Informasaun kona-ba reuniaun boot ba 2015
Oras: Reuniaun boot fatin sei loke iha tuku 8.00 dadeer, no múzika atu loke programa sei hahú iha tuku 9.20 dadeer. Kuandu ita rona múzika neʼe, ita hotu tenke tuur ona hodi hatudu respeitu ba programa neʼebé komesa daudaun. Programa sei remata maizumenus tuku 5.00 lokraik iha loron-sesta no sábadu, no iha loron-domingu sei remata maizumenus tuku 4.00 lokraik.
‘Hahiʼi Jeová ho knananuk sira’: Maromak nia povu iha tempu uluk sempre hahiʼi Jeová hodi kanta. Ohin loron mós múzika mak parte importante iha ita-nia adorasaun. (Salmo [Mazmur] 28:7) Baibain, programa ba reuniaun boot sira mós inklui rona múzika antes diskursu sira hahú. Múzika neʼe laʼós hodi rona halimar deʼit maibé irmaun-irmán sira prepara didiʼak hodi ita bele aprende kona-ba Jeová no adora nia. Tan neʼe, bainhira aprezentadór fó avizu katak múzika atu komesa ona, neʼe mak tempu atu tuur hodi rona didiʼak duké koʼalia ba malu. Ita halo hanesan neʼe hodi hatudu katak ita hafolin irmaun-irmán sira neʼebé toka múzika neʼe. Tinan ida dala rua, sira gasta sira-nia tempu no osan rasik bá iha Patterson, Novaiorke hodi toka no grava múzika furak ba ita. Rona tiha ba múzika neʼe, ema hotu hahiʼi Jeová hamutuk hodi kanta.
Buka tuur-fatin: Kuandu reuniaun boot fatin loke iha dadeer, favór ida labele ansi atu hili kedas tuur-fatin neʼebé ita gosta liu toʼo ita hanesan hadau malu ho ita-nia maluk sira. Ema tenke haree ita hatudu hahalok nuʼudar ema kristaun loos hodi buka uluk ema seluk nia diʼak. Ida-neʼe sei book sira atu hahiʼi Maromak. (João 13:34, 35; 1 Korinto 13:5; 1 Pedro 2:12) Ita bele prepara deʼit tuur-fatin ba ita-nia maluk neʼebé mai hamutuk ho ita iha karreta, ka família neʼebé hela ho ita, no mós ba ita-nia estudante Bíblia sira.
Roupa neʼebé hatudu respeitu: Ita-nia hatais durante reuniaun boot labele tuir ema mundu nia toman neʼebé la hatudu respeitu. (1 Timóteo 2:9) Iha tempu hotu, ita hakarak ita-nia hatais atu nafatin moos, kabeer no la sabraut. Tan neʼe, ita sei kontente atu uza ita-nia kartaun naran nian no la moe atu haklaken ba ema kuandu iha oportunidade. Ita-nia hatais no hahalok kuandu ita tuir reuniaun boot, sei dada ema laran-moos sira ba Bíblia nia mensajen neʼebé bele salva sira-nia moris, no ida-neʼe mós halo Maromak Jeová kontente.—Sofonias (Zefanya) 3:17.
Hatudu respeitu bainhira uza sasán eletróniku nian: Ita bele hatudu respeitu ba ema seluk hodi taka telemovel ka tablet nia lian, hodi nuneʼe, la atrapalla ema seluk. Se uza kámera ruma atu grava, diʼak atu hanoin ema seluk hodi kuidadu ita la hanetik ita-nia maluk sira atu haree. Ita mós hatudu respeitu hodi la haruka mensajen ka email durante reuniaun.
Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba serbisu iha mundu tomak iha reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Christian Congregation of Jehovahʼs Witnesses”.
Ai-moruk: Se Ita hemu daudauk ai-moruk ruma neʼebé doutór fó ba Ita, halo favór lori ai-moruk neʼe atu Ita bele hemu, tanba Ita sei la hetan ai-moruk neʼe iha reuniaun-fatin.
Sapatu: Tinan-tinan asidente balu mosu tanba ema uza sapatu neʼebé lori perigu ba sira. Nuneʼe, diʼak ba ita hotu atu hatais sapatu neʼebé simples no neʼebé halo fasil ba ita atu laʼo ho seguru.
Restaurante: Hanoin nafatin atu fó glória ba Maromak Jeová liuhusi ita-nia hatais no hahalok neʼebé diʼak bainhira ita bá han iha restaurante.
Otél:
Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida.
Se ita hatene katak ita sei la uza kuartu neʼebé ita hameno tiha ona, diʼak atu fó-hatene kedas ba otél-naʼin.—Mt 5:37.
Ita labele teʼin iha kuartu laran se otél-naʼin la fó lisensa atu halo nuneʼe.
Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian.
Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél. Tanba sira atende bainaka barak, sira sei kontente kuandu ita hatudu laran-diʼak no pasiénsia.
Inan-aman sira tenke tau matan didiʼak ba sira-nia oan hodi sira la estraga sasán ruma iha otél laran.
Serbisu voluntáriu: Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.