“Halibur povu hamutuk”
1. Saida mak hanesan entre ita-nia reuniaun boot sira ho tempu neʼebé ema Izraél halibur hamutuk depois sira sai tiha husi rai-Ejitu?
1 Depois sai tiha husi rai-Ejitu, Maromak Jeová haruka Moisés atu “halibur povu hamutuk” iha Foho Sinai atu rona Maromak nia liafuan, hodi sira bele hamtaʼuk Nia no sira bele hanorin sira-nia oan kona-ba Ninia dalan. (Deuteronômio [Ulangan] 4:10-13) Ita bele fiar katak tempu neʼe hametin duni sira-nia fiar. Durante fulan balu tuirmai, Testemuña ba Jeová sei halibur hamutuk atu tuir reuniaun boot ba loron tolu no mós reuniaun boot internasionál hodi simu hanorin husi Jeová. Saida mak ita presiza halo atu hetan buat diʼak husi reuniaun boot neʼe?
2. Saida mak ita presiza halo atu “sai prontu” ba ita-nia reuniaun boot?
2 “Sai prontu”: Jeová haruka ema Izraél atu “sai prontu” ba tempu espesiál neʼebé sira sei halibur iha Foho Sinai. (Êxodo [Keluaran] 19:10, 11) Hanesan neʼe mós, laʼós deʼit sira neʼebé iha parte iha programa mak presiza prepara didiʼak, maibé ita hotu presiza prepara atu tuir reuniaun boot. Porezemplu, ema barak sei presiza atu husu lisensa husi sira-nia patraun atu foti feriadu hodi bele tuir. Karik ita-nia situasaun hanesan ho Neemias nian. Nia toma konta ba Liurai Artaxerxes nia hemu no nia hakarak husu lisensa hodi bele bá Jeruzalein atu ajuda harii fali sidade nia moru sira. Maibé nia hatene katak karik liurai sei la fó lisensa ba nia. Nuneʼe, Neemias halo orasaun, depois bá hodi husu liurai. Liurai fó lisensa ba nia atu bá, no nia mós apoia projetu neʼe! (Neemias 2:1-9) Ita mós presiza halo planu kona-ba iha neʼebé mak ita sei hela no oinsá mak ita sei toʼo iha reuniaun boot fatin. Katuas sira husi kongregasaun sei kontente atu ajuda irmaun-irmán sira neʼebé presiza hela-fatin ka transporte. Halo planu atu toʼo sedu iha reuniaun boot fatin no sai prontu atu “tau hanoin tomak ba buat neʼebé ita rona”.—Ebreu 2:1.
3. Saida mak bele ajuda ita prepara ita-nia laran ba programa iha reuniaun boot?
3 Buat ida tan neʼebé ita presiza atu halo hodi sai prontu mak prepara ita-nia laran hodi bele rona no aprende. (Esdras [Ezra] 7:10) Fulan balu antes reuniaun boot, ita-nia organizasaun sei tau programa ba reuniaun boot iha sítiu jw.org hodi ita bele haree lista ba diskursu sira hotu no mós eskritura ida ka rua neʼebé liga ho diskursu ida-idak. Iha semana balu antes reuniaun boot, ita bele uza informasaun neʼe durante Adorasaun Família nian. Irmaun-irmán balu gosta print programa neʼe no uza atu hakerek nota badak durante reuniaun boot.
4. Oinsá mak reuniaun boot bele ajuda inan-aman sira atu hanorin sira-nia oan?
4 ‘Hanorin ita-nia oan sira’: Razaun ida tanbasá mak ema Izraél halibur iha Foho Sinai mak hodi sira bele “hanorin sira-nia oan sira”. (Deuteronômio [Ulangan] 4:10) Ita-nia reuniaun boot mós fó oportunidade ba inan-aman sira atu halo hanesan. Entaun, inan-aman presiza tuur hamutuk ho sira-nia oan durante programa neʼe laʼo hodi sira bele ajuda sira-nia oan atu tau atensaun. Kuandu loron ida ramata, no mós iha tempu seluk kuandu halaʼo Adorasaun Família nian, família sira bele koʼalia hamutuk kona-ba programa.
5. Hodi tuir reuniaun boot, oinsá mak ida-neʼe sei ajuda ita?
5 Kuandu ema Izraél halibur hamutuk iha Foho Sinai, neʼe ajuda sira atu hafolin sira-nia oportunidade espesiál nuʼudar Maromak nia povu. (Deuteronômio [Ulangan] 4:7, 8) Ita-nia reuniaun boot mós bele ajuda ita atu sente hanesan. Ba loron tolu, ita bele haketak an husi Satanás nia mundu aat hodi ransu hamutuk ho maluk sira no sente kmaan iha fatin hakmatek. (Isaías [Yesaya] 35:7-9) Tanba Jeová nia loron besik ona, mai ita hafolin oportunidade neʼe atu halibur hamutuk hodi fó laran-manas ba malu.—Ebreu 10:24, 25.