Ita prepara ona atu tuir festa espirituál ka lae?
1. Presiza halo saida deʼit atu prepara festa?
1 Presiza gasta tempu barak atu prepara festa. Tenke sosa modo oioin atu teʼin, no ita hakarak hahán neʼe gostu no haree furak. Ita mós presiza organiza oinsá atu fó hahán neʼe ba ema. Liután neʼe, fatin atu han tenke prepara. Bainaka mós tenke prepara sira-nia an, liuliu se sira mai husi fatin dook. Maski serbisu barak atu prepara festa, ita haksolok atu han hamutuk ho ita-nia família no kolega. Lakleur tan, Testemuña ba Jeová iha mundu tomak sei halibur hamutuk nuʼudar grupu boot ka kiʼik atu haksolok ho hahán espirituál hodi tuir reuniaun boot ba loron tolu ho tema: “Matan-moris bá!” Irmaun sira halo serbisu barak tiha ona atu prepara programa ba reuniaun boot neʼe. Maromak Jeová konvida ita hotu atu tuir festa neʼe. Tan neʼe, atubele simu buat diʼak husi festa neʼe, ita mós presiza prepara ita-nia an.—Prov 21:5.
2. Atubele tuir programa hotu ba reuniaun boot, ita tenke halo saida?
2 Simu buat diʼak: Ita halo planu ona atu tuir programa hotu ba reuniaun boot neʼe ka lae? Se Ita serbisu, karik Ita presiza fó-hatene patraun katak ita sei tuir reuniaun husi loron primeiru toʼo hotu. Ita halo planu tiha ona kona-ba transporte no fatin atu hela ka lae? Katuas sira iha kongregasaun tenke haree se ferik-katuas balu no irmaun-irmán seluk presiza ajuda ka lae.—Jer 23:4; Gal 6:10.
3. Tansá mak ita labele tuir reuniaun boot internasionál se ita la simu konvite?
3 Iha rai balu sei iha reuniaun boot internasionál. La haluha katak kongregasaun balu deʼit no irmaun-irmán balu husi raiseluk mak simu konvite atu tuir reuniaun boot internasionál sira-neʼe. Atu organiza ida-neʼe, sukursál sura tuur-fatin no otél hira mak iha atu bele hatene ema naʼin-hira mak bele hetan konvite. Se karik irmaun-irmán barak neʼebé la simu konvite tuir reuniaun boot internasionál, fatin sei la toʼo.
4. Saida mak sei ajuda ita atu prepara ita-nia laran ba reuniaun boot?
4 Halo planu atubele toʼo reuniaun fatin sedu, hodi nuneʼe ita sei iha tempu atu buka tuur-fatin antes programa hahú. Uza minutu balu atu lee surat ba programa. Ida-neʼe sei ajuda ita atu prepara ita-nia laran atu simu informasaun neʼebé sei hatoʼo. (Esd 7:10) Kuandu aprezentadór konvida ita atu tuur hodi rona múzika, rona didiʼak no sai prontu atu kanta knananuk no rona orasaun atu loke.
5. Saida mak bele ajuda família sira atu see tilun didiʼak ba programa?
5 Se família tuur hamutuk, fasil ba inan-aman atu haree se sira-nia oan rona didiʼak ba programa ka lae. (Deut 31:12) Loke eskritura sira neʼebé temi iha diskursu no hakerek nota badak, ida-neʼe sei ajuda ita atu see tilun didiʼak ba programa. Buat neʼebé ita hakerek iha nota sei ajuda ita atu hanoin-hetan pontu importante husi diskursu sira. Hakaʼas an atu labele koʼalia ba malu durante diskursu, ka sai tama. Se Ita iha telemovel, labele husik ida-neʼe hanetik Ita ka ema seluk atu rona diskursu sira. Iha kalan, diʼak atu koʼalia ho ema seluk kona-ba informasaun neʼebé ita gosta husi programa.
6. Iha reuniaun boot, ita iha oportunidade diʼak saida? Oinsá mak ita bele halo ida-neʼe?
6 Iha reuniaun boot, ita iha oportunidade atu haksolok ho relasaun diʼak hamutuk ita-nia irmaun-irmán sira, neʼebé ita la bele hetan ho ema iha mundu. (Sal 133:1-3; Mc 10:29, 30) Tansá la buka atu koñese malu ho ema foun neʼebé tuur besik ita no koʼalia ho sira durante han-meiudia? Atu bele halo ida-neʼe, diʼak tebes se lori ita-nia ai-han duké sai bá han iha liʼur. Labele lakon oportunidade furak neʼe hodi hamutuk ho ita-nia maluk atu hametin malu.—Rom 1:11, 12.
7. Tansá mak importante atu hanoin didiʼak dalan neʼebé ita hatais?
7 Hatais: Maromak Jeová haruka ema Izraél atu halo saren iha sira-nia roupa ninin, ho kabas kór azúl haleʼu saren neʼe. (Núm 15:37-41) Ida-neʼe fó-hanoin ema seluk katak sira mak ema neʼebé Maromak Jeová hili atu fó adorasaun ba nia. Hanesan mós ohin loron, liuhusi ita-nia hatais neʼebé hatudu respeitu kuandu ita tuir reuniaun boot ita hatudu katak ita ema neʼebé ketak husi mundu neʼe. Ida-neʼe mós bele fó sasin diʼak ba ema seluk se karik ita bá han iha liʼur. Tan neʼe hanoin didiʼak dalan neʼebé ita hatais.
