Ita bele “mai to’o Masedónia” ka lae?
1. Tanbasá mak Paulo no ninia maluk sira bá Masedónia?
1 Maizumenus iha tinan 49, apóstolu Paulo husik hela Antiokia iha rai-Síria atu halo ninia viajen misionáriu nian ba dala segundu. Nia planu atu vizita Éfeso no sidade sira seluk iha Ásia Menór. Maibé, espíritu santu fó vizaun ba nia hodi konvida nia atu “mai to’o Masedónia”. Paulo no ninia maluk sira kontente atu simu konvite ne’e, no sira hetan oportunidade espesiál atu harii kongregasaun primeiru iha área ne’e. (Apos 16:9, 10; 17:1, 2, 4) Ohin loron, rai balu iha mundu ne’e hanesan to’os ne’ebé presiza serbisu-na’in barak tan atu halo serbisu ko’a nian. (Mt 9:37, 38) Ita bele ajuda atu halo ida-ne’e ka lae?
2. Tanbasá mak ema balu laran-rua atu muda ba rai seluk?
2 Karik ita iha hakarak atu sai misionáriu hanesan Paulo maibé ita seidauk hanoin didi’ak kona-ba muda ba rai seluk tanba ita sente katak ita la bele halo ida-ne’e. Porezemplu, karik ita la iha oportunidade atu bele hetan treinu iha Eskola Gilead tanba ita idade ona, ka irmán klosan, ka iha oan ne’ebé ki’ik hela. Karik ita mós seidauk hanoin kona-ba muda ba rai seluk tanba ita ladún fiar an katak ita bele aprende língua seluk. Ka karik ita mak ema imigrante ida ne’ebé hela iha rai seluk tanba razaun ekonomia no tan ne’e ita laran-rua atu muda fali ba fatin seluk. Maibé, depois halo tiha orasaun no hanoin kle’an, karik ita bele haree katak situasaun sira-ne’e la’ós sai nu’udar razaun boot liu atu hapara ita muda ba rai seluk ne’ebé presiza haklaken-na’in.
3. Tanbasá mak atu bele haklaken ho susesu iha rai seluk ne’e la depende de’it ba hetan treinu misionáriu nian?
3 Tenke hetan treinu atu sai misionáriu ka lae? Saida mak ajuda Paulo no ninia maluk sira atu halo serbisu ho susesu? Sira sadere ba Jeová no ninia espíritu santu. (2 Kor 3:1-5) Tan ne’e, maski ita la hetan oportunidade atu simu treinu espesiál, maibé ita bele haklaken ho susesu iha rai seluk. Hanoin-hetan katak ita simu nafatin treinu liuhusi Eskola Serbisu Kristaun no Reuniaun Serbisu. Se ita iha planu atu tuir Eskola Gilead ka eskola seluk ne’ebé hanesan, di’ak atu muda ba rai seluk tanba ida-ne’e sei fó ita esperiénsia ne’ebé di’ak ne’ebé ita bele uza se aban bainrua ita simu treinu liután.
4. Tanbasá mak sira ne’ebé idade ona la presiza hanoin katak sira la bele haklaken iha rai seluk?
4 Sira ne’ebé idade ona: Ema ne’ebé iha esperiénsia iha lia-loos ne’ebé iha saúde di’ak bele fó ajuda barak iha rai ne’ebé presiza haklaken-na’in. Ita-nia tinan to’o ona atu para serbisu atu manán osan ka lae? Ema balu hetan osan pensaun nian ne’ebé to’o ba sira hodi bele hela iha rai seluk tanba la presiza gasta osan barak ba buat oioin se kompara ho sira-nia rai, ne’e inklui la gasta osan barak atu konsulta ba doutór.
5. Konta to’ok esperiénsia ida husi irmaun ne’ebé muda ba rai seluk.
5 Irmaun ida husi rai ne’ebé ko’alia lia-inglés, ne’ebé idade to’o ona atu para serbisu, no ne’ebé serbí nu’udar katuas no nu’udar pioneiru, deside atu muda ba rai Ásia nian ida atu serbí hamutuk ho haklaken-na’in sia ne’ebé iha grupu lia-inglés. Grupu ne’e haka’as an atu haklaken ba ema na’in-30.000 ne’ebé mai husi rai seluk ne’ebé hela iha ne’ebá. Iha tinan rua nia laran, ema na’in-50 tuir reuniaun. Irmaun ne’e hatete: “Hodi muda mai fatin ne’e ha’u hetan bensaun ne’ebé di’ak tebes iha ha’u-nia moris. Tempu la to’o atu konta bensaun hotu ne’ebé ha’u simu!”
