Loron tolu neʼebé halo ita sente kmaan
1. Ita hein atu hetan saida iha reuniaun boot ba loron tolu ba tinan ida-neʼe?
1 Iha Satanás nia mundu neʼe, neʼebé hanesan rai-maran, Maromak Jeová kontinua fó kmaan ba ninia povu sira. (Isa 58:11) Dalan ida neʼebé Maromak Jeová uza atu fó forsa mai ita mak liuhusi reuniaun boot ba loron tolu neʼebé ita halaʼo tinan-tinan. Sin, iha reuniaun neʼe ita hakarak sente kmaan no mós fó kmaan ba ema seluk. Entaun, nuʼudar reuniaun boot ba tinan neʼe sai besik daudauk ona, oinsá mak ita bele prepara an?—Prov 21:5.
2. Preparasaun saida deʼit mak ita presiza halo?
2 Se ita seidauk husu lisensa husi ita-nia patraun iha serbisu-fatin atubele foti feriadu ba loron tolu neʼe, diʼak atu halo nuneʼe agora. Importante atu tuir programa hotu iha reuniaun boot ba loron tolu. Hanoin nanis kona-ba oras hira mak ita presiza atu laʼo ba reuniaun-fatin hodi bele toʼo iha neʼebá sedu no buka tuur-fatin antes programa komesa. Klaru katak ita lakohi duni lakon informasaun kapás neʼebé Maromak Jeová prepara ona mai ita, loos ka lae? (Isa 65:13, 14) Ita arranja ona ka lae, fatin atu hela no transportasaun durante reuniaun boot neʼe?
3. Saida deʼit mak ita no ita-nia família bele halo atu hetan buat diʼak husi reuniaun boot?
3 Saida mak bele ajuda ita atu fó atensaun durante programa iha reuniaun boot? Se ita bele, toba sedu iha kalan. Hateke ba irmaun neʼebé fó diskursu. Loke Bíblia hodi lee tuir eskritura ida-idak. Hakerek nota badak. Diʼak se família tuur hamutuk atu nuneʼe inan-aman bele ajuda sira-nia oan atu fó atensaun ba diskursu sira. (Prov 29:15) Karik bele uza tempu iha kalan atu koʼalia hamutuk nuʼudar família kona-ba buat diʼak neʼebé ita rona. Atu ita-nia família bele kontinua hetan kmaan depois reuniaun boot, diʼak atu uza tempu uitoan kuandu ita halaʼo Adorasaun Família nian atu koʼalia kona-ba informasaun ruma husi reuniaun boot neʼebé ita-nia família bele halo tuir.
4. Oinsá mak ita bele ajuda irmaun-irmán sira iha ita-nia kongregasaun atu hetan kmaan?
4 Ajuda ema seluk atu hetan kmaan: Ita mós hakarak ema seluk atu hetan kmaan iha reuniaun boot. Iha ka lae, ferik-katuas ka haklaken-naʼin seluk neʼebé presiza ajuda atu tuir reuniaun boot? Se iha, ita bele ajuda sira ka lae? (1 Joao 3:17, 18) Katuas sira, liuliu katuas ba grupu haklaken sira, presiza tau matan hodi haklaken-naʼin sira hanesan neʼe hetan duni ajuda.
5. Oinsá mak ita sei fahe konvite ba reuniaun boot? (Haree mós kaixa iha leten.)
5 Hanesan iha tempu uluk, semana tolu antes ita halaʼo reuniaun boot, ita hola parte iha kampaña atu konvida ema seluk atu tuir reuniaun boot. Kongregasaun sira tenke hakaʼas an atu fahe konvite hotu iha sira-nia haklaken-fatin. Konvite neʼebé ita-nia família la bele fahe hotu toʼo kampaña neʼe ramata, bele lori kuandu ita tuir reuniaun boot, hodi nuneʼe ita bele uza atu haklaken iha dalan la formál. Ita sei hetan informasaun liután kona-ba neʼe durante programa iha loron-sesta. Se ita hanoin katak ita-nia família la bele fahe konvite neʼebé resin, ita bele fó konvite sira-neʼe ba asistente kuandu ita toʼo iha reuniaun-fatin. Ita bele rai konvite ida ba ita-nia an tanba ita sei uza ida-neʼe durante diskursu ikus iha loron-domingu.
