Bainhira moris susar demais atu tahan

Porezemplu, Sallya husi rai-Estadus Unidus, neʼebé lakon buat hotu tanba anin-fuik, nia esplika: “Haʼu la hatene oinsá atu tahan ho situasaun neʼe. Ba tempu barak haʼu sente hanesan labele tahan tanba estrese.”

Oinsá se ema neʼebé ita hadomi mate? Janice husi rai-Austrália hatete: “Bainhira haʼu-nia oan-mane naʼin-rua mate, haʼu kompara haʼu-nia moris hanesan buat neʼebé rahun no haʼu tenke hadiʼa ida-neʼe. Haʼu harohan ba Maromak: ‘Favór, haʼu labele ona atu tahan! Husik haʼu mate deʼit. Haʼu lakohi moris tan.’”

Daniel sente fuan moras tebetebes bainhira ninia feen la hatudu laran-metin ba nia. Nia esplika: “Bainhira haʼu-nia feen fó-hatene mai haʼu katak nia la laran-metin ona mai haʼu, neʼe hanesan tudik ida mak sona haʼu-nia fuan. Haʼu sente hanesan sona haʼu dala barak. Neʼe mak buat neʼebé haʼu sente durante fulan barak nia laran.”

Livru Haklaken neʼe sei koʼalia kona-ba oinsá moris iha folin duni maski

• Dezastre akontese

• Ema neʼebé ita hadomi mate

• Ita-nia pár la laran-metin

• Ita kona moras boot

• Moris susar demais atu tahan

Primeiru, oinsá mak ita bele tahan hasoru bainhira dezastre akontese?