Rona no aprende
1. Tanbasá mak ita presiza hakaʼas an liután hodi bele rona no aprende iha reuniaun boot?
1 Lakleur tan reuniaun boot ba loron tolu ba tinan 2013 sei hahú. Ita-nia organizasaun serbisu makaʼas ona hodi prepara programa neʼebé sei ajuda Maromak Jeová nia povu iha mundu tomak. Ita halo planu ona hodi bele tuir reuniaun boot neʼe hotu ka lae? Tanba reuniaun boot sira hanesan neʼe iha buat barak neʼebé bele dada ita-nia atensaun, ita presiza hakaʼas an liután atu fó atensaun ba programa. No mós, tanba programa ba reuniaun boot sira naruk liu se kompara ho reuniaun kongregasaun nian, ita presiza fó atensaun ba tempu barak. Liután neʼe, laʼo dook toʼo reuniaun-fatin no buat seluk tan bele halo ita kole. Entaun, saida deʼit mak bele ajuda ita atu fó atensaun nafatin hodi bele rona no aprende iha reuniaun boot neʼe?—Deut 31:12.
2. Oinsá mak ita bele prepara ita-nia laran ba reuniaun boot?
2 Antes reuniaun boot hahú: Ita bele hetan programa ba reuniaun boot neʼe iha ita-nia sítiu ofisiál www.jw.org. Iha programa neʼe, ita bele hetan títulu ba diskursu ida-idak no mós eskritura ida ka rua. Se ita iha internét, diʼak atu haree programa neʼe tanba ida-neʼe sei ajuda ita atu prepara ita-nia laran. (Esd 7:10) Durante ita-nia Adorasaun Família nian, ita bele ka lae, uza tempu uitoan atu koʼalia hamutuk kona-ba programa neʼe hodi halo ita-nia família hein namanas ba reuniaun boot?
3. Saida deʼit mak sei ajuda ita rona didiʼak ba programa?
3 Durante programa: Se bele, diʼak atu uza hariis-fatin antes programa hahú. No mós taka ita-nia telemovel hodi la hanetik ita atu tau atensaun ba programa. Se ita tenke husik ita-nia telemovel loke hela, taka ninia lian hodi la dada ema seluk nia atensaun. Se ita uza sasán eletróniku seluk durante programa, kuidadu atu labele atrapalla ema seluk. Diʼak mós atu la hemu ka han buat ruma durante programa. (Ecle 3:1) Hateke ba irmaun neʼebé hatoʼo diskursu, no se nia lee eskritura ruma, lee tuir husi ita-nia Bíblia, no hakerek nota badak.
4. Oinsá mak inan-aman sira bele ajuda sira-nia oan atu rona no aprende?
4 Ita mós hakarak ita-nia oan sira atu rona no aprende. Provérbios 29:15 hatete: “Labarik-mane neʼebé husik livre deʼit sei hamoe nia inan.” Tan neʼe, diʼak se família tuur hamutuk hodi nuneʼe inan-aman bele haree se sira-nia oan fó atensaun ba programa, la koʼalia ba malu, la halimar ho telemovel, ka laʼo bá-mai. Maski oan sei kiʼik atu komprende buat hotu neʼebé hatoʼo iha oin, maibé ita bele treinu labarik sira atu tau atensaun no tuur nonook.
5. Tanbasá mak importante atu koʼalia hamutuk kona-ba buat neʼebé ita rona iha reuniaun boot? Oinsá mak ita bele halo ida-neʼe?
5 Kuandu programa ramata iha loron ida-idak: Hakaʼas an atu toba sedu iha kalan. Kuandu ita uza minutu balu iha kalan atu koʼalia hamutuk ho ita-nia família kona-ba buat neʼebé ita rona, ida-neʼe sei ajuda ita atu hanoin-hetan buat neʼebé hatoʼo iha reuniaun boot. Se ita bá han iha restaurante, diʼak atu lori ita-nia nota hodi ita bele koʼalia kona-ba pontu ida ka rua neʼebé ita gosta liu. Depois reuniaun boot hotu ona, diʼak atu uza tempu balu durante Adorasaun Família nian atu koʼalia hamutuk kona-ba oinsá mak ita nuʼudar família bele halo tuir matadalan sira neʼebé ita rona. Ita mós bele fahe tempu semana-semana atu lee hamutuk pájina balu husi livru foun neʼebé ita simu iha reuniaun boot.
6. Tuir deʼit reuniaun boot toʼo ona ka lae? Esplika toʼok.
6 Ita bele hetan buat diʼak husi festa só deʼit se ita han no nata didiʼak hahán neʼebé prepara ba festa neʼe. Nuneʼe mós ho festa espirituál nian iha ita-nia reuniaun boot. Mai ita hetan buat diʼak husi reuniaun boot neʼe hodi tuir programa hotu, rona didiʼak, no hodi halo tuir buat neʼebé ita aprende.