Hahalok neʼebé fó glória ba Maromak
1. Tanbasá mak ema barak hatene kuandu Testemuña ba Jeová halaʼo reuniaun boot?
1 Kuandu ita tuir reuniaun boot, ema barak haree ita. Iha rai barak, média fó avizu kona-ba ita-nia reuniaun boot. Otél no restaurante sira mós nakonu ho ita-nia irmaun-irmán sira, nuneʼe ema iha fatin sira-neʼe haree ita-nia maluk barak neʼebé uza kartaun naran nian. Matadalan sira tuirmai neʼe sei ajuda ita atu nafatin fó glória ba Maromak liuhusi ita-nia hahalok nuʼudar ita tuir reuniaun boot.—1 Ped 2:12.
2. Oinsá mak ita bele fó glória ba Maromak liuhusi ita-nia hatais kuandu ita tuir reuniaun boot?
2 Hatais iha dalan neʼebé hatudu respeitu: Kuandu ita tuir reuniaun boot, ema seluk sempre haree kona-ba ita-nia hatais neʼebé hatudu respeitu. Maibé, ema barak mós haree dalan neʼebé ita hatais iha tempu seluk, hanesan kuandu ita atu hela iha otél, han iha restaurante, sosa buat ruma iha loja no halo buat seluk tan. Maski iha tempu sira-neʼe ita la presiza hatais roupa hanesan ita tuir reuniaun, maibé ita-nia hatais tenke moos no kabeer no la sabraut. Ema seluk presiza haree katak ita la hanesan duni ho ema neʼebé laʼós Testemuña. (Rom 12:2) Liután neʼe, ita mós presiza uza nafatin kartaun naran nian tanba liuhusi ida-neʼe ema sei hatene kona-ba ita-nia reuniaun boot, loke oportunidade atu fó sasin, no halo fasil ba ita-nia maluk kristaun sira atu hatene ita.
3. Oinsá mak ita bele hatudu pasiénsia no respeitu?
3 Hatudu pasiénsia no respeitu: Ohin loron, ema barak iha mundu neʼe hanoin deʼit sira-nia an no la hatene fó-agradese. Nuneʼe, kuandu ita hatudu pasiénsia no respeitu iha tempu hotu, neʼe halo ema seluk neʼebé haree ita sente kmaan no kontente. (2 Tim 3:1-5) Kuandu ita atu prepara tuur-fatin ka hamriik iha liña atu foti livru foun neʼebé fó sai iha reuniaun boot, ita hakarak buka ema seluk nia diʼak duké ita-nian. (1 Kor 10:23, 24) Kuandu mane ida tuir ita-nia reuniaun boot ba dala primeiru, nia hatete: “Haʼu haluha ona diskursu sira neʼebé haʼu rona iha loron neʼebá, maibé haʼu sei hanoin-hetan hahalok diʼak neʼebé Testemuña sira hatudu.”
4. Tanbasá mak ita hakarak halo serbisu voluntáriu iha reuniaun boot se ita-nia situasaun husik ita atu halo nuneʼe?
4 Serbisu voluntáriu: Ema kristaun loos sira sempre prontu halo serbisu voluntáriu. (Sal 110:3) Ita mós bele fó ita-nia an atu halo serbisu voluntáriu iha reuniaun boot ka lae? Iha reuniaun boot ida, maizumenus irmaun-irmán naʼin-600 halo serbisu voluntáriu atu hamoos fatin antes halaʼo reuniaun boot. Serbisu-naʼin sira hakfodak kona-ba neʼe no hatete: “Ami seidauk haree buat neʼe! Susar ba ami atu fiar katak ema sira-neʼe halo serbisu voluntáriu.” Sin, ita hotu hein namanas ona ba ita-nia reuniaun boot ba 2013, no ba oportunidade atu rona no aprende husi Maromak no atu fó glória ba nia.
[Dezeñu iha pájina 3]
Informasaun kona-ba reuniaun boot ba loron tolu ba 2013
◼ Oras: Programa sei hahú iha tuku 9.20 dadeer. Reuniaun-fatin sei loke iha tuku 8.00 dadeer. Kuandu komesa múzika atu loke programa, ita hotu tenke tuur ona iha reuniaun-fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4.55 lokraik iha loron-sesta no sábadu, no iha loron-domingu sei ramata tuku 3.40 lokraik.
◼ Buka tuur-fatin: Ita bele prepara deʼit tuur-fatin ba Ita-nia maluk neʼebé mai hamutuk ho Ita iha karreta, ka família neʼebé hela ho Ita, no mós ba Ita-nia estudante Bíblia sira.—1 Kor 13:5.
◼ Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba serbisu iha mundu tomak iha reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Christian Congregation of Jehovahʼs Witnesses”.
◼ Ai-moruk: Se Ita hemu daudauk ai-moruk ruma neʼebé doutór fó ba Ita, halo favór lori ai-moruk neʼe atu Ita bele hemu, tanba Ita sei la hetan ai-moruk neʼe iha reuniaun-fatin.
◼ Sapatu: Tinan-tinan asidente balu mosu tanba ema uza sapatu neʼebé lori perigu ba sira. Nuneʼe, diʼak ba ita hotu atu hatais sapatu neʼebé simples no neʼebé halo fasil ba ita atu laʼo ho seguru.
◼ Restaurante: Hanoin nafatin atu fó glória ba Maromak Jeová liuhusi ita-nia hatais no hahalok neʼebé diʼak bainhira ita bá han iha restaurante.
◼ Otél:
(1) Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida.
(2) Se ita hatene katak ita sei la uza kuartu neʼebé ita hameno tiha ona, diʼak atu fó-hatene kedas ba otél-naʼin.—Mt 5:37.
(3) Ita labele teʼin iha kuartu laran se otél-naʼin la fó lisensa atu halo nuneʼe.
(4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian.
(5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél. Tanba sira atende bainaka barak, sira sei kontente kuandu ita hatudu laran-diʼak no pasiénsia.
(6) Inan-aman sira tenke tau matan didiʼak ba sira-nia oan hodi sira la estraga sasán ruma iha otél laran.
◼ Serbisu voluntáriu: Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.