíblia. Ami ida-idak lee uluk kapítulu balu husi Bíblia. Ami-nia oan sira buka informasaun liután kona-ba pontu balu neʼebé sira hili, depois sira hatoʼo informasaun neʼebé sira hetan ba ami hotu. Dala barak Michael [tinan 7] hakerek dezeñu ka hakerek istória badak. David [tinan 13] no Kaitlyn [tinan 15] hakerek istória husi Bíblia hodi finje katak sira mós iha tempu neʼebá no haree duni buat neʼebé akontese. Porezemplu, kuandu ami lee istória kona-ba José esplika Faraun nia atan naʼin-rua nia mehi iha dadur laran, Kaitlyn hakerek istória kona-ba neʼe hodi finje sai dadur ida neʼebé haree buat neʼebé akontese daudaun.”—Gên, kap. 40.
Klaru katak ita ida-idak iha situasaun neʼebé la hanesan. Dalan neʼebé diʼak ba família ida ka ema ida, karik ladún diʼak ba ema seluk. Pájina iha sorin neʼe hatudu ideia balu neʼebé ita bele uza kuandu ita halaʼo adorasaun família nian ka estuda mesak. Karik ita rasik mós iha ideia oioin kona-ba neʼe.
[Kaixa/Dezeñu iha pájina 6, 7]
Família neʼebé iha oan joven:
• Lee informasaun husi livru Pertanyaan Kaum Muda—Jawaban yang Praktis no koʼalia hamutuk.
• Finje hanesan ita iha tempu Bíblia. (Haree Menara Pengawal 15 Mei 1996, pájina 14 parágrafu 17-18.)
• Koʼalia hamutuk kona-ba planu ba futuru no mós planu neʼebé ita bele kumpre kedas.
• Haree vídeo kona-ba Bíblia no koʼalia kona-ba neʼe.
• Uza informasaun “Ba joven sira” iha Livru Haklaken.
Feen-laʼen neʼebé la iha oan:
• Koʼalia hamutuk kona-ba informasaun husi livru Halaʼo Moris neʼebé Kontente nuʼudar Família, kapítulu 1, 3, 11-16.
• Hodi tuir programa lee Bíblia, fahe ba malu informasaun neʼebé ida-idak prepara ona kona-ba pontu balu.
• Prepara ba Estudu Bíblia iha Kongregasaun ka Estudu Livru Haklaken.
• Koʼalia ba malu kona-ba oinsá atu aumenta serbisu ba Jeová nuʼudar feen-laʼen.
Irmaun no irmán klosan ka sira neʼebé la iha família iha lia-loos:
• Estuda livru sira neʼebé foin simu iha reuniaun boot ba loron tolu.
• Lee Buku Tahunan foun ka tinan uluk nian.
• Buka informasaun liután atubele hatán ba pergunta sira neʼebé ema sempre husu Ita iha haklaken-fatin.
• Prepara oinsá atu koʼalia iha serbisu haklaken.
Família neʼebé iha oan kiʼik:
• Halo drama kona-ba istória Bíblia.
• Halimar ai-sasiʼik. Porezemplu, Ita bele uza pájina 30 no 31 iha Sedarlah!
• Dala ruma halimar halo dezeñu ka uza sasán ruma atu koʼalia kona-ba istória husi Bíblia. (Haree Livru Haklaken 15 Fevereiru 2011, pájina 11 ho títulu “Ita-nia hakaʼas-an sei lori rezultadu diʼak”.)
• Uza informasaun “Hanorin Ita-nia oan” iha Livru Haklaken.