Reuniaun boot ba loron tolu neʼebé fó ksolok mai ita
1. Oinsá mak ema judeu nia festa iha tempu uluk mak hanesan ho ita-nia reuniaun boot ba loron tolu?
1 José, Maria, no sira-nia nia oan ho mós sira seluk neʼebé adora Maromak, iha toman atu bá Jeruzalein hodi tuir festa tinan-tinan nian. Iha oportunidade sira-neʼe, sira husik sira-nia problema loroloron nian hotu iha kotuk no hanoin deʼit kona-ba buat neʼebé importante liu iha sira-nia moris, neʼe mak sira-nia relasaun ho Maromak. Festa neʼe fó oportunidade ba sira atu hanoin no koʼalia kona-ba Maromak Jeová nia laran-diʼak no ninia Ukun-Fuan. Ita-nia reuniaun boot ba loron tolu mós fó oportunidade furak hanesan neʼe mai ita atu adora Maromak Jeová ho laran-haksolok.
2. Saida deʼit mak ita presiza halo atu prepara an ba reuniaun boot?
2 Prepara didiʼak: Atu tuir festa iha Jeruzalein, Jesus nia família neʼebé hela iha Nazaré presiza laʼo dook maizumenus kilómetru 100. Maski ita la hatene Jesus iha alin naʼin-hira, maibé ita hatene katak José no Maria presiza halo planu no prepara didiʼak. Ita mós prepara didiʼak ona atu tuir programa hotu iha reuniaun boot ba loron tolu ka lae? Karik Ita presiza foti feriadu husi serbisu ka husu lisensa husi patraun, ka karik presiza koʼalia ho Ita-nia oan nia mestre iha eskola. Ita arranja ona fatin atu hela ka lae? Ita mós karik bele halo buat ruma atu apoia ema balu iha kongregasaun neʼebé presiza ajuda atubele tuir reuniaun boot ka lae?—1 Joao 3:17, 18.
3. Ema neʼebé tuir festa judeu nian hetan oportunidade atu halo saida?
3 Fó laran-manas ba malu: Ita fiar duni katak ema judeu sira-nia festa fó oportunidade furak ba sira atu fó laran-manas ba malu! Tan neʼe ita la duvida katak Jesus nia família mós kontente atu hasoru fali sira-nia kolega neʼebé sira koñese ona ba tempu kleur. Sira mós karik gosta atu halo belun foun ho ema seluk inklui mós ema husi rai seluk neʼebé fiar ona ba relijiaun judeu, neʼebé mai atu tuir festa neʼe.
4. Oinsá mak ita bele hatudu katak ita hafolin duni ita-nia unidade nuʼudar ema kristaun?
4 Tanbasá mak atan laran-metin no matenek la fahe deʼit informasaun ba ita ida-idak liuhusi livru sira, maibé halo arranju atu ita halibur hamutuk atu rona diskursu sira iha reuniaun boot? Razaun ida mak iha reuniaun boot ita iha oportunidade atu fó laran-manas ba malu. (Ebr 10:24, 25) Tan neʼe, diʼak atu ita halo planu atu toʼo sedu iha reuniaun-fatin atubele ransu ho ita-nia maluk seluk antes múzika primeiru hahú. Duké sai atu sosa hahán durante han-meiudia iha liʼur, diʼak mós atu ita lori hahán ruma husi uma hodi ita bele iha tempu atu koʼalia no koñese malu ho ema seluk. Ita-nia unidade nuʼudar ema kristaun mak prezente ida husi Maromak Jeová no ita hotu presiza hafolin ida-neʼe.—Miq 2:12.
5. Saida deʼit mak bele ajuda ita atu aprende buat diʼak husi diskursu sira iha reuniaun boot?
5 Tempu atu aprende: Husi kiʼik kedas, Jesus hafolin festa judeu nian nuʼudar oportunidade atu aprende kona-ba ninia Aman iha lalehan. (Lc 2:41-49) Saida deʼit mak sei ajuda ita no ita-nia família atu aprende buat diʼak husi diskursu sira neʼebé hatoʼo iha reuniaun boot? Durante programa hotu, diʼak atu tuur nafatin no hakaʼas an atu la koʼalia ba malu. Se Ita iha telemovel, labele husik ida-neʼe hanetik Ita ka ema seluk atu rona diskursu sira. Tau atensaun ba diskursu-naʼin no hakerek nota. Tuur hamutuk nuʼudar família, hodi inan-aman bele haree se sira-nia oan rona didiʼak ka lae. Iha kalan, diʼak atu koʼalia hamutuk kona-ba informasaun neʼebé ita rona iha reuniaun boot.