6. Konta to’ok esperiénsia husi irmán klosan ida ne’ebé muda ba rai ne’ebé presiza haklaken-na’in barak tan.
6 Irmán klosan: Maromak Jeová uza ona irmán sira atu hola parte importante atu habelar lia-foun di’ak iha rai sira-ne’ebé presiza haklaken-na’in. (Sal 68:11) Irmán klosan ida ne’ebé joven hela, iha planu atu haklaken iha rai seluk, maibé ninia inan-aman hanoin barak tanba karik perigu uitoan ba nia. Tan ne’e, irmán ne’e halo planu atu serbí iha rai ne’ebé la iha problema polítiku no ekonomia, no nia hakerek karta ba sukursál. Ikusmai sukursál fó informasaun kapás ne’ebé ajuda nia. Durante tinan neen ne’ebé nia hela iha rai ne’e, nia hetan bensaun barak. Nia hatete: “Iha ha’u-nia rai, ha’u ladún iha oportunidade barak atu estuda Bíblia ho ema. Maibé serbí iha fatin ne’ebé presiza haklaken-na’in, ida-ne’e fó oportunidade ba ha’u atu estuda Bíblia ho ema barak no ida-ne’e ajuda ha’u atu aumenta ha’u-nia matenek atu hanorin.”
7. Konta to’ok esperiénsia husi família ida ne’ebé muda ba rai seluk.
7 Família sira: Se ita iha oan, ne’e dehan katak ita la bele muda ba rai seluk atu haklaken lia-foun di’ak ka lae? Família ida ne’ebé iha oan na’in-rua ho tinan ualu no sanulu, deside atu koko muda ba rai seluk. Inan ne’e hakerek sira-nia esperiénsia: “Ami kontente tebes katak ami bele haboot ami-nia oan iha rai ne’e, tanba sira bele ransu malu ho pioneiru tempu-tomak no misionáriu sira. Ami hetan bensaun barak tanba ami serbí iha rai ne’ebé presiza haklaken-na’in.”
8. Bele ka lae atu muda ba rai seluk maski ita la aprende língua foun? Esplika to’ok.
8 Aprende língua foun: Ita ta’uk atu muda ba rai seluk tanba ita sente katak susar ba ita atu aprende língua foun? Maibé, keta haluha katak karik ema seluk mós ko’alia ita-nia língua iha rai ne’ebé presiza haklaken-na’in. Kaben-na’in ida ne’ebé ko’alia lia-inglés deside atu muda ba rai ne’ebé ko’alia lia-españól tanba rai ne’e iha imigrante barak ne’ebé ko’alia lia-inglés. Depois hetan tiha informasaun husi sukursál kona-ba kongregasaun inglés balu ne’ebé presiza haklaken-na’in, sira hili kongregasaun ida no vizita kongregasaun ne’e dala rua. Depois vizita, sira fila ba sira-nia rai, no halo sira-nia moris simples liu hodi bele rai osan ba tinan ida. Kuandu sira prontu ona atu muda ba rai ne’e, irmaun sira ajuda kaben-na’in ne’e atu hetan uma ne’ebé ladún karun.
9, 10. Di’ak ba sira ne’ebé hela nu’udar imigrante iha rai seluk atu hanoin kona-ba saida? Tanbasá?
9 Imigrante sira: Ita muda ba rai seluk antes aprende lia-loos ka lae? Karik iha ita-nia rai rasik presiza haklaken-na’in barak tan atu halo serbisu ko’a nian. Ita hanoin ona kona-ba muda fali ba ita-nia rai atu ajuda ka lae? Karik sei fasil liu ba ita atu hetan serbisu no uma duké ema husi rai seluk. Karik ita hatene ona língua ne’ebé ema ko’alia iha ita-nia rai. Liután ne’e, ema karik prontu atu rona ba mensajen ne’ebé ita hato’o se kompara ho ema husi rai seluk.
