“Hatudu nafatin hahalok diʼak iha nasaun sira-nia leet”
1. Tanbasá mak importante atu hatudu nafatin hahalok diʼak durante ita-nia reuniaun boot sira?
1 Tinan-tinan, kuandu ita tuir ita-nia reuniaun boot ba loron tolu, ema barak sempre haree ita. Tan neʼe, importante katak ita-nia hahalok fó naran diʼak ba Maromak neʼebé ita adora. (Levítico [Imamat] 20:26) Ita-nia hahalok diʼak no dalan neʼebé ita hatais tenke hatudu katak ita mak Kristu nia dixípulu sira neʼebé loos. Kuandu ita tuir reuniaun boot ba loron tolu ka reuniaun boot internasionál, oinsá mak ita bele “hatudu nafatin hahalok diʼak iha nasaun sira-nia leet” no fó glória ba ita-nia Aman iha lalehan?—1 Pedro 2:12.
2. Bainhira mak ita presiza hatudu hahalok kristaun nian durante reuniaun boot ba loron tolu?
2 Hatudu hahalok kristaun nian: Domin neʼebé ita hatudu ba maluk sira no mós ita-nia laran-diʼak ba “ema iha liʼur” mak la hanesan duni ho ema mundu sira ohin loron. (Koloso 3:10; 4:5; 2 Timóteo 3:1-5) Ita presiza hatudu laran-diʼak no pasiénsia kuandu ita koʼalia ho serbisu-naʼin sira iha otél no restaurante iha tempu hotu, inklui mós kuandu problema ruma mosu.
3. Inan-aman sira presiza halo saida, no tanbasá?
3 Inan-aman sira presiza tau matan didiʼak ba sira-nia oan iha reuniaun boot fatin, iha restaurante sira no mós iha otél. (Provérbios [Amsal] 29:15) Manager ida husi otél hatete ba kaben-naʼin ida: “Ami gosta tebes imi-nia maluk sira. Imi-nia família no labarik sira hotu hatudu laran-diʼak no respeitu. Serbisu-naʼin hotu iha-neʼe gaba imi. Se imi hela iha-neʼe semana-semana karik, neʼe diʼak tebes.”
4. Durante tempu reuniaun boot nian, ita presiza hatais oinsá?
4 Roupa neʼebé hatudu respeitu: Ita-nia hatais durante reuniaun boot labele tuir ema mundu nia toman neʼebé la hatudu respeitu. (1 Timóteo 2:9) Iha tempu hotu, ita hakarak ita-nia hatais atu nafatin moos, kabeer no la sabraut. Tan neʼe, ita sei kontente atu uza ita-nia kartaun naran nian no la moe atu haklaken ba ema kuandu iha oportunidade. Ita-nia hatais no hahalok kuandu ita tuir reuniaun boot, sei dada ema laran-moos sira ba Bíblia nia mensajen neʼebé bele salva sira-nia moris, no ida-neʼe mós halo Maromak Jeová kontente.—Sofonias (Zefanya) 3:17.
[kaixa iha pájina 2-3]
Informasaun kona-ba reuniaun boot ba 2014
◼ Oras: Reuniaun boot fatin sei loke iha tuku 8.00 dadeer, no múzika atu loke programa sei hahú iha tuku 9.20 dadeer. Kuandu ita rona múzika neʼe, ita hotu tenke tuur ona hodi hatudu respeitu ba programa neʼebé komesa daudaun. Programa sei ramata iha tuku 4.55 lokraik iha loron-sesta no sábadu, no iha loron-domingu sei ramata tuku 3.50 lokraik.
◼ Reuniaun boot internasionál: Rai balu sei halaʼo reuniaun boot internasionál. La haluha katak antes sukursál konvida kongregasaun balu no irmaun-irmán balu husi rai seluk atu tuir reuniaun boot internasionál, sira hanoin didiʼak uluk kona-ba buat balu hanesan: Fatin atu uza boot oinsá? Iha ka lae, fatin toʼo atu para karreta sira? No iha ka lae, otél ka hela-fatin neʼebé toʼo ba irmaun-irmán sira neʼebé sei tuir. Se ita tuir reuniaun boot internasionál iha rai sira-neʼe ida, maibé ita la hetan konvite, karik neʼe bele hamosu problema. Nuneʼe, se ita la konsege tuir reuniaun boot iha ita-nia área no ita presiza tuir iha fatin seluk, diʼak se ita la tuir reuniaun boot internasionál.
◼ Buka tuur-fatin: Kuandu reuniaun boot fatin loke iha dadeer, favór ida labele ansi atu hili kedas tuur-fatin neʼebé ita gosta liu toʼo ita hanesan hadau malu ho ita-nia maluk sira. Ema tenke haree ita hatudu hahalok nuʼudar ema kristaun loos hodi buka uluk ema seluk nia diʼak. Ida-neʼe sei book sira atu hahiʼi Maromak. (João 13:34, 35; 1 Korinto 13:4, 5; 1 Pedro 2:12) Ita bele prepara deʼit tuur-fatin ba ita-nia maluk neʼebé mai hamutuk ho ita iha karreta, ka família neʼebé hela ho ita, no mós ba ita-nia estudante Bíblia sira.
◼ Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba serbisu iha mundu tomak iha reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Christian Congregation of Jehovahʼs Witnesses”.
◼ Ai-moruk: Se Ita hemu daudauk ai-moruk ruma neʼebé doutór fó ba Ita, halo favór lori ai-moruk neʼe atu Ita bele hemu, tanba Ita sei la hetan ai-moruk neʼe iha reuniaun-fatin.
◼ Sapatu: Tinan-tinan asidente balu mosu tanba ema uza sapatu neʼebé lori perigu ba sira. Nuneʼe, diʼak ba ita hotu atu hatais sapatu neʼebé simples no neʼebé halo fasil ba ita atu laʼo ho seguru.
◼ Restaurante: Hanoin nafatin atu fó glória ba Maromak Jeová liuhusi ita-nia hatais no hahalok neʼebé di’ak bainhira ita bá han iha restaurante.
◼ Otél:
(1) Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida.
(2) Se ita hatene katak ita sei la uza kuartu neʼebé ita hameno tiha ona, diʼak atu fó-hatene kedas ba otél-naʼin.—Mt 5:37.
(3) Ita labele teʼin iha kuartu laran se otél-naʼin la fó lisensa atu halo nuneʼe.
(4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian.
(5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél. Tanba sira atende bainaka barak, sira sei kontente kuandu ita hatudu laran-diʼak no pasiénsia.
(6) Inan-aman sira tenke tau matan didiʼak ba sira-nia oan hodi sira la estraga sasán ruma iha otél laran.
◼ Serbisu voluntáriu: Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.