Hametin relasaun ho Jeová maski serbí iha fatin neʼebé koʼalia língua seluk
“Haʼu hafolin Ita-nia liafuan iha haʼu-nia laran.”—SALMO (MAZMUR) 119:11.
1-3. (a) Ita tenkesér tau uluk saida? (b) Ema neʼebé aprende língua foun hasoru susar saida deʼit, no neʼe hamosu pergunta saida deʼit? (Haree foto iha leten.)
OHIN loron, Testemuña ba Jeová rihun ba rihun hola parte hodi kumpre daudauk Bíblia nia profesia ida kona-ba haklaken “ba nasaun hotu, suku hotu, lian hotu no povu hotu”. (Apokalipse 14:6) Ita aprende daudauk língua foun ka lae? Ema balu serbí nuʼudar misionáriu ka muda atu serbí iha rai neʼebé presiza liután haklaken-naʼin. Balun tuir reuniaun neʼebé koʼalia língua seluk iha sira-nia rai rasik.
2 Maromak nia povu hotu tenkesér tau uluk sira rasik nia relasaun diʼak ho Jeová no família nian. (Mateus 5:3) Dala ruma tanba ita iha buat barak atu halo, neʼe halo susar ba ita atu halaʼo estuda mesak ho didiʼak. Maibé sira neʼebé serbí iha kongregasaun neʼebé koʼalia língua seluk, sira mós hasoru susar seluk tan.
3 Sira neʼebé hakarak serbí iha kongregasaun neʼebé koʼalia língua seluk laʼós deʼit presiza atu aprende língua foun, maibé sira mós presiza kontinua estuda buat neʼebé kleʼan husi Maromak nia Liafuan. (1 Korinto 2:10) Oinsá mak sira bele halo nuneʼe, tanba sira seidauk komprende didiʼak língua foun neʼe? No oinsá mak inan-aman bele ajuda sira-nia oan atu Maromak nia Liafuan mós bele book oan sira-nia laran?
BUAT NEʼEBÉ LORI PERIGU BA ITA-NIA RELASAUN HO JEOVÁ
4. Saida mak bele lori perigu ba ita-nia relasaun ho Jeová? Fó toʼok ezemplu.
4 Se ita la komprende Maromak nia Liafuan iha língua foun ida, neʼe bele lori perigu ba ita-nia relasaun ho Jeová. Bainhira Neemias bá Jeruzalein, nia haree katak ema judeu nia oan barak la hatene koʼalia lia-ebraiku. (Lee Neemias 13:23, 24.a) No tanba labarik sira-neʼe la bele komprende Maromak nia Liafuan, neʼe halo fraku sira-nia relasaun ho Jeová.—Neemias 8:2, 8.
5, 6. Inan-aman balu neʼebé serbí iha kongregasaun neʼebé koʼalia língua seluk haree saida, no tanbasá mak neʼe akontese?
5 Ohin loron inan-aman balu mós haree katak, tanba serbí iha kongregasaun neʼebé koʼalia língua seluk, neineik-neineik oan sira-nia relasaun ho Jeová mós sai fraku. Tanba oan sira ladún komprende informasaun neʼebé sira rona husi reuniaun, neʼe susar atu book sira-nia laran. Pedro muda husi Amérika Súl ba Austrália hamutuk ho ninia família, nia dehan: “Bainhira atu koʼalia kona-ba buat espirituál nian, tenkesér envolve laran no sentimentu.”[1] (Haree nota husi lisaun.)—Lucas 24:32.
6 Bainhira ita lee iha língua seluk, neʼe ladún book ita-nia laran no sentimentu se kompara ho lee iha ita-nia língua rasik. No mós tanba susar atu komprende malu iha língua foun, neʼe bele halo ita kole no bele lori mós perigu ba ita-nia relasaun ho Jeová. Tan neʼe mak, maski ita hakarak tebes atu serbí iha kongregasaun neʼebé koʼalia língua seluk, maibé ita mós presiza tau matan didiʼak ba ita-nia relasaun ho Jeová.—Mateus 4:4.
