Ita-nia reuniaun boot ba loron tolu fó sasin kona-ba lia-loos
1. Festa neʼebé ema Israel sira tuir tinan-tinan, fó oportunidade ba sira atu hanoin no koʼalia kona-ba lia-loos importante saida deʼit?
1 Ema Israel iha tempu antigu halibur an tinan ida dala tolu atu halaʼo festa. Maski mane sira deʼit mak tenke tuir festa neʼe, maibé dala ruma família tomak bá Jerusalém atu tuir reuniaun boot sira-neʼe. (Deut 16:15, 16) Reuniaun sira hanesan neʼe, fó oportunidade ba sira atu hanoin no koʼalia kona-ba lia-loos importante kona-ba Maromak. Saida mak lia-loos importante sira-neʼe? Buat ida mak Maromak Jeová mak Ida neʼebé sempre fó ho laran-luak buat neʼebé ninia povu presiza. (Deut 15:4, 5) Buat seluk mak Maromak nia povu bele fiar katak nia sei proteje no dirije sira. (Deut 32:9, 10) Tempu neʼe mós fó oportunidade ba ema Israel sira atu hanoin-hetan katak sira presiza haleno Maromak Jeová nia hahalok, tanba sira mak povu ba ninia naran. (Deut 7:6, 11) Ohin loron, reuniaun boot ba loron tolu neʼebé ita halaʼo tinan-tinan, mós ajuda ita iha dalan hanesan.
2. Iha reuniaun boot, buat saida deʼit mak bele ajuda ita atu komprende liután lia-loos?
2 Programa neʼebé ajuda ita komprende lia-loos: Iha ita-nia reuniaun boot ba loron tolu, ita kontente atu rona diskursu no entrevista sira, haree drama no drama kiʼik sira neʼebé ajuda ita atu komprende liután lia-loos husi Bíblia. (Joao 17:17) Irmaun sira gasta ona tempu barak atu prepara ita-nia reuniaun boot ba loron tolu. Maromak Jeová nia organizasaun prepara daudaun programa ida neʼebé sei ajuda ema iha mundu tomak ho sira-nia presiza ohin loron nian. (Mt 24:45-47) Ita hein namanas ona atu haree no rona programa ba ita-nia reuniaun boot ka lae?
3. Saida deʼit mak ita presiza halo atu hetan buat diʼak husi programa?
3 Maibé atu ita hetan buat diʼak husi reuniaun boot neʼe, ita presiza tuir programa hotu ba loron tolu no rona didiʼak. Nuneʼe, se Ita seidauk husu lisensa husi Ita-nia patraun, agora mak tempu diʼak atu halo ida-neʼe. Diʼak atu toba sedu iha kalan hodi ita bele tau atensaun ba programa. Ema barak dehan katak hodi haree ba irmaun neʼebé hatoʼo diskursu no hakerek nota badak, neʼe mós ajuda sira atu rona didiʼak. Diʼak atu hamate ita-nia telemovel ka taka ninia lian atu labele hanetik ita no ema seluk atu rona diskursu. Diʼak mós atu la koʼalia ba ema seluk, la haruka mensajen, no la hemu ka han buat ruma durante programa.
4. Oinsá mak inan-aman sira bele ajuda sira-nia oan durante reuniaun boot?
4 Kada tinan hitu, durante Festa Barraka nian família sira husi Israel halibur hamutuk atu rona Maromak nia Ukun-Fuan neʼebé ema lee ba sira. “Labarik sira” mós hamutuk ho sira-nia inan-aman iha tempu hanesan neʼe hodi “sira bele rona no atu sira bele aprende”. (Deut 31:12) Iha ita-nia reuniaun boot sira, ita mós kontente tebes atu haree família sira tuur hamutuk durante programa no labarik sira rona didiʼak, loos ka lae? Iha kalan, karik diʼak atu koʼalia nuʼudar família kona-ba buat neʼebé ita gosta husi programa iha loron neʼe. Bíblia hatete: “Hahalok beik mak iha oan nia laran.” Tan neʼe, durante han meiudia no kuandu iha hela-fatin, importante ba inan-aman sira atu tau matan ba sira-nia oan, inklui mós oan joven sira, duké husik sira “livre deʼit”.—Prov 22:15; 29:15.