6. Iha dalan saida deʼit mak ita bele hatudu hahalok diʼak iha reuniaun boot?
6 Hatudu hahalok diʼak: Ohin loron, ema barak “hanoin deʼit sira an” no la hanoin ema seluk nia sentimentu, nuneʼe ita sente kmaan duni atu hamutuk ho maluk kristaun sira neʼebé hakaʼas an atu hatudu hahalok diʼak! (2 Tim 3:2) Ita hatudu hahalok diʼak hodi tama iha reuniaun-fatin la ho runguranga kuandu fatin neʼe loke iha tuku 8.00 dadeer, no hodi prepara deʼit tuur-fatin ba ita-nia família neʼebé hela ho ita, ka maluk neʼebé mai hamutuk ho ita iha karreta, ka ba ita-nia estudante Bíblia sira. Ita hakarak halo tuir matadalan husi aprezentadór kuandu nia haruka ita atu tuur no rona múzika neʼebé atu loke programa. Ita mós hatudu hahalok diʼak hodi hamate ita-nia telemovel, ka taka ninia lian atu labele hanetik ema seluk atu rona diskursu. Ita mós hatudu hahalok diʼak hodi la koʼalia ba malu, la haruka sms ba malu, la han buat ruma, no la hamriik iha kotuk se la presiza durante programa.
7. Oinsá mak ita bele sente kmaan no mós fó kmaan ba ema seluk iha ita-nia reuniaun boot?
7 Ransu malu: Reuniaun boot sira fó ita oportunidade atu haksolok hodi hamutuk ho ita-nia maluk kristaun sira ho unidade. (Sal 133:1-3) Diʼak se ita ‘loke ita-nia laran’ hodi fó koñese ita-nia an ba irmaun no irmán sira husi kongregasaun seluk neʼebé mai atu tuir reuniaun boot, loos ka lae? (2 Kor 6:13, MF) Karik ita hakarak halo planu atu fó koñese ita-nia an ba maizumenus ema ida ka rua, ka ba família ida kada loron. Diʼak atu halo ida-neʼe durante tempu han-meiudia. Nuneʼe, duké bá liʼur atu sosa hahán ka bá han iha restaurante, diʼak liu se ita lori hahán atu ita bele haksolok hodi han no ransu malu ho ita-nia irmaun-irmán sira iha reuniaun-fatin. Kuandu ita halo nuneʼe, karik ita sei koñese maluk foun neʼebé sei sai ita-nia belun ba nafatin.
8. Tanbasá mak ita hakarak atu serbisu ho voluntáriu iha reuniaun boot? Oinsá mak ita bele halo ida-neʼe?
8 Bainhira ita halo serbisu ba Maromak hamutuk ho ita-nia maluk kristaun, ita sente kmaan duni! Ita bele sai voluntáriu hodi halo serbisu ruma, hanesan ajuda hamoos reuniaun-fatin ka lae? (Sal 110:3) Se Ita hakarak ajuda, fó-hatene Grupu neʼebé Tau Matan ba Serbisu Voluntáriu iha reuniaun boot neʼe. Kuandu ema barak mak halo serbisu hamutuk, serbisu neʼe sei sai kmaan no halo ita kontente.
9. Tansá mak ita presiza fó atensaun ba ita-nia hatais no hahalok antes, durante, no depois reuniaun boot?
9 Ita-nia hahalok diʼak fó kmaan ba ema iha liʼur: Kuandu ita tuir reuniaun boot, ita hakarak hatudu katak ita mak Testemuña ba Jeová iha tempu hotu, laʼós deʼit durante programa. Ema neʼebé haree ita kuandu ita sai tiha husi reuniaun-fatin tenke hatene katak ita la hanesan duni ho ema neʼebé laʼós Testemuña ba Jeová. (1 Ped 2:12) Ita-nia hatais kuandu ita tuir reuniaun boot, kuandu ita iha ita-nia hela-fatin, ka kuandu ita bá han iha restaurante tenke fó glória ba Maromak Jeová. (1 Tim 2:9, 10) Hodi uza nafatin kartaun naran nian, neʼe bele ajuda ema seluk atu hatene ita mak ema Testemuña ba Jeová. No ida-neʼe mós bele fó oportunidade mai ita atu fó-hatene ba sira kona-ba ita-nia reuniaun boot no fó sasin ba sira.
