Dalan neʼebé Maromak ukun ninia kriasaun hotu, lori dame no unidade
Tanbasá mak ita presiza Maromak nia Reinu?
Iha tempu neʼebé ema foin komesa moris iha mundu, ita-nia Kriadór neʼebé naran Jeová, nia mesak deʼit mak ukun. Nia ukun ema iha dalan domin nian. Nia kria jardín Eden nuʼudar hela-fatin neʼebé furak ba ema atu hela. No nia fó ai-han neʼebé barak ba sira atu han. No nia mós fó serbisu neʼebé kapás ba sira atu halo. (Génesis 1:28, 29; 2:8, 15) Loloos, ohin loron ema iha mundu bele moris ho dame se karik ema primeiru husik Maromak atu ukun sira.
Ema primeiru la simu Maromak nuʼudar sira-nia Ukun-Naʼin
Bíblia dehan katak anju ida neʼebé ikusmai hanaran Diabu Satanás kontra Maromak no hasaʼe duvida kona-ba Maromak nia direitu atu ukun. Nia dehan katak ema sei kontente liu se Maromak la ukun no la fó matadalan ba sira. Triste mak, ema primeiru, Adão no Eva, halo tuir Satanás nia ezemplu hodi kontra hasoru Maromak.—Génesis 3:1-6; Apokalipse 12:9.
Tanba Adão no Eva lakohi Maromak atu ukun sira, sira lakon sira-nia hela-fatin neʼebé furak, no lakon esperansa atu bele moris ba nafatin ho saúde neʼebé perfeitu. (Génesis 3:17-19) Adão no Eva nia desizaun neʼe mós kona sira-nia oan hotu. Bíblia hatete katak tanba Adão halo sala, “sala tama iha mundu . . . , no mate tanba sala”. (Roma 5:12) Sala mós lori susar seluk tan: “Ema mak domina ema seluk, no neʼe lori deʼit susar.” (Eclesiastes 8:9) Neʼe katak, bainhira ema ukun sira-nia an rasik, problema sempre mosu.
EMA KOMESA ATU UKUN
Nimrod kontra hasoru Jeová
Ukun-naʼin primeiru neʼebé temi iha Bíblia mak Nimrod. Nia kontra Jeová nia direitu atu ukun. Hahú husi Nimrod nia tempu, ema neʼebé iha kbiit no pozisaun boot uza ida-neʼe iha dalan neʼebé sala. Maizumenus tinan 3.000 liubá, Liurai Salomão hakerek: “Haʼu haree ema nia matan-been tanba ema hanehan sira, no la iha ema ida mak fó kmaan ba sira. Ema neʼebé hanehan sira mak iha kbiit.”—Eclesiastes 4:1.
Situasaun neʼe akontese toʼo ohin loron. Iha 2009, Nasoins Unidas hatete katak, tuir ema barak nia hanoin, problema barak mosu iha mundu neʼe tanba “ema ukun iha dalan neʼebé la diʼak”.
MAROMAK HARII REINU IDA
Mundu neʼe presiza tebes ukun-naʼin neʼebé diʼak liu no sistema governu neʼebé diʼak liu. Neʼe mak buat neʼebé ita-nia Kriadór promete ona mai ita!
Maski ema nia governu ida mak diʼak, maibé sira labele rezolve problema hotu neʼebé ema hasoru
Maromak harii ona Reinu ida. Reinu neʼe mak hanesan ukun, ka governu ida neʼebé sei troka ema nia governu hotu, no “ukun neʼe mesak mak sei hamriik ba nafatin”. (Daniel 2:44) Reinu neʼe mak ema barak temi iha sira-nia orasaun. (Mateus 6:9, 10) Maibé Maromak sei la ukun iha governu neʼe. Nia hili ona Ukun-Naʼin ida neʼebé uluk moris ona nuʼudar ema. Sé mak Maromak hili?