10 Mane ida husi Albánia muda ba rai-Itália nu’udar refujiadu. Nia hetan serbisu di’ak no haruka osan ba ninia família iha Albánia. Depois hetan tiha lia-loos, nia hahú hanorin língua Albánia ba pioneiru espesiál balu husi Itália ne’ebé muda atu serbí iha Albánia. Irmaun ne’e hakerek: “Sira atu muda ba rai ne’ebé ha’u husik hela. Sira la hatene língua maibé sira hakarak duni atu bá. Maibé ha’u, ha’u-nia kultura no ha’u-nia língua mak Albánia. Entaun, tansá mak ha’u hela nafatin iha Itália?” Irmaun ne’e deside atu fila fali ba Albánia atu habelar lia-foun di’ak. Nia hatete: “Ha’u sente triste tanba ha’u husik ha’u-nia serbisu no oportunidade atu hetan osan barak iha Itália ka lae? Lae duni! Ha’u halo serbisu ne’ebé di’ak liu hotu iha Albánia. Tuir ha’u-nia hanoin, serbisu ne’ebé importante no lori ksolok ba nafatin mak serbí Maromak Jeová ho buat hotu ne’ebé ita iha!”
11, 12. Sira ne’ebé hanoin atu muda ba rai seluk tenke halo saida?
11 Oinsá halo ida-ne’e: Antes bá Masedónia, Paulo ho ninia maluk sira hakarak atu la’o ba parte loromonu, maibé “espíritu santu la husik sira”, tan ne’e sira la’o fali ba parte norte. (Apos 16:6) Kuandu sira besik ona to’o Bitínia, Jesus hapara sira. (Apos 16:7) Liuhusi Jesus, Jeová kontinua tau matan ba serbisu haklaken. (Mt 28:20) Tan ne’e, se ita hanoin atu muda ba rai seluk, di’ak atu halo orasaun hodi husu Maromak Jeová atu hatudu dalan.—Lc 14:28-30; Tgo 1:5; haree mós kaixa “Oinsá atu hatene se rai ne’ebé ita hili presiza haklaken-na’in”.
12 Husu ita-nia katuas kongregasaun nian ka ema seluk ne’ebé iha esperiénsia barak iha lia-loos atu fó sai sira-nia hanoin kona-ba ita. (Prov 11:14; 15:22) Lee ita-nia livru sira-ne’ebé hakerek tiha ona kona-ba serbí iha rai seluk no mós buka-hatene informasaun barak tan kona-ba rai ne’ebé ita hili atu muda ba. Ita bele vizita rai ne’ebé ita hakarak muda ba, karik ba tempu kleur uitoan ka lae? Se ita hakarak duni muda ba rai seluk, karik ita bele hakerek ba sukursál iha rai ne’ebá hodi uza diresaun ne’ebé hakerek iha livru tinan nian ne’ebé foun, hodi nune’e ita bele hetan informasaun liután. Maibé, duké haruka ita-nia karta kedas ba sukursál, di’ak atu fó uluk ba katuas sira iha ita-nia kongregasaun hodi sira bele aumenta sira-nia hanoin ruma antes haruka.—Haree mós livru Diorganisasi untuk Melakukan Kehendak Yehuwa, pájina 111-112.
13. Oinsá mak sukursál bele ajuda ita? Maibé saida mak ita-nia responsabilidade?
13 Sukursál sei haruka informasaun di’ak kona-ba rai ne’e ne’ebé bele ajuda ita atu halo desizaun. Maibé la’ós sira-nia responsabilidade atu hetan vistu ba ita, fatin atu hela, ka fó ba ita formuláriu oioin. Ne’e mak ita-nia responsabilidade no tan ne’e ita presiza buka-hatene uluk, antes muda. Liután ne’e, ita mós iha responsabilidade atu kontaktu embaixada sira atu hetan informasaun kona-ba saida mak ita presiza halo atu hetan vistu, inklui vistu serbisu nian. Sira ne’ebé muda ba rai seluk tenke tau matan ba sira-nia an no buat ne’ebé sira presiza hodi tuir lei iha rai ne’e.—Gal 6:5.