10. Saida deʼit mak ita bele halo hodi serbisu-naʼin sira iha otél no restaurante iha hanoin neʼebé loos kona-ba ita-nia reuniaun boot?
10 Oinsá mak ita bele halo sira neʼebé serbisu iha otél ka restaurante sente kmaan? Diʼak se ita la hameno kuartu barak liu duké kuartu neʼebé ita presiza atu ema seluk mós bele hela iha otél nia kuartu neʼebé mamuk. Se ema neʼebé serbisu iha otél mak okupadu iha tempu neʼebé ita tama, ita presiza hatudu pasiénsia no laran-diʼak.—Kol 4:6.
11. Esperiénsia saida deʼit mak hatudu katak ita-nia hahalok diʼak nuʼudar ema kristaun bele fó sasin diʼak?
11 Saida mak ema seluk sente kona-ba ita-nia hahalok diʼak kuandu ita bá asiste reuniaun boot? Jornál ida konta kona-ba Manager husi otél ida neʼebé ita-nia irmaun-irmán sira uza atu tuir reuniaun boot, manager neʼe hatete: “Testemuña sira sempre hatudu hahalok diʼak. Ami kontente atu simu sira tinan-tinan.” Iha tinan kotuk, ema ida neʼebé laʼós Testemuña lakon ninia karteira iha otél neʼebé nia hela. Kuandu Testemuña ida neʼebé mós hela iha otél neʼe fó fali karteira neʼe ba manager ho buat hotu iha laran, manager neʼe hatete ba karteira neʼe nia naʼin: “Diʼak ba Ita tanba Testemuña ba Jeová tuir daudauk sira-nia reuniaun boot besik iha neʼe, no sira barak hela iha otél neʼe. Selae, karik Ita la bele hetan fali Ita-nia karteira neʼe.”
12. Nuʼudar reuniaun boot besik daudauk ona, ita hakarak hakaʼas an atu halo saida? Tanbasá?
12 Reuniaun boot ba loron tolu ba tinan ida-neʼe besik daudauk ona. Ami uza tempu barak tiha ona atu prepara buat barak hodi reuniaun neʼe bele halo ita sente kmaan. Nuneʼe, mai ita hakaʼas an atu tuir reuniaun boot neʼe ba loron tolu hotu, no sai prontu atu simu buat neʼebé Maromak Jeová no ninia organizasaun prepara tiha ona mai ita. Hakaʼas an atu fó kmaan ba ema seluk hodi hatudu hahalok diʼak, no hodi kontente atu ransu malu ho maluk kristaun sira. Se ita halo buat sira-neʼe, ita no mós ita-nia maluk sira bele sente hanesan ho feto ida neʼebé tuir reuniaun boot iha tinan kotuk, nia hatete: “Haʼu nunka sente kontente hanesan neʼe iha haʼu-nia moris!”
[Liafuan neʼebé foti husi pájina 4]
Hanesan iha tempu uluk, semana tolu antes reuniaun boot ita sei konvida ema seluk atu tuir reuniaun boot
[Liafuan neʼebé foti husi pájina 6]
Ita-nia hatais kuandu tuir reuniaun boot, kuandu iha hela-fatin, ka kuandu bá han iha restaurante tenke fó glória ba Maromak Jeová
[Liafuan neʼebé foti husi pájina 7]
Hakaʼas an atu fó kmaan ba ema seluk hodi hatudu hahalok diʼak, no hodi kontente atu ransu ho maluk kristaun
[Kaixa iha pájina 4-7]
Informasaun kona-ba reuniaun boot ba loron tolu ba 2011
◼ Oras: Reuniaun sei hahú iha tuku 9.20 dadeer. Reuniaun-fatin sei loke iha tuku 8.00 dadeer. Kuandu komesa múzika atu loke programa, ita hotu tenke tuur ona iha reuniaun-fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4.55 lokraik iha loron-sesta no sábadu, no iha tuku 3.40 lokraik iha loron-domingu.
