Bainhira ema neʼebé Ita hadomi mate

SE ITA lakon ema neʼebé Ita hadomi tanba mate, karik sei mosu sentimentu oioin hanesan: triste, mesamesak no labele halo buat ida. Karik Ita mós hirus, fó sala ba Ita-nia an no taʼuk. Dala ruma Ita husu, moris neʼe iha folin duni ka lae?

Bainhira ema neʼebé Ita hadomi mate, la sala atu sente triste, no neʼe la dehan katak Ita mak ema neʼebé fraku, maibé tanba Ita hadomi tebes ema neʼebé mate. Maski nuneʼe, Ita bele sente kmaan fali ka lae?

BUAT NEʼEBÉ AJUDA ONA EMA SELUK

Maski Ita sente Ita-nia triste sei nunka lakon, Ita bele hetan kmaan hodi aplika sujestaun tuirmai:

LALIKA SENTE SALA TANBA LARAN-TRISTE

Ema ida-idak nia sentimentu triste la hanesan. Tanis bele ajuda Ita sente kmaan. Vanessa, neʼebé temi ona, hatete: “Haʼu tenke tanis atu bele fakar sai haʼu-nia sentimentu.” Sofía, neʼebé ninia alin-feto mate derrepente deʼit, hatete: “Susar tebes kuandu hanoin fali kona-ba buat neʼebé akontese, neʼe hanesan kurativu kanek. Ita sente moras tebes, maibé neʼe sei lori diʼak.”

FÓ SAI BUAT NEʼEBÉ ITA HANOIN NO SENTE

Karik tempu hanesan neʼe ita hakarak atu mesamesak. Maibé sentimentu triste mak buat neʼebé todan ba ita atu lori mesak. Jared, tinan 17, hatete: “Haʼu fó sai haʼu-nia sentimentu ba ema seluk. Karik sira la komprende haʼu, maibé loloos, diʼak atu koʼalia sai.” Janice, neʼebé temi ona, esplika kona-ba benefísiu seluk neʼebé nia hetan: “Fó sai ita-nia sentimentu mak dalan diʼak tebes atu bele sente kmaan. Haʼu foin komprende katak ema seluk mós sente hanesan haʼu, no haʼu la presiza hasoru ida-neʼe mesak.

SIMU AJUDA

Doutór ida hatete: “Bainhira ita husik belun no família ajuda ita lalais, dala ruma neʼe bele ajuda ita tahan hasoru ita-nia sentimentu triste.” Fó-hatene Ita-nia belun se Ita presiza ajuda; sira hakarak ajuda Ita maibé karik ladún hatene buat neʼebé Ita presiza.​—Provérbios 17:17.

HAKBESIK BA MAROMAK

Tina hatete: “Bainhira haʼu-nia laʼen mate tanba kankru, haʼu labele tan koʼalia ba nia kona-ba problema sira, hanoin no sentimentu, tan neʼe haʼu hatoʼo buat hotu ba Maromak! Haʼu husu nia ajuda haʼu tahan loron ida-idak. Maromak ajuda ona haʼu iha dalan oioin neʼebé haʼu labele sura.” Tarsha tinan 22 bainhira ninia inan mate, hatete: “Lee Bíblia loroloron mak ajuda haʼu atu sente kmaan. Neʼe fó laran-manas duni mai haʼu.”

HANOIN KONA-BA ESPERANSA MORIS-HIʼAS

Tina hatutan: “Foufoun, esperansa moris-hiʼas la lori kmaan tanba haʼu no haʼu-nia oan sira presiza haʼu-nia laʼen. Maibé agora, tinan haat liutiha, esperansa neʼe ajuda tebes haʼu. Haʼu imajina hasoru fali nia, no neʼe lori dame no kontente mai haʼu.”

Karik Ita la sente kmaan kedas. Maski nuneʼe, Vanessa nia esperiénsia neʼe bele ajuda Ita. Nia hatete: “Ita hanoin katak Ita labele hasoru ida-neʼe, maibé Ita sei haree katak Ita bele tahan.”

Maski Ita sei hanoin nafatin ema neʼebé mate ona, maibé moris iha folin duni. Ho Maromak nia ajuda, Ita bele goza moris. No lakleur tan Maromak sei fó moris-hiʼas ba sira neʼebé mate ona. Nia hakarak Ita atu hasoru fali ema neʼebé Ita hadomi. No susar iha Ita-nia laran sei lakon ba nafatin!