SIRA PROTEJE SIRA-NIA RELASAUN DIʼAK HO JEOVÁ
7. Iha dalan saida mak ema Babilónia koko atu obriga Daniel simu sira-nia kultura no relijiaun?
7 Bainhira ema Babilónia lori Daniel ho ninia belun sira ba rai-Babilónia, ema koko atu obriga sira hodi simu rai neʼe nia kultura no relijiaun. Oinsá? Ema hanorin sira atu “koʼalia ema Kaldeia nia língua” no fó ema Babilónia nia naran ba sira. (Daniel 1:3-7) Sira fó naran ida ba Daniel neʼebé iha ligasaun ho Bel, maromak boot liu iha Babilónia. Karik Liurai Nabukodonosor halo nuneʼe atu halo Daniel fiar katak ema Babilónia nia maromak mak forsa liu fali Daniel nia Maromak Jeová.—Daniel 4:8.
8. Oinsá mak Daniel bele kaer metin ba ninia relasaun ho Jeová iha ema nia rai?
8 Maski ema haruka Daniel atu han liurai nia hahán gostu, maibé nia “deside iha ninia laran” katak nia sei la han hahán neʼebé kontra Maromak nia ukun-fuan. (Daniel 1:8) Oinsá mak Daniel bele kaer metin ba ninia relasaun ho Jeová iha ema nia rai? Tanba nia estuda beibeik livru sagradu sira iha ninia língua rasik. (Daniel 9:2) Tan neʼe mak maski nia hela iha rai-Babilónia ba tinan 70, ema hatene nafatin ninia naran ebreu nian.—Daniel 5:13.
9. Oinsá mak Maromak nia Liafuan ajuda ema neʼebé hakerek Salmo 119?
9 Ema neʼebé hakerek Salmo 119 mós hetan kbiit husi Maromak nia Liafuan hodi tahan hasoru ema seluk neʼebé koʼalia aat ba nia iha palásiu. No neʼe ajuda nia atu halo tuir nafatin Jeová nia ukun-fuan. (Salmo [Mazmur] 119:23, 61) Nia husik Maromak nia Liafuan mak atu book ninia laran.—Lee Salmo (Mazmur) 119:11, 46.b
HAMETIN NAFATIN ITA-NIA RELASAUN HO JEOVÁ
10, 11. (a) Bainhira estuda Bíblia, ita-nia hakarak mak saida? (b) Ita tenke halo saida? Fó toʼok ezemplu.
10 Karik ita iha responsabilidade barak atu halo iha kongregasaun ka iha serbisu, maibé ita presiza buka tempu atu halaʼo estuda mesak no halaʼo adorasaun família nian. (Éfeso 5:15, 16) Ita-nia hakarak laʼós deʼit atu lee livru ka prepara hodi bele hatoʼo komentáriu iha reuniaun, maibé importante atu husik Maromak nia Liafuan book ita-nia laran no hametin ita-nia fiar.
11 Tan neʼe mak bainhira ita estuda, la hanoin deʼit kona-ba ema seluk nia presiza, maibé hanoin mós ita rasik nian. (Filipe 1:9, 10) Ita rekoñese katak bainhira ita prepara informasaun kona-ba haklaken, ba reuniaun, ka atu hatoʼo diskursu, dala ruma ita la hanoin oinsá mak ita rasik mós bele uza informasaun sira-neʼe. Porezemplu, ema neʼebé teʼin, ka koziñeiru, nia sei koko uluk ai-han sira antes nia fó ba ema atu han. Maibé se nia mak hakarak moris ho saúde neʼebé diʼak, nia presiza teʼin hahán neʼebé diʼak ba ninia an, koko deʼit hahán sira neʼebé nia teʼin la bele fó saúde diʼak ba nia. Hanesan neʼe mós se ita mak hakarak atu iha relasaun neʼebé diʼak ho Jeová, ita rasik presiza han ai-han espirituál hodi estuda beibeik Bíblia.
12, 13. Tanbasá mak ema barak sente katak estuda Bíblia iha sira-nia lian rasik ajuda sira?
12 Ema barak sente katak estuda beibeik Bíblia iha ‘sira-nia lian rasik’ ajuda tebes sira atu bele serbí iha kongregasaun neʼebé koʼalia língua seluk. (Apóstolu 2:8) Misionáriu sira mós sente katak se sira hakarak serbí ba tempu kleur iha sira-nia knaar, latoʼo atu rona deʼit informasaun neʼebé hatoʼo iha reuniaun sira.