6. Saida mak ita presiza hanoin-hetan kona-ba ita-nia hatais?
6 Hatais: Ema husi rai seluk neʼebé hasoru Jesus nia família no fiar-naʼin seluk iha dalan hatene kedas katak sira mak ema judeu neʼebé atu bá ka foin fila husi festa, tanba ema judeu hatais roupa ho saren iha ninin ho kabas kór azúl haleʼu saren neʼe. (Núm 15:37-41) Maski ita ema kristaun la hatais roupa espesiál, maibé ema hatene ita nuʼudar ema neʼebé sempre hatais diʼak no moos. Ita presiza tau matan didiʼak ba ita-nia hatais liuliu kuandu ita halo viajen atu tuir reuniaun boot no fila fali ba uma, no mós kuandu ita sei hela iha sidade neʼebé halaʼo reuniaun boot. Maski ita troka ita-nia roupa reuniaun nian depois reuniaun ramata, maibé ita hakarak nafatin fó hahiʼi ba Maromak Jeová liuhusi ita-nia hatais no uza nafatin kartaun naran nian. Hodi halo nuneʼe, ita hatudu katak ita la hanesan ho ema neʼebé laʼós Testemuña ba Jeová no ita bele fó sasin diʼak ba ema neʼebé haree ita.
7. Tanbasá mak ita presiza hanoin kona-ba halo serbisu voluntáriu iha reuniaun boot?
7 Serbisu voluntáriu: Atu reuniaun boot bele halaʼo ho diʼak, presiza ema barak atu ajuda hodi halo serbisu oioin. Ita mós bele ajuda ka lae? (Sal 110:3) Serbisu neʼebé ita halo iha reuniaun-fatin mós parte husi ita-nia serbisu ba Maromak no liuhusi serbisu neʼe ita bele fó sasin diʼak. Patraun ba salaun ida haree ema barak neʼebé fó sira-nia tempu no forsa atu hamoos salaun, tan neʼe nia hakerek: “Ami hakarak hatoʼo ami-nia agradese ba imi-nia atividade furak neʼebé ami foin haree. Ami sempre rona katak Testemuña ba Jeová mak grupu neʼebé espesiál, no ema barak hatene katak imi sempre halo fatin neʼebé imi uza moos liu fali uluk. Imi no imi-nia organizasaun halo ami-nia fatin sai kapás liu no imi hotu nia laran-diʼak halo ami kontente tebes atu koñese imi.”
8. Oportunidade saida deʼit mak ita iha atu fó sasin?
8 Oportunidade atu fó sasin: Ema barak neʼebé hela besik reuniaun-fatin sei haree ita hatais diʼak no uza kartaun naran nian no sira balu karik hakarak hatene liután kona-ba ita, ida-neʼe fó oportunidade mai ita atu esplika kona-ba ita-nia reuniaun boot. Labarik ida ho tinan haat lori livru foun ba restaurante no hatudu ba serbisu-naʼin iha neʼebá. Ida-neʼe loke dalan ba labarik neʼe nia inan-aman atu konvida nia atu tuir reuniaun boot.
9. Oinsá mak ita bele banati-tuir Jesus nia família neʼebé hafolin oportunidade atu aprende kona-ba Maromak Jeová?
9 Ema judeu sira neʼebé hakarak atu aprende buat barak liután kona-ba Maromak Jeová sempre hein ho laran-manas atu tuir sira-nia festa. (Deut 16:15) Jesus nia família kontente atu uza sira-nia tempu no osan atu tuir festa neʼe no gosta atu aprende barak. Ita mós hafolin tebes ita-nia reuniaun boot ba loron tolu neʼebé halaʼo tinan ida dala ida, no ita hakarak haree ida-neʼe nuʼudar prezente diʼak husi ita-nia Aman iha lalehan. (Tgo 1:17) Tan neʼe, agora mak tempu diʼak atu ita prepara ba oportunidade furak atu adora ita-nia Maromak ho laran-haksolok!
[Kaixa iha pájina 6, 7]
Informasaun kona-ba reuniaun boot ba loron tolu
◼ Oras: Reuniaun sei hahú iha tuku 9.20 dadeer. Reuniaun-fatin sei loke iha tuku 8.00 dadeer. Kuandu komesa múzika atu loke programa, ita hotu tenke tuur ona iha reuniaun-fatin. Hodi halo nuneʼe, ita hatudu respeitu ba programa neʼebé komesa daudauk. Programa sei ramata iha tuku 4.55 lokraik iha loron-sesta no sábadu, no iha tuku 3.40 lokraik iha loron-domingu.