5. Oinsá mak ita-nia hahalok diʼak kuandu hela iha otél bele fó sasin kona-ba lia-loos?
5 Ita-nia hahalok diʼak fó sasin kona-ba lia-loos: Ita-nia hahalok diʼak neʼebé ita hatudu kuandu ita tuir reuniaun boot bele fó sasin kona-ba lia-loos. (Tito 2:10) Iha rai balu irmaun-irmán sira presiza hela iha otél kuandu sira tuir reuniaun boot. Serbisu-naʼin sira iha otél bele haree kuandu irmaun-irmán sira hatudu pasiénsia no respeitu ba sira. (Kol 4:6) Iha tinan kotuk, kuandu irmaun sira husi sukursál halo kontratu ho otél neʼebé irmaun-irmán sira sei hela, manager husi otél neʼe hatete: “Ami gosta tebes imi-nia ema sira atu mai hela iha ami-nia otél tanba sira ema diʼak. Sira hotu hatudu laran-diʼak, no sira kuidadu sasán sira iha otél laran no sempre hatudu respeitu ba serbisu-naʼin sira.”
6. Oinsá mak ita bele fó sasin kona-ba lia-loos liuhusi dalan neʼebé ita hatais kuandu ita tuir reuniaun boot?
6 Kuandu ita uza nafatin kartaun naran nian, ema seluk bele hatene kona-ba ita-nia reuniaun boot, no ita-nia irmaun-irmán sira bele rekoñese ita. La’ós neʼe deʼit, ida-neʼe mós bele fó sasin ba ema seluk. Porezemplu, ema sei haree katak sira neʼebé uza kartaun naran nian sempre hatais didiʼak, la hanesan ho ema iha mundu neʼebé hatais sabraut no la hatudu respeitu. (1 Tim 2:9, 10) Tan neʼe, kuandu ita tuir reuniaun boot, ita presiza hanoin kona-ba ita-nia hatais iha tempu hotu. Maski dala ruma reuniaun-fatin manas uitoan, maibé dalan neʼebé ita hatais presiza hahiʼi Maromak nafatin. Se ita hakarak troka roupa depois reuniaun hotu atu bá han iha restaurante, ita presiza hanoin-hetan katak ita reprezenta Maromak Jeová no la diʼak atu hatais iha dalan neʼebé haleno mundu nia hahalok.
7. Kuandu ita tuir reuniaun boot, oinsá mak ita bele haksolok hodi ransu ho ita-nia maluk kristaun?
7 Kuandu ema Israel sira tuir festa tinan-tinan nian, sira haksolok hodi ransu hamutuk ho sira-nia maluk fiar-naʼin husi rai oioin ho unidade. (Apos 2:1, 5) Kuandu ita tuir reuniaun boot sira, ema seluk bele haree katak ita iha relasaun espesiál ho ita-nia maluk kristaun husi fatin oioin, no ida-neʼe bele fó sasin ba sira. (Sal 133:1) Entaun, duké sai hodi sosa hahán iha liʼur, diʼak liu atu lori hahán uitoan hodi ita bele aproveita tempu han meiudia nian atu koʼalia ho ita-nia irmaun-irmán sira neʼebé tuur besik ita.
8. Se ita bele, tansá mak diʼak atu fó ita-nia an atu halo serbisu ruma iha reuniaun boot sira?
8 Baibain, ema hakfodak kuandu sira haree oinsá ita-nia reuniaun boot sira organiza ho didiʼak, no liuliu kuandu sira hatene katak ema neʼebé halo serbisu sira-neʼe la manán osan. Ita mós bele ‘fó ita-nia an ho hakarak rasik’ hodi bele halo serbisu sira iha reuniaun boot ka lae? (Sal 110:3) Dala ruma, família tomak fó sira-nia an hodi serbisu iha reuniaun boot. Ida-neʼe dalan diʼak ba inan-aman sira atu treinu sira-nia oan atu ajuda ema seluk. Se ita mak ema moedór ida, dalan diʼak atu koñese irmaun-irmán seluk mak hodi halo serbisu ruma iha reuniaun-fatin. Irmán ida hatete: “Iha reuniaun-fatin haʼu la koñese ema barak, haʼu koñese deʼit haʼu-nia família no kolega balu. Maibé kuandu haʼu ajuda atu hamoos, haʼu hasoru irmaun no irmán barak, no haʼu kontente tebes ho ida-neʼe!” Hodi ajuda atu halo serbisu oioin iha reuniaun boot, ita bele hetan kolega barak tan, no ida-neʼe halo ita kontente. (2 Kor 6:12, 13) Se ita seidauk koko atu halo serbisu ruma iha reuniaun boot sira, husu katuas sira saida mak ita presiza halo atu bele ajuda.