13 Alain aprende língua Pérsia nian ba tinan ualu ona, nia hatete: “Bainhira haʼu prepara ba reuniaun iha língua Pérsia nian, buat neʼebé haʼu lee ladún kona haʼu-nia laran, tanba haʼu fokus liu atu aprende língua neʼe. Tan neʼe mak haʼu buka beibeik tempu atu estuda Bíblia no ita-nia livru sira iha haʼu-nia língua rasik.”
IMPORTANTE ATU BOOK OAN NIA LARAN
14. Inan-aman presiza halo saida, no tanbasá?
14 Inan-aman presiza ajuda oan hodi Maromak nia Liafuan bele book sira-nia neon no laran. Serge ho ninia feen, Muriel uluk serbí iha kongregasaun neʼebé koʼalia língua seluk ba tinan tolu. Sira haree katak sira-nia oan-mane neʼebé ho idade 17 laiha ksolok atu halo atividade espirituál nian. Muriel dehan: “Nia la gosta atu haklaken iha língua seluk. Uluk nia gosta tebes atu haklaken iha ninia língua rasik, fransés.” Serge hatete: “Bainhira ami haree situasaun hanesan neʼe hanetik ami-nia oan atu laʼo ba oin iha lia-loos, ami deside hodi muda fali ba kongregasaun uluk nian.”
Importante atu haree katak lia-loos book duni oan sira-nia laran (Haree parágrafu 14, 15)
15. (a) Saida mak bele ajuda inan-aman atu halo desizaun kona-ba muda kongregasaun? (b) Deuteronômio 6:5-7 fó matadalan saida ba inan-aman?
15 Saida mak bele ajuda inan-aman atu halo desizaun kona-ba diʼak ka lae atu muda fali ba kongregasaun neʼebé koʼalia oan sira-nia lian rasik? Primeiru, sira tetu didiʼak atu haree sira iha tempu no forsa ka lae atu hanorin oan hadomi Jeová iha tempu neʼebé sira mós aprende hela língua foun. Segundu, se sira haree katak sira-nia oan la gosta atu bá haklaken, tuir reuniaun, ka sira la gosta serbí iha kongregasaun neʼebé koʼalia língua seluk. Haree didiʼak ba razaun sira-neʼe bele ajuda inan-aman atu foti desizaun ho matenek. Se aban-bainrua mak oan iha ona relasaun neʼebé metin ho Jeová, inan-aman bele halo desizaun atu muda fali ba kongregasaun neʼebé koʼalia língua seluk.—Lee Deuteronômio (Ulangan) 6:5-7.c
16, 17. Saida mak ajuda inan-aman atu hanorin oan kona-ba Jeová?
16 Inan-aman balu neʼebé serbí daudauk iha kongregasaun ka grupu neʼebé koʼalia língua seluk, sira mós konsege hanorin oan kona-ba Jeová ho sira-nia lian rasik. Porezemplu, Charles mak aman neʼebé iha oan-feto naʼin-tolu, tinan 9, 12 no 13. Sira tuir grupu ida neʼebé koʼalia lia-lingala. Charles hatete: “Ami halo desizaun hodi estuda ho oan sira no halaʼo adorasaun família nian iha ami-nia lian rasik. Maibé ami mós treinu oan sira oinsá atu haklaken no uza game balu iha lia-lingala hodi sira la sente baruk atu aprende língua foun neʼe.”
Hakaʼas an atu aprende língua neʼebé kongregasaun uza no hola parte iha reuniaun sira (Haree parágrafu 16, 17)
17 Kevin mós iha oan-feto naʼin-rua, tinan lima no ualu. Nia hakaʼas an hodi hanorin lia-loos ba oan sira tanba sira seidauk komprende língua foun husi kongregasaun neʼebé sira serbí daudauk. Nia dehan: “Haʼu ho haʼu-nia feen estuda ho ami-nia oan-feto naʼin-rua iha lia-fransés, ami-nia língua rasik. Ami mós halo planu hodi bele tuir reuniaun iha lia-fransés fulan ida dala ida, no ami foti feriadu hodi bele tuir reuniaun boot iha ami-nia língua rasik.”
