‘Halo tuir Maromak nia hakarak’
1. Saida mak tema ba reuniaun boot ba loron ida iha tinan serbisu nian 2012? Tanbasá mak importante atu ko’alia kona-ba ida-ne’e?
1 Tanba Maromak Jeová nia hakarak, nia kria ita. (Apok 4:11) Tan ne’e, se ita la aprende kona-ba Maromak no la halo tuir ninia hakarak, ita sei la hatene razaun tansá ita moris. Klaru katak la fasil atu halo tuir Maromak tanba ita presiza halo funu hasoru ita-nia hakarak atu halo buat ne’ebé “ita-nia hakarak aat no ita-nia rasik nia hanoin aat mak ukun” ka atu halo “buat ne’ebé jentiu sira hakarak halo”. (Ef 2:3; 1 Ped 4:3; 2 Ped 2:10) Se Maromak la ajuda ita, Diabu bele kaer ita hodi sai ninia atan atu halo tuir ninia hakarak. (2 Tim 2:26) Programa ba ita-nia reuniaun boot ba loron ida iha tinan serbisu nian 2012, sei ajuda ita atu hala’o ita-nia moris hodi tuir Jesus nia liafuan iha orasaun ne’ebé dehan: “Halo tuir Ita-nia hakarak.”—Mt 6:9, 10.
2. Durante programa ne’e, ita sei hetan resposta ba pergunta saida de’it?
2 Pergunta sira-ne’ebé sei hetan ninia resposta: Nu’udar ita rona ba programa, buka-hatene resposta ba pergunta sira-ne’e: Duké rona de’it ba Maromak nia Liafuan, saida tan mak ita tenke halo? Oinsá mak ita bele kontinua buka-hatene saida mak Maromak nia hakarak mai ita? Tanbasá mak ita hakarak haka’as an atu haklaken ba ema hotu? Oinsá mak ita bele moris ho kontente? Joven sira, saida mak imi tenke hatudu ba Aman Jeová? Halo tuir Maromak nia hakarak lori bensaun saida de’it? Tanbasá importante atu ajuda no fó laran-manas ba ema seluk?
3. Oinsá mak ita bele hetan buat di’ak husi hahán espirituál ne’ebé ita simu?
3 Haka’as an atu tuir no rona didi’ak ba programa iha reuniaun boot ne’e. Dala ruma karik ema husi Betel ka katuas ne’ebé vizita kongregasaun tuir reuniaun boot ne’e nu’udar oradór vizitante. Tan ne’e, antes no depois programa, keta ta’uk atu ko’alia ba nia no ninia feen, se nia kaben ona. Kuandu ita fila fali ba uma, keta sai hanesan ema ne’ebé haluhadór, maibé ko’alia hamutuk fali programa ne’e nu’udar família no haree oinsá ita bele halo tuir di’ak liután Maromak nia hakarak.—Tgo 1:25.
4. Tanbasá mak importante atu halo uluknanain Maromak nia hakarak?
4 Lakleur tan, ema sira-ne’ebé buka de’it sira-nia hakarak no ne’ebé lakohi atu halo tuir Maromak nia hakarak sei lakon. (1 Joao 2:17) Tan ne’e, ita agradese tebes ba Maromak Jeová tanba nia prepara informasaun iha tempu loloos atu ajuda ita halo uluknanain Maromak nia hakarak!