9. Oinsá mak ita sei konvida ema seluk atu tuir reuniaun boot?
9 Konvida ema seluk atu rona kona-ba lia-loos: Hanesan baibain, semana tolu antes ita halaʼo reuniaun boot, ita sei hola parte iha kampaña atu konvida ema seluk atu tuir reuniaun boot. Kongregasaun sira tenke hakaʼas an atu fahe konvite ba ema barak liu iha sira-nia haklaken-fatin. (Haree kaixa “Oinsá mak ita sei fahe konvite?”) Ita bele lori konvite neʼebé resin kuandu ita tuir reuniaun boot. Irmaun-irmán sira neʼebé tuir reuniaun boot sei uza konvite sira-neʼe atu haklaken iha dalan la formál.
10. Konta toʼok ezemplu sira neʼebé hatudu katak ita bele hetan rezultadu diʼak kuandu ita halaʼo kampaña atu fahe konvite.
10 Kampaña atu konvida ema seluk atu tuir reuniaun boot, lori rezultadu diʼak ka lae? Iha reuniaun boot ida, asistente ajuda kaben-naʼin ida atu buka tuur-fatin. Kaben-naʼin neʼe hatete katak sira simu konvite no hanoin katak sira “hakarak hatene kona-ba neʼe”. Entaun, sira hodi karreta dook kilómetru 320 atu tuir reuniaun boot. Iha situasaun seluk, irmán ida neʼebé haklaken husi uma ba uma, fó konvite ba mane ida. Mane neʼe hatudu interese kona-ba reuniaun boot, entaun, irmán neʼe uza tempu atu esplika liután kona-ba ida-neʼe. Loron balu tuirmai, kuandu irmán neʼe tuir reuniaun boot, nia haree mane neʼe hamutuk ho ninia kolega ida tuir reuniaun boot no kaer hela livru neʼebé foin hasai iha loron neʼe.
11. Tansá mak importante atu tuir reuniaun boot tinan-tinan?
11 Festa tinan-tinan nian neʼebé ema Israel halaʼo iha tempu uluk mak arranju husi Maromak Jeová atu ajuda sira ‘serbí nia iha lia-loos’. (Jos 24:14) Hanesan iha tempu uluk, kuandu ita tuir reuniaun boot ba loron tolu neʼebé ita halaʼo tinan-tinan, neʼe sei ajuda ita atu kontinua “laʼo iha lia-loos”, no ida-neʼe parte importante husi ita-nia adorasaun ba Maromak. (3 Joao 3) Ita bele fiar katak Jeová sei haraik bensaun ba ita hotu neʼebé hadomi lia-loos, nuʼudar ita hakaʼas an atu tuir no hetan buat diʼak husi reuniaun boot!
[Liafuan neʼebé foti husi pájina 4]
Ita-nia hahalok diʼak kuandu ita tuir reuniaun boot fó sasin kona-ba lia-loos
[Liafuan neʼebé foti husi pájina 5]
Semana tolu antes reuniaun boot, ita sei konvida ema seluk atu tuir reuniaun boot
[Kaixa iha pájina 3]
Informasaun Kona-ba Reuniaun Boot Ba Loron Tolu Ba 2012
◼ Oras: Programa sei hahú iha tuku 9.20 dadeer. Reuniaun-fatin sei loke iha tuku 8.00 dadeer. Kuandu komesa múzika atu loke programa, ita hotu tenke tuur ona iha reuniaun-fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4.55 lokraik iha loron-sesta no sábadu, no iha tuku 3.40 lokraik iha loron-domingu.