8. Oinsá mak ita bele fó sasin ba ema seluk kuandu ita tuir reuniaun boot?
8 Fó sasin: Halo planu atu bele fó sasin ba ema seluk kuandu ita tuir reuniaun boot. Irmaun ida ho nia feen kuandu programa hotu tiha bá han iha restaurante ida. Irmaun neʼe hatudu kartaun neʼebé prega iha nia faru no husu ba serbisu-naʼin: “Ita haree ema barak uza kartaun hanesan neʼe ka lae?” Serbisu-naʼin neʼe hatán, sin, maibé nia hanoin ida-neʼe kona-ba saida. Ida-neʼe loke dalan ba irmaun atu fó sasin ba ema neʼe, no ikusmai irmaun neʼe konvida nia hodi tuir reuniaun boot.
9. Oinsá mak ita hatudu agradese ba Maromak Jeová, ida neʼebé konvida ita atu tuir festa espirituál?
9 Maski ita-nia irmaun sira mak sei hatoʼo diskursu, entrevista, no drama kiʼik, maibé tuir loloos ita-nia Aman Jeová iha lalehan mak ida neʼebé ho domin fó ai-han iha festa espirituál kada tinan. (Isa 65:13, 14) Hodi tuir programa hotu iha reuniaun boot neʼe no simu ai-han espirituál hotu, ita hatudu agradese ba Maromak Jeová, ida neʼebé konvida ita. Ita prepara ona atu tuir festa espirituál neʼe ka lae?
[Kona-ba dezeñu husi pájina 6]
Informasaun kona-ba reuniaun boot ba loron tolu
◼ Oras: Reuniaun boot ba loron tolu sei hahú iha tuku 9.20 dadeer. Reuniaun-fatin sei loke iha tuku 8.00 dadeer. Kuandu komesa múzika atu loke programa, ita hotu tenke tuur ona iha reuniaun-fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4.55 lokraik iha loron-sesta no sábadu, no iha tuku 4.00 lokraik iha loron-domingu. Ba reuniaun boot internasionál, programa ba loron-kinta sei hahú iha tuku 1.20 lokraik, no sei ramata iha tuku 4.55 lokraik.
◼ Buka tuur-fatin: Ita bele prepara deʼit tuur-fatin ba ita-nia maluk neʼebé mai hamutuk ho ita iha karreta, ka família neʼebé hela ho ita.
◼ Han-meiudia: Diʼak atu lori ita-nia hahán ba reuniaun-fatin duké sai bá han iha liʼur durante tempu deskansa. Bele lori ita-nia hahán iha raga no tau iha ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba Serbisu iha Mundu Tomak iha Salaun Reinu ka reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Kongregasaun Kristaun husi Testemuña ba Jeová”.
◼ Asidente no emerjénsia: Se ema ruma sai moras tebes iha reuniaun-fatin, favór ida fó-hatene ba irmaun sira neʼebé serbisu nuʼudar asistente. Se presiza, katuas ida sei bolu ambulánsia.
◼ Gravasaun: Se hakarak grava programa, labele uza eletrisidade iha salaun atu liga ita-nia sasán eletróniku, no kuidadu hodi la hanetik ema seluk atu rona.
◼ Restaurante: Hanoin nafatin atu fó glória ba Maromak Jeová liuhusi ita-nia hahalok neʼebé diʼak bainhira ita bá han iha restaurante.
◼ Otél: (1) Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida. (2) Se ita hatene katak ita sei la uza otél neʼebé ita hameno tiha ona, diʼak atu fó-hatene kedas ba otél-naʼin. (3) Ita labele teʼin iha kuartu laran se otél-naʼin la fó lisensa atu halo nuneʼe. (4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba meiudia nian. (5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél.
◼ Batizmu: Ema neʼebé atu hetan batizmu iha reuniaun boot neʼe tenke tuur iha fatin neʼebé prepara nanis ona ba sira antes atu komesa programa iha sábadu dadeer. Sira ida-idak presiza atu lori toalla no roupa batizmu nian neʼebé la mihis ka badak liu. Dala ruma, ema hatais roupa neʼebé ladún hatudu respeitu ba tempu importante neʼe. Katuas neʼebé halo pergunta ba sira neʼebé hakarak hetan batizmu tenke esplika ho klaru kona-ba oinsá atu hatais iha dalan neʼebé diʼak. Ita hetan batizmu atu hatudu katak Ita dedika an ona ba Maromak Jeová. Tanba desizaun neʼe mak buat neʼebé Ita halo entre Ita ho Maromak Jeová deʼit, ladiʼak atu ema naʼin-rua tama bee laran hamutuk no kaer liman atubele hetan batizmu dala ida deʼit.
◼ Kartaun naran nian: Durante loron tolu, diʼak atu tau nafatin ita-nia kartaun naran nian kuandu ita sai husi uma toʼo ita fila. Dala barak kartaun neʼe bele loke dalan atu fó sasin neʼebé diʼak. Ita tenke foti kartaun no ninia plástiku liuhusi ita-nia kongregasaun, tanba ita la bele hetan ida-neʼe iha reuniaun boot. Keta husik toʼo loron atu halaʼo reuniaun boot mak ita foin husu kartaun neʼebé ita no ita-nia família sei uza. Keta haluha atu lori nafatin ita-nia kartaun neʼebé hatudu katak ita la simu raan.
◼ Telemovel: Ita tenke hamate ita-nia telemovel, ka taka ninia lian atu labele hanetik ema seluk atu rona diskursu.