18. (a) Oinsá mak matadalan husi Roma 15:1, 2 bele ajuda ita halo desizaun neʼebé matenek hodi ajuda ita-nia oan? (b) Inan-aman balu fó sujestaun saida deʼit? (Haree nota husi lisaun.)
18 Família ida-idak mak tenke deside saida mak diʼak ba sira-nia oan no saida mak sira bele halo hodi hametin sira-nia relasaun ho Jeová.[2] (Haree nota husi lisaun.) (Galásia 6:5) Muriel hatete katak maski nia ho ninia laʼen gosta tebes serbí iha kongregasaun neʼebé koʼalia língua seluk, maibé tanba atu ajuda sira-nia oan hametin sira rasik nia relasaun ho Jeová, sira deside diʼak liu muda kongregasaun. (Lee Roma 15:1, 2.) Serge hanoin fali ba desizaun neʼebé sira halo no nia hatene katak sira foti desizaun neʼebé loos. Nia dehan: “Husi tempu neʼebé ami muda fali ba kongregasaun neʼebé koʼalia lia-fransés, ami-nia oan-mane laʼo ba oin iha lia-loos ho diʼak toʼo nia mós hetan batizmu. Nia agora serbí nuʼudar pioneiru regulár. No nia mós hanoin hela atu muda fali ba grupu neʼebé koʼalia língua seluk!”
HUSIK MAROMAK NIA LIAFUAN BOOK ITA-NIA LARAN
19, 20. Oinsá mak ita hatudu katak ita hadomi Maromak nia Liafuan?
19 Jeová hadomi ema hotu. Tan neʼe mak nia fó ninia Liafuan Bíblia ba ema iha língua atus ba atus hodi ‘ema hotu bele hetan salvasaun no hatene didiʼak kona-ba lia-loos’. (1 Timóteo 2:4) Nia hatene katak se ema lee Bíblia iha língua neʼebé sira komprende liu, neʼe sei hametin liután sira-nia relasaun ho nia.
20 Ita hotu tenke hakaʼas an atu hametin ita-nia relasaun ho Jeová liuhusi estuda beibeik Bíblia iha língua neʼebé ita komprende liu. Hodi halo nuneʼe ita mós bele ajuda ita-nia família atu hametin sira-nia relasaun ho Jeová, no neʼe hatudu katak ita hafolin duni Maromak nia Liafuan.—Salmo (Mazmur) 119:11.
^ [1] (parágrafu 5) Naran sira laʼós naran neʼebé loos.
^ [2] (parágrafu 18) Atu hatene prinsípiu sira oinsá bele ajuda ita-nia família, haree informasaun iha Menara Pengawal 15 Outubru 2002 kona-ba “Membesarkan Anak di Negeri Asing—Tantangan dan Berkatnya”.
a Neemias 13:23, 24 23 No mós iha loron neʼebá haʼu haree ema Judeu neʼebé kaben ona ho feto Asdod, Ammon, no Moab. 24 Sira-nia oan-mane balu koʼalia língua ema Asdod nian no língua husi povu sira seluk, maibé oan sira-neʼe ida mós la hatene atu koʼalia língua Judeu nian.
b Salmo 119:11, 46 11 Haʼu hafolin Ita-nia liafuan iha haʼu-nia laran atu nuneʼe haʼu la halo sala kontra Ita. 46 Haʼu sei koʼalia kona-ba Ita-nia avizu sira iha liurai sira-nia oin, no haʼu sei la moe.
c Deuteronômio 6:5-7 5 Imi tenke hadomi Jeová, imi-nia Maromak, ho imi-nia laran tomak no ho imi-nia moris tomak no ho imi-nia kbiit tomak. 6 Liafuan sira neʼebé haʼu fó sai ba imi ohin tenke rai iha imi-nia laran, 7 no imi tenke hanorin liafuan sira-neʼe ba imi-nia oan no koʼalia kona-ba buat sira-neʼe kuandu imi tuur iha imi-nia uma, kuandu imi laʼo iha dalan, kuandu imi toba, no kuandu imi hadeer.