14. Di’ak atu hanoin kona-ba saida kuandu ita vizita ka muda ba rai ne’ebé estadu bandu?
14 Rai ne’ebé estadu bandu serbisu haklaken: Iha rai balu, irmaun-irmán sira presiza kuidadu kuandu sira hala’o sira-nia atividade atu adora Maromak. (Mt 10:16) Haklaken-na’in sira-ne’ebé vizita ka muda ba rai sira hanesan ne’e karik, la ho neon bele dada atensaun ba ita-nia serbisu haklaken no ida-ne’e bele lori perigu ba ita-nia irmaun-irmán sira. Se ita hanoin atu muda ba rai hanesan ne’e, di’ak atu hakerek karta ba sukursál iha ita-nia rai, no antes haruka karta ne’e hatudu uluk ba grupu katuas nian.
15. Oinsá mak sira ne’ebé la bele muda ba rai seluk bele aumenta sira-nia haklaken?
15 Se ita la bele muda: Keta sente laran-tun se ita la bele muda. Karik “odamatan luan” ida seluk loke ba ita. (1 Kor 16:8, 9) Ita-nia katuas área nian karik hatene fatin ne’ebé la dook husi ita-nia área ne’ebé presiza haklaken-na’in barak tan. Karik ita bele ajuda kongregasaun ka grupu ne’ebé besik ita-nia área ne’ebé uza língua seluk. Ka karik ita bele aumenta ita-nia serbisu haklaken iha ita-nia kongregasaun. Maski ita bele muda ba rai seluk ka la bele, buat ne’ebé importante liu mak ita hala’o ita-nia adorasaun ba Maromak ho laran tomak.—Kol 3:23.
16. Di’ak atu iha hanoin oinsá kona-ba sira ne’ebé hakarak atu muda ba rai seluk?
16 Ita koñese maluk kristaun ida ne’ebé iha esperiénsia no iha planu atu muda ba rai seluk ka lae? Se nune’e, di’ak atu apoia nia no fó laran-manas ba nia! Kuandu Paulo husik hela Antiokia iha rai-Síria, iha tempu ne’ebá sidade ne’e mak sidade boot terseiru iha rai hotu ne’ebé Roma mak ukun (depois sidade Roma no Alexandria). Tanba kongregasaun iha Antiokia nia haklaken-fatin mak luan tebes, karik kongregasaun ne’e presiza Paulo nia ajuda no sira sei hanoin tebes nia se nia husik hela fatin ne’e. Maibé, Bíblia la fó sai katak irmaun sira iha ne’ebá koko atu hapara Paulo atu muda. Duké hanoin de’it kona-ba sira-nia kongregasaun, sira hanoin-hetan katak “to’os mak mundu”.—Mt 13:38.
17. Tanbasá di’ak atu hanoin kona-ba bá “to’o Masedónia”?
17 Paulo no ninia maluk sira hetan bensaun barak tanba sira simu konvite atu bá to’o Masedónia. Kuandu sira iha sidade Filipe iha rai-Masedónia, sira hetan feto ida naran Lídia, no Maromak Jeová “loke nia fuan atu see tilun ba buat ne’ebé Paulo hateten”. (Apos 16:14) Hanoin to’ok kona-ba ksolok ne’ebé Paulo no ninia maluk sira hetan kuandu Lídia no ninia umakain tomak hetan batizmu! Iha rai barak, iha ema laran-di’ak hanesan Lídia ne’ebé seidauk rona mensajen kona-ba Maromak nia Ukun. Se ita bá “to’o Masedónia”, ita bele sente haksolok hodi hetan ema laran-loos no ajuda sira.
[Kaixa iha pájina 5]
Oinsá atu hatene se rai ne’ebé ita hili presiza haklaken-na’in
• Haree Buku Tahunan ne’ebé foun. Haree ba pájina ne’ebé iha lista ne’ebé kompara númeru haklaken-na’in ho ema ne’ebé hela iha rai ida.
• Uza Índise atu hetan informasaun no esperiénsia husi rai ne’ebé ita hanoin atu muda ba.
• Ko’alia ho haklaken-na’in sira ne’ebé vizita ona ka hela iha rai ne’e.
• Se ita hanoin atu muda atu haklaken iha rai ne’ebé iha ema ne’ebé uza ita-nia língua rasik, buka informasaun husi fatin oioin hanesan internét atu hatene ema na’in-hira mak hela iha rai ne’e ne’ebé ko’alia ita-nia língua.