Dalan atu estuda Bíblia neʼebé lori rezultadu diʼak no ksolok liután

JOSUÉ iha knaar atu lori nasaun Izraél tama ba rai neʼebé Maromak promete. Neʼe susar tebes ba nia, maibé Jeová hametin no anima nia hodi dehan: “Ó tenke sai aten-brani no sai forte.” Nia dehan ba Josué katak, se nia lee no halo tuir Maromak nia Ukun-Fuan, Josué sei foti desizaun sira ho matenek no sei hetan susesu.​—Josué (Yosua) 1:7, 8.

Iha loron ikus sira-neʼe, ita hasoru “problema barak neʼebé susar atu tahan”, tan neʼe, dala ruma ita-nia moris mós susar tebes. (2 Timóteo 3:1) Se ita hakarak susesu hanesan Josué, ita presiza halo tuir matadalan neʼebé Jeová fó ba nia. Ita tenke lee Bíblia beibeik no uza buat neʼebé ita aprende atu foti desizaun neʼebé diʼak.

Karik ita la hatene oinsá atu estuda, ka ita la gosta atu estuda. Maibé tuir loloos, estuda Bíblia mak importante tebes. Iha kaixa ho títulu “Koko sujestaun sira-neʼe” ita sei hetan sujestaun sira oinsá ita bele gosta liután estuda Bíblia no oinsá atu hetan benefísiu.

Ema neʼebé hakerek salmu ida hatete: “Dirije haʼu atu halo tuir Ita-nia mandamentu sira, tanba haʼu gosta laʼo tuir dalan neʼe.” (Salmo [Mazmur] 119:35) Ita mós bele gosta estuda Maromak nia Liafuan. Bainhira ita keʼe iha Maromak nia Liafuan, ita sei hetan buat murak barak.

Maski Ita la presiza dirije nasaun tomak ida hanesan Josué, maibé Ita mós iha Ita-nia problema rasik. Tan neʼe, estuda no halo tuir Maromak nia Liafuan hanesan Josué. Se Ita halo nuneʼe, Ita sei foti desizaun sira ho matenek, no sai susesu.