◼ Buka tuur-fatin: Ita bele prepara deʼit tuur-fatin ba Ita-nia maluk neʼebé mai hamutuk ho Ita iha karreta, ka família neʼebé hela ho Ita, no mós ba Ita-nia estudante Bíblia sira.—1 Kor 13:5.
◼ Han-meiudia: Favór ida, lori Ita-nia hahán ba reuniaun-fatin duké sai bá han iha liʼur durante tempu deskansa. Ita bele lori Ita-nia hahán iha raga no tau iha Ita-nia kadeira okos. Koko atu la lori sasán barak liu neʼebé bele okupa fatin.
◼ Kontribuisaun: Ita bele hatudu katak ita agradese ba arranju sira-neʼe hodi fó kontribuisaun ba Serbisu iha Mundu Tomak iha Salaun Reinu ka reuniaun boot. Se uza xeke atu fó kontribuisaun, favór ida hakerek iha xeke neʼe katak selu ba “Watchtower”.
◼ Asidente no emerjénsia: Se ema ruma sai moras tebes iha reuniaun-fatin, favór ida fó-hatene ba irmaun sira neʼebé serbisu nuʼudar asistente. Se presiza, katuas ida sei bolu ambulánsia.
◼ Gravasaun: Se hakarak grava programa, labele uza eletrisidade iha salaun atu liga Ita-nia sasán eletróniku, no kuidadu hodi la hanetik ema seluk atu rona.
◼ Restaurante: Hanoin nafatin atu fó glória ba Maromak Jeová liuhusi ita-nia hahalok neʼebé diʼak bainhira ita bá han iha restaurante.
◼ Otél: (1) Ita labele hameno kuartu barak liu duké kuartu neʼebé Ita presiza, no mós halo tuir kuandu otél-naʼin fó-hatene ema naʼin-hira deʼit mak bele toba iha kuartu ida. (2) Se ita hatene katak ita sei la uza otél neʼebé ita hameno tiha ona, diʼak atu fó-hatene kedas ba otél-naʼin. (3) Ita labele teʼin iha kuartu laran se otél-naʼin la fó lisensa atu halo nuneʼe. (4) Se otél-naʼin mak prepara matabixu ho gratis, han deʼit iha otél laran no labele foti tan atu rai ba han-meiudia nian. (5) Hatudu hahalok nuʼudar ema kristaun neʼebé loos kuandu hasoru no koʼalia ho serbisu-naʼin sira iha otél.
◼ Serbisu voluntáriu: Kuandu ita hola parte iha serbisu voluntáriu, ita bele aumenta liután ita-nia haksolok iha reuniaun boot. (Apos 20:35) Se Ita hakarak ajuda, fó-hatene grupu neʼebé tau matan ba serbisu voluntáriu iha reuniaun boot neʼe. Labarik sira ho tinan 16 ba kraik mós bele ajuda hodi serbisu hamutuk ho ninia inan ka aman, ka irmaun ka irmán ida neʼebé tau matan ba nia.
◼ Batizmu: Ema neʼebé atu hetan batizmu iha reuniaun boot neʼe tenke tuur iha fatin neʼebé prepara nanis ona ba sira antes atu komesa programa iha sábadu dadeer. Sira ida-idak presiza atu lori toalla no roupa batizmu nian neʼebé la mihis ka badak liu. Dala ruma, ema hatais roupa neʼebé ladún hatudu respeitu ba tempu importante neʼe. Katuas neʼebé halo pergunta ba sira neʼebé hakarak hetan batizmu tenke esplika ho klaru kona-ba oinsá atu hatais iha dalan neʼebé diʼak. Ita hetan batizmu atu hatudu katak Ita dedika an ona ba Maromak Jeová. Tanba desizaun neʼe mak buat neʼebé Ita halo entre Ita ho Maromak Jeová deʼit, ladiʼak atu ema naʼin-rua tama bee laran hamutuk no kaer liman atubele hetan batizmu dala ida deʼit.
◼ Kartaun naran nian: Durante loron tolu, diʼak atu tau nafatin ita-nia kartaun naran nian kuandu ita sai husi uma toʼo ita fila. Dala barak kartaun neʼe bele loke dalan atu fó sasin neʼebé diʼak. Ita tenke foti kartaun no ninia plástiku liuhusi ita-nia kongregasaun, tanba Ita la bele hetan ida-neʼe iha reuniaun boot. Keta husik toʼo loron atu halaʼo reuniaun boot mak Ita foin husu kartaun neʼebé Ita no Ita-nia família sei uza. Keta haluha atu lori nafatin Ita-nia kartaun neʼebé hatudu katak Ita la simu raan.
◼ Telemovel: Hamate ita-nia telemovel, ka taka ninia lian atu labele hanetik ema seluk atu rona diskursu.