Karta husi Sukursál

Ba haklaken-naʼin Reinu nian neʼebé ami hadomi:

Ami hakarak hakerek karta ida-neʼe atu fó laran-manas ba imi hodi fó-hatene kona-ba atividade balun neʼebé ami halaʼo iha sukursál Austrália.

Iha fulan-Juñu ema naʼin-60 vizita ami atu sira bele tuir reuniaun ida. Reuniaun neʼe ba grupu sira-neʼebé tau matan ba serbisu atu harii salaun no fatin seluk. Reuniaun neʼe koʼalia kona-ba presiza atu organiza didiʼak projetu sira no buka Maromak Jeová nia bensaun, atubele toma konta ba projetu atu harii Salaun Reinu barak neʼebé halaʼo daudaun.

Agora eskola ba katuas no atan ministeriál neʼebé klosan ba dala 18 halaʼo daudaun. Irmaun naʼin-30 husi rai-Austrália, rai-Zelándia Foun, no rai-Nusar Salomaun mak tuir. Klase neʼe sei ramata iha 26 Outubru 2008.

Iha fulan-Augusto iha mós irmaun naʼin-48 neʼebé vizita ami husi Austrália-Oeste. Sira ajuda ami ho haloot fiu ba ami-nia komputadór sira. Sira foti feriadu husi sira-nia serbisu baibain, no selu tiket ba aviaun no buat seluk ho sira rasik nia osan hodi sira bele ajuda iha projetu ida-neʼe.

Tanba Maromak fó bensaun ba serbisu Reinu nian, ami mós presiza ema seluk tan atu serbí iha Betel nuʼudar voluntáriu ba tempu badak ka tempu naruk. Liuliu, ami presiza irmaun klosan sira-neʼebé iha matenek atu halaʼo serbisu harii uma ka hadiʼa karreta. Irmaun klosan ida, neʼebé serbí hela iha Betel, hatete katak dala ruma nia hanoin hanesan neʼe: “Haʼu hein tempu neʼebé haʼu tama tiha mundu foun no bele hatete ba fiar-naʼin husi tempu Bíblia katak haʼu halo serbisu iha Betel.” Hodi halo serbisu iha Betel Ita bele sente kontente tanba ida-neʼe mak dalan ida atu tau uluk Maromak nia Reinu, no apoia serbisu haklaken iha mundu tomak.​—Mt 6:33.

Maski ita halo serbisu iha Betel, ka halo serbisu seluk ba Maromak nia Reinu, ami hein katak ita hotu bele kontinua atu “serbí Maromak Jeová ho laran-ksolok”.​—Sal 100:2.

Ita-nia irmaun sira husi

Sukursál Austrália