◼ Buka tuur-fatin: Ita bele prepara deʼit tuur-fatin ba Ita-nia maluk neʼebé mai hamutuk ho Ita iha karreta, ka família neʼebé hela ho Ita, no mós ba Ita-nia estudante Bíblia sira.—1 Kor 13:5.
◼ Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba serbisu iha mundu tomak iha reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Christian Congregation of Jehovahʼs Witnesses”.
◼ Asidente no emerjénsia: Se ema ruma sai moras tebes iha reuniaun-fatin, favór ida fó-hatene ba irmaun sira neʼebé serbisu nuʼudar asistente. Se presiza, katuas ida sei bolu ambulánsia.
◼ Ai-moruk: Se Ita hemu daudauk ai-moruk ruma neʼebé doutór fó ba Ita, halo favór lori ai-moruk neʼe atu Ita bele hemu, tanba Ita sei la hetan ai-moruk neʼe iha reuniaun-fatin.
◼ Sapatu: Tinan-tinan asidente balu mosu tanba ema uza sapatu neʼebé lori perigu ba sira. Nuneʼe, diʼak ba ita hotu atu hatais sapatu neʼebé simples no neʼebé halo fasil ba ita atu laʼo ho seguru.
◼ Restaurante: Hanoin nafatin atu fó glória ba Maromak Jeová liuhusi ita-nia hahalok neʼebé diʼak bainhira ita bá han iha restaurante.
◼ Serbisu voluntáriu: Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.
◼ Batizmu: Ema neʼebé atu hetan batizmu iha reuniaun boot neʼe tenke tuur iha fatin neʼebé prepara nanis ona ba sira antes atu komesa programa iha sábadu dadeer. Sira ida-idak presiza atu lori toalla no roupa batizmu nian neʼebé la mihis ka badak liu. Dala ruma, ema hatais roupa neʼebé ladún hatudu respeitu ba tempu importante neʼe. Katuas neʼebé halo pergunta ba sira neʼebé hakarak hetan batizmu tenke esplika ho klaru kona-ba oinsá atu hatais iha dalan neʼebé diʼak. Ita hetan batizmu atu hatudu katak Ita dedika an ona ba Maromak Jeová. Tanba desizaun neʼe mak buat neʼebé Ita halo entre Ita ho Maromak Jeová deʼit, ladiʼak atu ema naʼin-rua tama iha bee laran hamutuk no kaer liman atubele hetan batizmu dala ida deʼit.
◼ Kartaun naran nian: Durante loron tolu, diʼak atu tau nafatin ita-nia kartaun naran nian kuandu ita sai husi uma toʼo ita fila. Dala barak kartaun neʼe bele loke dalan atu fó sasin neʼebé diʼak. Ita tenke foti kartaun no ninia plástiku liuhusi ita-nia kongregasaun tanba Ita la bele hetan ida-neʼe iha reuniaun boot. Keta husik toʼo loron atu halaʼo reuniaun boot mak Ita foin husu kartaun neʼebé Ita no Ita-nia família sei uza. No mós, keta haluha atu lori nafatin Ita-nia kartaun neʼebé hatudu katak Ita la simu raan.
◼ Otél:
(1) Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida.
(2) Se ita hatene katak ita sei la uza otél neʼebé ita hameno tiha ona, diʼak atu fó-hatene kedas ba otél-naʼin.—Mt 5:37
(3) Ita labele teʼin iha kuartu laran se otél-naʼin la fó lisensa atu halo nuneʼe.
(4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian.
(5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél. Tanba sira atende bainaka barak, sira sei kontente kuandu ita hatudu laran-diʼak no pasiénsia.
◼ Telemovel: Hamate ita-nia telemovel, ka taka ninia lian atu labele hanetik ema seluk atu rona diskursu.
[Kaixa iha pájina 6]
Oinsá mak ita sei fahe konvite?
Atu ita bele fahe konvite barak, karik ita presiza koʼalia uitoan deʼit. Ita bele hatete: “Bondia. Ami hola parte iha serbisu neʼebé halaʼo iha mundu tomak atu fahe konvite neʼe. Neʼe mak konvite ba Ita. Ita bele haree informasaun liután iha konvite neʼe.” Koʼalia ho laran-manas. Kuandu ita hola parte atu fahe konvite iha findesemana, ita bele fahe konvite hamutuk ho livru fulan-fulan.