Hanorin ema seluk atu hadomi Aman Jeová
1. Tanbasá mak ema balun hakarak hakbesik ba Aman Jeová?
1 Ita bele hanoin-hetan dala primeiru Ita rona kona-ba Aman Jeová? Tanbasá mak Ita gosta atu hakbesik ba nia? Ema barak neʼebé laran-moos hatán katak sira sente besik liután ba Maromak, ita-nia Kriadór, kuandu sira aprende kona-ba ninia hahalok neʼebé furak tebes, liuliu hahalok hanesan laran-luak, laran-diʼak no domin.—1 Joao 4:8.
2, 3. Oinsá mak ita bele uza livru Bíblia Hanorin atu hanorin estudante sira atu halo kleʼan sira-nia domin ba Maromak Jeová?
2 “Ida-neʼe mak ita-nia Maromak”: Livru Bíblia Hanorin esplika katak Maromak Jeová hadomi ita, no mós katak ita tenke haburas ita-nia relasaun ho nia. Oinsá mak ita bele uza ho diʼak livru ida-neʼe atu hanorin ema seluk atu halo kleʼan sira-nia domin ba Maromak? Bainhira ita hanorin informasaun neʼebé foun, karik ita bele husu pergunta neʼebé bele book estudante nia fuan, hanesan: “Saida mak lia-loos ida-neʼe hanorin Ita kona-ba Aman Jeová nia hahalok sira?” ka “Oinsá mak lia-loos neʼe hatudu mai ita katak Jeová mak Aman diʼak liu hotu?” Hodi husu pergunta hanesan neʼe kuandu ita hanorin, ita bele ajuda ita-nia estudante atu haburas sira-nia relasaun ho Maromak Jeová agora no ba nafatin.
3 Bainhira ita ajuda ita-nia estudante sira atu haree katak aprende lia-loos kona-ba Maromak loos mesak deʼit mak buat neʼebé iha folin boot tebes, sira sei sente hanesan ho liafuan neʼebé profeta Isaías hakerek, “ida-neʼe mak ita-nia Maromak”. (Isa 25:9) Kuandu ita esplika Maromak nia Liafuan, ita tenke koʼalia kona-ba Maromak Jeová nia hakarak, no oinsá mak liuhusi Jesus Kristu nuʼudar liurai husi ninia governu, Maromak sei haraik bensaun ba ema.—Isa 9:6, 7.
4, 5. Oinsá mak ita bele hatudu katak ita hadomi Maromak Jeová?
4 Hatudu domin ba Maromak Jeová: Ita hatene katak hatudu domin ba Aman Jeová ho ita-nia laran, kbiit no hanoin tomak laʼós sentimentu deʼit. Ita tenke banati-tuir dalan neʼebé Maromak hanoin. (Sal 97:10) Ita hatudu katak ita hadomi Maromak hodi hakaʼas an atu halo tuir ninia ukun-fuan sira, no halaʼo “hahalok neʼebé santu no hahalok neʼebé hatudu adorasaun ba Maromak”, maski ita hasoru susar oioin.—2 Ped 3:11, MF; 2 Joao 6.
5 Maromak sente kontente kuandu ita halo tuir ninia hakarak tan domin. (Sal 40:8) Ita-nia estudante Bíblia mós tenke hatene katak Maromak nia ukun-fuan bele lori ninia atan sira ba bensaun neʼebé sei iha ba nafatin. (Deut 10:12, 13) Ema neʼebé moris tuir Maromak nia matadalan hatudu katak nia hafolin no agradese ba Maromak nia hahalok neʼebé furak tebes. Ajuda Ita-nia estudante atu hatene katak laʼo iha Maromak Jeová nia dalan loos sei halo nia livre husi susar barak no laran-moras.
6. Maromak Jeová haraik bensaun saida deʼit ba sira neʼebé hadomi nia?
6 Maromak haraik bensaun ba sira neʼebé hadomi nia: Aman Jeová hanoin ba sira neʼebé hadomi nia, no nia hatudu lia-loos neʼebé kleʼan ba sira hodi sira “hatene momoos Maromak”. (1 Kor 2:9, 10) Sira hatene ho klaru Maromak nia hakarak ba aban bainrua, no sira iha esperansa neʼebé furak tanba sira fiar ida-neʼe. (Jer 29:11) Naʼi Jeová haraik ninia laran-diʼak ba sira neʼebé hadomi nia. (Êx 20:6) Sira agradese no kaer metin ba sira-nia esperansa atu moris ba nafatin, tanba hatene katak Maromak nia domin mak book nia atu fó prezente neʼe.—Joao 3:16.
7. Oinsá mak Ita sente kona-ba hanorin ema seluk atu hadomi Aman Jeová?
7 Kuandu ita kontinua atu hatene liután kona-ba ita-nia Aman iha lalehan, neʼe hanesan ita iha rikusoin barak liután atu fahe ba ema seluk. (Mt 13:52) Tuir loloos, knaar atu hanorin ema seluk, liuliu atu hanorin ita-nia oan sira, mak knaar espesiál neʼebé Maromak Jeová fó mai ita! (Deut 6:5-7) Hanesan bee-matan neʼebé suli nafatin, mai ita, hamutuk ho ita-nia estudante Bíblia sira, kontinua atu hahiʼi Maromak tanba ita hetan nafatin ‘Jeová nia diʼak’.—Sal 145:7.