◼ Buka tuur-fatin: Ita bele prepara deʼit tuur-fatin ba família neʼebé hela ho Ita, ka ba Ita-nia maluk neʼebé mai hamutuk ho Ita iha karreta, ka ba Ita-nia estudante Bíblia sira.—1 Kor 13:5.
◼ Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba Serbisu iha Mundu Tomak iha reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Watchtower”.
◼ Asidente no emerjénsia: Se ema ruma sai moras tebes iha reuniaun-fatin, favór ida fó-hatene ba irmaun sira neʼebé serbisu nuʼudar asistente. Se presiza, katuas ida sei bolu ambulánsia.
◼ Gravasaun: Se hakarak grava programa, labele uza eletrisidade iha salaun atu liga Ita-nia sasán eletróniku, no kuidadu hodi la hanetik ema seluk atu rona.
◼ Restaurante: Hanoin nafatin atu fó glória ba Maromak Jeová liuhusi ita-nia hahalok neʼebé diʼak bainhira ita bá han iha restaurante.
◼ Otél:
(1) Favór ida, labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida.
(2) Se ita hatene katak ita sei la uza otél neʼebé ita hameno tiha ona, diʼak atu fó-hatene kedas ba otél-naʼin.—Mt 5:37.
(3) Ita labele teʼin iha kuartu laran se otél-naʼin la fó lisensa atu halo nuneʼe.
(4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian.
(5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél.
◼ Serbisu voluntáriu: Kuandu ita hola parte iha serbisu voluntáriu, ita bele aumenta liután ita-nia haksolok iha reuniaun boot. (Apos 20:35) Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.
◼ Batizmu: Ema neʼebé atu hetan batizmu iha reuniaun boot neʼe tenke tuur iha fatin neʼebé prepara nanis ona ba sira antes atu komesa programa iha sábadu dadeer. Sira ida-idak presiza atu lori toalla no roupa batizmu nian neʼebé la mihis ka badak liu. Dala ruma, ema hatais roupa neʼebé ladún hatudu respeitu ba tempu importante neʼe. Katuas neʼebé halo pergunta ba sira neʼebé hakarak hetan batizmu tenke esplika ho klaru kona-ba oinsá atu hatais iha dalan neʼebé diʼak. Ita hetan batizmu atu hatudu katak Ita dedika an ona ba Maromak Jeová. Tanba desizaun neʼe mak buat neʼebé Ita halo entre Ita ho Maromak Jeová deʼit, ladiʼak atu ema naʼin-rua tama bee laran hamutuk no kaer liman atubele hetan batizmu dala ida deʼit.
◼ Kartaun naran nian: Durante loron tolu, diʼak atu tau nafatin ita-nia kartaun naran nian kuandu ita sai husi uma toʼo ita fila. Dala barak kartaun neʼe bele loke dalan atu fó sasin neʼebé diʼak. Ita tenke foti kartaun no ninia plástiku liuhusi ita-nia kongregasaun, tanba Ita la bele hetan ida-neʼe iha reuniaun boot. Keta husik toʼo loron atu halaʼo reuniaun boot mak Ita foin husu kartaun neʼebé Ita no Ita-nia família sei uza. Keta haluha atu lori nafatin Ita-nia kartaun neʼebé hatudu katak Ita la simu raan.
◼ Telemovel: Hamate ita-nia telemovel, ka taka ninia lian atu labele hanetik ema seluk atu rona diskursu.
[Kaixa iha pájina 5]
Oinsá mak ita sei fahe konvite?
Atu ita bele fahe konvite barak, ita tenke koʼalia uitoan deʼit. Ita bele hatete: “Bondia. Ami hola parte iha serbisu neʼebé halaʼo iha mundu tomak atu fahe konvite neʼe. Neʼe mak konvite ba Ita. Ita bele haree informasaun liután iha konvite neʼe.” Iha konvite nia oin, iha dezeñu no liafuan neʼebé dada ema nia atensaun, nuneʼe kuandu ita fahe konvite ba ema, halo fasil ba sira atu haree konvite nia oin. Koʼalia ho laran-manas. Kuandu ita hola parte atu fahe konvite iha findesemana, ita bele fahe konvite hamutuk ho livru fulan-fulan.